Naa No Vha Ni Tshi Zwi Ḓivha?
Ndi ngani kha mmbi ya Davida ho vha hu na vhanna vhe vha vha vhe si Vhaisiraele?
KHA mmbi ya Davida ho vha hu na vhanna vhe vha vha vhe si Vhaisiraele vha ngaho Tseleke wa Muamoni, Uria wa Muhethe na Yithima wa Mumoaba. a (1 Koron. 11:39, 41, 46) Kha mmbi ya Davida ho vha hu na ‘Vhakireti, Vhapelethi na Vhagathi.’ (2 Sam. 15:18) Zwi vhonala uri Vhakireti na Vhapelethi vho vha vhe na vhushaka ha tsini na Vhafilisita. (Hesek. 25:16) Nahone Vhagathi vho vha vha tshi dzula muḓini wa Gathi u re ngei Filisita.—Yosh. 13:2, 3; 1 Sam. 6:17, 18.
Ndi ngani Davida o tendela vhenevho vhanna vha tshi lwa kha mmbi yawe? O vha e na vhungoho ha uri vhenevho vhanna vha ḓo fhulufhedzea khae na kha Yehova. Sa tsumbo, iṅwe ṱhalusamaipfi ya Bivhili i amba zwi tevhelaho nga ha Vhakireti na Vhapelethi i ri: “Vho dzula vha tshi fhulufhedzea kha Davida na nga zwifhinga zwi konḓaho musi a tshi khou vhusa.” Vho sumbedza hani u fhulufhedzea? Musi “vhanna vhoṱhe vha Isiraele” vha tshi ṱutshela Khosi Davida vha tevhela “munna a sa ḓivhalei ane a pfi Sheba,” Vhakireti na Vhapelethi vho dzula vha tshi fhulufhedzea kha Davida nahone vha mu thusa u thivhela vhushandukwa ha Sheba. (2 Sam. 20:1, 2, 7) Kha tshiṅwe tshiitea, Adonia murwa wa Khosi Davida o lingedza u dzhavhula vhuhosi. Fhedzi Vhakireti na Vhapelethi vha dzula vha tshi fhulufhedzea kha Davida nahone vha thusa kha u vhea Salomo sa khosi ngauri o vha e ene we Yehova a mu nanga.—1 Dzikh. 1:24-27, 38, 39.
Ithai wa Mugathi o vha e si Muisiraele fhedzi o bvela phanḓa a tshi fhulufhedzea kha Davida. Ithai na maswole awe a 600 vho tikedza Khosi Davida musi Abesalomo murwa wa Davida a tshi shandukela khosi na u ita uri vhathu vha Isiraele vha mu tikedze nṱhani ha u tikedza khosi. U thomani Davida o vhudza Ithai uri o vha a songo tea u mu lwela sa izwi o vha e si Muisiraele. Fhedzi Ithai a ri: “Ndi ana nga Yehova a tshilaho na nga thovhela muṋe wanga a tshilaho, hune thovhela muṋe wanga a ḓo ya hone, ndo ḓiimisela u fa nae!”—2 Sam. 15:6, 18-21.
Ithai o fhulufhedzea kha Davida, we a vha e khosi yo ḓodzwaho nga Yehova
Naho Vhakireti, Vhapelethi na Vhagathi vho vha vhe si Vhaisiraele, vho vha vha tshi ṱhonifha Yehova sa Mudzimu wa ngoho na Davida sa khosi yo ḓodzwaho nga Yehova. Zwi tou pfala uri Davida o takalela u tikedzwa nga vhenevha vhanna vha fhulufhedzeaho nga u ralo.
a Mulayo wa Mudzimu u re kha Dotoronomio 23:3-6 wo vha u tshi thivhela Vhaamoni na Vhamoaba u ḓa tshivhidzoni tsha Vhaisiraele. Naho zwo ralo, zwi vhonala uri wonoyo mulayo wo vha u tshi khou ambela kha u vha tshipiḓa tsha lushaka nga lwa mulayo nahone wo vha u sa thivheli vhenevho vhathu vhane vha si vhe Vhaisiraele u konana na vhathu vha Mudzimu kana u dzula navho. Vhalani mafhungo a re fhasi ha tshiṱohwana “Intermarriage With Israelites” kha Insight on the Scriptures, Voḽumu 1, siaṱ. 95.
