1. Muṅwe mutukana o sumbedza hani uri u na fhulufhelo ḽa uri u ḓo vuswa?

 MUṄWE mutukana ane a pfi Matthew u na vhulwadze vhu shushaho he ha ita uri a itwe miaro minzhi. Musi e na miṅwaha ya sumbe, ene na vha muṱa wahawe vho vha vha tshi khou ṱalela Khasho ya JW. Musi yeneyo khasho i tsini na u fhela, vho vhona vidio ya muzika i tshi khou sumbedza vhathu vha tshi khou ṱanganedza vhathu vho vuswaho. b Musi yeneyo khasho yo no fhela, Matthew o mbo ḓi ya kha vhabebi vhawe a vha fara nga zwanḓa a ri: “Mma na Baba, vho zwi vhona musi? Naho arali nda nga fa, ndi ḓo dovha nda vusiwa. Vha songo vhilaela, vha nga nndindela musi ndi tshi vusiwa.” Humbulani uri vhabebi vha Matthew vha nga vha vho takala hani musi vha tshi vhona uri fhulufhelo ḽa mvuwo ndi ḽa vhukuma kha ṅwana wavho.

2-3. Ndi ngani zwi zwavhuḓi u humbulisisa nga ha fhulufhelo ḽa mvuwo?

² Ndi zwavhuḓi u humbulisisa nga ha fhulufhelo ḽa mvuwo ḽi re Bivhilini. (Yoh. 5:28, 29) Ndi ngani? Ndi ngauri zwi nga itea ra farwa nga vhulwadze vhune ha nga ri vhulaya kana ra lovhelwa nga muthu ane ra mu funa. (Muh. 9:11; Yak. 4:13, 14) Fhulufhelo ḽa mvuwo ḽi nga ri thusa u konḓelela musi ri kha honoho vhuimo. (1 Vhathes. 4:13) Bivhili i ri khwaṱhisedza uri Khotsi ashu wa ṱaḓulu u a ri ḓivha zwavhuḓi nahone u a ri funa nga maanḓa. (Luka 12:7) Yehova Mudzimu u tea u vha a tshi ri ḓivha zwavhuḓi lune a nga ri vusa ri nga nḓila ine ra vha ngayo nahone ri na mihumbulo ine ra vha nayo zwino. Yehova u ri funa nga maanḓa nahone o ita uri zwi konadzee uri ri tshile nga hu sa fheli. Naho ra nga fa, u ḓo ri vusa.

³ Kha ino thero, ri ḓo thoma nga u haseledza nga ha uri ndi ngani ri tshi nga tenda kha fhulufhelo ḽa mvuwo. Nga murahu, ri ḓo ṱolisisa iṅwe tsumbo i re Bivhilini i khwaṱhisaho lutendo i re na  maipfi e ino thero ya thewa khao ane a ri: “Khaladzi au u ḓo vuwa.” (Yoh. 11:23) Ri ḓo fhedzisela nga u guda uri ri nga ita hani uri fhulufhelo ḽashu ḽa mvuwo ḽi dzule ḽo khwaṱha.

4. Uri ri tende zwe muṅwe muthu a fhulufhedzisa, ri tea u vha na vhungoho ha mini? Fanyisani.

⁴ Uri ri tende zwe muṅwe muthu a zwi fhulufhedzisa, ri tea u vha ri na vhungoho ha uri onoyo muthu u a ṱoḓa u ita zwe a zwi fhulufhedzisa na uri u na maanḓa kana vhukoni ha u zwi ita. Kha ri zwi fanyise nga heyi nḓila: Kha ri ri nnḓu yaṋu yo tshinyadzwa zwihulu nga ḓumbu. Khonani yaṋu a ḓa kha inwi nahone a ni fhulufhedzisa uri: ‘Ndi ḓo ni thusa u fhaṱulula nnḓu yaṋu.’ U khou zwi amba zwi tshi bva mbiluni nahone ni na vhungoho ha uri u khou ṱoḓa u ni thusa. Arali onoyo khonani yaṋu e mufhaṱi makone nahone e na zwishumiswa zwine zwa ṱoḓea, ni nga vha na vhungoho ha uri a nga kona u ni thusa. Zwenezwo zwi nga ita uri ni tende zwe a ni fhulufhedzisa. Hu pfi mini nga zwe Mudzimu a ri fhulufhedzisa zwa uri hu ḓo vha na mvuwo? Naa u khou ṱoḓa u zwi ita nahone u na maanḓa a u zwi ita?

5-6. Ndi ngani ri na vhungoho ha uri Yehova u khou ṱoḓa u vusa vhafu?

⁵ Naa Yehova u khou ṱoḓa u vusa vho faho? Zwi tou pfala uri u khou ṱoḓa u vha vusa. O hevhedza vhaṅwali vhanzhi vha Bivhili uri vha ṅwale nga ha uri vhafu vha ḓo vuswa tshifhingani tshi ḓaho. (Yes. 26:19; Hos. 13:14; Nzumb. 20:11-13) Nahone zwoṱhe zwine Yehova a zwi fhulufhedzisa u a zwi ita. (Yosh. 23:14) Yehova o ḓiimisela u vusa vho faho. Ndi ngani ri tshi ralo?

⁶ Ṱhogomelani zwe Yobo a zwi amba. O vha e na vhungoho ha uri naho a nga lovha, Yehova u ḓo ṱoḓa u mu vusa kana uri u ḓo mu ṱuvha. (Yobo 14:14, 15) Yehova o ṱuvha na vhashumeli vhawe vhoṱhe vho lovhaho. U khou ṱoḓa u vha vusa uri vha vhe na mutakalo wavhuḓi na uri vha takale. Zwino, Yehova u ḓipfa hani nga vhathu vha dzibiḽioni vhe vha lovha vha songo wana tshibuli tsha u guda nga hae? Yehova ane a vha Mudzimu ane a ri funa, u khou ṱoḓa u vha vusa. (Mish. 24:15) U khou ṱoḓa uri na vhone vha wane tshibuli tsha u vha khonani dzawe na u tshila tshoṱhe kha ḽifhasi. (Yoh. 3:16) Zwi tou vha khagala uri Yehova u khou ṱoḓa u vusa vho faho.

7-8. Ndi ngani ri tshi nga vha na vhungoho ha uri Yehova u na maanḓa a u vusa vhafu?

⁷ Naa Yehova u na maanḓa a u vusa vhathu vho lovhaho? Ee! Ndi ene “Ramaanḓaoṱhe.” (Nzumb. 1:8) Nga zwenezwo, u na maanḓa ane a nga kona u kunda swina ḽiṅwe na ḽiṅwe u katela na lufu. (1 Vhakor. 15:26) U ḓivha zwenezwo zwi a ri khwaṱhisa na u ri khuthadza. Kha ri ambe nga ha tshenzhelo ya Wahashu Vho Emma Arnold. Vhone na muṱa wavho vho ṱangana na thaidzo nnzhi nga tshifhinga tsha Nndwa ya Shango ya Vhuvhili. Vho Emma vho khuthadza ṅwana wavho ngauri vho vha vho lovhelwa nga vhunzhi ha vhathu vhane vha vha funa gammbani dza tshengedzo dza Vhanazi. Vho vhudza ṅwana wavho uri: “Arali vhathu vho lovhaho vha sa ḓo vhuya vha vuwa, zwi amba uri lufu lu na maanḓa u fhira Mudzimu. Fhedzi zwenezwo a si ngoho.” A hu na tshithu tshi re na maanḓa u fhira Yehova! Arali Mudzimu Ramaanḓaoṱhe o kona u ri sika, zwi tou vha khagala uri u na maanḓa a u kona u ri vusa musi ro lovha.

⁸ Tshiṅwe tshiitisi tshine tsha ita uri ri ḓivhe uri Mudzimu u na maanḓa a u vusa vhafu ndi ngauri u humbula zwithu zwoṱhe. U ḓivha ṋaledzi iṅwe na iṅwe nga dzina. (Yes. 40:26) Zwiṅwe hafhu, u humbula vhathu vhoṱhe vhe vha lovha. (Yobo 14:13; Luka 20:37, 38) Nga zwenezwo, zwi nga mu lelutshela uri a humbule na zwithu zwiṱukuṱuku nga ha vhathu vhane a ḓo vha vusa, zwi ngaho mbonalo yavho, nḓila ine vha vha ngayo, zwe zwa itea vhutshiloni havho na zwine vha zwi humbula.

9. Ndi ngani ni tshi tenda zwe Yehova a zwi fhulufhedzisa zwa uri u ḓo vusa vhafu tshifhingani tshi ḓaho?

 ⁹ Zwi tou vha khagala uri ri nga tenda zwe Yehova a zwi amba musi a tshi ri u ḓo vusa vhafu tshifhingani tshi ḓaho ngauri ri a zwi ḓivha uri u a ṱoḓa na uri u na maanḓa a u zwi ita. Ṱhogomelani tshiṅwe tshiitisi tshine tsha ita uri ri tende zwenezwo. Yehova o no vusa vhafu. Tshifhingani tsha Bivhili, Yehova o ṋea vhashumeli vhawe vha fhulufhedzeaho, u katela na Yesu, maanḓa uri vha vuse vhathu vho faho. Kha ri ambe nga mafhungo a muṅwe muthu we a vuswa nga Yesu. Eneo mafhungo a wanala kha Yohane ndima ya 11.

10. Ho itea mini musi Yesu a tshi khou huwelela seli ha mulambo wa Yorodane nahone o ita mini? (Yohane 11:1-3)

¹⁰ Vhalani Yohane 11:1-3. Humbulani zwe zwa itea ngei Bethania mafheleloni a 32 C.E. Yesu o vha e na khonani dzawe dza tsini henefho Bethania, Lazaro na khaladzi dzawe mbili, Maria na Marita. (Luka 10:38-42) Fhedzi Lazaro a lwala nahone khaladzi dzawe vha vhilaela nga hae. Vha ruma muthu uri a vhudze Yesu eneo mafhungo. Yesu o vha e seli ha mulambo wa Yorodane nahone zwo vha zwi tshi nga dzhia maḓuvha mavhili u ya henefho musi muthu a tshi bva Bethania a tshi khou tshimbila nga milenzhe. (Yoh. 10:40) Zwi ṱungufhadzaho ndi uri onoyo muthu a tshi swika, Lazaro o vha o no lovha. Naho Yesu o vha a tshi zwi ḓivha uri Lazaro khonani yawe o lovha, o dzula henefho maḓuvha mavhili nahone nga murahu a kona u fara lwendo lwa u ya Bethania. Musi a tshi swika, Lazaro o vha o no fhedza maḓuvha maṋa o lovha. Yesu o vha a tshi khou ṱoḓa u ita tshiṅwe tshithu tshine tsha ḓo vhuyedza khonani dzawe na u ita uri Mudzimu a huliswe.—Yoh. 11:4, 6, 11, 17.

11. Ri guda mini nga ha vhukonani kha mafhungo a Lazaro?

¹¹ Ri dovha ra guda zwiṅwe zwithu nga ha vhukonani kha enea mafhungo. Ṱhogomelani uri musi Maria na Marita vha tshi ruma muthu uri a ye kha Yesu, a vho ngo humbela Yesu uri a ḓe Bethania. Vho sokou mu vhudza uri khonani yawe u khou lwala. (Yoh. 11:3) Musi Lazaro o lovha, Yesu o vha a tshi nga kona u mu vusa naho o vha e kule na Bethania. Fhedzi Yesu o khetha uri u ḓo ya a vha na khonani dzawe, Maria na Marita. Naa na inwi ni na khonani ine ya nga ni thusa naho ni songo humbela thuso? Arali ni nayo, ni a zwi ḓivha uri ni nga ḓitika ngayo musi ni tshi ṱoḓa thuso “musi wa khombo.” (Mir. 17:17) U nga ri na riṋe ri nga vha khonani yo raloho u fana na Yesu! Zwa zwino kha ri vhuyelele kha mafhungo ane ra khou amba nga hao ri vhone uri hu itea mini nga murahu.

12. Yesu o fhulufhedzisa Marita mini nahone ndi ngani Marita o vha a tshi nga tenda zwe a fhulufhedziswa? (Yohane 11:23-26)

¹² Vhalani Yohane 11:23-26. Marita a vhudziwa uri Yesu u tsini na Bethania. A ya u mu ṱanganedza a amba nae a ri: “Murena, arali wo vha u fhano, ndi musi khaladzi anga a songo fa.” (Yoh. 11:21) Ndi ngoho uri Yesu o vha a tshi nga fhodza Lazaro, fhedzi Yesu o vha a tshi khou ṱoḓa u ita tshiṅwe tshithu tshi mangadzaho. O mu fhulufhedzisa uri: “Khaladzi au u ḓo vuwa.” O dovha a ita uri Marita a tende zwe a mu fhulufhedzisa  zwone nga u amba uri: “U vuwa na vhutshilo ndi nṋe.” Mudzimu o ṋea Yesu maanḓa a uri a vuse vhathu vho faho. Yesu o vha o no vusa muṅwe musidzana we a vha a tshi kha ḓi tou bva u lovha nahone o vha o no vusa muṅwe muṱhannga we a vha o lovha nga ḽeneḽo ḓuvha. (Luka 7:11-15; 8:49-55) Fhedzi, naa o vha a tshi nga kona u vusa muthu we a vha o no fhedza maḓuvha maṋa o lovha, we muvhili wawe wa vha u tshi vho thoma u sina?

13. Samusi zwo sumbedzwa kha Yohane 11:32-35, Yesu o ita mini musi a tshi vhona Maria na vhaṅwe vha tshi khou lila? (Sedzani tshifanyiso.)

¹³ Vhalani Yohane 11:32-35. Humbulani zwe zwa itea nga murahu. Maria na ene o mbo ḓi ya kha Yesu. O swika a dovholola zwe Marita a zwi amba a ri: “Murena, arali wo vha u fhano, ndi musi khaladzi anga a songo fa.” Ene na vhaṅwe vho vha vho ṱungufhala. Musi Yesu a tshi vhona na u pfa vha tshi lila, na ene a ṱungufhala. Nge a vha a tshi khou pfela vhuṱungu khonani dzawe, o mbo ḓi lila. O vha a tshi khou pfesesa vhuṱungu vhune vha khou vhu pfa nga nṱhani ha u lovhelwa nga muthu ane vha mu funa. O vha o ḓiimisela u fhelisa tshithu tshe tsha vha tshi tshi khou ita uri vha lile.

14. Ri nga guda mini nga ha Yehova kha zwe Yesu a zwi ita musi a tshi vhona Maria a tshi lila?

¹⁴ Zwe Yesu a ita musi a tshi vhona Maria a tshi lila, zwi ri funza uri Yehova ndi Mudzimu ane a pfela vhuṱungu. Ndi ngani ri tshi ralo? Samusi ro zwi guda kha thero yo fhelaho, Yesu u edzisa nḓila ine Khotsi awe vha humbula na u ḓipfa ngayo kokotolo. (Yoh. 12:45) Yesu o lila ngauri o vha a tshi khou pfela vhuṱungu khonani dzawe dze dza vha dzi tshi khou lila. Nga zwenezwo, ri a zwi ḓivha uri na Yehova na ene u a pfa vhuṱungu musi a tshi ri vhona ri tshi khou lila. (Ps. 56:8) Naa zwenezwo a zwi iti uri ni ṱoḓe u vha khonani ya Mudzimu ane a pfela vhuṱungu?

15. Samusi zwo sumbedzwa kha Yohane 11:41-44, ho itea mini vhiḓani ḽa Lazaro? (Sedzani tshifanyiso.)

¹⁵ Vhalani Yohane 11:41-44. Yesu a swika vhiḓani ḽa Lazaro a humbela uri hu bviswe tombo ḽe ḽa vha ḽo vala vhiḓa. Marita a hana a ri tshitumbu tsha Lazaro tshi ḓo vha tshi tshi vho nukha. Yesu a fhindula a ri: “Naa a tho ngo u vhudza uri arali wa tenda u ḓo vhona vhugala ha Mudzimu?” (Yoh. 11:39, 40) Yesu a lavhelesa ṱaḓulu a rabela phanḓa ha vhathu. U ṱoḓa uri  hu huliswe Yehova nga zwine zwa ḓo itea. Nga murahu, Yesu a vhidzelela a ri: “Lazaro, ibva!” Lazaro a mbo ḓi bva vhiḓani. Yesu o ita zwithu zwe vhaṅwe vha vhona u nga zwo vha zwi sa konadzei.—Sedzani study note tsha Yohane 11:17 kha Study Bible.

16. Mafhungo a re kha Yohane ndima ya 11 a khwaṱhisa hani lutendo lwashu kha uri vhafu vha ḓo vuswa?

¹⁶ Mafhungo a re kha Yohane ndima ya 11 a khwaṱhisa lutendo lwashu kha fhulufhelo ḽa uri vhafu vha ḓo vuswa. Nga nḓila-ḓe? Humbulani uri Yesu o fhulufhedzisa Marita uri: “Khaladzi au u ḓo vuwa.” (Yoh. 11:23) Yesu u a ṱoḓa nahone u na maanḓa a u vusa vhafu u fana na Khotsi awe. A tshi lila o sumbedza uri u a ṱoḓa u vusa vhafu na u fhelisa vhuṱungu vhune vhathu vha vhu pfa musi vha tshi lovhelwa. Yesu o dovha a sumbedza uri u na maanḓa a u vusa vhafu musi Lazaro a tshi bva vhiḓani. Ni dovhe ni humbule uri Yesu o humbudza Marita uri: “Naa a tho ngo u vhudza uri arali wa tenda u ḓo vhona vhugala ha Mudzimu?” (Yoh. 11:40) Ri na tshiitisi tsho khwaṱhaho tsha u tenda uri Yehova u ḓo ita zwe a fhulufhedzisa musi a tshi ri u ḓo vusa vhathu vho lovhaho. Fhedzi riṋe ri nga ita mini uri fhulufhelo ḽa mvuwo ḽi vhe ḽa vhukuma kha riṋe?

17. Ri tea u humbula mini musi ri tshi vhala Bivhilini nga ha vhathu vho vuswaho?

¹⁷ Ni vhale na u elekanya nga ha vhathu vhe vha vuswa tshifhingani tsho fhiraho. Bivhili i amba nga ha vhathu vha malo vhe vha vuswa tshifhingani tsho fhiraho vha tshila kha ḽifhasi. c Ni nga guda nga ha eneo mafhungo. Musi ni tshi guda nga hao, ni humbule uri vhenevho vho vha vhe vhathu vha vhukuma. Ho vha hu na vhanna, vhafumakadzi na vhana. Ni vhone uri ni nga guda mini kha u vuswa havho. Ni humbule uri tsumbo iṅwe na iṅwe ya muthu we a vuswa i sumbedza hani uri Mudzimu u a ṱoḓa na uri u na maanḓa a u vusa vhathu vho lovhaho. Tsha ndeme vhukuma, ni humbule nga ha u vuswa ha Yesu. Yeneyo ndi mvuwo ya ndeme ye ya vhuya  ya vha hone. Ni songo hangwa uri ho vha na ṱhanzi nnzhi dzo zwi vhonaho nga maṱo uri Yesu o vuswa nahone zwenezwo zwi ita uri ri vhe na lutendo.—1 Vhakor. 15:3-6, 20-22.

18. Ni nga shumisa hani nyimbo dzi ambaho nga fhulufhelo ḽa uri vhafu vha ḓo vuswa? (Sedzani na ṱhaluso i re magumoni a siaṱari.)

¹⁸ Thetshelesani, ni imbe na u humbulisisa nga maipfi a nyimbo dzine dza amba nga ha uri vhafu vha ḓo vuswa. d (Vhaef. 5:19) Dzenedzi nyimbo dzi ita uri fhulufhelo ḽa mvuwo ḽi vhe ḽa vhukuma kha riṋe na u ita uri ri vhe na lutendo lwo khwaṱhaho kha ḽeneḽo fhulufhelo. Ni dzi thetshelese, u dzi guda na u haseledza maipfi adzo kha vhurabeli haṋu ha muṱa. Ni rwele ngomani maipfi a luimbo na u humbulisisa nga hao uri a kone u ni khwaṱhisa lutendo na u ni kwama mbilu. Musi ni tshi ṱangana na thavha kana ni tshi lovhelwa nga muthu ane na mu funa, muya mukhethwa wa Yehova u ḓo ita uri ni kone u dzi humbula uri dzi ni khuthadze na u ni khwaṱhisa.

19. Ri nga humbula mini nga ha vhane vha ḓo vuswa? (Sedzani bogisi “ Ndi Mbudziso Dzifhio Dzine Na Nga Vha Vhudzisa?”)

¹⁹ Shumisani ḽiṱo ḽa muhumbulo. Yehova o ri ṋea vhukoni ha u ḓivhona ri shangoni ḽiswa. Muṅwe wahashu wa tshifumakadzini o ri: “Ndi fhedzesa tshifhinga ndi tshi khou ḓivhona ndi shangoni ḽiswa lune nda nga ndi a pfa maluvha a tshi khou nukhelela Pharadisoni.” Humbulani uri zwi ḓo vha hani u ṱangana na vhanna na vhafumakadzi vha fhulufhedzeaho vha tshifhingani tsha Bivhili. Ndi nnyi ane na ṱoḓa u mu vhona? Ni ṱoḓa u mu vhudzisa mini? Humbulani uri zwi ḓo vha hani u ṱangana na vhathu vhane na vha funa vho lovhaho. Humbulani uri musi ni tshi ṱangana navho, ndi maipfi afhio ane na ḓo amba navho lwa u tou thoma, nḓila ine na ḓo vha kuvhatedza ngayo na uri ni ḓo vha no takala hani!

20. Ri tea u ḓiimisela u ita mini?

²⁰ Ri livhuwa Yehova nge a fhulufhedzisa uri vhafu vha ḓo vuswa! Ri nga vha na vhungoho ha uri zwe a zwi fhulufhedzisa zwi ḓo itea ngauri Yehova u a ṱoḓa nahone u na maanḓa a u zwi ita. Kha ri ḓiimisele u dzula ri tshi khwaṱhisa lutendo lwashu kha ḽeneḽi fhulufhelo. Musi ri tshi ita nga u ralo, ri ḓo vha khonani dza tsini dza Yehova we a ri fhulufhedzisa uri ‘vhathu vhane ra vha funa vha ḓo vuwa!’