1. Pharadiso ya pfanyisedzo ndi mini nahone ri tea u ḓiimisela u ita mini?

 HU NA pharadiso fhano kha ḽifhasi, yo ḓalaho nga vhathu vhane vha khou ita zwithu zwinzhi zwavhuḓi. Vhenevho vhathu vha dzimiḽioni vha ḓiphiṋa nga u vha na mulalo. Nahone vhane vha vha kha yeneyi pharadiso vho ḓiimisela u dzula vhe khayo. Vha ṱoḓa na vhaṅwe vhanzhi nga hune zwa nga konadzea ngaho uri na vhone vha ḓe kha yeneyi pharadiso. Yeneyi pharadiso ndi mini? Ndi pharadiso ya pfanyisedzo. a

2. Ndi zwifhio zwi mangadzaho nga ha pharadiso ya pfanyisedzo?

² Yehova o ita fhethu ha pfanyisedzo hune vhathu vhawe vha kona u vha na mulalo na vhuthihi naho vha tshi khou tshila shangoni ḽivhi ḽa Saṱhane ḽi re na khombo, hune vhathu vha vhengana. (1 Yoh. 5:19; Nzumb. 12:12) Mudzimu washu a re na lufuno u khou vhona nḓila ine ḽino shango ḽa khou huvhadza ngayo vhathu, fhedzi u ita uri vhashumeli vhawe vha pfe vho tsireledzea uri vha bvele phanḓa vha tshi mu shumela vho takala. Ipfi ḽawe ḽi amba uri pharadisoni ya pfanyisedzo ndi fhethu ha “vhushavhelo” ho tsireledzeaho na uri hu tou nga “tsimu yo sheledzwaho zwavhuḓi.” (Yes. 4:6; 58:11) Vhane vha vha kha yeneyi pharadiso vha pfa vho takala nahone vho tsireledzea kha ano maḓuvha a vhufhelo ngauri Yehova u khou vha fhaṱutshedza.—Yes. 54:14; 2 Tim. 3:1.

3. Vhuporofita vhu re kha Yesaya ndima 65 ho itea hani lwa u thoma kha ḽa Isiraele?

³ Yehova o shumisa muporofita Yesaya u itela u ṱalusa nḓila ine vhutshilo ha vhathu vhane vha ḓo vha vha pharadisoni ya pfanyisedzo ha ḓo vha vhu ngayo. Ni nga wana zwe a zwi amba kha Yesaya ndima 65, honoho vhuporofita ho itea lwa u thoma nga  537 B.C.E. Nga tshenetsho tshifhinga, Vhayuda vho rembuluwaho vho vhofhololwa vhupulini ha Babele vha vhuyelela shangoni ḽa havho. Yehova o fhaṱutshedza vhathu vhawe a vha thusa uri vha fhaṱulule muḓi wa Yerusalema uri u dovhe u nake na u vusulusa thembele uri i dovhe i vhe fhethu hune vhathu vha gwadamela hone Yehova kha ḽa Isiraele.—Yes. 51:11; Sak. 8:3.

4. Vhuporofita vhu re kha Yesaya ndima ya 65 vhu khou itea hani musalauno?

⁴ Vhuporofita ha Yesaya ho u itea lwa vhuvhili u bva nga 1919 musi vhagwadameli vha Yehova vha musalauno vha tshi vhofhololwa kha Babele Ḽihulu. Nga murahu ha zwenezwo pharadiso ya pfanyisedzo yo thoma u phaḓalala na ḽifhasi ḽoṱhe. Ho thoma u vha na zwivhidzo zwinzhi musi vhahuweleli vha tshi khou ḓi engedzea vha tshi ya nahone vha tshi khou tshila u tendelana na muya mukhethwa. Vhanna na vhafumakadzi vhe u thomani vha vha vha tshi ita zwa dzikhakhathi nahone vha tshi ḓifara luvhi, vho ‘ambara vhumuthu vhuswa he Mudzimu a vhu ita u tendelana na zwine a zwi funa.’ (Vhaef. 4:24) Ndi ngoho uri vhunzhi ha phaṱhutshedzo dzo ambiwaho kha bugu ya Yesaya dzi ḓo vha hone tshifhingani tshi ḓaho shangoni ḽiswa. Fhedzi naho zwo ralo, hu na nḓila nnzhi dzine pharadiso ya pfanyisedzo ya ri vhuyedza ngadzo zwino. Kha ri vhone uri pharadiso ya pfanyisedzo i ri kwama hani na uri ndi ngani ri tshi tea u dzula ri khayo.

VHA RE KHA PHARADISO YA PFANYISEDZO VHA ḒIPFA HANI?

5. Samusi zwo fhulufhedziswa kha Yesaya 65:13, ndi mini zwine ra ḓiphiṋa ngazwo pharadisoni ya pfanyisedzo?

⁵ Vha ḓipfa vho fushea nga zwiḽiwa zwa pfanyisedzo nahone vho homolowa. Vhuporofita vhu re kha bugu ya Yesaya vhu sumbedza phambano ire hone vhukati ha vhathu vhane vha khou tshila pharadisoni ya pfanyisedzo na vhathu vhane vha si vhe kha pharadiso ya pfanyisedzo. (Vhalani Yesaya 65:13.) Yehova u ṋea vhashumeli vhawe zwoṱhe zwine vha zwi ṱoḓa uri vha dzule vhe na vhushaka ha tsini nae. Ri na muya wawe mukhethwa, Ipfi ḽawe na khandiso dzo thewaho Bivhilini dzine dza ita uri ri ‘ḽe, ri nwe, ri takale.’ (Vhambedzani Nzumbululo 22:17.) Kha ḽiṅwe sia vhane vha si vhe kha pharadiso ya pfanyisedzo vha na ‘nḓala, vha na ḓora nahone vha a shona.’ A vha na vhushaka na Mudzimu.—Amosi 8:11.

6. Yoele 2:21-24 i ṱalusa hani zwifhiwa zwine Yehova a ri ṋea zwone nahone zwi ri vhuyedza hani?

⁶ Kha vhuporofita hawe, Yoele o shumisa zwithu zwi ngaho mavhele, waini na mapfura u itela u sumbedza uri Yehova u ṋea vhathu vhawe nga mafunda zwithu zwine vha zwi ṱoḓa, u uri vha dzule vhe na lutendo lwo khwaṱhaho, u katela na vhulivhisi vhune ha bva Bivhilini. (Yoele 2:21-24) Sa tsumbo, o ri ṋea Bivhili, khandiso dzo thewaho Bivhilini, website yashu, miṱangano, maguvhangano na mabuthano. Ri nga vhuyelwa nga zwenezwi zwithu ḓuvha ḽiṅwe na ḽiṅwe nahone ri nga ḓipfa ro takala na u homolowa.

7. Ndi mini zwine zwa ita uri ri vhe na ‘vhuimo havhuḓi ha mbilu’? (Yesaya 65:14)

⁷ Vha ḓipfa vho takala na u fushea. Vhathu vha Mudzimu vha nga “pembela” nga nṱhani ha uri mbilu dzavho dzi fhufhuma nga dakalo na u livhuwa Yehova. (Vhalani Yesaya 65:14.) Ngoho ine ya ri khwaṱhisa lutendo na mafhulufhedziso a re Ipfini ḽa Mudzimu ane a ri khuthadza na lutendo lwashu lwo thewaho kha tshirengululi tsha Kristo zwi ita uri ri vhe na ‘vhuimo havhuḓi ha mbilu.’ U haseledza nga ha zwenezwi zwithu na vhahashu zwi ita uri ri takale zwa vhukuma.—Ps. 34:8; 133:1-3.

8. Ndi zwifhio zwithu zwivhili zwa ndeme zwine zwa ṱalusa pharadiso ya pfanyisedzo?

⁸ Lufuno na vhuthihi zwine zwa vha hone vhukati ha vhathu vha Yehova ndi zwone zwithu zwivhili zwa ndeme zwine zwa ṱalusa pharadiso ya pfanyisedzo. (Vhakol. 3:14) Zwenezwi ita uri ri humbule nga ha nḓila ine vhutshilo ha ḓo vha  vhu ngayo shangoni ḽiswa, hune vhashumeli vha Yehova vha ḓo funana na u vha na vhuthihi nga ho engedzeaho u fhira zwine zwa vha ngaho ṋamusi. Muṅwe wahashu wa tshifumakadzini o ṱalusa zwe a zwi ṱhogomela musi a tshi thoma u ṱangana na vhathu vha Yehova o ri: “Ndo vha ndi sa ḓivhi uri dakalo ndi mini, u katela na muṱani wahashu. Musi ndi tshi ṱangana na Ṱhanzi dza Yehova, ndi he nda thoma u vhona vhathu vha tshi khou sumbedzana lufuno lwa vhukuma.” Muṅwe na muṅwe ane a ṱoḓa u takala na u fushea u tea uri a ḓe pharadisoni ya pfanyisedzo. Hu sa londwi uri ḽino shango ḽi humbula mini nga ha vhashumeli vha Mudzimu, vha a ṱhonifhea nahone vha na dzina ḽavhuḓi kha Yehova na vhathu vhoṱhe vhane vha mu gwadamela.—Yes. 65:15.

9. Yesaya 65:16, 17 i fhulufhedzisa uri hu ḓo itea mini kha zwithu zwine zwa ri pfisa vhuṱungu na u ri tsikeledza?

⁹ Vha ḓipfa vho vhofholowa nahone vho dzika. Yesaya 65:14 i amba uri vhane vha khetha u vha nnḓa ha pharadiso ya pfanyisedzo vha a ‘lila nga nṱhani ha mbilu dzavho dzine dza pfa vhuṱungu, na nga nṱhani ha muya wavho wo kwashekanaho.’ Fhedzi hu pfi mini nga zwithu zwe zwa ita uri vhathu vha Mudzimu vha pfe vhuṱungu na u tsikeledzea? Hu si kale eneo maṱungu oṱhe a ḓo ‘hangwiwa na u dzumbiwa hune Mudzimu a sa ḓo a vhona.’ (Vhalani Yesaya 65:16, 17.) Yehova u ḓo ita uri zwithu zwoṱhe zwine zwa ri dina zwi si tsha vha hone nahone nga u ya ha tshifhinga a ri tsha ḓo dovha ra humbula thaidzo dzoṱhe dzine ra ṱangana nadzo.

10. Ndi ngani ni tshi livhuwa u vha na vhahaṋu vha Vhakriste? (Sedzani tshifanyiso.)

¹⁰ Ri pfa ro dzika musi ri miṱanganoni hune ra kona u ḓigeḓa na u sa livhisa ṱhogomelo kha mitsiko ya ḽino shango ḽivhi. Ri kona u thusa na vhahashu uri na vhone vha dzike musi ri tshi sumbedza zwiaṋwiwaho nga muya zwi ngaho lufuno, dakalo, mulalo, vhuthu na u vuḓa. (Vhagal. 5:22, 23) Ri pfa ri tshi livhuwa vhukuma u vha tshipiḓa tsha ndangulo ya Yehova! Vhane vha dzula vhe kha pharadiso ya pfanyisedzo vha ḓo vhona musi Mudzimu a tshi ita zwe a fhulufhedzisa zwa uri u ḓo sika “ḽiṱaḓulu ḽiswa na ḽifhasi ḽiswa.”

11. U ya nga Yesaya 65:18, 19, pharadiso ya pfanyisedzo yo sikwaho nga Yehova i fanela u ri kwama hani?

¹¹ Vha pfa vha tshi livhuwa nahone vho takala. Yesaya u bvela phanḓa na u dzumbulula uri ndi ngani ri tshi fanela uri ri ‘pembele na u takala’ musi ri pharadisoni ya pfanyisedzo. Yeneyi pharadiso ya pfanyisedzo yo sikwa nga Yehova. (Vhalani Yesaya 65:18, 19.) Nga zwenezwo, a zwi ri mangadzi uri Yehova u khou shumisa riṋe u itela u thusa vhathu uri vha bve kha zwiimiswa zwa shango zwine zwa si vha funze ngoho nga ha  Mudzimu, na u vha thusa uri vha vhe tshipiḓa tsha pharadiso ya pfanyisedzo. Ri takalela phaṱhutshedzo dzoṱhe dzine ra dzi wana nga nṱhani ha uri ri a ḓivha ngoho nahone zwi ri sudzulusela uri ri vhudze vhaṅwe nga hazwo.—Yer. 31:12.

12. Zwo fhulufhedziswaho kha Yesaya 65:20-24 zwi ita uri ni ḓipfe hani nahone ndi ngani?

¹² Ri a livhuwa vhukuma nahone ri takalela fhulufhelo ḽine ra vha naḽo sa vhadzulapo vha pharadiso ya pfanyisedzo. Humbulani nga ha zwithu zwoṱhe zwine ra ḓo zwi vhona na u zwi ita shangoni ḽiswa. Bivhili i fhulufhedzisa uri: “A hu tsha ḓo vha na ṅwana ane a tshila maḓuvha maṱuku . . . kana mukalaha ane a si fhedze maḓuvha awe.” Ri ḓo ‘fhaṱa nnḓu ra dzula khadzo na u ṱavha minḓirivhe ra ḽa mitshelo yayo.’ A ri nga “shumeli mahala” ngauri ri ḓo vha ro ‘fhaṱutshedzwa nga Yehova.’ O ri fhulufhedzisa uri ri ḓo vha na vhutshilo ho tsireledzeaho na vhu takadzaho, ri tshi ḓivha uri ri khou tshilela mini. ‘Musi ri sa athu vhidzelela,’ Yehova u ḓo vha a tshi ḓivha zwine ra ṱoḓa nahone u ḓo “fusha lutamo lwa tshiṅwe na tshiṅwe tshi tshilaho.”—Yes. 65:20-24; Ps. 145:16.

13. Yesaya 65:25 i ṱalusa hani tshanduko dze vhathu vha dzi ita vhutshiloni havho musi vha tshi thoma u shumela Yehova?

¹³ Vha na mulalo nahone vho tsireledzea. Vhathu vhe vha vha vha tshi ita zwa dzikhakhathi, vhuvemu kana u sa fhulufhedzea, Yehova o vha thusa uri vha ite tshanduko khulwane vhutshiloni havho. (Vhalani Yesaya 65:25.) Vho shuma nga maanḓa u itela u lwisana na vhuḓifari havho vhu si havhuḓi. (Vharoma 12:2; Vhaef. 4:22-24) Ndi ngoho uri sa vhathu vha Mudzimu ri kha ḓi vha na tshivhi, nga zwenezwo ri ḓo bvela phanḓa ri tshi ita vhukhakhi. Naho zwo ralo, Yehova o kuvhanganya “vhathu vhoṱhe” vhane vha mu funa na vhane vha funana nga tshavho uri vha vhe na mulalo wa vhukuma na vhuthihi. (Tito 2:11) Honovhu ndi vhuṱolo vhune ha nga itwa fhedzi nga Mudzimu Ramaanḓaoṱhe.

14. Zwo ambiwaho kha Yesaya 65:25 zwo itea hani kha muṅwe wahashu?

¹⁴ Naa vhathu vha nga shandula nḓila ine vha tshila ngayo? Ṱhogomelani tshenzhelo i tevhelaho. Muṅwe muṱhannga we musi e na miṅwaha ya 20 a vha a tshi dzulela u fariwa, o vha o ḓidzhenisa kha vhuḓifari vhuvhi na vhugevhenga. O vha o no farelwa u tswa goloi, u kwasha miḓini ya vhathu na miṅwe milandu mihulwane. O vha a tshi sokou dzula o lugela u thoma nndwa na muṅwe na muṅwe. Musi a tshi thoma u pfa ngoho i bvaho Bivhilini, o thoma u ya miṱanganoni ya Ṱhanzi dza Yehova. O vha e na vhungoho ha uri o wana zwiṅwe zwithu zwine a nga tshilela zwone, zwine zwa vha u gwadamela Yehova pharadisoni ya pfanyisedzo. Nga murahu ha musi o no lovhedzwa, kanzhi o vha a tshi dzulela u humbula nga ha nḓila ye luṅwalo lwa Yesaya 65:25 lwa shuma ngayo khae. O shanduka a si tsha tshila vhutshilo vhu ofhisaho vhu no nga ha ndau, a tshila vhutshilo ha mulalo vhu no nga ha ngwana.

15. Ndi ngani ri tshi khou ṱoḓa u ramba vhaṅwe uri vha ḓe vha vhe na riṋe pharadisoni ya pfanyisedzo nahone ri nga zwi itisa hani?

¹⁵ Yesaya 65:13 i thoma nga u amba uri: “Zwe Yehova Murena Muvhusahoṱhe a zwi amba ndi hezwi.” Vese ya 25 i fhela nga u amba uri: “U ralo Yehova.” Zwine a zwi amba zwi dzulela u itea. (Yes. 55:10, 11) Pharadiso ya pfanyisedzo ndi ya ngoho nahone i hone ṋamusi. Yehova o sika muṱa wa vhagwadameli vhawe wa ngoho wo khetheaho. Nga nṱhani ha uri ri tshipiḓa tsha muṱa wawe, ri na mulalo nga hune zwa nga konadzea ngaho nahone ri ḓipfa ro tsireledzea kha ḽino shango ḽo ḓalaho dzikhakhathi. (Ps. 72:7) Nga nṱhani ha zwenezwo, ri khou ṱoḓa u thusa vhathu vhanzhi nga hune zwa nga konadzea ngaho uri na vhone vha ḓe vha vhe tshipiḓa tsha muṱa washu wa Vhukriste. Ri ita zwenezwi nga u livhisa ṱhogomelo kha mushumo wa u ita vhafunziwa.—Mat. 28:19, 20.

 RI NGA THUSA HANI VHAṄWE URI VHA ḒE PHARADISONI YA PFANYISEDZO?

16. Ndi mini zwine zwa nga thusa vhathu uri vha ṱoḓe u ḓa pharadisoni ya pfanyisedzo?

¹⁶ Muṅwe na muṅwe washu u na mushumo wa ndeme une a fanela u u ita, wa u ita uri vhathu vha ḓe pharadisoni ya pfanyisedzo. Ri tea u edzisa Yehova uri ri kone u ita wonoyu mushumo. Yehova ha kombetshedzi vhathu uri vha ḓe vha vhe tshipiḓa tsha ndangulo yawe. Nṱhani hazwo u ‘kokodza’ vhathu nga vhulenda uri vha ḓe khae. (Yoh. 6:44; Yer. 31:3) Vhathu vha fhulufhedzeaho vhane vha guda nga ha lufuno lwa Yehova na zwine a vha zwone vha a sendela tsini nae. Zwithu zwavhuḓi zwine ra zwi ita na nḓila yavhuḓi ine ra ḓifara ngayo zwi nga ita hani uri vhathu vha ṱoḓe u ḓa pharadisoni ya pfanyisedzo?

17. Ri nga ita hani uri vhaṅwe vha tame u ḓa pharadisoni ya pfanyisedzo?

¹⁷ Iṅwe nḓila ine ra nga ita ngayo uri vhathu vha ṱoḓe u ḓa pharadisoni ya pfanyisedzo ndi nga u fara vhatendi nga riṋe nga lufuno na vhuthu. Musi vhathu vhaswa vho ḓa miṱanganoni ya tshivhidzo, ri ṱoḓa uri vha ḓipfe u fana na vhathu vhe vha vha vhe si vhatendi vhane vha nga vha vho ya tshivhidzoni kha Korinta tsha kale, vhe vha amba uri: “Vhukuma Mudzimu u vhukati haṋu.” (1 Vhakor. 14:24, 25; Sak. 8:23) Nga zwenezwo, ri fanela u bvela phanḓa ri tshi tevhela nyeletshedzo ya uri ‘ri vhe na mulalo nga tshashu.’—1 Vhathes. 5:13.

18. Ndi mini zwine zwa nga kunga vhathu uri vha ḓe ndanguloni yashu?

¹⁸ Ri tea u lwela u dzhia vhahashu vha Vhakriste nga nḓila ine Yehova a vha dzhia ngayo. Zwenezwo ri nga zwi ita nga u livhisa ṱhogomelo kha zwithu zwavhuḓi zwine vha zwi ita, nṱhani ha vhukhakhi havho vhune hu si kale ha ḓo vha vhu si tsheeho. Ri nga tandulula phambano dzine dza vha hone vhukati hashu nga nḓila ya lufuno arali ra dzula ri tshi ‘pfelana vhuṱungu na u hangwelana  zwi tshi bva mbiluni.’ (Vhaef. 4:32) Nahone zwenezwo zwi ḓo ita uri vhathu vhane vha takalela u farwa nga nḓila i fanaho vha pfe vha tshi kungea u ḓa pharadisoni ya pfanyisedzo. b

DZULANI NI PHARADISONI YA PFANYISEDZO

19. (a) Samusi zwo sumbedzwa kha bogisi “ Vho Ṱuwa Vha Dovha Vha Vhuya,” ndi mini zwe vhaṅwe vha zwi amba musi vha tshi vhuyelela pharadiso ya pfanyisedzo? (b) Ri tea u ḓiimisela u ita mini? (Sedzani tshifanyiso.)

¹⁹ Ri a livhuwa zwihulu u vha kha pharadiso ya pfanyisedzo. Yo naka u fhira naho hu lini nahone yo ḓala nga vhathu vhane vha renda Yehova u fhira na hu lini. Ngavhe roṱhe ri tshi dzula ri tshi livhuwa pharadiso ye Yehova a ri itela yone lini na lini. Muṅwe na muṅwe ane a ṱoḓa u homoloswa, u fushea, u dzika na u tsireledzea u fanela u ḓa pharadisoni ya pfanyisedzo nahone a dzule e khayo! Naho zwo ralo, ri tea u ḓiṱhogomela ngauri Saṱhane u khou lingedza zwoṱhe zwine a nga kona u itela u ri kunga uri ri bve khayo. (1 Pet. 5:8; Nzumb. 12:9) Ri songo mu tendela. Ri fanela u shuma nga maanḓa u itela u tsireledza lunako lwa pharadiso ya pfanyisedzo na u ita uri i dzule yo kuna, hu na mulalo.