1. Vhaṅwe vha ḓipfa hani nga mushumo wa u huwelela? (Sedzani tshifanyiso.)

 SA VHATHU vha Yehova, ri huwelela kha vhathu ngauri ri funa Khotsi ashu wa ṱaḓulu na uri ri khou ṱoḓa u vha thusa uri na vhone vha fune Yehova. Vhunzhi ha vhahuweleli vha a ḓiphiṋa nga mushumo wa u huwelela. Fhedzi vhaṅwe vha wana zwi tshi vha konḓela u ḓiphiṋa nga wonoyu mushumo. Ndi ngani? Vhaṅwe vha nga vha vhe na ṱhoni nahone vha tshi vhona u nga a vha koni u gudisa. Vhaṅwe zwi a vha konḓela u ya miḓini ya vhathu vha songo rambiwa. Vhaṅwe vha ofha uri vhathu vha ḓo vha sinyutshela. Vhaṅwe vho gudiswa uri vha tea u iledza u sinyusa vhaṅwe. Naho vhenevho vhahashu vha tshi funa Yehova nga maanḓa, zwi a vha konḓela u huwelela mafhungo maḓifha kha vhathu vhane vha si vha ḓivhe. Fhedzi vha a zwi ḓivha uri wonoyu mushumo ndi wa ndeme nahone vha dzula vha tshi u ita. Zwenezwo zwi a takadza Yehova vhukuma.

2. Arali nga zwiṅwe zwifhinga zwi tshi ni konḓela u takala musi ni tshi khou huwelela, ndi ngani ni songo tea u kulea nungo?

² Naa na inwi nga tshiṅwe tshifhinga ni wana zwi tshi ni konḓela u ḓiphiṋa nga mushumo wa u huwelela zwi tshi itiswa nga zwithu zwo ambiwaho afho nṱha? Arali zwo ralo ni songo kulea nungo. U sa ḓifhulufhela haṋu zwi nga sumbedza uri ni a ḓiṱukufhadza na uri a ni ṱoḓi u ḓikokodzela maṱo. Zwi nga dovha zwa sumbedza uri a ni ṱoḓi u ṱaṱa khani na vhathu. Nahone a hu na muthu ane a ṱoḓa u sinyusa vhaṅwe, zwihuluhulu musi a tshi khou lingedza u vha itela zwithu zwavhuḓi. Khotsi aṋu wa ṱaḓulu u a ḓivha zwavhuḓi thaidzo dzine na sedzana nadzo nahone u khou ṱoḓa u ni thusa. (Yes. 41:13) Kha ino thero, ri ḓo haseledza zwithu zwiṱanu zwine zwa ḓo ni thusa u lwisana na eneo maḓipfele  na u ni thusa uri ni vhe na dakalo musi ni tshi khou ita mushumo wa u huwelela.

TENDELANI IPFI ḼA MUDZIMU ḼI TSHI NI KHWAṰHISA

3. Yeremia o thuswa nga mini uri a kone u huwelela kha vhaṅwe?

³ U bva tshifhingani tsha kale, mulaedza wa Mudzimu wo khwaṱhisa vhashumeli vhawe vhe vha vha vha tshi tea u ita mushumo u konḓaho. Kha ri ambe nga ha tsumbo ya muporofita Yeremia. O vha a tshi khou timatima musi Yehova a tshi mu ṋea mushumo wa u huwelela. Yeremia o ri: “A thi koni u amba, ngauri ndi kha ḓi vha mutukana.” (Yer. 1:6) Ndi mini zwe zwa mu thusa uri a vhe na tshivhindi tsha u huwelela? O khwaṱhiswa nga zwe Mudzimu a mu vhudza zwone. O ri: “Ipfi ḽawe ḽa nga mulilo u re maramboni anga, nda si tsha kona u ḓifara.” (Yer. 20:8, 9) Naho Yeremia o vha a tshi tea u huwelela tsimuni i konḓaho, mulaedza we a vha o ṋewa uri a u huwelele wo mu khwaṱhisa uri a kone u ita wonoyo mushumo.

4. Ndi mini zwine zwa itea musi ri tshi vhala Ipfi ḽa Mudzimu na u elekanya nga haḽo? (Vhakolosa 1:9, 10)

⁴ Vhakriste vha wana nungo dzine vha dzi ṱoḓa Ipfini ḽa Mudzimu. Musi muapostola Paulo a tshi ṅwalela tshivhidzo tsha Kolosa, o amba uri u wana nḓivho yo teaho zwi ḓo ṱuṱuwedza vhahawe uri vha “tshile nga nḓila i rendisaho Yehova” musi vha tshi khou bvela phanḓa na u ita “mishumo mivhuya.” (Vhalani Vhakolosa 1:9, 10.) Yeneyo mishumo mivhuya i katela u huwelela mafhungo maḓifha. Nga zwenezwo, musi ri tshi vhala Ipfi ḽa Mudzimu na u elekanya nga haḽo, lutendo lwashu kha Yehova lu a khwaṱha nahone ra vhona uri ndi ngani zwi zwa ndeme u huwelela mulaedza wa Muvhuso.

5. Ndi mini zwine ra nga zwi ita uri ri vhuyelwe nga ho engedzeaho nga Ipfi ḽa Mudzimu?

⁵ U itela u vhuyelwa nga ho engedzeaho nga Ipfi ḽa Mudzimu, ri tea u ḓiṋea tshifhinga tsho eḓanaho tsha u vhala, u guda na u elekanya nga haḽo. Ri songo zwi ita ro dzhaha. Arali na vhala luṅwalo lune zwa khou ni konḓela u lu pfesesa, ni songo sokou fhira. Nṱhani hazwo, gudani zwo engedzeaho nga ha lwonolo luṅwalo ni tshi shumisa Watch Tower Publications Index kana Research Guide for Jehovah’s Witnesses. Arali na ḓiṋea tshifhinga musi ni tshi khou guda, zwi ḓo ita uri ni vhe na fhulufhelo ḽo engedzeaho kha uri zwine Bivhili ya zwi amba ndi ngoho. (1 Vhathes. 5:21) U vha na vhungoho ho engedzeaho zwi ḓo ni thusa uri ni ḓiphiṋe nga u vhudza vhaṅwe zwe na zwi guda.

 LUGISELELANI ZWAVHUḒI NI SA ATHU YA U HUWELELA

6. Ndi ngani ri tshi tea u lugiselela zwavhuḓi ri sa athu ya u huwelela?

⁶ Arali ra lugiselela zwavhuḓi ri sa athu ya u huwelela, zwi ḓo ita uri ri pfe ro vhofholowa musi ri tshi amba na vhaṅwe. Yesu o thusa vhafunziwa vhawe u lugiselela musi vha sa athu ya u huwelela. (Luka 10:1-11) Nga nṱhani ha uri vho shumisa zwe Yesu a vha gudisa zwone, vho kona u ita zwithu zwinzhi zwavhuḓi nahone zwa ita uri vha takale.—Luka 10:17.

7. Ri nga lugiselela hani musi ri sa athu ya u huwelela? (Sedzani tshifanyiso.)

⁷ Ri nga lugiselela hani musi ri sa athu ya u huwelela? Ri tea u humbulisisa zwavhuḓi nga ha zwine ra ḓo zwi amba nahone ri zwi ambe nga maipfi ashu na nga nḓila ya nzulele. Zwi a thusa u humbula nga ha nḓila dzine vhathu vha nga fhindula ngadzo na u ḓivha uri riṋe ri ḓo ri mini musi vha tshi fhindula nga u ralo. Nga murahu ha zwenezwo, musi ni tshi amba na vhathu ni lingedze u dzika, u ṅwethuwa na u sumbedza uri ni na ndavha navho.

8. Vhakriste vha fana hani na midzio yo ambiwaho nga Paulo?

⁸ Muapostola Paulo o vhudza vhahawe vha Vhakriste uri: “Ri na lupfumo kha midzio ya vumba.” (2 Vhakor. 4:7) Ndi lufhio lupfumo lune a khou amba nga halwo? Ndi mushumo wa u huwelela mafhungo maḓifha a Muvhuso une wa tshidza vhathu. (2 Vhakor. 4:1) Midzio i imela mini? I imela vhashumeli vha Mudzimu vhane vha vhudza vhaṅwe mafhungo maḓifha. Tshifhingani tsha Paulo, vharengisi vho vha vha tshi shumisa midzio ya vumba u itela u hwala zwithu zwa ndeme zwi ngaho sa zwiḽiwa, waini na tshelede. Nga hu fanaho na ṋamusi, Yehova o ri ṋea mulaedza wa ndeme vhukuma wa u huwelela mafhungo maḓifha. Yehova a nga ri thusa uri ri vhe na nungo dza u bvela phanḓa ri tshi huwelela.

RABELANI URI NI VHE NA TSHIVHINDI

9. Ri nga ita mini uri ri si tsha ofha vhathu kana u pikiswa? (Sedzani tshifanyiso.)

⁹ Nga tshiṅwe tshifhinga ri nga pfa ri tshi ofha vhathu na u ofha u pikiswa. Ri nga kunda hani yeneyo thaidzo? Ṱhogomelani zwe zwa itwa nga vhaapostola musi vha tshi vhudzwa u pfi vha litshe u huwelela. Nṱhani ha u ofha, vho rabela kha Yehova uri a vha thuse uri “vha dzule vha tshi amba ipfi [ḽawe] nga tshivhindi.” Yehova o fhindula thabelo yavho nga u ṱavhanya.  (Mish. 4:18, 29, 31) Arali ri tshi ofha vhathu nga tshiṅwe tshifhinga, na riṋe ri tea u rabela ra humbela Yehova uri a ri thuse musi ri tshi ita mushumo wa u huwelela. Humbelani Yehova uri a ni thuse uri ni fune vhathu nga ho engedzeaho uri ni sa ofhe u vha vhudza mafhungo maḓifha.

10. Yehova u ri thusa hani uri ri kone u ita mushumo wa u huwelela? (Yesaya 43:10-12)

¹⁰ Yehova o ri nanga uri ri vhe Ṱhanzi dzawe. O fhulufhedzisa uri u ḓo ri thusa uri ri vhe na tshivhindi. (Vhalani Yesaya 43:10-12.) Ṱhogomelani nḓila nṋa dzine a ri thusa ngadzo. Ya u thoma, Yesu u dzula e na riṋe tshifhinga tshoṱhe musi ri tshi khou huwelela mafhungo maḓifha. (Mat. 28:18-20) Ya vhuvhili, Yehova o vhea vharuṅwa uri vha ri thuse. (Nzumb. 14:6) Ya vhuraru, o ri ṋea muya mukhethwa uri u ri humbudze zwithu zwe ra zwi guda. (Yoh. 14:25, 26) Ya vhuṋa, Yehova o ri ṋea vhahashu vhane ra ṱuwa navho musi ri tshi ya u huwelela. Nga thuso ya Yehova na thikhedzo ine ra i wana kha vhahashu, ri na zwoṱhe zwine ra zwi ṱoḓa uri ri kone u vha na tshivhindi na u dzula ri tshi huwelela.

TENDELANANI NA ZWIIMO NAHONE NI VHE NA MAVHONELE AVHUḒI

11. Ni nga wana hani vhathu vhanzhi musi ni tshi khou huwelela? (Sedzani tshifanyiso.)

¹¹ Naa ni a pfa no kulea nungo musi ni sa wani vhathu vhanzhi mahayani? Ndi ngani ni sa ḓivhudzisi uri: ‘Vhathu vha tsimuni yashu vha vha vha gai nga itshi tshifhinga?’ (Mish. 16:13) ‘Naa vha mushumoni kana vha mavhengeleni?’ Arali zwo ralo, naa ni nga wana vhathu vhanzhi arali na huwelela tshiṱaraṱani? Muṅwe wahashu ane a pfi Joshua u ri: “Ndi wana zwibuli zwo engedzeaho zwa u huwelela mavhengeleni na fhethu ha vhomuthumunzhi.” Ene na mufumakadzi wawe Bridget vho wana vhathu vhanzhi vhe mahayani musi vha tshi ya nga tshikovhelelo na nga Swondaha nga masiari.—Vhaef. 5:15, 16.

12. Ni nga ḓivha hani zwine vhathu vha zwi tenda kana zwine zwa vha vhilaedzisa?

¹² Arali vhathu vha sumbedza u sa vha na dzangalelo kha mulaedza waṋu, lingedzani u wanulusa uri ndi zwifhio zwine vha zwi tenda kana ndi mini zwine zwa vha vhilaedzisa. Joshua na Bridget vha shumisa mbudziso i re nga nnḓa ha tshibammbiri musi vha tshi amba na  vhathu. Sa tsumbo, musi vha tshi shumisa tshibammbiri tshine tsha ri Ni Humbula Mini Nga ha Bivhili? vha ri: “Vhaṅwe vhathu vha dzhia Bivhili sa bugu i bvaho ha Mudzimu, vhaṅwe a vha i dzhii nga u ralo. Inwi ni humbula mini nga hayo?” Kanzhi zwenezwo zwi ita uri vha vhe na nyambedzano.

13. Ndi ngani ri tshi vha ro swikelela tshipikwa musi ri tshi huwelela naho vhathu vha songo thetshelesa? (Mirero 27:11)

¹³ Naho arali vhathu vha sa thetshelesi musi ri tshi huwelela, ri vha ro swikelela tshipikwa tshashu. Ndi ngani? Ngauri ri vha ro ita zwine Yehova na Murwa wawe vha ṱoḓa ri tshi zwi ita, ri vha ro huwelela. (Mish. 10:42) Naho ra sa wana muthu ane ra nga huwelela khae kana musi vha sa thetshelesi mulaedza washu, ri nga wana dakalo nga u ḓivha uri ri khou takadza Khotsi ashu wa ṱaḓulu.—Vhalani Mirero 27:11.

14. Ndi ngani ri tshi takala musi muṅwe muhuweleli a tshi wana muthu a re na dzangalelo tsimuni?

¹⁴ Ri nga takala musi muṅwe muhuweleli a tshi wana muthu a re na dzangalelo musi ri tsimuni. Tshiingamo tsho fanyisa mushumo washu na mushumo wa u ṱoḓa ṅwana o xelaho. Hu vha na vhathu vhanzhi vhane vha shela mulenzhe kha u ṱoḓa onoyo ṅwana nahone vha mu ṱoḓa fhethu hunzhi. Musi ṅwana a tshi wanala, a hu takali we a mu wana fhedzi, vhathu vhoṱhe vha a takala. Nga hu fanaho, vhathu vhoṱhe tshivhidzoni vha a shela mulenzhe kha u ita vhathu vhafunziwa. Hu ṱoḓea vhathu vhoṱhe tshivhidzoni uri vha huwelele kha vhathu vhoṱhe kha tsimu ya tshivhidzo nahone vha a takala musi muthu muswa a tshi thoma u ḓa miṱanganoni.

LIVHISANI ṰHOGOMELO KHA NḒILA INE NA FUNA NGAYO YEHOVA NA VHATHU

15. U shumisa zwi re kha Mateo 22:37-39 zwi nga ri thusa hani u fhisea nga ho engedzeaho mushumoni wa u huwelela? (Sedzani tshifanyiso.)

¹⁵ Ri nga fhisea nga ho engedzeaho kha mushumo wa u huwelela arali ra livhisa ṱhogomelo kha nḓila ine ra funa ngayo Yehova na vhathu. (Vhalani Mateo 22:37-39.) Humbulani uri Yehova u ḓo takala hani musi a tshi vhona ri tshi khou ita wonoyo mushumo na nḓila ine vhathu vha ḓo takala ngayo musi vha tshi thoma u guda Bivhili! Ni humbule na uri vhane vha ḓo thetshelesa mulaedza washu nahone vha khetha u shumela Yehova vha nga wana tshibuli tsha u tshila lwa tshoṱhe.—Yoh. 6:40; 1 Tim. 4:16.

16. Ri nga wana hani dakalo kha mushumo wa u huwelela musi ri sa koni u bva hayani? Ṋeani tsumbo.

 ¹⁶ Naa vhuimo haṋu a vhu ni tendeli u bva hayani? Arali zwo ralo, livhisani ṱhogomelo kha zwine na nga kona u zwi ita u itela u sumbedza uri ni a funa Yehova na vhathu. Nga tshifhinga tsha dziedzi ḽa Corona, vhuimo ha Vho Samuel na Vho Dania ho vha vhu sa vha tendeli u bva hayani. Nga tshenetsho tshifhinga tshi konḓaho, vho vha vha tshi huwelela vha tshi shumisa founu, u ṅwala marifhi na u fara pfunzo dza Bivhili vha tshi shumisa Zoom. Vho Samuel vho huwelela kha vhathu vhe vha ṱangana navho kiḽiniki he vha vha vha tshi khou lafhiwa hone khentsara. Vha ri: “Musi ro sedzana na zwiimo zwi konḓaho, ri nga pfa ri tshi khou vhilaela, ro neta nahone lutendo lwashu lu nga lingwa. Ri tea u wana dakalo kha u shumela Yehova.” Nga tshenetsho tshifhinga, Vho Dania vho wa nahone vha vha vha sa koni u bva mmbeteni lwa miṅwedzi miraru. Nahone nga murahu ha zwenezwo, vho tea u tshimbila nga wheelchair lwa miṅwedzi ya rathi. Vha ri: “Ndo lingedza u ita zwoṱhe zwine vhuimo hanga ha ntendela. Ndo kona u huwelela kha nese we a vha a tshi ḓa muḓini wanga na kha vhathu vhe vha vha vha tshi ḓisa zwithu. Nahone ndo kona u vha na nyambedzano dzavhuḓi nga founu na vhaṅwe mufumakadzi vhane vha shuma kha iṅwe khamphani ya zwa ngalafho.” Naho Vho Samuel na Vho Dania vho vha vha sa koni u ita zwe vha vha vha tshi kona u ita u thomani, vho ita zwe vha vha vha tshi nga kona nahone vha wana dakalo.

17. Ndi mini zwine na nga zwi ita uri ni vhuyelwe nga zwithu zwe ra zwi haseledza kha ino thero?

¹⁷ Lingedzani u shumisa zwithu zwiṱanu zwe ra amba ngazwo kha ino thero. Zwenezwi zwithu zwiṱanu zwi tou nga zwithu zwine na zwi shela musi ni tshi khou bika. Arali na shela zwenezwi zwithu zwoṱhe musi ni tshi khou bika, ni nga kona u bika zwiḽiwa zwavhuḓi zwi ḓifhelelaho. Nga hu fanaho, arali na shumisa zwenezwi zwithu zwoṱhe zwo haseledzwaho kha ino thero, zwi ḓo ni thusa uri ni vhe o lugelaho u kunda maḓipfele a si avhuḓi na uri ni kone u wana dakalo mushumoni wa u huwelela.