THERO I GUDWAHO 33
Wanani Dakalo Kha Zwine Na Kona U Ita Tshumeloni Ya Yehova
“Ndi khwine u ḓiphiṋa nga zwine maṱo a kona u zwi vhona u fhira u tovhola zwine muthu a zwi tama.”—MUH. 6:9.
LUIMBO 111 Zwi Itaho Uri Ri Takale
MANWELEDZO *
1. Vhunzhi ha vhahashu vha khou lingedza hani u ita zwoṱhe zwine vha nga kona tshumeloni ya Yehova?
SAMUSI ḽino shango ḽi tsini na u fhela, hu na mushumo munzhi une ra tea u u ita. (Mat. 24:14; Luka 10:2; 1 Pet. 5:2) Roṱhe ri ṱoḓa u shumela Yehova nga hune zwa nga konadzea ngaho. Vhunzhi ha vhahashu vha khou ita zwoṱhe zwine vha nga kona vhuḓinḓani. Vhaṅwe vha ṱoḓa u shuma sa vhavulanḓila. Vhaṅwe vha ṱoḓa u shuma Bethele kana kha mushumo wa u fhaṱa zwifhaṱo zwa ndangulo. Nahone vhunzhi ha vhahashu vha tshinnani vha khou ita zwoṱhe zwine vha nga kona uri vha fanelee u vha vhashumeli kana vhahulwane. (1 Tim. 3:1, 8) Yehova u a takala vhukuma musi a tshi vhona zwe vhashumeli vhawe vha ḓiimisela u ita zwone u itela u mu shumela.—Ps. 110:3; Yes. 6:8.
2. Ri nga ḓipfa hani arali ri sa khou swikelela zwiṅwe zwipikwa zwe ra ḓivhetshela zwone ndanguloni ya Yehova?
2 Ri nga kulea nungo arali hu tshi khou fhela tshifhinga tshilapfu ri sa khou swikelela zwipikwa zwe ra ḓivhetshela zwone ndanguloni ya Yehova. Kana ri nga kulea nungo arali ri sa wani dziṅwe ndugelo nga nṱhani ha uri ro no vha vhaaluwa kana nga zwiṅwe zwiitisi. (Mir. 13:12) Zwenezwo zwo itea kha Melissa. * U ṱoḓa u shuma Bethele kana u ya Tshikoloni Tsha Vhahuweleli Vha Muvhuso (SKE), fhedzi u ri: “Miṅwaha yanga yo no pfuka ine ya ṱoḓea kha dzenedzi tshumelo. Nga zwenezwo, a thi tsha fanelea uri ndi ye. Nga zwiṅwe zwifhinga, ndi pfa ndo tsikeledzea.”
3. Vhaṅwe vhahashu vha tea u ita mini uri vha kone u fanelea u wana dziṅwe ndugelo?
3 Vhaṅwe vhahashu vhane vha kha ḓi vha vhaswa, vha re na mutakalo wavhuḓi, zwi nga ṱoḓea uri vha ite dziṅwe tshanduko kana uri vha shumele kha zwiṅwe musi vha sa athu u fanelea u wana ndugelo dzo engedzeaho. Sa tsumbo, vha nga vha vho ṱalifha, vha tshi ṱavhanya u dzhia phetho nahone vho ḓiimisela u shuma. Fhedzi zwi nga ṱoḓea uri vha shumele kha u sa fhela mbilu, u ita mushumo wavho nga vhuronwane na u ṱhonifha vhaṅwe. Arali na livhisa ṱhogomelo kha u khwinisa zwenezwo zwithu, ni nga wana dziṅwe ndugelo ni songo vhuya na dzi lavhelela. Kha ri ambe nga ha tsumbo ya Nick. Musi e na miṅwaha ya 20 o vha o kulea nungo ngauri o vha a songo vhewa sa mushumeli tshivhidzoni. U ri: “Ndo vhona u nga hu na zwiṅwe zwithu zwe nda khakha.” Fhedzi Nick ho ngo fhulufhuwa. O ita zwoṱhe zwine a nga kona tshivhidzoni na tsimuni. Zwazwino ndi muraḓo wa Komiti ya Davhi.
4. Ri ḓo amba nga ha mini kha ino thero?
4 Naa no kulea nungo ngauri a ni athu u swikelela tshipikwa tshe na ḓivhetshela tshone ndanguloni ya Yehova? Arali zwo ralo, vhudzani Yehova nga thabelo nḓila ine na khou ḓipfa ngayo. (Ps. 37:5-7) Zwiṅwe hafhu, ni nga vhudza vhahashu vha re na tshenzhelo uri vha ni vhudze hune na nga khwinisa hone nahone ni shumise nyeletshedzo ye vha ni ṋea yone. Arali na ita nga u ralo, ni nga wana dziṅwe ndugelo kana na swikelela tshipikwa tshe na ḓivhetshela tshone. U fana na Melissa we ra amba nga hae, khamusi zwazwino a zwi konadzei uri ni swikelele tshipikwa tshe na ḓivhetshela tshone tshumeloni ya Yehova. Nga zwenezwo, ni nga ita mini uri ni dzule no takala? U itela u fhindula yeneyo mbudziso, ino thero i ḓo amba nga ha (1) zwine zwa nga ita uri ni takale, (2) zwine zwa nga ita uri ni vhe na dakalo ḽo engedzeaho, na nga ha (3) zwipikwa zwine zwa nga ita uri ni dzule no takala.
NDI MINI ZWINE ZWA NGA ITA URI RI TAKALE?
5. Ri tea u livhisa ṱhogomelo kha mini u itela uri ri takale? (Muhuweleli 6:9)
5 Muhuweleli 6:9 i ṱalutshedza zwine zwa nga ri thusa uri ri takale. (Vhalani.) I sumbedza uri muthu ane a livhisa ṱhogomelo kha “zwine maṱo a kona u zwi vhona” u a fushea nga zwine a vha nazwo kana vhuimo vhune a vha khaho. Fhedzi muthu ane a tovhola zwine a zwi tama ha fushei nga zwine a vha nazwo. Ri guda mini? U itela uri ri takale, ri tea u livhisa ṱhogomelo kha zwine ra vha nazwo na u ḓivhetshela zwipikwa zwine ra nga kona u zwi swikelela.
6. Ri ḓo amba nga ha tshifanyiso tshifhio nahone ri ḓo guda mini khatsho?
6 Naa zwi a konadzea uri ri fushee nga zwine ra vha nazwo? Vhathu vhanzhi vha vhona u nga a zwi konadzei ngauri ri ṱoḓa u guda u ita zwithu zwiswa. Fhedzi zwi a konadzea u fushea nga zwine ra vha nazwo. Ri nga ḓiphiṋa nga zwine “maṱo a kona u zwi vhona.” Ri nga zwi ita hani? U itela u vhona uri ri nga zwi ita hani, kha ri ambe nga ha tshifanyiso tsha Yesu tsha talente tshi re kha Mateo 25:14-30. Kha tshenetsho tshifanyiso, ri ḓo guda nga ha uri ri nga wana hani dakalo na u ḽi engedza kha vhuimo vhune ra vha khaho.
NDI MINI ZWINE ZWA NGA ITA URI RI VHE NA DAKALO ḼO ENGEDZEAHO?
7. Ṱalutshedzani nga u pfufhifhadza tshifanyiso tsha Yesu tsha talente.
7 Kha tshenetsho tshifanyiso tsha talente muṅwe munna o vha a tshi khou ṱoḓa u fara lwendo. Musi a sa athu u ṱuwa o vhidza vhalanda vhawe a vha ṋea talente uri vha dzi bindulise. * Onoyo munna o vha a tshi zwi ḓivha uri vhalanda vhawe vha na vhukoni vhu sa fani. Nga zwenezwo, wa u thoma o mu ṋea talente ṱhanu, wa vhuvhili a mu ṋea mbili nahone wa vhuraru a mu ṋea nthihi. Mulanda wa u thoma na wa vhuvhili vho finya dza khwaṱha uri vha bindulise dzenedzo talente. Fhedzi mulanda wa vhuraru ho ngo ita tshithu nga dzenedzo talente, nga zwenezwo, muṋe wawe a mu pandela.
8. Ndi ngani mulanda wa u thoma a tshi nga vha o takala?
8 Mulanda wa u thoma a nga vha o takala nge a ṋewa talente ṱhanu nga muṋe wawe. Yeneyi yo vha i tshelede nnzhi vhukuma nahone zwo vha zwi tshi sumbedza uri muṋe wawe u a mu fhulufhela! Fhedzi hu pfi mini nga mulanda wa vhuvhili? O vha a tshi nga kulea nungo ngauri ene ho ngo wana talente dzi linganaho na dza mulanda wa u thoma. Fhedzi o ita mini?
Ri guda mini kha mulanda wa vhuvhili we Yesu a amba nga hae kha tshifanyiso tshawe? (1) Muṋe wawe o mu ṋea talente mbili. (2) O shuma nga maanḓa uri a bindulise dzenedzo talente. (3) O bindulisa dzenedzo talente mbili dza vha nṋa. (Sedzani dziphara 9-11)
9. Ndi zwifhio zwe Yesu a si zwi ambe nga ha mulanda wa vhuvhili? (Mateo 25:22, 23)
9 Vhalani Mateo 25:22, 23. Yesu ho ngo amba uri onoyo mulanda o sinyuwa kana o vhofha gwikhwi nge a ṋewa talente mbili. Nahone Yesu ho ngo amba uri onoyo mulanda o gungula a ri: ‘Ndi ngani muṋe wanga a tshi tou mpha talente mbili fhedzi? Na nṋe ndi mushumi wa biko u fana na mulanda we a ṋewa talente ṱhanu. Arali muṋe wanga a tshi vhona u nga a thi mushumi wa biko ndi khwine ndi tshi bwela fhasi dzenedzi talente nda ḓivhonela zwanga.’
10. Mulanda wa vhuvhili o ita mini nga talente dzawe?
10 Mulanda wa vhuvhili u fana na mulanda wa u thoma ngauri o vha a tshi dzhia mushumo we muṋe wawe a mu ṋea wone u wa ndeme. Nahone o finya dza khwaṱha kha wonoyo mushumo, nga zwenezwo, o bindulisa dzenedzo talente mbili dza vha nṋa. Muṋe wawe o mu lambedza nge a shuma vhukuma. Muṋe wawe o takala vhukuma nahone a mu ṋea muṅwe mushumo wo engedzeaho.
11. Ri nga ita mini uri ri vhe na dakalo ḽo engedzeaho?
11 Nga nḓila i fanaho ri nga wana dakalo ḽo engedzeaho musi ri tshi ita zwoṱhe zwine ra nga kona kha mushumo une ra vha nawo tshumeloni ya Yehova. Ni tea u “farekanea vhukuma” kha mushumo wa u huwelela na u finya dza khwaṱha kha mishumo ine na vha nayo tshivhidzoni. (Mish. 18:5; Vhahev. 10:24, 25) Ni lugiselele zwavhuḓi musi ni tshi ya miṱanganoni uri ni kone u ṱuṱuwedza vhaṅwe nga phindulo dzaṋu. Musi ni tshi ṋewa nyambo dza vhagudiswa kha muṱangano wa vhukati ha vhege, ni dzi dzhie dzi dza ndeme. Musi ni tshi ṋewa miṅwe mishumo tshivhidzoni, farani tshifhinga nahone ni vhe muthu ane a fhulufhelea. Ni songo humbula uri mushumo une na vha nawo a si wa ndeme na uri a ni tei u ḓiṋea tshifhinga uri ni u ite. Itani zwoṱhe zwine na nga kona uri ni vhe na vhutsila kha mushumo waṋu. (Mir. 22:29) Musi ni tshi ita zwoṱhe zwine na nga kona kha mishumo ine na vha nayo tshumeloni ya Yehova, ni ḓo vha khonani ya Yehova nahone ni ḓo vha na dakalo ḽo engedzeaho. (Vhagal. 6:4) Zwi ḓo ni lelutshela uri ni takale na vhaṅwe musi vha tshi wana ndugelo dze na vha ni tshi khou dzi ṱoḓa.—Vharoma 12:15; Vhagal. 5:26.
12. Melissa na Nick vho thuswa nga mini uri vha vhe na dakalo ḽo engedzeaho?
12 Naa ni kha ḓi humbula Melissa we ra amba nga hae kha phara ya vhuvhili, we a vha a tshi ṱoḓa u ya Bethele kana Tshikoloni Tsha Vhahuweleli Vha Muvhuso (SKE)? Naho zwi sa konadzei uri a ye Bethele kana SKE, u ri: “Samusi ndi muvulanḓila ndi ita zwoṱhe zwine nda nga kona kha u vula nḓila. Nahone ndi shumisa nḓila dzo fhambanaho kha u huwelela. Zwenezwi zwi ita uri ndi takale vhukuma.” Nick o thuswa nga mini uri a dzule o takala musi a songo vhewa sa mushumeli? U ri: “Ndo livhisa ṱhogomelo nga zwe nda vha ndi tshi nga kona u zwi ita, zwi ngaho u huwelela na u fhindula nga nḓila i ṱuṱuwedzaho tshivhidzoni. Ndo ḓadza fomo ya Bethele nahone nda vhidzwa ṅwaha u tevhelaho.”
13. Hu ḓo itea mini arali na finya dza khwaṱha kha mushumo une na vha nawo zwino? (Muhuweleli 2:24)
13 Arali na finya dza khwaṱha kha mushumo une na vha nawo zwino, naa zwi amba uri ni ḓo wana muṅwe mushumo wo engedzeaho tshifhingani tshi ḓaho? Khamusi zwi nga itea nga u ralo samusi zwo itea kha Nick. Arali zwa sa vha nga u ralo, ni nga vha na dakalo ḽo engedzeaho kha zwine na khou zwi itela Yehova u fana na Melissa. (Vhalani Muhuweleli 2:24.) Ni ḓo dovha na takala ngauri ni ḓo vha ni tshi khou zwi ḓivha uri ni khou takadza Yesu Kristo ane a vha Muṋe washu.
ZWIPIKWA ZWINE ZWA ITA URI RI DZULE RO TAKALA
14. Ri tea u dzula ri tshi humbula mini musi ri tshi ḓivhetshela zwipikwa tshumeloni ya Yehova?
14 Arali ro tou fombe kha mushumo une ra vha nawo tshumeloni ya Yehova, naa zwi amba uri a ro ngo tea u lingedza u ita zwo engedzeaho? Na khathihi! Ri tea u ḓivhetshela zwipikwa zwine zwa ḓo ri thusa uri ri vhe vhagudisi vha khwine vhuḓinḓani na uri ri thuse vhahashu nga ho engedzeaho. Ri ḓo swikelela zwenezwi zwipikwa arali ra livhisa ṱhogomelo kha u thusa vhaṅwe nṱhani ha u i livhisa kha riṋe vhaṋe.—Mir. 11:2; Mish. 20:35.
15. Ndi zwipikwa zwifhio zwine zwa nga ni thusa uri ni vhe na dakalo ḽo engedzeaho?
15 Ndi zwipikwa zwifhio zwine na nga ḓivhetshela zwone? Humbelani Yehova uri a ni thuse u ḓivha zwipikwa zwine na nga kona u zwi swikelela. (Mir. 16:3; Yak. 1:5) Naa ni nga kona u swikelela zwipikwa zwe ra amba nga hazwo kha phara ya u thoma zwi ngaho u vha muvulanḓila wa u thusa kana muvulanḓila wa tshifhinga tshoṱhe, u shuma Bethele kana kha mushumo wa u fhaṱa zwifhaṱo zwa ndangulo? Kana khamusi ni nga guda luṅwe luambo u itela u phaḓaladza mafhungo maḓifha kana u shuma fhethu hu re na ṱhoḓea. Ni nga guda zwinzhi nga ha zwenezwi zwipikwa nga u vhala ndima 10 ya bugu U Dzudzanyelwa U Ita Zwine Yehova A Zwi Funa kana na amba na vhahulwane vha tshivhidzo tshaṋu. * Musi ni tshi lingedza u swikelela zwenezwi zwipikwa, vhaṅwe vha ḓo zwi vhona uri ni khou ita mvelaphanḓa nahone ni ḓo vha na dakalo ḽo engedzeaho.
16. Ni tea u ita mini arali hu na tshiṅwe tshipikwa tshine ni si kone u tshi swikelela zwino?
16 Ni tea u ita mini arali ni sa koni u swikelela zwipikwa zwe ra amba nga hazwo kha ino thero? Ni nga ḓivhetshela tshipikwa tshine na nga kona u tshi swikelela. Kha ri ambe nga ha zwiṅwe zwa zwenezwo zwipikwa.
Ndi tshipikwa tshifhio tshine na nga tshi swikelela? (Sedzani phara 17) *
17. U ya nga 1 Timotheo 4:13, 15, wahashu wa tshinnani a nga ita mini uri a khwinise nḓila ine a funza ngayo?
17 Vhalani 1 Timotheo 4:13, 15. Arali ni wahashu wa tshinnani o lovhedzwaho, ni nga khwinisa nḓila ine na vhea ngayo nyambo na nḓila ine na funza ngayo. Ndi ngani? Ndi ngauri arali na ‘ḓikumedzela’ kha u vhala, kha u vhea nyambo dzavhuḓi na u funza, zwi ḓo thusa vhane vha ni thetshelesa. Ni nga lingedza u ḓivhetshela tshipikwa tsha u guda na u shumisa mbuno iṅwe na iṅwe i re kha bugwana Ḓiṋekedzeleni Kha U Vhala Na U Funza. Gudani mbuno nthihi ni ite nḓowe-nḓowe musi ni hayani nahone ni shumise zwe na zwi guda kha yeneyo mbuno musi ni tshi ṋekedza nyambo. Humbelani muṋei wa nyeletshedzo kana vhaṅwe vhahulwane “vhane vha shuma nga maanḓa kha u amba na u funza” uri vha ni thuse. * (1 Tim. 5:17) Ni songo livhisa ṱhogomelo kha u shumisa zwine na zwi guda kha yeneyi bugwana fhedzi, ni dovhe ni i livhise kha u thusa vhathetshelesi vhaṋu uri vha vhe na lutendo lwo khwaṱhaho na uri vha shumise zwine vha khou zwi guda. Musi ni tshi ita nga u ralo, ni ḓo ita uri inwi na vhathetshelesi vhaṋu ni vhe na dakalo ḽo engedzeaho.
Ndi tshipikwa tshifhio tshine na nga tshi swikelela? (Sedzani phara 18) *
18. Ndi mini zwine zwa nga ri thusa uri ri swikelele zwipikwa zwe ra ḓivhetshela zwone vhuḓinḓani?
18 Roṱhe ri na mushumo we ra ṋewa wone wa u huwelela na u ita vhathu vhafunziwa. (Mat. 28:19, 20; Vharoma 10:14) Naa ni a ṱoḓa u khwinisa vhutsila haṋu kha wonoyu mushumo wa ndeme vhukuma? Gudani bugwana U Funza nahone ni ḓivhetshele zwipikwa zwine zwa ḓo ni thusa u shumisa zwine na khou zwi guda. Ni nga dovha na khwinisa vhutsila haṋu nga u shumisa zwi re kha Tshibugwana Tsha Muṱangano Wa Vhutshilo Na Vhuḓinḓa Hashu Ha Vhukriste na kha vidio dza tsumbo dza u thoma nyambedzano kha miṱangano ya vhukati ha vhege. Lingedzani nḓila dzo fhambanaho dza u huwelela nahone ni vhone uri ndi ifhio ine ya shuma khwine. Musi ni tshi ita zwenezwo ni ḓo vha mugudisi wa khwine nahone ni ḓo takala vhukuma.—2 Tim. 4:5.
Ndi tshipikwa tshifhio tshine na nga tshi swikelela? (Sedzani phara 19) *
19. Ndi mini zwine zwa nga ni thusa uri ni tshile nga nḓila ine Vhakriste vha tea u tshila ngayo?
19 Ni songo hangwa uri tshiṅwe tsha zwipikwa zwa ndeme zwine na nga ḓivhetshela zwone ndi u tshila nga nḓila ine Vhakriste vha tea u tshila ngayo. (Vhagal. 5:22, 23; Vhakol. 3:12; 2 Pet. 1:5-8) Ni nga swikelela hani tshenetsho tshipikwa? Sa tsumbo, kha ri ri ni khou ṱoḓa u vha na lutendo lwo khwaṱhaho. Ni nga vhala thero dzine dza vha kha khandiso dzashu dzine dza nga ni thusa u vhona uri ni nga vha hani na lutendo lwo khwaṱhaho. Ni nga dovha na thuswa nga u ṱalela zwipiḓa zwa Khasho Ya JW zwine zwa sumbedza nḓila ye vhahashu vha sumbedza lutendo musi vha tshi sedzana na milingo yo fhambanaho. Nga murahu, ni ṱoḓe nḓila dzine na nga edzisa ngadzo tsumbo dzavho vhutshiloni haṋu.
20. Ri nga ita mini uri ri vhe na dakalo ḽo engedzeaho na uri ri si kulee nungo?
20 Ndi ngoho uri roṱhe ri ṱoda u ita zwi fhiraho zwine ra khou zwi ita zwino tshumeloni ya Yehova. Shangoni ḽiswa ri ḓo shumela Yehova nga hu sa fheli. Musi tshenetsho tshifhinga tshi sa athu u swika, ri nga wana dakalo ḽo engedzeaho na u sa kulea nungo, arali ra ita zwoṱhe zwine ra nga kona tshumeloni ya Yehova. Tsha ndeme vhukuma ndi uri ri ḓo hulisa na u renda Yehova ane a vha “Mudzimu o takalaho.” (1 Tim. 1:11) Nga zwenezwo, kha ri wane dakalo kha ndugelo dzine ra vha nadzo.
LUIMBO 82 ‘Tshedza Tshaṋu Kha Tshi Vhonetshele’
^ phar. 5 Yehova ri a mu funa nga maanḓa nahone ri ṱoḓa u ita zwoṱhe zwine ra nga kona tshumeloni yawe. Ndi ngazwo vhunzhi hashu ri tshi ṱoḓa u ita zwoṱhe zwine ra nga kona vhuḓinḓani kana uri ri fanelee u wana dziṅwe ndugelo tshivhidzoni. Fhedzi ri tea u ita mini arali ri tshi khou ita zwoṱhe zwine ra nga kona ngeno ri sa khou kona u swikelela tshipikwa tshashu? Ndi mini zwine zwa ḓo ri thusa uri ri dzule ro farekanea tshumeloni ya Yehova na uri ri dzule ro takala musi ri tshi mu shumela? Phindulo ri i wana kha tshifanyiso tsha Yesu tsha talente.
^ phar. 2 Maṅwe madzina o shandulwa.
^ phar. 7 ṰHALUTSHEDZELO YA MAIPFI: Talente yo vha i tshelede ye ya vha i tshi lingana na muholo wa miṅwaha ya 20.
^ phar. 15 Vhahashu vha tshinnani vho lovhedzwaho vha ṱuṱuwedzwa uri vha ite zwoṱhe zwine vha nga kona uri vha fanelee u vha vhashumeli kana vhahulwane tshivhidzoni. Vhalani ndima 5 na 6 ya bugu U Dzudzanyelwa U Ita Zwine Yehova A Zwi Funa u itela u vhona zwine vha tea u ita uri vha fanelee.
^ phar. 17 ṰHALUTSHEDZELO YA MAIPFI: Muṋei wa nyeletshedzo ndi muhulwane ane a eletshedza muhulwane kana mushumeli musi zwi tshi ṱoḓea malugana na nyambo naho i ifhio ye a i ṋekedza u katela na kha u vhala dziphara tshivhidzoni.
^ phar. 64 ṰHALUSO YA TSHIFANYISO: Wahashu u khou ita ṱhoḓisiso kha khandiso dzashu uri a swikelele tshipikwa tsha u vha mugudisi wa khwine.
^ phar. 66 ṰHALUSO YA TSHIFANYISO: Wahashu o ḓivhetshela tshipikwa tsha u huwelela lu songo dzudzanywaho nahone nga murahu a ṋea mushumi wa resiturente garaṱa ya vhukwamani.
^ phar. 68 ṰHALUSO YA TSHIFANYISO: Wahashu we a ḓivhetshela tshipikwa tsha u vha na mafunda o ṋea muṅwe tshifhiwa.
