1. Ndi dzifhio nḓila dzine ra nga shumisana ngadzo na Yehova?

MUSI Mudzimu o no sika vhathu, o vha a tshi ṱoḓa uri vha shumisane nae u itela u khunyeledza zwine a ṱoḓa u zwi ita. Vhathu vha fulufhedzeaho vha nga shumisana na Yehova ḓuvha ḽiṅwe na ḽiṅwe, hu sa londwi u sa fhelela havho. Sa tsumbo, ri “vhashumisani na Mudzimu” musi ri tshi huwelela mafhungo maḓifha a Muvhuso wawe na u ita vhafunziwa. (1 Vhakor. 3:5-9) Ndi ndugelo khulwane vhukuma u shumisana na Musiki wa fhethu hoṱhe kha u ita mushumo une a u dzhia u wa ndeme! Fhedzi, u huwelela na u ita vhafunziwa a si dzone nḓila dzi dzoṱhe dzine ra shumisana ngadzo na Yehova. Ino thero i ḓo haseledza dziṅwe nḓila dzine ra nga shumisana ngadzo na Mudzimu—u thusa muṱa washu na vhaṅwe tshivhidzoni, u ṱanganedza vhaeni, u shuma nga u ḓifunela na u ita zwo engedzeaho tshumeloni khethwa.—Vhakol. 3:23.

2. Ndi ngani zwi si vhuṱali u vhambedza zwine ra nga kona u itela Yehova na zwine vhaṅwe vha nga kona u mu itela zwone?

² Musi ri tshi khou haseledza dzenedzi nḓila, ri songo vhambedza zwine ra nga kona u itela Yehova na zwine vhaṅwe vha nga kona u mu itela zwone. Humbulani uri miṅwaha, mutakalo, zwiimo na vhukoni vhune ra vha naho a zwi fani. Muapostola Paulo o ri: “Muṅwe na muṅwe kha ṱolisise mishumo yawe, nga zwenezwo u ḓo vha na  tshiitisi tsha u takala ene muṋe, a sa ḓivhambedzi na muṅwe muthu.”—Vhagal. 6:4.

3. Ndi ngani hu tshi nga ambiwa uri muthu muṅwe na muṅwe ane a ṱunḓela muṱa wawe u vha a tshi khou shumisana na Mudzimu?

³ Yehova u lavhelela uri vhashumeli vhawe vha ṱhogomele miṱa yavho. Sa tsumbo, ni nga shuma u itela u ṱunḓela muṱa waṋu. Vho-mme vhanzhi vha dzula hayani u itela u ṱhogomela vhana vhavho. Vhaṅwe vhana vhane vha vha vhahulwane vha nga tea uri vha ṱhogomela vhabebi vhavho vhane vha si vhe na mutakalo wavhuḓi. Yeneyi ndi mishumo ya ndeme. Bivhili i ri: “Arali muthu a sa ṱhogomeli vhahawe, zwihuluhulu miraḓo ya muṱa wawe, o landula lutendo nahone ndi muvhi u fhira muthu a si na lutendo.” (1 Tim. 5:8) Arali ni na vhuḓifhinduleli ho raloho, ni nga si kone u vhetshela tshifhinga tshinzhi thungo u itela u ita zwo engedzeaho tshumeloni ya Mudzimu u fana na nḓila ye na vha ni tshi nga takalela u zwi ita ngayo. Fhedzi ni songo neta! Yehova u a takala musi ni tshi ṱunḓela muṱa.—1 Vhakor. 10:31.

4. Vhabebi vha nga rangisa hani mushumo wa Yehova u thoma, nahone hu vha na mvelelo dzifhio?

⁴ Vhabebi vha Vhakriste vha shumisana na Yehova Mudzimu musi vha tshi thusa vhana vhavho uri vha ḓivhetshele zwipikwa tshumeloni ya Mudzimu. Vhunzhi ha vhabebi vhe vha ita nga u ralo, vho vhona vhana vhavho vha tshi dzhenela tshumelo ya tshifhinga tsho ḓalaho nahone vha shuma kule na hayani havho. Vhaṅwe ndi vharumiwa; vhaṅwe vha khou vula nḓila fhethu hune ha vha na ṱhoḓea khulwane ya vhahuweleli; vhaṅwe vha shuma Bethele. U vha havho kule na hayani, zwi nga ita uri zwi vha konḓele u fhedza tshifhinga na miṱa yavho nga nḓila ye vha vha vha tshi nga takalela u zwi ita ngayo. Fhedzi vhabebi vhane vha ḓidzima zwithu zwinzhi vha ṱuṱuwedza vhana vhavho uri vha bvele phanḓa vha tshi shumela Yehova hu sa londwi uri vha mu shumela vhe ngafhi. Ndi ngani? Zwi a vha takadza vhukuma u ḓivha uri vhana vhavho vha khou rangisa Yehova u thoma. (3 Yoh. 4) Khamusi vhenevha vhabebi vhanzhi vha ḓipfa u fana na Hanna we a amba uri o “kumedzela” Samuele murwa wawe kha Yehova. Vhabebi vha dzhia u shumisana na Yehova nga yeneyi nḓila hu ndugelo khulwane vhukuma.—1 Sam. 1:28.

5. Ni nga thusa hani vhaṅwe tshivhidzoni tshaṋu? (Sedzani tshifanyiso tsha u thoma.)

⁵ Arali ni si na vhuḓifhinduleli ho engedzeaho muṱani, naa ni nga thusa vhaṅwe tshivhidzoni vhane vha khou ṱhogomela vhathu vhane vha si vhe na mutakalo wavhuḓi, vhaaluwa kana u thusa vhaṅwe nga zwine vha zwi ṱoḓa? Ndi ngani ni sa sedzi tshivhidzoni tshaṋu nahone ni ḓivhe vhane vha ṱoḓa thuso? Khamusi hu na wahashu wa tshifumakadzini ane a khou ṱhogomela vhabebi vhawe vho no vhaho vhalala. Naa ni nga fhedza tshifhinga ni na vhabebi vhawe u itela uri a kone u ita miṅwe mishumo? Kana khamusi ni nga thusa vhaṅwe nga u ṱuwa navho miṱanganoni, mavhengeleni, u vha itela zwithu kana u ṱuwa navho sibadela u itela u ṱolela muṅwe muthu. U ita nga u ralo, ni nga vha ni tshi khou shuma na Yehova u itela u fhindula thabelo.—Vhalani 1 Vhakorinta 10:24.

6. Ri nga ṱanganedza hani vhaeni?

⁶ Vhashumisani na Mudzimu vha vhonala nga u ṱanganedza vhaeni. (Vhaheb. 13:2) Bivhilini, hu na tsumbo dzine ra nga dzi edzisa dza nḓila dzine ra nga ṱanganedza ngadzo vhaeni. (Gen. 18:1-5) Ri nga kona u ṱanganedza vhaeni nahone ri fanela u sedza zwibuli zwine ra nga thusa ngazwo vhaṅwe tshifhinga tshoṱhe, hu sa londwi uri “vha na lutendo lu fanaho na lwashu” kana hai.—Vhagal. 6:10.

7. Hu vha na mbuyelo dzifhio musi ni tshi ṱanganedza vhane vha vha tshumeloni ya tshifhinga tsho ḓalaho?

⁷ Naa ni nga shumisana na Yehova nga u ṱanganedza  vhaeni musi ni tshi dalelwa nga vhane vha vha tshumeloni ya tshifhinga tsho ḓalaho? (Vhalani 3 Yohane 5, 8.) Zwiitea zwo raliho zwi vula zwibuli zwa u ‘ṱuṱuwedzana.’ (Vharoma 1:11, 12) Ṱhogomelani tsumbo ya Olaf. O amba uri miṅwahani yo fhiraho, muṅwe mulavhelesi wa ḽiisela we a vha e siho mbinganoni o dalela tshivhidzo tshawe nahone o vha a tshi ṱoḓa fhethu ha u dzula, fhedzi ho vha hu si na na muthu na muthihi tshivhidzoni tshawe we a vha a tshi nga kona u mu thusa. Olaf we a vha a tshee muswa o humbela vhabebi vhawe vha ne vha si vhe Dziṱhanzi arali vha tshi nga swielela mulavhelesi wa ḽiisela. Vhabebi vhawe vho tenda, fhedzi vha amba uri Olaf u ḓo tea u eḓela kha sofa. U ita zwenezwo zwithu zwo mu vhuyedza vhukuma. Olaf o ri: “Yo vha vhege yavhuḓi vhukuma!” Nṋe na mulavhelesi wa ḽiisela ro vha ri tshi vuwa nga matsheloni ra vha na khaseledzo dzi takadzaho vhukuma musi ri tshi khou ḽa zwiḽiwa zwa nga matsheloni. Ṱhuṱhuwedzo ye nda i wana yo ita uri ndi vhe na lutamo lwa u vha tshumeloni ya tshifhinga tsho ḓalaho.” Olaf o no fhedza miṅwaha ya 40 e tshumeloni dzo fhamba-fhambanaho dza vhurumiwa.

8. Ndi ngani ri tshi tea u vha na vhuthu naho vhaṅwe vhathu vha sa zwi dzhieli nṱha? Ṋeani tsumbo.

⁸ Ni nga sumbedza lufuno kha vhatsinda nga nḓila nnzhi naho vha sa dzhieli nṱha vhuḓidini vhune na khou vhu ita. Ṱhogomelani tsumbo i tevhelaho. Muṅwe muhuweleli wa ngei Spain, o vha a tshi khou guda Bivhili na muṅwe mugudiswa wawe ane a pfi Yesica ane a bva ngei Ecuador. Musi pfunzo i kati, onoyo mugudiswa o mbo ḓi thoma u lila. Onoyo muhuweleli o mu vhudzisa uri ndi ngani a tshi khou lila. Yesica o amba uri musi a sa athu u pfuluwa, o vha a tshi shaya lwe ḽiṅwe ḓuvha a vha a si na zwiḽiwa, fhedzi zwithu zwe a vha a tshi kona u ṋea ṅwana wawe nga ḽeneḽo ḓuvha ho vha hu maḓi fhedzi. Yesica o lingedza u fhembeledza ṅwana wawe uri a eḓele ngeno a tshi khou rabela u itela uri a wane thuso. Nga u ṱavhanya, Yesica o dalelwa nga Ṱhanzi mbili, fhedzi ho ngo vha ṱanganedza zwavhuḓi nahone o kherukanya magazini we dzenedzo Ṱhanzi dza mu ṋea wone. O vhudzisa uri: “Naa izwi ndi zwone zwiḽiwa zwine na khou ṱoḓa ndi tshi ṋea ṅwananyana wanga?” Dzenedzo Ṱhanzi dzo lingedza u mu khuthadza, fhedzi zwe vha zwi ita ho vha hu u shela maḓi nṱha ha tombo. Nga murahu, vho sia zwiḽiwa muṋangoni wa nnḓu yawe. Yesica o kwamea vhukuma nga vhuthu ha dzenedzo Ṱhanzi nahone o ḓisola nge a si dzhiele nṱha nḓila ye Mudzimu a fhindula ngayo thabelo yawe. Zwino o ḓiimisela u shumela Yehova. U vha havho na mafunda zwo ita uri hu vhe na mvelelo dzavhuḓi vhukuma!—Muh. 11:1, 6.

9, 10. (a) Ndi kha mishumo ifhio ye Vhaisiraele vha vha vha tshi tea uri vha shume nga u ḓifunela? (b) Vhahashu vha tshinnani vha nga thusa nga nḓila dzifhio tshivhidzoni?

⁹ Tshifhingani tsho fhiraho, Vhaisiraele vho vha vhe na zwibuli zwinzhi zwa u shuma nga u ḓifunela. (Ek. 36:2; 1 Koron. 29:5; Neh. 11:2) Ṋamusi, na inwi ni na zwibuli zwinzhi zwa u shumisa tshifhinga tshaṋu, zwine na vha nazwo na vhutsila haṋu u itela u thusa vhahaṋu nga u ḓifunela. Musi ni tshi ita nga u ralo, ni ḓo takala vhukuma na u wana phaṱhutshedzo nnzhi.

¹⁰ Bivhili i ṱuṱuwedza vhanna tshivhidzoni uri vha shumisane na Yehova nga u ita zwoṱhe zwine vha nga kona uri vha fanelee u shuma sa vhashumeli na u vha vhahulwane vha tshivhidzo. (1 Tim. 3:1, 8, 9; 1 Pet. 5:2, 3) Vhane vha ita nga u ralo vha ṱoḓa u thusa vhaṅwe nga zwine vha zwi shaya na u vha na vhushaka havhuḓi na Mudzimu. (Mish. 6:1-4) Naa vhahulwane vho no ni humbela uri ni shume sa mulindi, u thusa kha dzibugu, u ṱhogomela nzudzanyo dza tsimu, u lugisa zwithu holoni kana zwiṅwe zwithu? Vhane vha ṱhogomela yeneyo mishumo vha ḓo ni vhudza uri zwi a takadza u thusa vhaṅwe.

11. Khonani dze wahashu a dzi wana musi e kha mushumo wa u fhaṱa, dzo mu thusa hani?

 ¹¹ Vhane vha shuma nga u ḓifunela kha mishumo i re hone ndanguloni ya Mudzimu vha anzela u wana khonani ntswa. Ṱhogomelani tsumbo ya wahashu wa tshifumakadzini ane a pfi Margie, we a shuma u fhaṱa Holo dza Muvhuso lwa miṅwaha ya 18. Musi a tshi khou ita mushumo wa u fhaṱa, o thusa na u gudisa vhahashu vhe vha vha vha vhaṱuku khae. O wana uri u shuma kha yeneyo mishumo zwi ita uri vha ṱuṱuwedzane. (Vharoma 1:12) Musi o sedzana na zwiimo zwi konḓaho, o ṱuṱuwedzwa nga khonani dzawe dze a dzi wana musi e kha mushumo wa u fhaṱa. Naa no no vhuya na shuma nga u ḓifunela kha yeneyi mishumo ya u fhaṱa? Naa ni nga shuma nga u ḓifunela kha mishumo ya u fhaṱa hu sa londwi uri ni na vhutsila kana a ni na?

12. Ni nga shela hani mulenzhe kha u thusa vho welwaho nga khombo?

¹² Musi hu tshi vha na khombo, vhathu vha Mudzimu vha vha na zwibuli zwa u shumisana na Mudzimu nga u thusa vhahavho. Sa tsumbo, vha nga thusa vho welwaho nga khombo nga u vha tikedza siani ḽa zwa masheleni. (Yoh. 13:34, 35; Mish. 11:27-30) Iṅwe nḓila ya u vha thusa ndi u kunakisa kana u vusulusa. Muṅwe wahashu wa tshifumakadzini ane a pfi Gabriela we a vha a tshi bva Poland we muḓi wawe wa kumbiwa nga miḓalo o vha o takala vhukuma musi vhahashu vhane vha bva kha zwivhidzo zwa nga tsini vha tshi ḓa u mu thusa. O ri: “A thi ṱoḓi u amba nga zwe nda xelelwa ngazwo—zwo vha zwi tshi sokou vha zwithu zwi vhonalaho. Fhedzi ndi khou ṱoḓa u ni vhudza nga zwe nda zwi wana. Zwe nda ṱangana nazwo zwo nkhwaṱhisedza uri u vha tshipiḓa tsha tshivhidzo tsha Vhukriste ndi ndugelo yo khetheaho nahone zwi ḓisa dakalo ḽa vhukuma.” Vhunzhi ha vhathu vhe vha wana thuso nga murahu ha khombo vha ḓipfa nga nḓila i fanaho. Vhane vha shumisana na Yehova kha u tikedza vhahashu vha ḓipfa vho fushea.—Vhalani Mishumo 20:35; 2 Vhakorinta 9:6, 7.

13. U shuma nga u ḓifunela zwi nga khwaṱhisa hani vhushaka hashu na Yehova? Ṋeani tsumbo.

¹³ Stephanie na vhaṅwe vhahuweleli vho ḓiphina nga u shumisana na Mudzimu musi vha tshi thusa Ṱhanzi dze dza shavhela United States. Vho thusa vhenevho vhathu uri vha wane fhethu ha u dzula na thundu dza nḓuni.  Stephanie o ri: “U takala na u livhuwa havho musi vha tshi vhona nḓila ine vhahavho u mona na shango ḽoṱhe vha vha funa ngayo, zwo ri takadza vhukuma.” O dovha a ri: “Yeneyo miṱa yo humbula uri ro i thusa, fhedzi ngoho ndi ya uri ndi yone yo thusaho riṋe. U vha havho na lufuno, vhuthihi na u ḓitika nga Yehova zwo engedza nḓila ye ra vha ri tshi funa ngayo Yehova nahone zwo ita uri dzhiele nṱha zwoṱhe zwine ra zwi wana ndanguloni yawe.”

14, 15. (a) Yesaya o vha o ḓiimisela u ita mini? (b) Vhahuweleli vha Muvhuso vha nga edzisa hani Yesaya?

¹⁴ Naa ni nga takalela u shumisana na Yehova nga ho engedzeaho? Naa ni nga pfulutshela hu re na ṱhoḓea khulwane ya vhahuweleli? A hu ṱoḓei uri vhashumeli vha Mudzimu vha pfulutshele kule na hayani u itela u mu shumela. Fhedzi vhaṅwe vhahashu vhuimo vhu a vha tendela uri vha ite zwo engedzeaho. Mavhonele a vhenevho vhathu a fana na a muporofita Yesaya. Musi Yesaya a tshi fhindula mbudziso ya Yehova ine ya ri: “Ndi ḓo ruma nnyi? Muḓinḓa washu ndi nnyi?” O fhindula a ri: “Ndi nṋe, nthume.” (Yes. 6:8) Naa no ḓiimisela u thusa ndangulo ya Yehova arali vhuimo vhu tshi ni tendela? Ndi dzifhio dziṅwe nḓila dzine na nga thusa ngadzo?

¹⁵ Musi Yesu a tshi amba nga ha mushumo wa u huwelela na u ita vhafunziwa, o ri: “Khaṋo ndi khulu, fhedzi vhashumi a si vhanzhi. Ngauralo, humbelani Muṋe wa khaṋo uri a rumele vhashumi khaṋoni yawe.” (Mat. 9:37, 38) Naa ni nga shuma tsimuni hu re na ṱhoḓea khulwane, khamusi sa muvulanḓila? Kana naa ni nga thusa muṅwe muthu uri a ite nga u ralo? Vhunzhi ha vhahashu vho ṱhogomela uri nḓila ya khwine ya u sumbedza uri vha funa Mudzimu na vhahura vhavho ndi nga u vula nḓila fhethu hu re na ṱhoḓea khulwane ya vhahuweleli. Naa ni nga humbula nga ha dziṅwe nḓila dzine na nga ita zwo engedzeaho tshumeloni ya Mudzimu? U ita nga u ralo, zwi ḓo ita uri ni takale.

16, 17. Ndi zwifhio zwiṅwe zwibuli zwi re hone arali ni tshi takalela u ita zwo engedzeaho kha mushumo une na u itela Yehova?

¹⁶ Naa ni nga shuma Bethele kana u thusa kha u fhaṱa zwifhaṱo zwa ndangulo, u shuma lwa tshifhinganyana kana nga maṅwe maḓuvha? Ndangulo ya Yehova i dzula i tshi ṱoḓa vhathu vho ḓiimiselaho u mu shumela, hu sa londwi uri ndi ngafhi kana vha ḓo vha vha tshi khou ita mushumo ufhio. Zwenezwi zwi nga ṱoḓa uri vha shume fhethu hu re na ṱhoḓea naho vhe na vhutsila na tshenzhemo kha muṅwe mushumo. Yehova u takalela vhathu vhane vha ḓiṋekedzela nga u ḓifunela u itela u shuma hune ha vha na ṱhoḓea khulwane.—Ps. 110:3.

¹⁷ Naa ni nga takalela u gudiswa nga ho engedzeaho u itela uri ni kone u ita zwo engedzeaho tshumeloni khethwa? Arali zwo ralo, ni nga fanelea u ya Tshikoloni tsha Vhahuweleli vha Muvhuso. Tshenetshi tshikolo tshi gudisa vhahashu vhane vha vha tshumeloni ya tshifhinga tsho ḓalaho uri vha kone u ṱanḓavhudza vhuḓinḓa havho. Vhane vha ita khumbelo ya u ya kha tshenetsho tshikolo vha fanela u vha vho ḓiimisela u ṱanganedza mushumo naho u ufhio musi vho no ṱhaphudza. Naa no ḓiimisela u shumisa tshenetsho tshibuli u itela uri ni ite zwo engedzeaho tshumeloni ya Mudzimu nga yeneyo nḓila?—1 Vhakor. 9:23.

18. Ni vhuyelwa hani musi ni tshi shumisana na Yehova ḓuvha ḽiṅwe na ḽiṅwe?

¹⁸ Samusi ri vhathu vha Yehova, u vha hashu na mafunda, vhuthu, vhulenda na lufuno zwi ita uri ri vhe na ndavha na vhaṅwe ḓuvha ḽiṅwe na ḽiṅwe. Musi ri tshi ita nga u ralo, ri vha na dakalo na mulalo. (Vhagal. 5:22, 23) Hu sa londwi vhuimo haṋu, ni nga wana dakalo nga u edzisa nḓila ine Yehova a vha ngayo na mafunda na nga u vha mu shumisani nae!—Mir. 3:9, 10.