1. Ndi zwithu zwifhio zwe vhunzhi ha vhaswa vha zwi swikelela?

 ṄWAHA muṅwe na muṅwe, hu lovhedzwa vhaswa vhanzhi vha Vhakriste. Naa no no lovhedzwa? Arali zwo ralo, vhahaṋu vha Vhakriste vha a takala na inwi, na Yehova u a takala. (Mir. 27:11) Humbulani nga ha zwithu zwinzhi zwe na kona u zwi swikelela. Sa tsumbo, no guda Bivhili nga vhuronwane, khamusi lwa miṅwaha yo vhalaho. Zwe na zwi guda zwo ita uri ni tende uri Bivhili ndi Ipfi ḽa Mudzimu. Fhedzi zwi fhiraho zwenezwo, ni vho ḓivha na u funa Muṅwali wa yeneyo bugu khethwa. No funa Yehova nga maanḓa lwe na ḓiṋekedzela khae na lovhedzwa. No ita phetho yavhuḓi nga maanḓa.

2. Ri ḓo amba nga ha mini kha ino thero?

 ² A zwi timatimisi uri musi ni sa athu u lovhedzwa, no sedzana na thaidzo dze dza ita uri zwi ni konḓele u fhulufhedzea kha Yehova. Fhedzi musi ni tshi khou ḓi aluwa, ni ḓo sedzana na miṅwe milingo. Saṱhane u ḓo lingedza u ita uri ni litshe u funa Yehova na u mu shumela. (Vhaef. 4:14) Ni songo vhuya na tendela zwenezwo zwi tshi itea. Ndi mini zwine zwa nga ni thusa uri ni dzule ni tshi fhulufhedzea kha Yehova na u dzula ni tshi mu shumela sa zwe na fhulufhedzisa? Ni tea u bvela phanḓa ni tshi shuma nga maanḓa uri ni vhe Mukriste o vhibvaho. (Vhahev. 6:1) Fhedzi ni nga zwi itisa hani?

3. Vhakriste vhoṱhe vha tea u ita mini musi vho no lovhedzwa?

³ Musi ro no lovhedzwa, roṱhe ri tea u tevhedza nyeletshedzo  ye muapostola Paulo a i ṋea Vhakriste vha Efesa. O vha ṱuṱuwedza uri vha vhe Vhakriste vho “vhibvaho.” (Vhaef. 4:13) Nga maṅwe maipfi, o vha a tshi khou vha vhudza uri: ‘Dzulani ni tshi ita mvelaphanḓa.’ Paulo o vhambedza nḓila ine Mukriste a ita ngayo mvelaphanḓa na nḓila ine ṅwana a aluwa ngayo. Vhabebi vha ṅwana ane a kha ḓi tou bva u bebwa vha a funa onoyo ṅwana na u ḓirwa khana ngae. Fhedzi a nga si dzule e lutshetshe u ya nga hu sa fheli. Nga u ya ha tshifhinga, onoyo ṅwana u tea u laṱa “zwiito zwa ṅwana.” (1 Vhakor. 13:11) Zwo tou ralo na kha Vhakriste. Musi ro no lovhedzwa, ri tea u dzula ri tshi ita mvelaphanḓa. Kha ri ambe nga ha zwiṅwe zwithu zwine zwa nga ri thusa uri ri kone u ita mvelaphanḓa.

4. Ndi mini zwine zwa nga ri thusa uri ri ite mvelaphanḓa? Ṱalutshedzani. (Vhafilipi 1:9)

⁴ Funani Yehova nga ho engedzeaho. Ndi ngoho uri ni funa Yehova nga maanḓa. Fhedzi ni nga mu funa hani nga ho engedzeaho? Muapostola Paulo o amba iṅwe nḓila ine ra nga zwi ita ngayo kha Vhafilipi 1:9. (Vhalani.) Paulo o rabelela uri lufuno lwa Vhafilipi “lu engedzee.” Na riṋe ri nga funa Yehova nga ho engedzeaho nga u vha na “nḓivho yo teaho” na nga u “ṱalukanya nga vhuḓalo.” Musi ri tshi ḓivha Yehova nga ho engedzeaho, ri ḓo kona u mu funa nga ho engedzeaho na u dzhiela nṱha zwine a vha zwone na nḓila ine a ita ngayo zwithu. Zwenezwo zwi ita uri ri ḓiimisele u mu takadza na u sa ṱoḓa u mu vhaisa. Ri ita zwoṱhe zwine ra nga kona uri ri pfesese zwine a ṱoḓa ri tshi zwi ita na nḓila ine ra tea u zwi ita ngayo.

5-6. Ri nga funa hani Yehova nga ho engedzeaho? Ṱalutshedzani.

⁵ Ri nga funa Yehova nga ho engedzeaho nga u ḓivha Murwa wawe khwine samusi o sumbedza zwine Khotsi awe a vha zwone kokotolo. (Vhahev. 1:3) Ri nga ḓivha Yesu khwine nga u guda Evangeli nṋa dzi ambaho nga hae. Arali ni sa vhali Bivhili ḓuvha ḽiṅwe na ḽiṅwe, ni nga thoma zwino nga u vhala dzenedzi Evangeli dzi ambaho nga ha Yesu. Musi ni tshi vhala dzenedzo Evangeli, livhisani ṱhogomelo kha zwine Yesu a vha zwone. Vhathu vho vha vha tshi takalela u vha nae na u amba nae. O vha a tshi funa vhana nahone a tshi vha takula. (Marko 10:13-16) Yesu o vha e na vhuthu, a tshi takalela vhathu nahone zwo vha zwi tshi ita uri vhafunziwa vhawe vha kone u amba nae vho vhofholowa. (Mat. 16:22) Musi Yesu a tshi ita zwenezwi, o vha a tshi khou edzisa Khotsi awe wa ṱaḓulu. Ri a zwi ḓivha uri Yesu u fana na Khotsi awe nahone zwenezwo zwi ri gudisa uri ri nga kona u amba na Yehova ro vhofholowa. Ri nga amba nae nga thabelo. Musi ri tshi rabela, ri nga mu vhudza zwine ra khou zwi humbula kana nḓila ine ra khou ḓipfa ngayo. Ri nga vha na vhungoho ha uri ha nga ri haṱuli ngauri u a ri funa nahone u na ndavha na riṋe.—1 Pet. 5:7.

⁶ Yesu o vha a tshi pfela vhathu vhuṱungu. Muapostola Mateo o ri: “A tshi vhona gogo a ḽi pfela vhuṱungu, ngauri ḽo vha ḽo vhaisala na u kulea nungo sa nngu dzi si na mulisa.” (Mat. 9:36) Yehova ene u ḓipfa hani? Yesu o ri: “Khotsi anga wa ṱaḓulu ha funi hu tshi lovha na muṅwe wa vhenevha vhana.” (Mat. 18:14) Enea maipfi a a ri takadza ngauri a sumbedza uri Yehova u a ri funa nga maanḓa! Musi ri tshi ḓivha Yesu nga ho engedzeaho, ri ḓo funa Yehova nga ho engedzeaho.

7. Ni nga vhuyelwa hani nga u konana na Vhakriste vho vhibvaho?

⁷ Zwiṅwe zwine zwa nga ni thusa uri ni fune Yehova nga ho engedzeaho na u vha Mukriste o vhibvaho, ndi nga u konana na Vhakriste vho vhibvaho. Ṱhogomelani nḓila ye vha takala ngayo. A vha ḓisoli nga phetho ye vha i ita ya u shumela Yehova. Vha humbeleni uri vha ni vhudze nga ha tshenzhelo dzine vha vha nadzo  tshumeloni ya Yehova. Vha humbeleni nyeletshedzo musi ni tshi tea u ita phetho ya ndeme. Ni songo hangwa uri “arali hu na vhaeletshedzi vhanzhi hu vha na u bvelela.”—Mir. 11:14.

8. Ni nga ita mini arali ni tshi timatima zwine Bivhili ya zwi amba?

⁸ Litshani u timatima. Samusi zwo ambiwa kha  phara 2, Saṱhane u ḓo lingedza u ita uri ni si khwaṱhise lutendo lwaṋu na uri ni si sendele tsini na Yehova. Iṅwe nḓila ine a nga zwi ita ngayo ndi nga u ita uri ni timatime zwine Bivhili ya zwi funza. Sa tsumbo, vhaṅwe vhathu vha nga kha ḓi lingedza u ita uri ni tende uri a ro ngo sikwa nga Mudzimu, ro sokou bvelela. Musi ni tshi kha ḓi vha muṱuku, khamusi a no ngo vhuya na humbula nga hazwo. Fhedzi zwino ni nga vha ni tshi zwi funziwa tshikoloni. Khamusi zwine vhadededzi vhaṋu vha zwi amba zwi vhonala zwi tshi pfala. Fhedzi vha nga vha vha sa athu u lingedza u wana vhuṱanzi ha uri hu na Musiki. Ni songo hangwa vhulivhisi vhu re kha Mirero 18:17. Lwonolwo luṅwalo lu ri: “Ane a vhiga mulandu wawe u thoma u vhonala a tshi nga u khou amba zwone, u swika hu tshi ḓa uḽa muṅwe a mu sengisa.” Nṱhani ha u sokou tenda zwine na zwi gudiswa tshikoloni, ndi khwine ni tshi ḓigudisa Ipfi ḽa Mudzimu nga vhuronwane. Itani ṱhoḓisiso kha khandiso dzashu. Ambani na vhaṅwe Vhakriste vhe vha vha vha tshi tenda uri zwithu zwo sokou bvelela. Vha vhudziseni uri ndi mini zwe zwa ita uri vha tende uri hu na Musiki ane a ri funa. Zwine vha zwi amba zwi nga ni thusa u wana vhuṱanzi ha uri hu na Musiki.

9. No guda mini kha Melissa?

⁹ Muṅwe wahashu wa tshifumakadzini ane a pfi Melissa, o guda nga ha tsiko nahone zwo mu thusa uri a si tsha timatima. * Melissa u ri: “Vhadededzi vho vha vha tshi ri ṱalutshedza pfunzo ya uri zwithu zwo sokou bvelela nga nḓila ine ya ita uri vhathu vha vhone u nga ndi ngoho. U thomani, ndo vha ndi sa ṱoḓi u ita ṱhoḓisiso ngauri ndo vha ndi tshi ofha uri yeneyo pfunzo i nga vha i ngoho. Fhedzi nda zwi humbula uri Yehova u ṱoḓa ri tshi vha na vhuṱanzi ha zwine ra zwi tenda. Ndo mbo ḓi thoma u ita ṱhoḓisiso. Nda vhala bugu Is There a Creator Who Cares About You? na bugwana Naa Zwithu Zwi Tshilaho Zwo Tou Sikwa? na The Origin of Life—Five Questions Worth Asking. Ndi tama uri ngavhe ndo ṱavhanya nda ita yeneyi ṱhoḓisiso ngauri yo nthusa nga maanḓa.”

10-11. Ndi mini zwine zwa nga ni thusa uri ni iledze u ḓifara luvhi? (1 Vhathesalonika 4:3, 4)

 ¹⁰ Iledzani u ḓifara luvhi. Musi ni miṅwahani yaṋu ya vhuswa, ni nga vha na lutamo luhulu lwa u ita zwa vhudzekani nahone nga zwiṅwe zwifhinga vhaṅwe vha nga lingedza u ni ṱuṱuwedza uri ni ḓifare luvhi nga zwa vhudzekani. Ndi zwine Saṱhane a ṱoḓa ni tshi zwi ita. Ndi mini zwine zwa nga ni thusa uri ni iledze u ḓifara luvhi? (Vhalani 1 Vhathesalonika 4:3, 4.) Musi ni tshi amba na Yehova nga thabelo, ni nga mu vhudza nḓila ine na khou ḓipfa ngayo. Ni mu humbele uri a ni thuse u ima no khwaṱha. (Mat. 6:13) Ni songo hangwa uri Yehova u khou ṱoḓa u ni thusa, hu si u ni haṱula. (Ps. 103:13, 14) Na u vhala Bivhili zwi nga ni thusa. Melissa we ra amba nga hae, o vha e na thaidzo, a tshi khou tea u lwisana na u humbula zwithu zwi songo teaho. Melissa u ri: “Nge nda ḓigudisa Bivhili ḓuvha ḽiṅwe na ḽiṅwe, zwo nthusa uri ndi dzule ndi tshi lwisana na nyemulo mmbi. Zwo nkhumbudza uri ndi mushumeli wa Yehova na uri ndi ṱoḓa u mu shumela.”—Ps. 119:9.

¹¹ Ni songo lingedza u tandulula thaidzo dzine na vha nadzo nga inwi muṋe. Ambani na vhabebi vhaṋu nga ha zwine na khou sedzana nazwo. Ndi ngoho uri a zwi leluwi u amba nga ha eneo mafhungo, fhedzi ndi zwa ndeme u amba nga hazwo. Melissa u ri: “Ndo humbela Yehova uri a nṋee tshivhindi. Nga murahu, nda amba na khotsi anga nga ha thaidzo ye nda vha ndi nayo. Ndo pfa ndo rulwa muhwalo. Ndo zwi ḓivha uri Yehova u khou ḓirwa khana nga nṋe.”

12. Ndi mini zwine zwa nga ni thusa u ita phetho dzavhuḓi?

¹² Tendani u livhiswa nga zwine Bivhili ya zwi funza. Musi ni tshi khou ḓi aluwa, vhabebi vhaṋu vha ḓo ni tendela ni tshi ḓiitela phetho nga ho engedzeaho. Fhedzi hu kha ḓi vha na zwinzhi zwine na kha ḓi tea u zwi guda. Ni nga iledza hani u ita vhukhakhi vhune ha nga tshinya vhukonani haṋu na Yehova? (Mir. 22:3) Muṅwe wahashu wa tshifumakadzini ane a pfi Kari, u ri vhudza nga ha zwe zwa mu thusa uri a kone u ita phetho dzavhuḓi. O zwi ṱhogomela uri Mukriste o vhibvaho ho ngo tea u vhetshelwa milayo ya tshiṅwe na tshiṅwe. O ri: “Ndo tea u pfesesa nḓila ine Yehova a humbula ngayo, nṱhani ha u sokou tevhela milayo.” Musi ni tshi khou guda Bivhili, ḓivhudziseni uri: ‘Aya mafhungo a mmbudza mini nga ha nḓila ine Yehova a humbula ngayo? Naa hu na vhulivhisi vhune ha nga nthusa uri ndi ite zwo lugaho? Arali zwo ralo, ndi ḓo vhuyelwa hani nga u vhu shumisa?’ (Ps. 19:7; Yes. 48:17, 18) Musi ni tshi guda Bivhili na u elekanya nga zwine na zwi vhala, zwi ḓo ni lelutshela u ita phetho dzi takadzaho Yehova. Musi ni tshi khou ita mvelaphanḓa, ni ḓo zwi ṱhogomela uri a no ngo tea u vha na mulayo wa vhuimo vhuṅwe na vhuṅwe ngauri ni a pfesesa nḓila ine Yehova a humbula ngayo.

13. Khonani dzavhuḓi dzi nga ni thusa hani? (Mirero 13:20)

¹³ Ivhani na khonani dzi funaho Yehova. Samusi zwo no ambiwa, khonani dzine na vha nadzo dzi nga ni thusa uri ni vhe Mukriste o vhibvaho. (Vhalani Mirero 13:20.) Muṅwe wahashu wa tshifumakadzini ane a pfi Sara o vha a songo tsha takala. Ho mbo ḓi itea zwiṅwe zwe zwa mu thusa uri a dovhe a takale. Sara u ri: “Ndo mbo ḓi wana khonani dzavhuḓi nga tshifhinga tsho teaho. Nṋe na muṅwe wahashu wa tshifumakadzini ane a kha ḓi vha muswa, ro vha ri tshi ṱangana vhege iṅwe na iṅwe u itela u guda Tshiingamo. Iṅwe khonani yo nthusa uri ndi fhindule miṱanganoni. Nḓila ye khonani dzanga dza nthusa ngayo yo ita uri ndi thome u vha na pfunzo ya muthu nga eṱhe, na uri ndi dzhie u rabela zwi zwa ndeme. Ndo mbo ḓi thoma u vha na vhushaka ho khwaṱhaho na Yehova, zwa ita uri ndi dovhe ndi takale.”

14. Julien o wana hani khonani dzavhuḓi?

 ¹⁴ Ni nga wana hani khonani dzine dza ḓo ni ṱuṱuwedza nga nḓila yavhuḓi? Julien, ane zwino a vha muhulwane wa tshivhidzo, o ri: “Musi ndi tshi kha ḓi vha muṱuku, ndo wana khonani musi ndi tshi khou huwelela navho. Dzenedzo khonani dzo vha dzi tshi fhisea nahone dzo nthusa u vhona uri ndi nga ḓiphiṋa ndi tshi khou ita mushumo wa u huwelela. Ndo mbo ḓi vha na tshipikwa tsha u dzhenela tshumelo ya tshifhinga tshoṱhe. Zwiṅwe hafhu, ndo zwi ṱhogomela uri ndo vha ndi si na khonani nnzhi dzavhuḓi ngauri khonani dze nda vha ndi nadzo ho vha hu vhathu vha thanga yanga. Nga murahu, ndo vha na khonani dzavhuḓi Bethele. Tsumbo dzavho dzo nthusa uri ndi ḓimvumvuse nga zwithu zwavhuḓi nahone zwenezwo zwo ita uri ndi sendele tsini na Yehova.”

15. Paulo o tsivhudza Timotheo uri a ṱhogomele khonani-ḓe? (2 Timotheo 2:20-22)

¹⁵ Ni fanela u ita mini arali na ṱhogomela uri muṅwe muthu ane a vha khonani yaṋu ha ni ṱuṱuwedzi nga nḓila yavhuḓi? Paulo o vha a tshi zwi ḓivha uri vhaṅwe vhathu tshivhidzoni a vha humbuli kana u ḓifara sa Vhakriste. Ndi ngazwo o vhudza Timotheo uri a ḓisendedze kule na vhenevho vhathu. (Vhalani 2 Timotheo 2:20-22.) Vhukonani hashu na Yehova ndi ha ndeme. Ro shuma vhukuma uri ri vhe khonani dza Yehova. Ndi ngazwo ri songo tea u vha na khonani dzine dza nga tshinya vhushaka hashu na Yehova.—Ps. 26:4.

16. Ndi zwipikwa zwifhio zwine na nga ḓivhetshela zwone?

¹⁶ Ḓivhetsheleni zwipikwa zwi vhuyedzaho. Ḓivhetsheleni zwipikwa zwine zwa ḓo ita uri ni vhe na lutendo lwo khwaṱhaho na zwine zwa ḓo ni thusa uri ni vhe Mukriste o vhibvaho. (Vhaef. 3:16) Sa tsumbo, ni nga ḓiitela phetho ya u vhala na u guda Bivhili tshifhinga tshoṱhe. (Ps. 1:2, 3) Kana ni nga lingedza u rabela tshifhinga tshoṱhe na uri thabelo dzaṋu dzi bve mbiluni. Kana ni nga tea u ṱhogomela zwine na ḓimvumvusa ngazwo na nḓila ine na shumisa ngayo tshifhinga tshaṋu. (Vhaef. 5:15, 16) Yehova u ḓo takala musi a tshi vhona ni tshi khou ita vhuḓidini ha u ita mvelaphanḓa.

17. Ni ḓo vhuyelwa hani nga u thusa vhaṅwe?

¹⁷ Zwiṅwe zwine zwa nga ni thusa uri ni vhe Mukriste o vhibvaho, ndi nga u thusa vhaṅwe. Yesu o ri: “U ṋea zwi a takadza u fhira u ṋewa.”  (Mish. 20:35) Arali na shumisa tshifhinga tshaṋu na nungo dzaṋu u itela u thusa vhaṅwe, zwi ḓo ita uri ni takale vhukuma. Sa tsumbo, ni nga ḓivhetshela tshipikwa tsha u thusa vhalala na vha si na mutakalo wavhuḓi tshivhidzoni tshaṋu. Khamusi ni nga vha thusa nga u vha rengela zwithu kana nga u vha thusa uri vha kone u shumisa zwishumiswa zwavho zwa elekitironiki. Arali ni wa tshinnani, ni nga ḓivhetshela tshipikwa tsha u vha mushumeli uri ni kone u thusa vhahaṋu vha tshivhidzoni. (Vhafil. 2:4) Zwiṅwe hafhu, ni nga sumbedza vhaṅwe vhane vha si vhe Dziṱhanzi uri ni a vha funa nga u vha vhudza mafhungo maḓifha a Muvhuso. (Mat. 9:36, 37) Arali zwi tshi konadzea, ni nga ḓivhetshela tshipikwa tsha u dzhenela tshumelo ya tshifhinga tshoṱhe.

18. U dzhenela tshumelo ya tshifhinga tshoṱhe zwi nga ni thusa hani uri ni ite mvelaphanḓa?

¹⁸ Musi ni kha tshumelo ya tshifhinga tshoṱhe, zwi nga ni vulela zwibuli zwa u ita mvelaphanḓa. Arali ni muvulanḓila, ni nga kona u ya kha Tshikolo Tsha Vhahuweleli Vha Muvhuso (SKE). Ni nga kona u shuma Bethele kana kha mishumo ya u fhaṱa zwifhaṱo zwa ndangulo. Muṅwe wahashu wa tshifumakadzini ane a pfi Kaitlyn, ane a kha ḓi vha muswa na ane a vha muvulanḓila, o ri: “Zwe zwa nthusa uri ndi kone u sendela tsini na Yehova musi ndo no lovhedzwa, ndi nga u shuma tsimu na vhahashu vho vhibvaho. Vho nṱuṱuwedza nga tsumbo yavho uri ndi gude Bivhili nga ho engedzeaho na u khwinisa nḓila ine nda funza ngayo.”

19. Ndi phaṱhutshedzo dzifhio dzine na ḓo ḓiphiṋa ngadzo arali na bvela phanḓa ni tshi vha Mukriste o vhibvaho?

¹⁹ Yehova u ḓo ni fhaṱutshedza zwihulu arali na bvela phanḓa ni tshi vha Mukriste o vhibvaho. Ni ḓo iledza u shumisa nungo dzaṋu kha u ita zwithu zwi sa vhuyedzi. (1 Yoh. 2:17) Ni ḓo vha muthu a bvelelaho na o takalaho, nṱhani ha u vha na maṱungu ane a vhangwa nga u ita phetho dzi si dzavhuḓi. (Mir. 16:3) Tsumbo yaṋu i ḓo ṱuṱuwedza vhahaṋu tshivhidzoni, hu sa londwi uri ndi vhahulwane kana ndi vhaṱuku. (1 Tim. 4:12) Zwi fhiraho zwenezwo, ni ḓo vha na mulalo na dovha na fushea nga u ḓivha uri ni khou takadza Yehova nahone ni khonani yawe.—Mir. 23:15, 16.