1-2. Ndi mini zwine ra tea u vha ri tshi khou zwi ita musi ro lindela ḽifhasi ḽiswa?

 RI A livhuwa uri Yehova o fhulufhedzisa uri u ḓo fhelisa ḽino shango ḽivhi, ḽa dzhielwa vhudzulo nga ḽifhasi ḽiswa. (2 Pet. 3:13) Naho ri sa ḓivhi uri ḽifhasi ḽiswa ḽi ḓo ḓa lini, zwine zwa khou itea zwi sumbedza uri a ri tsha ḓo vha na tshifhinga tshilapfu ro lindela.—Mat. 24:32-34, 36; Mish. 1:7.

² Hu sa londwi uri ro no fhedza tshifhinga tshingafhani ri ngohoni, roṱhe ri a tea u khwaṱhisa lutendo lwashu kha zwe Mudzimu a zwi fhulufhedzisa. Ndi ngani? Ndi ngauri na lutendo lwo khwaṱhaho lu nga thenga-thenga nga u ya ha tshifhinga. Zwavhuḓivhuḓi, muapostola Paulo o ṱalusa u sa vha na lutendo sa “tshivhi tshine tsha ri piringedza nga hu leluwaho.” (Vhahev. 12:1) U itela uri lutendo lwashu lu si thengathenge, ri tea u dzula ri tshi humbulisisa nga ho dzikaho nga ha vhuṱanzi vhune ha sumbedza uri ḽifhasi ḽiswa ḽi ḓo vha hone zwa vhukuma.—Vhahev. 11:1.

3. Ri ḓo haseledza mini kha ino thero?

³ Kha ino thero, ri ḓo haseledza nga ha zwithu zwiraru zwine zwa nga khwaṱhisa lutendo lwashu kha zwe Yehova a zwi fhulufhedzisa zwa uri hu ḓo vha na shango ḽiswa. Tsha u thoma, u humbulisisa nga ha tshirengululi. Tsha vhuvhili, u humbulisisa nga ha maanḓa a Yehova. Tsha vhuraru, u fhedza tshifhinga ri tshi khou ita zwithu zwine zwa ḓo ri sendedza tsini na Yehova. Nga murahu, ri ḓo haseledza nga ha uri zwe Yehova a zwi vhudza Habakuku  zwi nga khwaṱhisa hani lutendo lwashu ṋamusi. Kha ri thome nga u haseledza nga ha vhuṅwe ha vhuimo vhune ra nga ṱangana naho ṋamusi vhune ha nga ṱoḓa uri ri vhe na lutendo lwo khwaṱhaho lwa uri Yehova u ḓo ḓisa shango ḽiswa ḽe a ḽi fhulufhedzisa.

ZWIIMO ZWINE ZWA ṰOḒA LUTENDO LWO KHWAṰHAHO

4. Ndi phetho dzifhio dzine dza ṱoḓa lutendo lwo khwaṱhaho?

⁴ Ḓuvha ḽiṅwe na ḽiṅwe ri dzhia phetho dzine dza ṱoḓa lutendo lwo khwaṱhaho. Sa tsumbo, ri dzhia phetho dzine dza kwama vhukonani, vhuḓimvumvusi, tshikolo, mbingano, vhana na mushumo wa u ḓitshidza. Ndi zwavhuḓi uri ri ḓivhudzise uri: ‘Naa phetho dzine nda dzi dzhia dzi sumbedza uri ndi khou tenda uri shango ḽino ḽivhi ḽi ḓo dzhielwa vhudzulo nga shango ḽiswa ḽa Mudzimu hu si kale? Kana naa phetho dzanga dzi ṱuṱuwedzwa nga vhathu vhane vha tenda kha uri lufu ndi ambadzifhele?’ (Mat. 6:19, 20; Luka 12:16-21) Ri ḓo dzhia phetho dzavhuḓi arali ra khwaṱhisa lutendo lwashu lwa uri shango ḽiswa ḽi tou vha tsini-tsini.

5-6. Ndi ngani ri tshi ṱoḓa lutendo lwo khwaṱhaho musi ro tsikeledzea? Fanyisani.

⁵ Ri dovha ra ṱangana na milingo ine ya ṱoḓa uri ri vhe na lutendo lwo khwaṱhaho. Ri nga sedzana na u tovholwa, vhulwadze vhu sa fholi, kana zwiṅwe zwithu zwine zwa nga ita uri ri ḓipfe ro kulea nungo. Ri nga thoma ri tshi ḓipfa u nga ri nga kona u konḓelela wonoyo mulingo kana thaidzo. Fhedzi arali ya ḓi bvela phanḓa i sa fheli, sa zwine zwa anzela u itea, ri ḓo ṱoḓa lutendo lwo khwaṱhaho uri ri kone u konḓelela na u bvela phanḓa ri tshi shumela Yehova ro takala.—Vharoma 12:12; 1 Pet. 1:6, 7.

⁶ Musi ri vhukati ha mulingo, ri nga pfa u nga ḽifhasi ḽiswa ḽe Yehova a ri fhulufhedzisa ḽi nga si vhuye ḽa ḓa. Naa zwenezwi zwi amba uri lutendo lwashu lu a thenga-thenga? Na khathihi! Ṱhogomelani tshifanyiso tshi tevhelaho. Musi ri vhukati ha vhuria vhu rotholaho, ri nga pfa u nga tshilimo tshi nga si vhuye tsha swika. Fhedzi tshilimo tshi ḓo swika. Nga hu fanaho, musi ri tshi sedzana na u kulea nungo, ri nga pfa u nga ḽifhasi ḽiswa ḽi nga si vhuye ḽa ḓa. Fhedzi arali ri na lutendo lwo khwaṱhaho, ri a ḓivha uri zwe Mudzimu a fhulufhedzisa zwi ḓo itea. (Ps. 94:3, 14, 15; Vhahev. 6:17-19) Arali ra fhulufhela zwenezwo, zwi ḓo ri thusa uri ri bvele phanḓa ri tshi ita uri u gwadamela Yehova zwi ḓe u thoma vhutshiloni hashu.

7. Ndi mahumbulele afhio ane ra tea u a thivhela?

⁷ Ri dovha ra ṱoḓa lutendo lwo khwaṱhaho musi ri tshi ita mushumo wa u huwelela. Vhathu vhanzhi vhane ra huwelela “mafhungo maḓifha” khavho vha vhona u nga zwi nga si konadzee uri Mudzimu u ḓo ḓisa shango ḽiswa. (Mat. 24:14; Hesek. 33:32) A ri ṱoḓi eneo mahumbulele a tshi ri kwama. Uri zwenezwo zwi si itee kha riṋe, ri tea u dzula ri tshi khwaṱhisa lutendo lwashu. Kha ri ṱhogomele nḓila tharu dzine ra nga zwi ita ngadzo.

ELEKANYANI NGA HA TSHIRENGULULI

8-9. U elekanya nga ha tshirengululi zwi nga khwaṱhisa hani lutendo lwashu?

⁸ Iṅwe nḓila ine ra nga khwaṱhisa lutendo lwashu ngayo ndi nga u elekanya nga ha tshirengululi. Tshirengululi tshi khwaṱhisedza uri zwe Mudzimu a fhulufhedzisa zwi ḓo itea. Musi ri tshi elekanya nga ho dzikaho uri ndi ngani tshirengululi tshi tsha ndeme, zwi khwaṱhisa lutendo lwashu kha uri zwe Mudzimu a zwi fhulufhedzisa zwa vhutshilo vhu sa fheli shangoni ḽiswa zwi ḓo itea. Ndi ngani ri tshi ralo?

⁹ Tshirengululi tshi katela mini? Yehova o rumela Murwa wawe wa tanzhe ane a vha khonani yawe uri a bebwe fhano kha ḽifhasi sa muthu o fhelelaho. Musi Yesu e kha ḽifhasi, o konḓelela vhuleme vhunzhi. O tambudzwa nahone a fa lufu lu vhavhaho. Ndi mutengo muhulwane  lungafhani we Yehova a u badela! Mudzimu washu wa lufuno o vha a sa ḓo tendela Murwa wawe a tshi tambula na u fa arali zwo vha zwi sa ḓo konadzea uri ri wane vhutshilo vhu sa fheli. (Yoh. 3:16; 1 Pet. 1:18, 19) Sa izwi Yehova o badela wonoyo mutengo muhulu, u ḓo vhona uri vhutshilo vhu sa fheli kha ḽifhasi ḽiswa vhu konadzee.

HUMBULANI NGA HA MAANḒA A YEHOVA

10. U ya nga Vhaefesa 3:20, ndi mini zwine Yehova a nga kona u zwi ita?

¹⁰ Tshiṅwe tshithu tsha vhuvhili tshine ra nga khwaṱhisa lutendo lwashu ngatsho ndi u humbula nga ha maanḓa a Yehova. U na maanḓa a u ita tshiṅwe na tshiṅwe tshe a fhulufhedzisa u tshi ita. Vhathu vhanzhi vha vhona u nga vhutshilo vhu sa fheli vhu nga si konadzee kha ḽifhasi. Fhedzi Yehova u dzula a tshi ri fhulufhedzisa zwithu zwine vhathu vha nga si kone u zwi ita. U ita zwenezwi ngauri ndi ene Ramaanḓaoṱhe. (Yobo 42:2; Marko 10:27) Zwi a pfala uri a ri fhulufhedzise zwithu zwi mangadzaho.—Vhalani Vhaefesa 3:20.

11. Ṋeani tsumbo ya zwe Yehova a zwi fhulufhedzisa zwe zwa vha zwi tshi vhonala u nga zwi nga si konadzee. (Vhalani bogisi “ Zwiṅwe Zwe Mudzimu A Fhulufhedzisa Zwe Zwa Vhonala Zwi Sa Konadzei, Fhedzi Zwa Itea.”)

¹¹ Ṱhogomelani zwiṅwe zwa zwithu zwe Yehova a fhulufhedzisa vhathu vhawe vha tshifhingani tsho fhelaho zwe zwa vha zwi tshi vhonala u nga zwi nga si konadzee. O fhulufhedzisa Abrahamu na Sara uri vho vha vha tshi ḓo vha na murwa naho vho vha vho no vha vhalala. (Gen. 17:15-17) O dovha a vhudza Abrahamu uri u ḓo ṋea vhaḓuhulu vhawe shango ḽa Kanana. Vhaisiraele vhane vha vha vhaḓuhulu vha Abrahamu vho fhedza miṅwaha minzhi vhe dziphuli ngei Egipita. Nga tshenetsho tshifhinga, zwo vhonala zwi tshi nga zwe Yehova a zwi fhulufhedzisa zwo vha zwi sa ḓo itea. Fhedzi zwo itea! Nga murahu, Yehova o vhudza Elisabetha we a vha o no kegula uri o vha a tshi ḓo vha na ṅwana. O dovha a vhudza Maria, musidzana we a vha a sa ḓivhi munna, uri o vha a tshi ḓo beba Murwa wawe we a vha o fhulufhedziswa miṅwahani minzhi yo fhiraho ngei tsimuni ya Edeni.—Gen. 3:15.

12. Yoshua 23:14 na Yesaya 55:10, 11 dzi ri vhudza mini nga ha maanḓa a Yehova?

¹² Musi ri tshi humbula nga ha zwoṱhe zwe Yehova a ri fhulufhedzisa uri u ḓo zwi ita, zwi ita uri ri pfesese khwiṋe maanḓa awe, zwa ita uri lutendo lwashu kha ḽifhasi ḽiswa lu khwaṱhe. (Vhalani Yoshua 23:14; Yesaya 55:10, 11.) Zwenezwi zwi ita uri ri vhudze vhaṅwe uri shango ḽiswa ḽo fhulufhedziswaho a ḽi sokou vha muḽoro. Yehova o amba nga ha ḽiṱaḓulu ḽiswa na ḽifhasi ḽiswa a ri: “Haya maipfi ndi ngoho, ni nga a fhulufhela.”—Nzumb. 21:1, 5.

ITANI ZWITHU ZWINE ZWA NI SENDEDZA TSINI NA YEHOVA

13. Miṱangano ya tshivhidzo i nga khwaṱhisa hani lutendo lwashu? Ṱalutshedzani.

¹³ Tshithu tsha vhuraru tshine tsha nga khwaṱhisa lutendo lwashu ndi u fhedza tshifhinga tshinzhi ri tshi khou ita zwithu zwine zwa ri sendedza tsini na Yehova. Ṱhogomelani tsumbo ya uri ri vhuyelwa hani musi ri miṱanganoni ya tshivhidzo. Anna we a vha tshumeloni ya tshifhinga tshoṱhe lwa miṅwaha minzhi o ri: “Miṱangano i khwaṱhisa lutendo lwanga. Naho muthu ane a khou ṋekedza nyambo a sa tou vha na vhukoni kana a sa khou amba zwithu zwiswa, ndi a doba zwithu zwine zwa nga nthusa uri ndi pfesese ngoho ine ya bva Bivhilini khwiṋe nahone zwenezwo zwi khwaṱhisa lutendo lwanga.” b A zwi timatimisi uri ri a khwaṱhiswa nga phindulo dzine dza ṋewa nga vhahashu musi ri miṱanganoni.—Vharoma 1:11, 12; 10:17.

14. Vhuḓinḓa vhu khwaṱhisa hani lutendo lwashu?

¹⁴ Ri nga dovha ra khwaṱhisa lutendo lwashu  nga u shela mulenzhe vhuḓinḓani. (Vhahev. 10:23) Vho Barbara vhane vha vha na miṅwaha i fhiraho 70 vha tshi khou shumela Yehova vha ri: “Mushumo wa u huwelela u khwaṱhisa lutendo lwanga. Musi ndi tshi amba na vhaṅwe nga ha zwe Yehova a zwi fhulufhedzisa, lutendo lwanga lu khwaṱha lu tshi ya.”

15. Ngudo ya muthu nga eṱhe i khwaṱhisa hani lutendo? (Sedzani zwifanyiso.)

¹⁵ Hu na zwiṅwe zwine zwa khwaṱhisa lutendo: ngudo ya muthu nga eṱhe. Susan u amba uri zwine zwa mu thusa ndi u dzudzanya uri u ḓo guda lini. U ri: “Nga Swondaha ndi vhala thero ya Tshiingamo ya vhege i tevhelaho. Nga Musumbuluwo na nga Ḽavhuvhili ndi lugiselela miṱangano ya vhukati ha vhege. Nga maḓuvha o salaho ndi vha ndi tshi khou ita ngudo ya muthu nga eṱhe.” Ngauri u dzula a tshi guda u ya nga he a dzudzanya ngaho, zwi ita uri lutendo lwawe lu dzule lwo khwaṱha. Irene we a shuma lwa miṅwaha yo vhalaho ofisini khulwane dza Ṱhanzi dza Yehova u amba uri ene lutendo lwawe lu khwaṱhiswa nga u guda vhuporofita vhu re Bivhilini. U ri: “Zwi a mangadza uri zwe Yehova a porofita zwi itea kokotolo nga he zwa porofitiwa ngaho.” c

“ZWI ḒO ITEA ZWA VHUKUMA”

16. Ndi ngani zwe Mudzimu a zwi khwaṱhisedza Habakuku zwi tshi vhuyedza na riṋe ṋamusi? (Vhahevheru 10:36, 37)

¹⁶ Ndi kale vhaṅwe vhashumeli vha Yehova vho lindela uri ḽino shango ḽi fheliswe. Vhaṅwe vhathu vha nga humbula uri vhufhelo vhu khou lenga u swika. Fhedzi Yehova u a ḓivha nḓila ine vhashumeli vhawe vha ḓipfa ngayo. Zwavhuḓivhuḓi, o khwaṱhisedza muporofita Habakuku uri: “Zwo vhonwaho kha bono zwi ḓo itea nga tshifhinga tsho vhewaho, tshenetsho tshifhinga tshi ḓo ḓa nga u ṱavhanya, zwa vhukuma zwi ḓo itea. Naho zwa lenga, u dzule wo zwi lindela! Ngauri zwi ḓo itea zwa vhukuma. A zwi nga lengi!” (Hab. 2:3) Naa Mudzimu o amba eneo  maipfi u itela u vhuyedza Habakuku fhedzi? Kana naa na vhashumeli vhawe vha ṋamusi vha nga vhuyelwa ngao? Yehova o hevhedza Paulo uri a shumise eneo maipfi kha Vhakriste vho lindelaho shango ḽiswa nga maṱo matswuku. (Vhalani Vhahevheru 10:36, 37.) Nga zwenezwo, ri nga vha na vhungoho ha uri naho ri tshi vhona u nga zwe Mudzimu a zwi fhulufhedzisa zwi khou lenga u itea, “zwi ḓo itea zwa vhukuma. A zwi nga lengi!”

17. Muṅwe wahashu wa tshifumakadzini o shumisa hani zwe Yehova a zwi vhudza Habakuku?

¹⁷ Vhashumeli vhanzhi vha Yehova vho shumisa zwe Yehova a zwi vhudza Habakuku zwa uri ‘vha dzule vho zwi lindela.’ Vhaṅwe vho lindela lwa miṅwaha minzhi. Sa tsumbo, Vho Louise vhe vha thoma u shumela Yehova nga 1939 vha ri: “Nga tshenetsho tshifhinga ndo vha ndi tshi vhona u nga Haramagedo i ḓo ḓa ndi sa athu fhedza tshikolo. Fhedzi zwenezwo a zwi ngo itea. Musi miṅwaha i tshi khou ḓi ya, ndo vhala nga ha mafhungo a re Bivhilini a vhathu vhe vha lindela Yehova a tshi ita zwe a fhulufhedzisa nahone zwenezwo zwo nthusa uri ndi lindele Yehova a tshi ita zwe a fhulufhedzisa. Ndo vhala nga ha Noaxe, Abrahamu, Yosefa na vhaṅwe vhe vha tea u lindela tshifhinga tshilapfu uri vha wane malamba e Yehova a vha fhulufhedzisa. U dzula ndo lindela zwo thusa nṋe na vhaṅwe uri ri livhise ṱhogomelo kha shango ḽiswa ḽi re tsini na u swika”. Vhashumeli vhanzhi vhe vha shumela Yehova lwa tshifhinga tshilapfu vha a tendelana na zwenezwo.

18. U sedza tsiko zwi nga khwaṱhisa hani lutendo lwashu kha shango ḽiswa?

¹⁸ Ndi ngoho uri shango ḽiswa a ḽi athu swika. Fhedzi humbulani nga ha zwithu zwine ra vha na zwo zwino: dziṋaledzi, miri, phukha na vhathu. A hu na ane a nga hanedza uri zwenezwi zwithu zwi hone zwa vhukuma naho ho vhuya ha vha na tshifhinga tshe zwenezwi zwithu zwa vha zwi siho. Zwenezwi zwithu zwi hone ngauri Yehova o tou zwi sika. (Gen. 1:1, 26, 27) Mudzimu washu o dovha a ri fhulufhedzisa uri u ḓo sika shango ḽiswa. U ḓo ita zwe a fhulufhedzisa. Shangoni ḽiswa vhathu vha ḓo ḓiphiṋa nga vhutshilo vhu sa fheli vhe na mutakalo wavhuḓi. Ri nga vha na vhungoho ha uri shango ḽiswa ḽi ḓo ḓa nga tshifhinga tshe Mudzimu a tshi vhea.—Yes. 65:17; Nzumb. 21:3, 4.

19. Ni nga khwaṱhisa hani lutendo lwaṋu?

¹⁹ Musi ro lindela, ri nga ita zwoṱhe zwine ra nga kona uri ri khwaṱhise lutendo lwashu. Ri dzule ri tshi livhuwa tshirengululi. Ri humbulisise nga ha maanḓa ane Yehova a vha nao. Ri ite zwithu zwine zwa ri sendedza tsini na Yehova. Musi ri tshi ita zwenezwi zwithu, ri ḓo vhalwa na vhe “vha wana zwe vha fhulufhedziswa nge vha vha na lutendo, vha si fhele mbilu.”—Vhahev. 6:11, 12; Vharoma 5:5.