1. Ri humbula mini musi ri tshi sedza zwoṱhe zwe Yehova a zwi sika?

MUSI ri tshi sedza zwoṱhe zwe Yehova a zwi sika, ri nga ḓipfa u fana na muphisalema Davida we a amba na Yehova nga thabelo a ri: “Musi ndi tshi vhona ḽiṱaḓulu, mishumo ya minwe yau, ṅwedzi na dziṋaledzi zwe wa zwi vhumba, muthu u tou vha mini u tshi dzula u tshi mu humbula, na murwa muthu u tou vha mini u tshi mu ṱhogomela?” (Ps. 8:3, 4) U fana na Davida, na riṋe ri nga mangadzwa nga nḓila ine Yehova a ri ṱhogomela ngayo naho ri tshi vhona u nga ri vhaṱuku musi ri tshi vhambedzwa na ṋaledzi dze a dzi sika. Fhedzi ri ḓo zwi vhona uri Yehova o vha a tshi ṱhogomela vhathu vha u thoma, Adamu na Eva, a vha ita miraḓo ya muṱa wawe.

2. Yehova o vha a tshi ṱoḓa uri Adamu na Eva vha ite mini?

² Adamu na Eva vho vha vhe vhana vha Yehova vha u thoma vha fhano kha ḽifhasi nahone Yehova o vha e Khotsi avho wa ṱaḓulu a re na lufuno. O vha o lavhelela uri vhenevha vhathu vhavhili vha bebe vhana. Mudzimu o vha vhudza a ri: “Bebani ni vhe vhanzhi ni ḓadze ḽifhasi ni ḽi vhuse.” (Gen. 1:28) O vha a tshi ṱoḓa uri vha vhe na vhana nahone vha ṱhogomele ḽifhasi. Arali Adamu na Eva vha thetshelese Mudzimu na u ita zwe a ri vha zwi ite, vhone na vhana vhavho vho vha vha tshi ḓo dzula vhe miraḓo ya muṱa wa Mudzimu lwa tshoṱhe.

3. Ndi ngani ri tshi nga ri Yehova o ṋea Adamu na Eva vhuimo vhu ṱhonifheaho muṱani wawe?

³ Adamu na Eva vho vha vho fhiwa vhuimo vhu ṱhonifheaho muṱani wa Yehova. Samusi zwo ṅwaliwa kha Phisalema 8:5, Davida o amba zwi tevhelaho nga ha nḓila ye Yehova a sika ngayo muthu. O ri: “Wo ita uri a vhe muṱuku kha vharuṅwa, wa mu ambadza vhugala na lunako.” Ndi ngoho uri Yehova ho ngo  ṋea vhathu maanḓa, vhuṱali na vhukoni zwi fanaho na zwa vharuṅwa. (Ps. 103:20) Naho zwo ralo, o vha ambadza vhugala na lunako. Ngoho zwi a mangadza! Yehova o ṋea vhabebi vhashu vha u thoma vhutshilo havhuḓi musi a tshi vha sika.

4. Ho itea mini kha Adamu na Eva nge vha si thetshelese Yehova nahone ri ḓo amba nga ha mini kha ino thero?

 ⁴ Zwi ṱungufhadzaho ndi uri Adamu na Eva a vho ngo tsha vha miraḓo ya muṱa wa Yehova nge vha si mu thetshelese. Samusi ri tshi ḓo zwi vhona nga murahu kha yeneyi thero, zwenezwi zwo vha na masiandoitwa a si avhuḓi kha vhana vhavho. Fhedzi tshipikwa tsha Yehova a tsho ngo shanduka. U ṱoḓa uri vhathu vha mu thetshelesaho vha vhe vhana vhawe lwa tshoṱhe. Ri ḓo thoma nga u amba nga ha uri Yehova o ri sumbedza hani uri ri vha ndeme khae. Nga murahu, ri ḓo amba nga ha uri ri nga ita mini zwino uri ri sumbedze uri ri ṱoḓa u vha miraḓo ya muṱa wa Mudzimu. Ri ḓo fhedza nga u amba nga ha zwithu zwavhuḓi zwine miraḓo ya muṱa wa Yehova ya ḓo vha nazwo kha ḽifhasi lwa tshoṱhe.

5. Samusi Mudzimu o ri sika a tshi ḓifanyisa, ri nga sumbedza hani uri ri zwi dzhiela nṱha?

⁵ Yehova o ri hulisa nga u ri sika a tshi ḓifanyisa. (Gen. 1:26, 27) Samusi Mudzimu o ri sika a tshi ḓifanyisa, ri nga guda u sumbedza zwine ene a vha zwone. Sa tsumbo, ri nga sumbedza lufuno, u pfela vhuṱungu, u fhulufhedzea na u luga. (Ps. 86:15; 145:17) Musi ri tshi sumbedza zwenezwo zwine Yehova a vha zwone, ri vha ri tshi khou mu hulisa na u dzhiela nṱha zwe a ri itela zwone. (1 Pet. 1:14-16) Musi ri tshi tshila nga nḓila ine ya takadza Khotsi ashu wa ṱaḓulu, ri vha na dakalo. Zwiṅwe hafhu, nge Yehova a ri sika a tshi ḓifanyisa, o ri fha vhukoni ha u vha vhathu vhane a ṱoḓa vha tshi vha miraḓo ya muṱa wawe.

6. Yehova o hulisa hani vhathu musi a tshi sika ḽifhasi?

⁶ Yehova o ri dzudzanyela haya ho khetheaho. Yehova o dzudzanyela vhathu ḽifhasi musi a sa athu u sika muthu wa u thoma. (Yobo 38:4-6; Yer. 10:12) Samusi Yehova e na mafunda nahone a tshi humbulela, o ri ṋea zwithu zwavhuḓi uri ri ḓiphiṋe ngazwo. (Ps. 104:14, 15, 24) O vha a tshi ita a tshi sedza zwithu zwe a zwi sika nahone a “vhona zwi zwavhuḓi.” (Gen. 1:10, 12, 31) O hulisa vhathu nga u ita uri vha “vhuse” zwithu zwoṱhe zwe a zwi sika kha ḽifhasi. (Ps. 8:6) Zwine Mudzimu a zwi ṱoḓa ndi uri vhathu vha si na tshivhi vha ḓiphiṋe nga u ṱhogomela zwe a zwi sika lwa tshoṱhe. Naa ni dzula ni tshi livhuwa Yehova nge a ni fhulufhedzisa zwithu zwavhuḓi nga u ralo?

7. Yoshua 24:15 i sumbedza hani uri vhathu vha na mbofholowo ya u ḓikhethela?

⁷ Yehova o ri ṋea mbofholowo ya u ḓikhethela. Ri nga ḓinangela zwine ra ṱoḓa u zwi ita vhutshiloni. (Vhalani Yoshua 24:15.) Mudzimu washu wa lufuno u a takala musi ri tshi nanga u mu shumela. (Ps. 84:11; Mir. 27:11) Ri nga shumisa mbofholowo yashu ya u ḓikhethela nga nḓila yavhuḓi musi ri tshi ita dziṅwe phetho dzavhuḓi. Kha ri humbule nga ha tsumbo ya Yesu.

8. Ṋeani tsumbo ya nḓila ye Yesu a shumisa ngayo mbofholowo yawe ya u ḓikhethela.

⁸ Ri nga edzisa tsumbo ya Yesu nga u ita zwithu zwine zwa vhuyedza vhaṅwe nṱhani ha zwine zwa vhuyedza riṋe. Ḽiṅwe ḓuvha musi Yesu na vhaapostola vhawe vho neta, vho ya fhethu ho dzikaho u itela u awela. Fhedzi a vho ngo kona u awela. Gogo ḽa vhathu ḽo vha wana nahone vho vha vha tshi ṱoḓa u funzwa nga Yesu. Fhedzi Yesu ho ngo dinalea. Nṱhani hazwo, o vha pfela vhuṱungu. Yesu o ita mini? O “thoma u vha funza zwithu zwinzhi.” (Marko 6:30-34) Ri ṋea Khotsi ashu wa ṱaḓulu vhugala  musi ri tshi edzisa Yesu nga u shumisa tshifhinga na nungo dzashu u itela u thusa vhaṅwe. (Mat. 5:14-16) Nahone ri vha ri tshi khou sumbedza Yehova uri ri ṱoḓa u vha muraḓo wa muṱa wawe.

9. Ndi tshifhiwa tshifhio tsha ndeme tshe Yehova a tshi ṋea vhathu?

⁹ Yehova o ṋea vhathu vhukoni ha u vha na vhana na vhuḓifhinduleli ha u vha gudisa u mu funa na u mu shumela. Arali ni mubebi, naa ni a dzhiela nṱha tshenetshi tshifhiwa? Yehova o ṋea vharuṅwa vhukoni ha u ita zwithu zwinzhi zwavhuḓi. Fhedzi ho ngo vha ṋea vhukoni ha u vha na vhana. Arali ni mubebi, dzhielani nṱha ndugelo ya u alusa vhana. Vhabebi vho ṋewa vhuḓifhinduleli ha u alusa vhana vha tshi “vha laya na u vha ṱuṱuwedzela zwa Yehova.” (Vhaef. 6:4; Dot. 6:5-7; Ps. 127:3) U itela u thusa vhabebi, ndangulo yo ri fha zwishumiswa zwinzhi zwo thewaho Bivhilini zwi fanaho na dzikhandiso, dzividio, muzika na thero dzi wanalaho kha website yashu. Zwi tou vha khagala uri Khotsi ashu wa ṱaḓulu na Murwa wawe vha funa vhana. (Luka 18:15-17) Yehova u a takala musi vhabebi vha tshi mu fhulufhela na u ita zwoṱhe zwine vha nga kona u itela u ṱhogomela vhana vhavho. Vhenevho vhabebi vha thusa vhana vhavho u vha na fhulufhelo ḽa u vha muraḓo wa muṱa wa Yehova lwa tshoṱhe!

10-11. Yehova o ita uri hu konadzee mini a tshi shumisa tshirengululi?

¹⁰ Yehova o ṋekedza Murwa wawe u itela uri ri dovhe ri vhe miraḓo ya muṱa wawe. Samusi ro amba nga hazwo kha  phara 4, musi Adamu na Eva vha tshi ita tshivhi, a vho ngo tsha vha tshipiḓa tsha muṱa wa Yehova, zwa ita uri na vhana vhavho vha si vhe tshipiḓa tsha muṱa wa Yehova. (Vharoma 5:12) Adamu na Eva vho khetha u sa thetshelesa Mudzimu, nga zwenezwo, zwo vha zwo tea uri a vha bvise muṱani wawe. Fhedzi ho vha hu tshi ḓo itea mini kha vhana vhavho? Yehova u funa vhathu, nga zwenezwo, o ita uri zwi konadzee uri vhane vha thetshelesa vha kone u vha tshipiḓa tsha muṱa wawe. O ita uri zwenezwo zwi konadzee nga tshiṱhavhelo tsha Murwa wawe muthihi fhedzi Yesu Kristo. (Yoh. 3:16; Vharoma 5:19) Nga nṱhani ha tshiṱhavhelo tsha Yesu Kristo, Yehova o ita uri vhashumeli vhawe vha fhulufhedzeaho vha 144 000 vha vhe vhana vhawe.—Vharoma 8:15-17; Nzumb. 14:1.

¹¹ Zwiṅwe hafhu, hu dovha ha vha na vhashumeli vha fhulufhedzeaho vha Yehova vha dzimiḽioni vhane vha khou ita zwine a zwi funa. Vha na fhulufhelo ḽa u vha miraḓo ya muṱa wa Yehova nga murahu ha u lingwa lwa u fhedzisela musi miṅwaha ya tshigidi i tshi fhela. (Ps. 25:14; Vharoma 8:20, 21) Nga nṱhani ha ḽeneḽo fhulufhelo, vha vhidza Yehova “Khotsi” sa izwi e Musiki wavho. (Mat. 6:9) Na vhane vha ḓo vuswa vha ḓo ṋewa tshikhala tsha u guda nga ha zwine Yehova a zwi ṱoḓa. Vhane vha khetha u mu thetshelesa na vhone vha ḓo vha tshipiḓa tsha muṱa wawe.

12. Ndi mbudziso ifhio ine ra ḓo i fhindula zwino?

¹² Samusi ro no amba nga hazwo, Yehova o no ita zwithu zwinzhi zwi sumbedzaho uri u a ri hulisa. Vhaḓodzwa vho no vha vhana vhawe nahone o ṋea vha “gogo ḽihulu” fhulufhelo ḽa uri vha ḓo vha vhana vhawe shangoni ḽiswa. (Nzumb. 7:9) Ri nga ita mini zwino u itela u sumbedza Yehova uri ri ṱoḓa u vha tshipiḓa tsha muṱa wawe lwa tshoṱhe?

13. Ri nga ita mini uri ri vhe tshipiḓa tsha muṱa wa Mudzimu? (Marko 12:30)

¹³ Sumbedzani uri ni funa Yehova nga u mu shumela nga mbilu yoṱhe. (Vhalani Marko 12:30.) Mudzimu o ri ṋea zwifhiwa  zwinzhi. Khamusi tshiṅwe tshihulwane kha zwenezwo zwifhiwa ndi ndugelo ya u mu gwadamela. Ri sumbedza uri ri funa Yehova nga u “tevhedza milayo yawe.” (1 Yoh. 5:3) Muṅwe wa milayo ine Yehova a ṱoḓa ri tshi i tevhedza ndi we Yesu a ri ṋea wone wa u ita vhafunziwa na u vha lovhedza. (Mat. 28:19) O dovha a ri laya uri ri funane. (Yoh. 13:35) Yehova u ḓo ṱanganedza vhane vha mu thetshelesa uri vha vhe tshipiḓa tsha muṱa wawe wa vhane vha mu gwadamela.—Ps. 15:1, 2.

14. Ri nga sumbedza hani uri ri funa vhaṅwe? (Mateo 9:36-38; Vharoma 12:10)

¹⁴ Funani vhaṅwe. Lufuno ndi lwone tshithu tsha ndeme kha Yehova. (1 Yoh. 4:8) Yehova o ri funa ri sa athu u mu ḓivha. (1 Yoh. 4:9, 10) Ri mu edzisa musi ri tshi funa vhaṅwe. (Vhaef. 5:1) Iṅwe ya nḓila dza khwinesa ine ra nga sumbedza ngayo uri ri funa vhaṅwe ndi nga u vha gudisa nga ha Yehova hu tshee na tshifhinga. (Vhalani Mateo 9:36-38.) Musi ri tshi vha thusa, vha nga ḓivha zwine vha tea u ita uri vha vhe miraḓo ya muṱa wa Yehova. Musi muthu o no lovhedzwa, ri tea u bvela phanḓa ri tshi mu funa na u mu ṱhonifha. (1 Yoh. 4:20, 21) Ri nga zwi ita hani? Iṅwe nḓila ine ra nga zwi ita ngayo ndi nga u tenda uri u na zwiṱuṱuwedzi zwavhuḓi. Sa tsumbo, arali wahashu o ita tshiṅwe tshithu tshine ri si tshi pfesese, a ri nga humbuli uri o tshi ita uri a ḓivhuyedze. Nṱhani hazwo, ri ḓo mu ṱhonifha, ra mu dzhia e muhulwane kha riṋe.—Vhalani Vharoma 12:10; Vhafil. 2:3.

15. Ndi vhafhio vhane ra tea u vha sumbedza khathutshelo na vhuthu?

¹⁵ Sumbedzani vhathu vhoṱhe vhuthu na khathutshelo. Arali ri tshi ṱoḓa u vha tshipiḓa tsha muṱa wa Mudzimu lwa tshoṱhe, ri fanela u tshila u tendelana na zwine a ri funza Bivhilini. Sa tsumbo, Yesu o ri funza uri ri vhe na vhuthu nahone ri khathutshele vhathu vhoṱhe, na maswina ashu. (Luka 6:32-36) Zwi nga ri konḓela u zwi ita nga zwiṅwe zwifhinga. Arali zwi tshi ri konḓela, ri fanela u ḓigudisa u humbula na u ita zwithu u fana na Yesu. Musi ri tshi ita zwoṱhe zwine ra nga kona uri ri thetshelese Yehova na u edzisa Yesu, ri vha ri tshi khou sumbedza Khotsi ashu wa ṱaḓulu uri ri ṱoḓa u vha tshipiḓa tsha muṱa wawe lwa tshoṱhe.

16. Ri nga ita hani uri muṱa wa Yehova u dzule u na dzina ḽavhuḓi?

¹⁶ Itani uri muṱa wa Yehova u dzule u na dzina ḽavhuḓi. Zwo ḓowelea uri muṱani ṅwana muṱuku a edzise mukomana wawe. Arali mukomana a tshila u tendelana na zwine Bivhili ya zwi funza, u vha tsumbo yavhuḓi kha murathu wawe. Arali mukomana a ita tshivhi, na murathu a nga tevhela yeneyo tsumbo i si yavhuḓi. Zwo tou ralo na muṱani wa Yehova. Arali Mukriste we a vha a tshi fhulufhedzea a gunea kana a ita zwithu zwi si zwavhuḓi, na vhaṅwe vha nga khetha u tevhela tsumbo yawe i si yavhuḓi. Vhane vha ita nga u ralo, vha tshinya dzina ḽavhuḓi ḽa muṱa wa Yehova wa vhane vha mu gwadamela. (1 Vhathes. 4:3-8) A ro ngo fanela u tevhela tsumbo dzi si dzavhuḓi kana u tendela naho tshi tshini tshi tshi tshinya vhushaka hashu na Khotsi ashu wa ṱaḓulu a re na lufuno.

17. Ndi mahumbulele afhio ane ra fanela u a iledza nahone ndi ngani?

¹⁷ Vheani fhulufhelo ḽaṋu kha Yehova, hu si kha thundu dzine na vha nadzo. Yehova o fhulufhedzisa uri u ḓo ri ṋea zwiḽiwa, zwiambaro na vhudzulo arali ra ṱoḓa Muvhuso wawe u thoma vhutshiloni na u tshila nga nḓila ine a i takalela. (Ps. 55:22; Mat. 6:33) Arali ra fhulufhela zwenezwo, a ri nga ḓo humbula uri thundu dzine ra vha nadzo dza ḽino shango dzi nga ri tsireledza kana u ita uri ri takale. Ri a zwi ḓivha uri u ita zwine Yehova a zwi funa  ndi zwone zwi zwoṱhe zwine zwa ḓo ita uri ri vhe na mulalo. (Vhafil. 4:6, 7) Naho ri tshi nga kona u renga zwithu zwinzhi, ri fanela u humbula arali ri tshi ḓo vha na tshifhinga na nungo zwa u ṱhogomela na u shumisa zwenezwo zwithu. Ri nga ḓivhudzisa uri: ‘Naa ri ḓo funesa dzenedzo thundu?’ Ri fanela u humbula uri Mudzimu o ri ṋea mushumo muṱani wawe. Nga zwenezwo, a ro ngo fanela u tendela naho tshi tshini tshi tshi ri thithisa. A ri ṱoḓi u fana na muṅwe munna we a vha a tshi funesa thundu dzawe, a khetha u sa tevhela Yesu. Nga zwenezwo, a xelelwa nga tshikhala tsha u shumela Yehova na u vha muṅwe wa vhana vhawe!—Marko 10:17-22.

18. Vhathu vha thetshelesaho vha ḓo huliswa na u fhaṱutshedzwa lwa tshoṱhe nga nḓila-ḓe?

¹⁸ Yehova u ḓo ṋea vhane vha mu thetshelesa ndugelo i fhiraho dzoṱhe ya u mu funa na u mu gwadamela lwa tshoṱhe! Vha re na fhulufhelo ḽa u tshila kha ḽifhasi vha ḓo takala musi vha tshi ṱhogomela ḽifhasi ḽe Yehova a ḽi sika uri ḽi vhe haya havho havhuḓi. Hu si kale, Muvhuso wa Mudzimu u ḓo ita uri ḽifhasi na zwoṱhe zwi re khaḽo zwi dovhe zwi nake. Yesu u ḓo fhelisa thaidzo dzoṱhe dze dza vha hone musi Adamu na Eva vha tshi khetha u ṱutshela muṱa wa Yehova. Yehova u ḓo vusa vha dzimiḽioni a vha ṋea tshikhala tsha u tshila lwa tshoṱhe vhe na mutakalo wavhuḓi kha ḽifhasi ḽa pharadiso. (Luka 23:42, 43) Musi vhathu vhane vha shumela Yehova vha si tsheena tshivhi, vha ḓo vha na “vhugala na lunako” zwe zwa ambiwa nga Davida.—Ps. 8:5.

19. Ri fanela u humbula mini?

¹⁹ Arali ni muṅwe wa vha “gogo ḽihulu,” ni na fhulufhelo ḽavhuḓi. Mudzimu u a ni funa nahone u ṱoḓa ni tshi vha muraḓo wa muṱa wawe. Nga zwenezwo, itani zwoṱhe zwine na nga kona u itela u mu takadza. Ni dzule ni tshi humbula zwe Yehova a ni fhulufhedzisa. Dzhielani nṱha ndugelo ya u gwadamela Khotsi ashu wa ṱaḓulu na fhulufhelo ḽa u mu renda lwa tshoṱhe!