NGA nṱhani ha u engedzea ha mitsiko ya ano ‘maḓuvha a vhufhelo,’ ri tea u sa fhela mbilu u fhira naho hu lini. (2 Tim. 3:1-5) Ri khou tshila kha shango ḽine kanzhi vhathu vha funa vhone vhaṋe fhedzi, a vho ngo ḓiimisela u vhofha thendelano naho i ifhio nahone a vha koni u ḓifara. Vhathu vho raloho vha a ṱavhanya u fhela mbilu. Nga zwenezwo, Mukriste muṅwe na muṅwe u fanela u ḓivhudzisa uri: ‘Naa ndi a ṱavhanya u fhela mbilu u fana na vhathu vha ḽino shango? Zwi amba mini u sa fhela mbilu? Nahone ndi nga ita mini uri yeneyi pfaneleo ya u sa fhela mbilu i vhe tshipiḓa tsha vhumuthu hanga?’

Bivhilini, u sa fhela mbilu zwi amba zwi fhiraho u sokou konḓelela vhuimo vhu konḓaho. Muthu ane a si fhele mbilu u konḓelela e na fulufhelo ḽa uri zwithu zwi ḓo vhuya zwa luga. Ha humbuli fhedzi nga ha nḓila ine ene muṋe a ḓipfa ngayo, fhedzi u dovha a humbula nga ha nḓila ine vhaṅwe vha ḓipfa ngayo. Nga zwenezwo, musi muthu ane a si fhele mbilu o khakhelwa kana o sinyuswa, u bvela phanḓa a tshi fulufhela uri vhushaka hawe na muthu o mu dinaho vhu ḓo vha khwine. A zwi mangadzi uri kha mutevhe u re Bivhilini une wa amba nga ha pfaneleo dzine dza bveledzwa nga lufuno, hu thoma nga u ambiwa nga ha u sa ‘fhela mbilu.’ * (1 Vhakor. 13:4) Musi Bivhili i tshi amba nga ha “zwiaṋwiwa nga muya,” i dovha ya katela na “u sa fhela mbilu.” (Vhagal. 5:22, 23) Ndi mini zwine ra tea u zwi ita u itela u vha na yeneyi pfaneleo?

U itela uri ri si fhele mbilu, ri tea u humbela muya mukhethwa wa Yehova uri u ri thuse. Wonoyo muya mukhethwa u u ṋea vhane vha mu fulufhela na u ḓitika ngae. (Luka 11:13) Naho muya mukhethwa wa Yehova u na maanḓa, na riṋe ri fanela u ita tshipiḓa tshashu nahone ra tshila u tendelana na thabelo dzashu. (Ps. 86:10, 11) Zwenezwi zwi amba uri ri tea u ita zwoṱhe zwine ra nga kona uri ri si fhele mbilu nahone musi ri tshi ita zwenezwo, yeneyo pfaneleo i ḓo sima midzi mbiluni dzashu. Naho ro no ita zwenezwo, hu ḓo ṱoḓea uri ri ite zwo engedzeaho uri yeneyo pfaneleo i vhe tshipiḓa tsha vhumuthu hashu. Ndi mini zwiṅwe zwine zwa nga ri thusa?

Ri nga vha na pfaneleo ya u sa fhela mbilu nga u ṱolisisa na u edzisa tsumbo ya Yesu. Musi muapostola Paulo a tshi amba nga ha “vhumuthu vhuswa” vhune ha katela u sa fhela mbilu, o ri ṱuṱuwedza uri ri “tendele mulalo wa Kristo u tshi vhusa mbiluni [dzashu].” (Vhakol. 3:10, 12, 15) Ri nga tendela wonoyo mulalo u tshi “vhusa” mbiluni dzashu nga u edzisa lutendo lwa Yesu lwo khwaṱhaho na u vha na fulufhelo ḽa uri Mudzimu u ḓo lugisa mafhungo ane a ri vhilaedzisa nga tshifhinga tshawe tsho teaho. Musi ri tshi edzisa tsumbo ya Yesu, ri nga si tendele u sinyuwa zwi tshi ita uri ri fhele mbilu hu sa londwi zwine zwa nga vha zwi tshi khou itea.—Yoh. 14:27; 16:33.

Naho ro lindela nga maṱo matswuku u vhona shango ḽiswa ḽa Mudzimu ḽo fulufhedziswaho, ri guda u sa fhela mbilu musi ri tshi elekanya nga ha nḓila ine Yehova a si ri fhelele ngayo mbilu. Bivhili i  ri: “Yehova ha ongolowi u ita zwe a fulufhedzisa, samusi vhaṅwe vhathu vha tshi mu dzhia sa ane a ongolowa, fhedzi ha ni fheleli mbilu ngauri ha ṱoḓi muthu naho e ufhio a tshi lozwiwa, fhedzi u tama vhoṱhe vha tshi rembuluwa.” (2 Pet. 3:9) Musi ri tshi humbula nga ha nḓila ine Yehova a si ri fhelele ngayo mbilu, naa zwenezwo a zwi ri sudzuluseli uri na riṋe ri si fhelele vhaṅwe mbilu? (Vharoma 2:4) Ri na zwenezwo muhumbuloni, ndi vhufhio vhuṅwe vhuimo vhune ra nga sumbedza uri a ri ṱavhanyi u fhela mbilu?

Ḓuvha ḽiṅwe na ḽiṅwe ri ṱangana na vhuimo vhune ha ṱoḓa uri ri si fhele mbilu. Sa tsumbo, arali hu na zwiṅwe zwithu zwa ndeme zwine na ṱoḓa u zwi amba, ni ḓo tea uri ni si fhele mbilu u itela u iledza u dzhena vhaṅwe haṋwani. (Yak. 1:19) Ri fanela u dovha ri si fhele mbilu musi muṅwe muthu a tshi ri dina. Nṱhani ha u fhufha murumba u sa athu u lila, zwi ḓo vha vhuṱali uri ni humbule nga ha nḓila ine Yehova na Yesu vha ḓipfa ngaho nga vhushayanungo hashu. A vha livhisi ṱhogomelo kha vhukhakhi vhuṱuku-ṱuku vhune ra vhu ita. Nṱhani hazwo, vha livhisa ṱhogomelo kha pfaneleo dzavhuḓi dzine ra vha nadzo nahone vha ri ṋea tshifhinga tsha u khwinisa vha sa ri fheleli mbilu.—1 Tim. 1:16; 1 Pet. 3:12.

Vhuṅwe vhuimo vhune ha nga ṱoḓa uri ri si fhele mbilu, ndi musi muṅwe muthu o amba uri ro amba kana ro ita tshiṅwe tshithu tsho khakheaho. Khamusi ri nga ṱavhanya u sinyuwa na u ḓiimelela. Fhedzi Bivhili i ri vhudza nḓila ine ra fanela u aravha ngayo. I ri: “U vulea ha mafhungo hu fhira u ranga hao; mukonḓeleli u fhira wa u ḓi-hudza. U songo ṱavhanya u sinyuwa mbiluni yau; ngauri hayani ha mbiti ndi mbiluni ya tsilu.” (Muh. 7:8, 9) Naho arali zwine zwa khou ambiwa zwi si ngoho, ri fanela u thoma ra humbula ri sa athu u fhindula. Na Yesu o ita nga u ralo musi vhaṅwe vha tshi amba mazwifhi nga hae.—Mat. 11:19.

Ndi zwa ndeme nga maanḓa uri vhabebi vha si fhele mbilu musi vha tshi tea u thusa vhana vhavho u khakhulula mavhonele avho na u iledza nyemulo mmbi. Ṱhogomelani tsumbo ya Mattias ane a vha muraḓo wa muṱa wa Bethele ya ngei Scandinavia. Musi Mattias a tshee muswa, o konḓelela u kolelwa nga nṱhani ha zwe a vha a tshi tenda khazwo. Mathomoni, vhabebi vhawe vho vha vha sa zwi ḓivhi. Fhedzi vho ṱhogomela uri u vho thoma u timatima zwine a tenda khazwo. Khotsi a Mattias vhane vha pfi Gillis, vho ri: “Honovhu vhuimo ho vha vhu tshi ṱoḓa uri ri si fhele mbilu.” Mattias o vha a tshi ri vhudzisa uri: “Mudzimu ndi nnyi? Hu pfi mini arali Bivhili i si Ipfi ḽa Mudzimu? Ri zwi ḓivha hani uri zwine ra fanela u zwi ita zwi bva ha Mudzimu zwa vhukuma?” O vha a tshi dovha a vhudzisa khotsi awe uri: “Ndi ngani nṋe ndi tshi fanela u farwa nga nḓila i si yavhuḓi arali ndi sa ḓipfi na u tenda kha zwine vhone vha tenda khazwo?”

Gillis o ri: “Nga tshiṅwe tshifhinga, ṅwana washu o vha a tshi vhudzisa mbudziso nga nḓila ye ya vha i tshi sumbedza uri o sinyuwa, fhedzi hu si uri o sinyutshela nṋe na mme awe, fhedzi o sinyutshela ngoho ye a vha a tshi pfa u nga i khou mu konḓisela vhutshilo.” Gillis o sedzana hani na honoho vhuimo? O ri: “Nṋe na ṅwana wanga ro vha ri tshi dzula ra amba lwa awara nnzhi. U itela u pfesesa nḓila ye a vha a tshi vhona ngayo zwithu na nḓila ine a ḓipfa ngayo, ndo vha ndi tshi mu thetshelesa na u mu vhudzisa mbudziso. Tshiṅwe tshifhinga ndo vha ndi tshi mu ṱalutshedza nga ha zwithu zwine a nga humbula nga hazwo lwa ḓuvha ḽithihi kana mavhili ri sa athu u bvela phanḓa na nyambedzano yashu. Tshiṅwe tshifhinga ndo vha ndi tshi mu vhudza uri  ndi ḓo thoma nda humbula lwa maḓuvhanyana nga ha zwe a mmbudza. Nga nṱhani ha uri ndo vha ndi tshi dzula ndi tshi amba na Mattias, o ita mvelaphanḓa nga zwiṱuku nga zwiṱuku nahone a thoma u pfesesa na u ṱanganedza zwe a zwi guda nga ha tshirengululi, vhuvhusahoṱhe ha Yehova Mudzimu na lufuno lune a vha nalwo. Zwo dzhia tshifhinga tshilapfu nahone kanzhi zwo vha zwi tshi konḓa, fhedzi nga zwiṱuku nga zwiṱuku o thoma u funa Yehova zwi tshi bva mbiluni. Nṋe na mufumakadzi wanga ro takala vhukuma uri a ro ngo mu fhelela mbilu nahone vhuḓidini he ra vhu ita u itela u mu thusa musi a tshee muswa, ho vha na mbuyelo dzavhuḓi nahone zwo swikelela mbilu yawe.”

Gillis na mufumakadzi wawe vho fulufhela uri Yehova u ḓo vha tikedza uri vha kone u thusa ṅwana wavho vha sa mu fheleli mbilu. Gillis o ri: “Ndo vha ndi tshi dzula ndi tshi vhudza Mattias uri u mu funa hashu zwo ita uri nṋe na mme awe ri rabele zwi tshi bva mbiluni uri Yehova a mu thuse u pfesesa.” Vhenevha vhabebi vho takala vhukuma nge vha si fhelele ṅwana wavho mbilu na u sa laṱela thaula!

Zwiṅwe zwine Vhakriste vha nga zwi ita u itela u thusa, ndi u sa fhela mbilu musi vha tshi khou ṱhogomela muraḓo wa muṱa kana khonani ine ya khou lwala vhulwadze vhu sa lafhei. Ṱhogomelani tsumbo ya Ellen * ane nae a dzula Scandinavia.

Miṅwahani i ṱoḓaho u vha malo yo fhiraho, munna wa Ellen o farwa nga stroke luvhili lwoṱhe nahone zwa thithisa nḓila ine vhuluvhi hawe ha shuma ngayo. Zwenezwo zwo ita uri a si tsha sumbedza maḓipfele a u takala, u ṱungufhala kana u pfela vhuṱungu. Honoho vhuimo ho konḓela vhukuma Ellen. O ri: “Zwo vha zwi tshi ṱoḓa uri ndi rabele lunzhi na u sa fhela mbilu.” O dovha ri: “Luṅwalo lune nda lu takalela lune lwa nkhuthadza ndi lwa Vhafilipi 4:13, lune lwa ri: ‘Ngauri zwithu zwoṱhe ndi zwi koniswa nga ane a nṋea maanḓa.’” Maanḓa na thikhedzo ya Yehova zwo thusa Ellen uri a konḓelele a sa fheli mbilu.—Ps. 62:5, 6.

Ndi ngoho uri zwi tshi ḓa kha u sa fhela mbilu, Yehova ndi ene tsumbo yavhuḓi ine ra tea u i edzisa. (2 Pet. 3:15) Hu na mafhungo manzhi ane a wanala Ipfini ḽa Mudzimu ane a amba nga ha Yehova a tshi sumbedza u sa fhela mbilu huhulwane. (Neh. 9:30; Yes. 30:18) Sa tsumbo, Yehova o aravha hani musi Abrahamu a tshi mu vhudzisa nga ha tsheo ine a ḓo i dzhia ya u fhelisa Sodoma? Yehova ho ngo dzhenelela musi Abrahamu a tshi amba. Fhedzi Yehova o thetshelesa a sa fheli mbilu musi Abrahamu a tshi mu vhudzisa mbudziso na musi a tshi mu vhudza zwine zwa khou mu vhilaedzisa. Yehova o sumbedza u thetshelesa musi a tshi dovholola zwe zwa vha zwi tshi khou vhilaedzisa Abrahamu nahone a mu khwaṱhisedza uri a nga si fhelise muḓi wa Sodoma naho ho sala vhathu vha fumi vha fulufhedzeaho. (Gen. 18:22-33) Ndi tsumbo yavhuḓi lungafhani ye Yehova a ri vhetshela yone ya u thetshelesa a sa fheli mbilu na u sa ṱavhanya u sinyuwa!

U sa fhela mbilu ndi tshipiḓa tsha ndeme tsha vhumuthu vhuswa vhune Vhakriste vhoṱhe vha fanela u vhu ambara. Arali ra shuma nga maanḓa u itela u vha na yeneyi pfaneleo ya ndeme ya u sa fhela mbilu, ri hulisa Khotsi ashu wa ṱaḓulu ane a vha na ndavha na riṋe na u sa ri fhelela mbilu nahone ri ḓo vhaliwa kha “vhe nga lutendo na u konḓelela vha ḽa ifa ḽe vha fulufhedziswa.”—Vhaheb. 6:10-12.