1. Ndi mini zwine roṱhe ra zwi ṱoḓela mashaka ashu?

WAHASHU wa tshifumakadzini ane a pfi Pauline * o ri: “U bva tshee nda guda ngoho, ndo ṱoḓa na mashaka anga a tshi ita zwi fanaho uri ri tshile roṱhe Paradisoni. Zwihuluhulu ndo vha ndi tshi ṱoḓa uri munna wanga Wayne na kutukana kwashu vha ṱanganele na nṋe kha u shumela Yehova.” Naa ni na mashaka a sa athu guda nga ha Yehova na u mu funa? Arali zwo ralo, ni nga vha ni tshi ḓipfa u fana na Pauline.

2. Ndi dzifhio mbudziso dzine ra ḓo dzi haseledza kha ino thero?

² Ri nga si kone u kombetshedza mashaka ashu uri a thetshelese mulaedza washu, fhedzi ri nga vha ṱuṱuwedza uri vha humbule nga ha mulaedza u re Bivhilini na uri vha u ṱanganedze. (2 Tim. 3:14, 15) Ndi ngani ri tshi tea u huwelela kha mashaka ashu? Ndi ngani ri tshi tea u lingedza u pfesesa nḓila ine vha ḓipfa ngayo? Ri nga thusa hani mashaka ashu uri a fune Yehova nga nḓila ine ra mu funa ngayo? Nahone tshivhidzo tshashu tshi nga ri thusa hani?

3. U ya nga 2 Petro 3:9, ndi ngani ri tshi tea u huwelela kha mashaka ashu?

³ Yehova u ḓo fhelisa ḽino shango hu si kale. Nahone hu ḓo tshidzwa vha re na “mavhonele o teaho uri vha wane vhutshilo vhu sa fheli.” (Mish. 13:48) Ri fhedza nungo na tshifhinga tshinzhi ri tshi khou huwelela kha vhathu vhane ra si vha ḓivhe nahone a zwi timatimisi uri ri ṱoḓa na mashaka ashu a tshi shumela Yehova na riṋe. Khotsi ashu wa lufuno, Yehova “ha ṱoḓi muthu naho e ufhio  a tshi lozwiwa, fhedzi u tama vhoṱhe vha tshi rembuluwa.”—Vhalani 2 Petro 3:9.

4. Ndi vhukhakhi vhufhio vhune ra nga vhu ita musi ri tshi khou huwelela kha mashaka ashu?

⁴ Ri songo hangwa uri hu na nḓila yo teaho na i songo teaho ya u huwelela mulaedza une wa tshidza. Sa tsumbo, ri nga amba nga vhuthu musi ri tshi huwelela kha muthu ane ra si mu ḓivhe, fhedzi ra amba banga kupalula musi ri tshi huwelela kha mashaka ashu.

5. Ndi mini zwine ra fanela u zwi humbula musi ri sa athu huwelela kha mashaka ashu?

⁵ Vhunzhi hashu ri nga ḓisola musi ri tshi humbula nga ha musi ri tshi thoma u huwelela kha mashaka ashu nahone ra tama uri ngavhe ro amba navho nga nḓila yavhuḓi. Muapostola Paulo o vhudza Vhakriste uri: “Tshifhinga tshoṱhe ni ambe maipfi a vhuthu, a nge o lungwa muṋo, uri ni kone u ḓivha nḓila ine na tea u fhindula ngayo muthu muṅwe na muṅwe.” (Vhakol. 4:5, 6) Ndi zwavhuḓi u humbula yeneyi nyeletshedzo musi ri tshi amba na mashaka ashu nga nṱhani ha uri u ita zwenezwo zwi nga ita uri ri si vha khukhulise, fhedzi vha ri thetshelese.

6-7. Ṋeani tsumbo ine ya sumbedza uri ndi ngani zwi zwa ndeme u lingedza u pfesesa mufarisi a si Mukriste.

⁶ Lingedzani u pfesesa nḓila ine vha ḓipfa ngayo. Pauline we ha ambiwa nga hae mathomoni u ri: “Mathomoni ndo vha ndi tshi ṱoḓa u amba na munna wanga nga ha Mudzimu na Bivhili fhedzi. Ro vha ri sa ambi nga ha zwithu zwo ḓoweleaho.” Naho zwo ralo, Wayne munna wa Pauline o vha a sa ḓivhi zwithu zwinzhi nga ha Bivhili, nga zwenezwo, o vha a sa pfesesi uri Pauline o vha a khou amba nga ha mini. Khae zwo vha zwi tshi tou nga zwine Pauline a vha na ndavha nazwo ndi vhurabeli hawe fhedzi. O vha a tshi vhilaela uri Pauline a nga vha a tshi khou ḓikonanya na vhathu vha re na khombo nahone a tshi khou fhurwa.

 ⁷ Pauline u tenda uri o vha a tshi khou fhedza tshifhinga tshinzhi nga madekwana na mafhelo a vhege e na Vhakriste ngae, e miṱanganoni, a tshi khou huwelela na u takalela vhukonani na vhaṅwe. O ri: “Nga tshiṅwe tshifhinga, Wayne o vha a tshi swika hayani a wana hu si na muthu nahone a ḽiwa nga vhuludu.” Zwi tou pfala uri Wayne o vha a tshi ṱuvha mufumakadzi wawe na ṅwana wawe. O vha a sa zwi ḓivhi uri Pauline u khou fhedza tshifhinga na vhonnyi nahone zwo vha zwi tshi vhonala u nga dzenedzo khonani dza Pauline ntswa dzo no vha dza ndeme u mu fhira. Wayne o shushedza Pauline nga u mu vhudza uri u ḓo mu ṱala. Ni vhona u nga Pauline o vha a tshi nga sumbedza hani uri u a pfesesa nḓila ine Wayne a ḓipfa ngayo?

8. U ya nga 1 Petro 3:1, 2, ndi mini zwine zwa nga thusa mashaka ashu uri a tende u guda Bivhili?

⁸ Ivhani tsumbo yavhuḓi. Kanzhi mashaka ashu a ṱhogomela zwine ra zwi ita u fhira zwine ra zwi amba. (Vhalani 1 Petro 3:1, 2.) Nga u ya ha tshifhinga, Pauline o zwi ṱhogomela zwenezwo. O ri: “Ndo vha ndi tshi zwi ḓivha uri Wayne u a ri funa na uri ha ṱoḓi u nṱala. Fhedzi musi a tshi amba uri u ḓo nṱala, ndo ṱhogomela uri ndi tea u thoma u ita zwithu nga nḓila ine Yehova a ṱoḓa. Tsha ndeme vhukuma ho vha hu u vha tsumbo yavhuḓi u fhira u dzula ndi tshi khou huwelela khae.” Pauline o litsha u kombetshedza munna wawe u amba nga ha Bivhili nahone a thoma u amba nae nga ha zwithu zwo ḓoweleaho. Wayne o ṱhogomela uri mufumakadzi wawe u dzula e na mulalo na uri ṅwana wavho u ḓifara nga nḓila yavhuḓi. (Mir. 31:18, 27, 28) Musi a tshi ṱhogomela nḓila ye Bivhili ya vha i khou thusa ngayo muṱa wawe, o thoma u humbula nga ha Bivhili nahone a tenda u i guda.—1 Vhakor. 7:12-14, 16.

9. Ndi ngani ri tshi tea u dzula ri tshi lingedza u thusa mashaka ashu?

 ⁹ Dzulani ni tshi lingedza u thusa mashaka aṋu. Yehova o ri vhetshela tsumbo ya u ita zwenezwo. Yehova u “dovha” a ṋea vhathu tshibuli tsha uri vha thetshelese mafhungo maḓifha na uri vha wane vhutshilo vhu sa fheli. (Yer. 44:4) Na muapostola Paulo o vhudza Timotheo uri a dzule a tshi thusa vhaṅwe. Ndi ngani? Ndi ngauri zwenezwo zwo vha zwi tshi ḓo mu tshidza, zwa tshidza na vhane vha mu thetshelesa. (1 Tim. 4:16) Ri ṱoḓa mashaka ashu a tshi guda ngoho i re Bivhilini ngauri ri a vha funa. Nga u ya ha tshifhinga, maipfi a Pauline na zwe a zwi ita zwo vha na ṱhuṱhuwedzo yavhuḓi kha muṱa wawe. Zwino u khou shumela Yehova na munna wawe nahone o takala. Vha khou vula nḓila vhoṱhe nahone Wayne ndi muhulwane wa tshivhidzo.

10. Ndi ngani ri songo tea u fhela mbilu?

¹⁰ Ni songo fhela mbilu. Musi ri tshi khetha u tshila u tendelana na zwine zwa funwa nga Mudzimu, zwi nga konḓela mashaka ashu uri vha ṱanganedze dzenedzo tshanduko. Kanzhi tshithu tsha u thoma tshine vha tshi ṱhogomela ndi uri a ri tsha ṱanganela navho kha zwithu zwa vhurereli na zwa politiki. Maṅwe mashaka ashu a nga thoma o ri sinyutshela. (Mat. 10:35, 36) Fhedzi a ro ngo tea u vha fhelela mbilu. Arali ra litsha u lingedza u vha thusa uri vha pfesese zwine ra tenda khazwo, zwi vha zwi tshi nga ro no vha haṱulela uri a vho ngo tewa nga u wana vhutshilo vhu sa fheli. Yehova ho ngo ri ṋea mushumo wa u haṱula, nṱhani hazwo o u ṋea Yesu. (Yoh. 5:22) Mashaka ashu a nga thetshelesa mulaedza washu nga u ya ha tshifhinga arali ra sa vha fhelela mbilu.—Sedzani bogisi “ Shumisani Website Yashu U Itela U Funza.”

11-13. Ni guda mini kha nḓila ye Alice a fara ngayo vhabebi vhawe?

¹¹ Ivhani na vhuthu, fhedzi ni songo tendela mashaka aṋu a tshi shandula phetho dzaṋu. (Mir. 15:2) Ṱhogomelani tsumbo ya Alice. O guda nga ha Yehova musi a tshi khou dzula kule na vhabebi vhawe vhe vha vha vha sa tendi kha Mudzimu nahone vho ḓidzhenisa tshoṱhe kha zwa politiki. O ṱhogomela uri u tea u ṱavhanya a vha vhudza nga ha zwithu zwavhuḓi zwe a vha a tshi khou zwi guda. Alice o ri: “Arali na dzhia tshifhinga ni sa athu vhudza mashaka aṋu zwine na tenda khazwo na zwine na zwi ita, vha ḓo sinyuwa.” O ṅwalela vhabebi vhawe vhurifhi nga ha mafhungo a re Bivhilini e a vha a tshi ḓivha uri a nga vha takadza, a ngaho sa a lufuno nahone a vha vhudzisa zwine vha humbula nga hao. (1 Vhakor. 13:1-13) O livhuwa vhabebi vhawe nge vha mu alusa na u mu ṱhogomela nahone a vha rumela na zwifhiwa. Musi o dalela vhabebi vhawe o ita zwoṱhe zwine a nga kona uri a thuse mme awe nga mishumo ya nḓuni. Mathomoni vhabebi vhawe a vho ngo takala musi a tshi vha vhudza nga ha vhurereli hawe vhuswa.

¹² Musi Alice o dalela vhabebi vhawe, o vha a tshi vhala Bivhili ḓuvha na ḓuvha. O ri: “Zwenezwi zwo thusa mme anga u pfesesa uri Bivhili yo vha i ya ndeme kha nṋe.” Nga tshenetsho tshifhinga, khotsi awe vho vha vha tshi khou vhala Bivhili u itela u pfesesa uri ndi ngani ṅwana wavho o shanduka na uri vha wane vhukhakhi Bivhilini. Alice o dovha a ri: “Ndo vha ṋea Bivhili ye khayo nda vha ndo vha ṅwalela mulaedza.” Ho vha na mvelelo dzifhio? Khotsi a Alice a vho ngo tsha wana vhukhakhi Bivhilini u itela u i sasaladza, nṱhani hazwo, vho kwamea nga zwe vha zwi vhala.

¹³ Ri fanela u vha na vhuthu, fhedzi ri songo tenda mashaka ashu a tshi shandula phetho dze ra dzi dzhia naho zwi tshi amba uri ri fanela u konḓelela vhuimo vhu konḓaho. (1 Vhakor. 4:12b) Sa tsumbo, Alice o tea u konḓelela u pikiswa nga mme awe. O ri: “Musi ndi tshi lovhedzwa, mme anga vho mmbudza uri ndi ṅwana a sa pfi.” Alice o ita mini? O ri: “Nṱhani ha u sokou zwi litsha, ndo vha vhudza nga nḓila ya  ṱhonifho uri ndo dzhia phetho ya u vha muṅwe wa Ṱhanzi Dza Yehova nahone ndo ima kha ḽeneḽo. Ndo lingedza u khwaṱhisedza mme anga uri ndi a vha funa. Ro lila roṱhe nahone nda vha bikela zwiḽiwa. U bva tsheetsho, mme anga vho thoma u ṱhogomela uri Bivhili i khou nthusa uri ndi vhe muthu wa khwine.”

14. Ndi ngani ri songo tea u tendela mashaka ashu a tshi shandula phetho ye ra i dzhia ya u shumela Yehova?

¹⁴ Zwi nga dzhiela mashaka ashu tshifhinga tshilapfu uri vha pfesese nḓila ine u shumela Yehova zwa vha zwa ndeme ngayo kha riṋe. Sa tsumbo, musi Alice a tshi khetha u vula nḓila nṱhani ha u tovhola buḓo ḽe vhabebi vhawe vha mu khethela ḽone, mme awe vho dovha vha lila. Fhedzi ho ngo tenda vha tshi shandula phetho ye a i dzhia. Alice o ri: “Arali na tendela mashaka aṋu a tshi shandula phetho nthihi ye na i dzhia, vha nga lingedza na u shandula phetho dzaṋu kha maṅwe mafhungo. Fhedzi arali na vha na vhuthu nahone na ima kha ḽe na phetha, maṅwe mashaka aṋu vha nga ni thetshelesa.” Ndi zwe zwa itea kha Alice. Vhabebi vhawe vhoṱhe ndi vhavulanḓila nahone khotsi awe ndi muhulwane wa tshivhidzo.

15. U ya nga Mateo 5:14-16 na 1 Petro 2:12, “mishumo . . . yavhuḓi” ya vhaṅwe i nga thusa hani mashaka ashu?

¹⁵ Yehova u kokodzela vhathu khae a tshi shumisa “mishumo . . . mivhuya” ya tshivhidzo tshawe. (Vhalani Mateo 5:14-16; 1 Petro 2:12.) Arali mufarisi waṋu e si muṅwe wa Ṱhanzi Dza Yehova, naa o no ṱangana na vhathu vha tshivhidzoni tshaṋu? Pauline we ra amba nga hae, o ramba Vhakriste ngae muḓini wawe u itela uri munna wawe Wayne a kone u vha ḓivha. Wayne u ri u humbula nḓila ye muṅwe wahashu a mu thusa ngayo uri a pfesese nḓila ine Ṱhanzi dza vha ngayo, o ri: “O dzhia ḓuvha ḽa u awela  mushumoni uri a ḓe a ṱalele bola na nṋe. Nahone ndo mbo ḓi ṱhogomela uri ndi muthu u fana nṋe!”

16. Ndi ngani ri tshi tea u ramba mashaka ashu uri vha ḓe miṱanganoni?

¹⁶ Iṅwe nḓila yavhuḓi ine ra nga thusa ngayo mashaka ashu ndi nga u vha ramba uri vha ḓe miṱanganoni na riṋe. (1 Vhakor. 14:24, 25) Wayne o thoma nga u ya Tshihumbudzoni ngauri tshi farwa nga madekwana o no tshaisa nahone a tshi fhedzi tshifhinga tshilapfu. O ri: “A tho ngo pfesesa nyambo, fhedzi ndi kha ḓi humbula nḓila ye vhathu vha mpfara ngayo. Vho ḓa kha nṋe, vha nṱanganedza nahone vha nkhaḓa. Zwo vha zwi tshi vhonala uri zwi khou bva mbiluni.” Vhaṅwe vhavhingani vho vha vha tshi sumbedza Pauline vhuthu, vha tshi mu thusa u ṱhogomela ṅwana musi vhe miṱanganoni na vhuḓinḓani. Musi Wayne a tshi fheleledza o dzhia phetho ya u pfesesa nga ho engedzeaho zwine Pauline a tenda khazwo, Wayne o humbela wa munna kha vhenevho vhavhingani uri a gude Bivhili nae.

17. Ndi mini zwine a ro ngo tea u ḓivhona mulandu khazwo, fhedzi ndi ngani ri tshi tea u bvela phanḓa ri tshi huwelela kha mashaka ashu?

¹⁷ Ri ṱoḓa mashaka ashu oṱhe a tshi ṱanganela na riṋe kha u shumela Yehova. Naho zwo ralo, hu sa londwi vhuḓidini hashu hoṱhe vhune ra nga vhu ita u itela u thusa mashaka ashu uri a shumele Mudzimu, zwi nga itea vha sa ḓe ngohoni. Arali zwo ralo, a ro ngo tea u ḓivhona mulandu nga phetho ye vha i dzhia. Ngoho ndi ya uri, ri nga si kone u kombetshedza vhathu uri vha tende zwine ra tenda. Fhedzi a no ngo tea u dzhiela fhasi ṱhuṱhuwedzo yavhuḓi ine na nga vha nayo kha mashaka aṋu musi vha tshi ni vhona ni tshi khou shumela Yehova no takala. Vha rabeleleni. Ambani navho nga nḓila ine ya sa ḓo vha khukhulisa. Ni songo litsha u lingedza u vha thusa. (Mish. 20:20) Ivhani na vhungoho ha uri Yehova u ḓo fhaṱutshedza vhuḓidini haṋu. Nahone arali mashaka aṋu a khetha u ni thetshelesa, a ḓo tshidzwa!