1. Ndi vhonnyi vho thusaho u thoma tshivhidzo tsha Filipi?

MUSI muapostola Paulo, Silasi, Luka na Timotheo vha tshi swika Filipi, shango ḽe ḽa vha ḽi tshi vhuswa nga Vharoma vho wana hu na vhathu vhanzhi vhane vha ṱoḓa u ḓivha zwo engedzeaho nga ha mafhungo maḓifha. Vhenevha vhahashu vhaṋa vha fhiseaho vho thusa kha u vhumba zwivhidzo nahone vhafunziwa vhoṱhe vho thoma u ṱanganela, zwi vhonala u nga vho vha vha tshi ṱanganela muḓini wa Lidia, we a vha a tshi ṱanganedza vhaeni.—Mish. 16:40.

2. Tshivhidzo tsha Filipi tsho sedzana na mulingo ufhio?

² Tshenetsho tshivhidzo tshe tsha vha tshi tshi kha ḓi vha tshiswa tsho mbo ḓi ṱangana na mulingo. Sathane o ita uri vhathu vhane vha vhenga ngoho vha pikise mushumo wa u huwelela we wa vha u tshi khou itwa nga Paulo na khonani dzawe. Paulo na Silasi vho farwa, u rwiwa nga ṱhamu na u valelwa dzhele. Musi vho no bviswa dzhele, vho dalela vhafunziwa vhaswa na u vha ṱuṱuwedza. Nga murahu, Paulo, Silasi na Timotheo vho ṱuwa kha yeneyo ḓorobo nahone Luka a nga vha o sala henefho. Ndi mini zwe tshenetsho tshivhidzo tshiswa tsha vha tshi tshi ḓo zwi ita? Yehova o vha thusa nga muya mukhethwa nahone vha bvela phanḓa vha tshi khou fhisea. (Vhafil. 2:12) Zwenezwo zwo ita uri Paulo a ḓirwe khana ngavho!

3. U ya nga Vhafilipi 1:9-11, Paulo o rabela nga ha mini?

³ Nga murahu ha miṅwaha i ṱoḓaho u vha fumi, Paulo o ṅwalela tshivhidzo tsha Filipi vhurifhi. Musi ni tshi vhala honoho  vhurifhi, ni ḓo zwi vhona uri Paulo o vha a tshi funa vhahawe. O ri: “Ndi a ni ṱuvha vhukuma, ndi a ni funa nga nḓila ye Kristo Yesu a vha a tshi ni funa ngayo.” (Vhafil. 1:8) O vha vhudza uri o vha a tshi vha rabelela. O humbela Yehova uri a vha thuse uri lufuno lwavho lu engedzee, vha ṱhogomele zwithu zwa ndeme vhukuma, vha si solee, vha si khukhulise vhaṅwe na uri vha bvele phanḓa vha tshi ḓadzwa nga mutshelo wa u luga. Na riṋe ṋamusi ri nga vhuyelwa nga zwe Paulo a zwi amba. Nga zwenezwo, kha ri vhale zwe Paulo a zwi ṅwalela Vhafilipi. (Vhalani Vhafilipi 1:9-11.) Nga murahu, ri ḓo haseledza zwe a zwi amba na u vhona uri ri nga zwi shumisa hani.

4. (a) U ya nga 1 Yohane 4:9, 10, Yehova o ri sumbedza hani uri u a ri funa? (b) Ri tea u funa Mudzimu hani?

⁴ Yehova o ri sumbedza uri u a ri funa nga u rumela Murwa wawe kha ḽifhasi uri a fele zwivhi zwashu. (Vhalani 1 Yohane 4:9, 10.) Ri funa Yehova ngauri u a ri funa. (Vharoma 5:8) Ri tea u funa Mudzimu hani? Yesu o fhindula yeneyo mbudziso musi a tshi vhudza Mufarisei uri: “U tea u funa Yehova Mudzimu wau nga mbilu yau yoṱhe na nga zwoṱhe zwine wa vha zwone na nga muhumbulo wau woṱhe.” (Mat. 22:36, 37) Ri tea u funa Yehova nga mbilu dzashu dzoṱhe. Nahone ri fanela u mu funa nga ho engedzeaho ḓuvha ḽiṅwe na ḽiṅwe. Paulo o vhudza Vhafilipi uri lufuno lwavho lu tea u “engedzea lu tshi ya.” Ri nga ita mini uri ri fune Yehova nga ho engedzeaho?

5. Ri nga vha hani na lufuno lwo engedzeaho?

⁵ Ri tea u ḓivha Mudzimu u itela u mu funa. Bivhili i ri: “A si na lufuno ha ḓivhi Mudzimu, ngauri Mudzimu ndi lufuno.” (1 Yoh. 4:8) Muapostola Paulo o ri ri ḓo funa Yehova nga ho engedzeaho musi ri tshi guda ngoho nga hae na u pfesesa uri ndi ngani a tshi dzhia zwithu nga nḓila ine a zwi dzhia ngayo. (Vhafil. 1:9) Musi ri tshi thoma u guda Bivhili, ro thoma u funa Yehova naho ro vha ri sa ḓivhi zwithu zwinzhi nga hae. Nahone musi ri tshi guda zwithu zwinzhi nga ha Yehova, ro thoma u mu funa nga ho engedzeaho. Ndi ngazwo u guda Bivhili tshifhinga tshoṱhe na u elekanya nga ha zwine ra zwi guda khayo zwi zwa ndeme vhukuma vhutshiloni hashu.—Vhafil. 2:16.

6. U ya nga 1 Yohane 4:11, 20, 21, ri nga vha hani na lufuno lwo engedzeaho?

⁶ Nḓila ine Mudzimu a ri funa ngayo i ri ṱuṱuwedza uri ri fune vhahashu. (Vhalani 1 Yohane 4:11, 20, 21.) Ri nga vhona u nga u funa vhahashu zwi ḓo leluwa nga nṱhani ha uri ri gwadamela Yehova nahone ri ṱoḓa u mu edzisa. Ri edzisa tsumbo ya Yesu we a ri sumbedza lufuno nga u fa a tshi itela riṋe. Fhedzi nga zwiṅwe zwifhinga zwi nga ri konḓela u tevhela nyeletshedzo ya uri ri funane. Ṱhogomelani zwo iteaho tshivhidzoni tsha Filipi.

7. Ri guda mini kha nyeletshedzo ye Paulo a i ṋea Euodia na Sintixe?

⁷ Vhahashu vha tshifumakadzini vha fhiseaho Euodia na Sintixe, vho shuma na muapostola Paulo. Khamusi vho kandana zwirethe nahone vha si tsha vha khonani. Musi Paulo a tshi ṅwalela tshivhidzo tsha Filipi vhurifhi tshe vhenevho vhahashu vha vha vhe khatsho, o eletshedza Euodia na Sintixe nga ho livhaho uri vha vhe na vhuthihi. (Vhafil. 4:2, 3) Paulo o vhona zwo tea u eletshedza tshivhidzo tshoṱhe uri: “Dzulani ni tshi ita zwithu zwoṱhe ni sa gunguli nahone ni sa ṱaṱisani khani.” (Vhafil. 2:14) A  zwi timatimisi uri yeneyo nyeletshedzo ya Paulo yo livhaho yo thusa vhenevho vhahashu vha fhulufhedzeaho na tshivhidzo tshoṱhe uri vha funane nga ho engedzeaho.

8. Ndi mini zwine zwa nga ita uri zwi konḓe u funa vhahashu nahone ri nga thuswa nga mini?

⁸ U fana na Euodia na Sintixe, zwi nga ri konḓela u funa vhahashu arali ra sedzesa vhukhakhi havho. Roṱhe ri a khakha ḓuvha na ḓuvha. Arali ra dzula ro livhisa ṱhogomelo kha vhukhakhi ha vhaṅwe, zwi ḓo ri konḓela u vha funa. Sa tsumbo, ri nga dinalea arali wahashu a hangwa u ri thusa u kunakisa Holo. Arali ra thoma u vhalela vhukhakhi hawe hoṱhe, ri ḓo ṋaṋa u dinalea nahone lufuno lwashu lwa fhungudzea. Arali na ṱangana na vhuimo ho raloho, zwi ḓo vha zwavhuḓi u humbula uri Yehova u ḓivha vhukhakhi hashu hoṱhe na ha wahashu. Fhedzi u a ri funa hu sa londwi vhukhakhi vhune ra vhu ita. Nga zwenezwo, ri fanela u edzisa Yehova nga u funa vhahashu na nga u vha na mavhonele o teaho nga havho. Musi ri tshi ita zwoṱhe zwine ra nga kona uri ri fune vhahashu, ri ḓo vha na vhuthihi navho.—Vhafil. 2:1, 2.

9. Ndi zwifhio “zwithu zwa ndeme vhukuma” zwe Paulo a zwi amba kha vhurifhi he a vhu ṅwalela Vhafilipi?

⁹ Yehova o livhisa Paulo uri a vhudze Vhakriste vha Filipi uri vha “ṱhogomele zwithu zwa ndeme vhukuma.” Na riṋe ri fanela u ita zwi fanaho. (Vhafil. 1:10) Zwenezwi zwithu zwa ndeme zwi katela u huliswa ha dzina ḽa Yehova, u itea ha zwe a zwi fhulufhedzisa na mulalo na vhuthihi zwi re hone tshivhidzoni. (Mat. 6:9, 10; Yoh. 13:35) Musi ri tshi ita uri zwenezwi zwi vhe zwa ndeme vhutshiloni hashu, ri sumbedza uri ri funa Yehova.

10. Ri tea u ita mini uri ri vhe vha sa solei?

¹⁰ Paulo o dovha a ri ri tea u vha vha sa ‘solei.’ Hezwi a zwi ambi uri ri fanela u vha vho fhelelaho. Ri nga si kone u ita zwithu zwoṱhe nga nḓila ine Yehova a zwi ita ngayo. Fhedzi Yehova u ri dzhia ri sa solei musi ri tshi ita zwoṱhe zwine ra nga kona u itela u engedza lufuno lune ra vha nalwo na u ṱhogomela zwithu zwa ndeme vhukuma. Iṅwe nḓila ine ra nga sumbedza ngayo uri ri na lufuno ndi nga u ita zwoṱhe zwine ra nga kona u itela u iledza u khukhulisa vhaṅwe.

11. Ndi ngani ri tshi fanela u iledza u khukhulisa vhaṅwe?

¹¹ Ri fanela u dzhiela nṱha nyeletshedzo ya uri ri songo khukhulisa vhaṅwe. Ndi zwifhio zwine ra nga ita zwine zwa nga khukhulisa vhaṅwe? Ri nga khukhulisa vhaṅwe nga vhuḓimvumvusi vhune ra vhu khetha, nḓila ine ra ambara ngayo kana mishumo ine ra i khetha. Zwine ra khou zwi ita zwi nga vha zwi songo khakhea. Fhedzi arali zwi tshi khukhulisa vhaṅwe, a ro ngo fanela u zwi dzhiela fhasi. Yesu o ri arali ra nga khukhulisa iṅwe ya nngu dzawe, ndi khwine ri tshi vhofhelelwa tombo ḽi lemelaho mukuloni washu nahone ra poswa lwanzheni!—Mat. 18:6.

12. Ri guda mini kha tsumbo ya vhavhingani vha vhavulanḓila?

¹² Ṱhogomelani nḓila ye vhaṅwe vhavhingani vha vhavulanḓila vha tevhela ngayo nyeletshedzo ya Yesu. Tshivhidzoni tshavho ho vha hu na vhavhingani vhane a si kale vho lovhedzwa, vho aluswaho muṱani u konḓisaho. Vhenevho vhavhingani vho vha vha tshi tenda uri Vhakriste a vha tei u ya hune ha ṱalelwa hone mimuvi, naho yeneyo mimuvi yo kuna. Musi vha tshi pfa uri vhavhingani vha vhavulanḓila vho ya u ṱalela muvi, vho khukhulisea. Nga murahu ha zwenezwo, vhavhingani vha vhavulanḓila a vho ngo tsha ya u  ṱalela mimuvi u swika vhenevho vhafunziwa vhaswa vha tshi gudisa luvalo lwavho na u pfesesa khwine zwo lugaho na zwi songo lugaho. (Vhaheb. 5:14) Nga u ita zwenezwo, vhavhingani vha vhavulanḓila vho sumbedza nga maipfi na nyito uri vha funa vhenevho vhahavho vhane vha kha ḓi vha vhaswa ngohoni.—Vharoma 14:19-21; 1 Yoh. 3:18.

13. Ri nga itisa muthu tshivhi nga nḓila ḓe?

¹³ Iṅwe nḓila ine ra nga khukhulisa wahashu ndi nga u mu ita uri a ite tshivhi. Zwi nga itea hani zwenezwo? Ṱhogomelani tsumbo i tevhelaho. Mugudiswa wa Bivhili u kunda dzema ḽa u nwesa nga murahu ha u lwisana naḽo lwa tshifhinga tshilapfu. U vhona zwo tea u litsha halwa lwa tshoṱhe. U ita tshanduko vhutshiloni hawe nahone a lovhedzwa. Nga murahu, wahashu u a mu ramba nahone a mu ṋea halwa a ri: “Ni Mukriste zwino, ni na muya mukhethwa wa Yehova. Muya mukhethwa u a ri thusa uri ri kone u ḓifara. Arali ni tshi kona u ḓifara, ni ḓo kona u nwa nga nḓila yo linganyiselwaho.” Hu nga vha na masiandoitwa a si avhuḓi arali onoyo wahashu a re muswa ngohoni a thetshelesa yeneyo nyeletshedzo i si yavhuḓi!

14. Miṱangano ya Vhukriste i ri thusa hani u shumisa nyeletshedzo dzi re kha Vhafilipi 1:10?

¹⁴ Miṱangano yashu ya Vhukriste i ri thusa u shumisa nyeletshedzo dzi re kha Vhafilipi 1:10 nga nḓila nnzhi. Ya u thoma, zwine ra zwi haseledza miṱanganoni zwi ri sumbedza zwine Yehova a vhona zwi zwa ndeme vhukuma. Ya vhuvhili, ri vhona nḓila ine ra  nga shumisa ngayo zwine ra zwi guda uri ri vhe vha sa solei. Nahone ya vhuraru, ri ṱuṱuwedzwa uri ri funane na u ita zwithu zwavhuḓi. (Vhaheb. 10:24, 25) Musi vhahashu vha tshi ri ṱuṱuwedza tshifhinga tshoṱhe, zwi ḓo engedza nḓila ine ra funa ngayo Mudzimu na vhahashu. Musi ri tshi funa Yehova na vhahashu, ri ḓo ita zwoṱhe zwine ra nga kona uri ri iledze u khukhulisa vhahashu.

15. Zwi amba mini u ‘ḓadzwa nga mutshelo wa u luga’?

¹⁵ Paulo o rabelela Vhafilipi uri vha “ḓadzwe nga mutshelo wa u luga.” (Vhafil. 1:11) A zwi timatimisi uri wonoyu “mutshelo wa u luga” u katela u funa Yehova na vhathu vhawe. Zwenezwi zwo vha zwi tshi amba uri vha tea u vhudza vhaṅwe nga ha lutendo lwavho kha Yesu na nga ha fhulufhelo ḽavho ḽavhuḓi. Vhafilipi 2:15 i shumisa tshiṅwe tshifanyiso, i ri: “Ni vhonetshele sa . . . maḓenzhe shangoni.” Tshenetsho tshifanyiso tsho tea ngauri Yesu o vhudza vhafunziwa vhawe uri vha “tshedza tsha shango.” (Mat. 5:14-16) O dovha a laedza vhatevheli vhawe uri vha “ite . . . vhafunziwa” nahone a dovha a amba uri vha ḓo vha “ṱhanzi . . . u swika tshipiḓani tsha kule vhukuma tsha ḽifhasi.” (Mat. 28:18-20; Mish. 1:8) Ri vha na “mutshelo wa u luga” musi ri tshi shela mulenzhe kha wonoyu mushumo wa ndeme.

16. U ya nga Vhafilipi 1:12-14, ri nga vhonetshela hani sa maḓenzhe naho ri kha vhuimo vhu konḓaho? (Sedzani tshifanyiso tshi re kha gwati.)

¹⁶ Ri nga vhonetshela sa maḓenzhe hu sa londwi vhuimo vhune ra vha khaho. Nga zwiṅwe zwifhinga, zwithu zwine zwa vhonala zwi tshi nga ri thivhela u huwelela zwi nga vha zwone zwi ri ṋeaho tshibuli tsha u huwelela. Sa tsumbo, muapostola Paulo o vha o fariwa nahone o valelwa nḓuni ngei Roma  musi a tshi ṅwalela Vhafilipi vhurifhi. Fhedzi naho o vha o fariwa, ho ngo litsha u huwelela kha vhalindi na kha vhane vha ḓa u mu dalela. Paulo o huwelela nga u fhisea nga fhasi ha honoho vhuimo nahone zwenezwo zwo thusa vhahashu uri vha vhe na tshivhindi tsha u “amba ipfi ḽa Mudzimu vha sa ofhi.”—Vhalani Vhafilipi 1:12-14; 4:22.

17. Vhaṅwe vhahashu vho bvela hani phanḓa vha tshi huwelela naho zwi tshi konḓa?

¹⁷ Vhunzhi ha vhahashu vha sumbedza tshivhindi u fana na Paulo. Vha dzula kha mashango ane a vha koni u huwelela khagala kana nnḓu nga nnḓu, fhedzi vha wana dziṅwe nḓila dzine vha nga huwelela ngadzo. (Mat. 10:16-20) Kha ḽiṅwe ḽa eneo mashango, mulavhelesi wa ḽiisela o vhudza vhahuweleli uri vha nga huwelela kha mashaka, vhahura, vhane vha dzhena navho tshikolo, vhane vha shuma navho na vhe vha vha ḓowela. Hu sa athu fhela miṅwaha mivhili, zwivhidzo zwo engedzea vhukuma kha ḽeneḽo ḽiisela. Ri nga vha ri tshi dzula shangoni ḽine ra kona u huwelela. Naho zwo ralo, ri nga edzisa tsumbo ya vhahashu nga u dzula ri tshi ṱoḓa tshibuli tsha u huwelela, ri tshi fhulufhela uri Yehova u ḓo ri ṋea maanḓa a u lwisana na zwine zwa nga ri thivhela.—Vhafil. 2:13.

18. Ri fanela u ḓiimisela u ita mini?

¹⁸ Kha tshifhinga tshine ra khou tshila khatsho, u nga ri ri nga ḓiimisela u tevhela nyeletshedzo ye Paulo a i amba kha vhurifhi he a vhu ṅwalela Vhafilipi. Ri fanela u ṱhogomela zwithu zwa ndeme vhukuma, u vha vha sa solei, u sa khukhulisa vhaṅwe na u vha na mutshelo wa u luga. Musi ri tshi ita zwenezwo, lufuno lwashu lu ḓo engedzea nahone zwi ḓo hulisa Yehova, Khotsi ashu wa lufuno.