THERO I GUDWAHO 33
Yehova U Ṱhogomela Na U Tsireledza Vhathu Vhawe
“Ḽiṱo ḽa Yehova ḽi lavhelesa vhoṱhe vhane vha mu ofha.”—PS. 33:18.
LUIMBO 4 “Yehova Ndi Mulisa Wanga”
MANWELEDZO *
1. Ndi ngani Yesu o humbela Yehova uri a tsireledze vhatevheli vhawe?
VHUSIKUNI ha musi Yesu a sa athu u fa, o humbela Khotsi awe wa ṱaḓulu Yehova uri a tsireledze vhatevheli vhawe. (Yoh. 17:15, 20) Ndi ngoho uri Yehova u na ndavha na vhathu vhawe nahone u a vha tsireledza. Fhedzi Yesu o vha a tshi zwi ḓivha uri Saṱhane u ḓo tovhola vhatevheli vhawe lwo kalulaho. O vha a tshi dovha a zwi ḓivha uri vha ḓo ṱoḓa thuso ya Yehova uri vha kone u kunda Saṱhane.
2. U ya nga Phisalema 33:18-20, ndi ngani ri songo tea u ofha thaidzo dzine ra nga ṱangana nadzo?
2 Vhakriste vha ngoho vha ṱangana na thaidzo nnzhi kha ḽino shango ḽine ḽa vhuswa nga Saṱhane. Ri ṱangana na thaidzo dzine dza ri kula nungo na u linga u fhulufhedzea hashu kha Yehova. Samusi ri tshi ḓo zwi vhona kha ino thero, a ro ngo tea u ofha thaidzo dzine ra nga ṱangana nadzo. Yehova u na ndavha na riṋe, u a vhona thaidzo dzine ra khou ṱangana nadzo nahone o ḓiimisela u ri thusa. Kha ri ṱolisise tsumbo mbili dzi re Bivhilini dzine dza sumbedza nḓila ine Yehova a “lavhelesa [ngayo] vhoṱhe vhane vha mu ofha.”—Vhalani Phisalema 33:18-20.
MUSI RI TSHI ḒIPFA RI ROṰHE
3. Ndi kha vhuimo vhufhio vhune ra nga ḓipfa ri roṱhe?
3 Naho ri na vhahashu vhanzhi tshivhidzoni, nga zwiṅwe zwifhinga ri nga ḓipfa ri roṱhe. Sa tsumbo, vhaswa vha nga vhona u nga a hu na muthu ane a nga vha thusa musi vha tshi khou vhudza vhane vha dzhena navho tshikolo zwine vha zwi tenda kana musi vha tshi pfulutshela kha tshivhidzo tshiswa. Vhaṅwe vhashu ri nga ḓipfa ro tsikeledzea kana ra kulea nungo, ri tshi humbula u nga a hu na muthu ane a nga ri thusa u sedzana na nḓila ine ra khou ḓipfa ngayo. Ri nga kha ḓi timatima u vhudza vhaṅwe nḓila ine ra khou ḓipfa ngayo ri tshi vhona u nga a vha nga pfesesi nḓila ine ra khou ḓipfa ngayo. Nahone nga zwiṅwe zwifhinga ri nga vhona u nga a hu na muthu ane a vha na ndavha na riṋe. Hu sa londwi uri ndi ngani ri tshi pfa u nga a hu na a re na ndavha na riṋe, zwi nga ita uri ri kulee nungo, ri vhilaele. Yehova ha ṱoḓi ri tshi ḓipfa nga yeneyo nḓila. Ndi ngani ri tshi ralo?
4. Ndi ngani muporofita Elia o ri: “Ndo sala ndi ndoṱhe”?
4 Kha ri ambe nga ha Elia we a vha e mushumeli wa Yehova a fhulufhedzeaho. O shavha lwa maḓuvha a fhiraho 40 ngauri Isabele o vha a tshi khou ṱoḓa u mu vhulaya. (1 Dzikh. 19:1-9) Musi e bakoni e eṱhe a tshi khou vhona u nga ndi ene muporofita o salaho e eṱhe, o lilela Yehova a ri: “Ndo sala ndi ndoṱhe.” (1 Dzikh. 19:10) Ho vha hu na vhaṅwe vhaporofita kha ḽeneḽo shango. Sa tsumbo, Obadia o tsireledza vhaporofita vha 100 ngauri Isabele o vha a tshi khou ṱoḓa u vha vhulaya. (1 Dzikh. 18:7, 13) Ndi ngani Elia o vha a tshi khou ḓipfa e eṱhe? Naa o vha a tshi khou humbula uri vhaporofita vhe Obadia a vha dzumba vho vha vho fa? Kana khamusi zwo itiswa ngauri a hu na muṅwe muthu we a thoma u shumela Yehova nga murahu ha musi Yehova o sumbedza uri ndi ene Mudzimu wa ngoho ngei Thavhani ya Karamele? Kana khamusi o vha a tshi khou humbula uri a hu na muṅwe muthu ane a ḓivha uri maswina awe a khou ṱoḓa u mu vhulaya kana a hu na muthu ane a vha na ndavha nae? Bivhili a i ri vhudzi nga vhuḓalo uri ndi ngani Elia o vha a tshi khou ḓipfa nga yeneyo nḓila. Fhedzi ri a zwi ḓivha uri Yehova o vha a tshi pfesesa nḓila ine Elia a khou ḓipfa ngayo na uri o vha a tshi ḓivha uri u ḓo mu thusa nga nḓila-ḓe.
Musi ri tshi ḓipfa ri roṱhe, ri nga guda mini kha nḓila ye Yehova a thusa ngayo Elia? (Sedzani dziphara 5-6)
5. Yehova o khwaṱhisedza hani Elia uri ha eṱhe?
5 Yehova o thusa Elia nga nḓila dzo vhalaho. O ṱuṱuwedza Elia uri a ambe nae. O vhudzisa Elia luvhili uri: “U khou ṱoḓa mini fhano?” (1 Dzikh. 19:9, 13) Tshifhinga tshoṱhe musi Elia a tshi vhudza Yehova nḓila ine a khou ḓipfa ngayo, Yehova o vha a tshi mu thetshelesa. Yehova o fhindula Elia nga u mu sumbedza uri u ḓo mu thusa na uri u na maanḓa mahulu. O dovha a mu khwaṱhisedza uri hu na vhaṅwe Vhaisiraele vhane vha kha ḓi mu shumela. (1 Dzikh. 19:11, 12, 18) Zwi tou vha khagala uri Elia o pfa o rulwa muhwalo musi a tshi vhudza Yehova nḓila ine a khou ḓipfa ngayo na u pfa Yehova a tshi mu fhindula. Yehova o dovha a ṋea Elia mishumo ya ndeme. O mu humbela uri a ḓodze Hasaele uri a vhe khosi ya Siria, Yehu uri a vhe khosi ya Isiraele na uri a ḓodze Elisha uri a vhe muporofita. (1 Dzikh. 19:15, 16) Musi Yehova a tshi ṋea Elia yeneyi mishumo, o vha a tshi khou mu thusa uri a vhe na mavhonele avhuḓi. O dovha a mu ṋea Elisha uri a vhe khonani yawe ya tsini. Yehova a nga ni thusa hani musi ni tshi ḓipfa ni noṱhe?
6. Ni nga rabela nga ha mini musi ni tshi ḓipfa ni noṱhe? (Phisalema 62:8)
6 Yehova u ṱoḓa ni tshi amba nae nga thabelo. U a vhona thaidzo dzine na khou ṱangana nadzo nahone ni nga vha na vhungoho ha uri u ḓo ni thetshelesa musi ni tshi rabela tshifhinga tshoṱhe. (1 Vhathes. 5:17) U a takalela u pfa vhashumeli vhawe vha tshi amba nae. (Mir. 15:8) Ni nga rabela nga ha mini musi ni tshi ḓipfa ni noṱhe? Vhudzani Yehova nḓila ine na khou ḓipfa ngayo, u fana na Elia. (Vhalani Phisalema 62:8.) Mu vhudzeni nga ha zwine zwa khou ni vhilaedzisa na uri zwi ita uri ni ḓipfe hani. Mu humbeleni uri a ni thuse u ḓivha uri ni ite mini musi ni tshi ḓipfa ni noṱhe kana musi no ṱungufhala. Sa tsumbo, arali ni tshi tshuwa musi vhane na dzhena navho tshikolo vha tshi ni vhudzisa uri ni tenda mini, humbelani Yehova uri a ni ṋee tshivhindi tsha u amba zwine na tenda zwone. Ni mu humbele uri a ni thuse u amba nga vhuṱali. (Luka 21:14, 15) Arali ni tshi pfa no kulea nungo kana no tsikeledzea, humbelani Yehova uri a ni thuse uri ni ambe na Mukriste o vhibvaho nga ha nḓila ine na khou ḓipfa ngayo. Ni nga humbela Yehova uri a thuse muthu ane na ḓo amba nae uri a kone u pfesesa nḓila ine na khou ḓipfa ngayo. Vhudzani Yehova nḓila ine na khou ḓipfa ngayo, ni sedze nḓila ine a fhindula ngayo thabelo dzaṋu nahone ni tende musi vhaṅwe vha tshi ni thusa uri ni si ḓipfe ni noṱhe.
Naa ni a wana nḓila dzo engedzeaho dza u huwelela na u shuma na vhaṅwe? (Sedzani phara 7)
7. No guda mini kha Mauricio?
7 Yehova o ṋea roṱhe mushumo une ra nga u ita. Ni nga vha na vhungoho ha uri Yehova u a vhona zwoṱhe zwine na zwi ita tshivhidzoni na musi ni tsimuni nahone u a zwi dzhiela nṱha. (Ps. 110:3) U dzula no farakanea kha wonoyo mushumo zwi nga ni thusa hani naho ni khou ḓipfa ni noṱhe? Kha ri ambe nga ha tsumbo ya muṅwe wahashu wa tshinnani ane a kha ḓi vha muswa, ane a pfi Mauricio. * Musi Mauricio a tshi kha ḓi bva u lovhedzwa, iṅwe khonani yawe yo mbo ḓi litsha ngoho nga zwiṱuku nga zwiṱuku. Mauricio o ri: “Musi ndi tshi vhona khonani yanga a tshi khou ṱutshela Yehova, zwo ita uri ndi si tsha ḓifhulufhela. Ndo vha ndi tshi khou ḓivhudzisa arali ndi tshi ḓo kona u ita zwe nda ana zwa uri ndi ḓo dzula ndi tshi shumela Yehova na u dzula ndi muraḓo wa muṱa wawe. Ndo ḓipfa ndi ndoṱhe nahone ndi tshi vhona u nga a hu na muthu ane a nga pfesesa nḓila ine nda khou ḓipfa ngayo.” Mauricio o thuswa nga mini? O ri: “Ndo huwelela nga ho engedzeaho. Zwenezwo zwo ita uri ndi si livhisese ṱhogomelo kha thaidzo dzanga na kha nḓila ine nda khou ḓipfa ngayo. Ndo pfa ndo takala nahone ndo ḓipfa ndi si ndoṱhe musi ndi tshi khou shuma na vhaṅwe tsimuni.” Naho ri si tsha kona u ya u huwelela na vhahashu u fana na u thomani, vha nga ri khwaṱhisa musi ri tshi huwelela navho nga u tou ṅwala marifhi kana nga founu. Mauricio o dovha a thuswa nga mini? O ri: “Ndo dovha nda ita zwo engedzeaho tshivhidzoni. Ndo vha ndi tshi ita zwoṱhe zwine nda nga kona uri ndi lugiselele nyambo dza vhagudiswa dzine nda dzi fhiwa tshivhidzoni. Dzenedzi nyambo dzo ita uri ndi zwi vhone uri Yehova na vhahashu vha na ndavha na nṋe.”
MUSI RO TSIKELEDZEA NGA THAIDZO DZINE RA KHOU ṰANGANA NADZO
8. Thaidzo dzine ra khou ṱangana nadzo dzi nga ita uri ri ḓipfe hani?
8 Samusi ri tshi khou tshila maḓuvhani a vhufhelo, ri lavhelela uri ri ḓo ṱangana na dzithaidzo. (2 Tim. 3:1) Fhedzi ri nga kha ḓi ṱangana na thaidzo ri songo zwi lavhelela. Khamusi ri nga vha na thaidzo ya tshelede, khamusi dokotela a ri vhudza uri ri na vhulwadze vhune ha nga ri vhulaya kana khamusi ra lovhelwa nga muthu ane ra mu funa. Musi ri tshi ṱangana na dzenedzo thaidzo, ri nga ḓipfa ro tsikeledzea na u kulea nungo, zwihuluhulu arali dzi khou ḓa nga u tou tevhekana kana ri khou ṱangana na thaidzo nnzhi nga tshifhinga tshithihi. Fhedzi ni songo hangwa uri Yehova u vhona thaidzo dzoṱhe dzine ra khou ṱangana nadzo nahone o ḓiimisela u ri thusa uri ri kone u dzi kunda.
9. Ambani nga ha thaidzo dze Yobo a ṱangana nadzo.
9 Humbulani nga ha nḓila ye Yehova a thusa ngayo munna a fhulufhedzeaho ane a pfi Yobo. O ṱangana na thaidzo nnzhi dzi tshi tou tevhekana nga tshifhinga tshiṱuku-ṱuku. Nga ḓuvha ḽithihi, o vhudzwa uri zwifuwo zwawe zwoṱhe zwo tswiwa kana zwo vhulawa nahone a vhudzwa uri vhana vhawe na vhashumeli vhawe vho vhulawa. (Yobo 1:13-19) Nga murahu ha zwenezwo, musi a tshi kha ḓi lilela vhana vhawe, o mbo ḓi vha na vhulwadze vhu vhavhaho na vhu nengisaho. (Yobo 2:7) Yobo o pfa vhuṱungu vhukuma lwe a vhuya a ri: “Ndi nengwa vhutshilo hanga; a thi tsha ṱoḓa u tshila.”—Yobo 7:16.
Yehova u khwaṱhisedza Yobo uri u na ndavha nae na uri u a mu funa nga u mu vhudza nga ha nḓila nnzhi dzine a ṱhogomela ngadzo tsiko yawe (Sedzani phara 10)
10. Yehova o thusa hani Yobo uri a konḓelele thaidzo dzine a vha nadzo? (Sedzani tshifanyiso tshi re kha gwati.)
10 Yehova o vha a tshi khou vhona zwoṱhe zwine zwa khou itea kha Yobo. O mu thusa uri a kone u konḓelela thaidzo dzine a vha nadzo na uri a dzule a tshi fhulufhedzea ngauri u a mu funa. Yehova o amba na Yobo a mu humbudza nḓila ye a ṱalifha ngayo na nḓila ine a ṱhogomela ngayo tsiko yawe. O mu vhudza nga ha zwipuka zwinzhi zwi mangadzaho. (Yobo 38:1, 2; 39:9, 13, 19, 27; 40:15; 41:1, 2) Yehova o dovha a shumisa Elihu we a vha a tshi kha ḓi vha muswa uri a khuthadze Yobo na u mu khwaṱhisa. Elihu o khwaṱhisedza Yobo uri Yehova u dzula a tshi lambedza vhashumeli vhawe vhane vha konḓelela. Fhedzi Yehova o dovha a ita uri Elihu a eletshedze Yobo nga nḓila ya lufuno. Elihu o thusa Yobo uri a si livhisese ṱhogomelo kha ene muṋe nga u mu humbudza uri riṋe ri vhaṱuku musi ri tshi vhambedzwa na Yehova ane a vha Musiki wa zwithu zwoṱhe. (Yobo 37:14) Yehova o dovha a ṋea Yobo mushumo wa uri a rabelele khonani dzawe tharu dze dza vha dzo khakha. (Yobo 42:8-10) Yehova u ri thusa hani ṋamusi musi ri tshi ṱangana na thaidzo?
11. Bivhili i ri thusa hani uri ri kone u konḓelela thaidzo?
11 Yehova ha ambi na riṋe nga ho livhaho, u fana na nḓila ye a amba ngayo na Yobo, fhedzi u amba na riṋe a tshi shumisa Ipfi ḽawe, Bivhili. (Vharoma 15:4) U ri khuthadza nga u ri ṋea fhulufhelo ḽa vhumatshelo. Kha ri ambe nga ha maṅwe Maṅwalo ane a nga ri khuthadza musi ri tshi khou ṱangana na dzithaidzo. Bivhilini, Yehova u ri khwaṱhisedza uri a hu na tshithu na tshithihi tshine tsha nga ita uri a “si ri fune,” u katela na milingo. (Vharoma 8:38, 39) U dovha a ri khwaṱhisedza uri “u tsini na vhoṱhe vhane vha mu vhidzelela” nga thabelo. (Ps. 145:18) U ri vhudza uri arali ri tshi ḓitika ngae, ri nga konḓelela thaidzo iṅwe na iṅwe ine ra nga ṱangana nayo na uri ri nga takala naho ri khou ṱangana na thaidzo. (1 Vhakor. 10:13; Yak. 1:2, 12) Ipfi ḽa Mudzimu ḽi dovha ḽa ri humbudza uri thaidzo dzine ra khou ṱangana nadzo ndi dza tshifhinganyana musi ri tshi dzi vhambedza na phaṱhutshedzo dzavhuḓi dzine a ḓo ri ṋea dzone tshifhingani tshi ḓaho. (2 Vhakor. 4:16-18) Yehova u dovha a ri khwaṱhisedza uri u ḓo fhelisa vhoṱhe vhane vha ita uri ri ṱangane na dzenedzi thaidzo, vhane vha vha Saṱhane Diabolo na vhathu vhavhi vhane vha nga ene. (Ps. 37:10) Naa hu na Maṅwalo a khuthadzaho e na a rwela ngomani ane a nga ni thusa uri ni kone u konḓelela thaidzo tshifhingani tshi ḓaho?
12. Yehova u ṱoḓa uri ri ite mini arali ri tshi ṱoḓa u thuswa nga Ipfi ḽawe?
12 Yehova u lavhelela uri ri ḓivhetshele tshifhinga tsha u guda Bivhili tshifhinga tshoṱhe na u elekanya nga zwine ra khou zwi vhala. Musi ri tshi shumisa zwine ra khou zwi guda, ri ḓo vha na lutendo lwo khwaṱhaho na u vha tsini-tsini na Khotsi ashu wa ṱaḓulu, Yehova. Zwenezwo zwi ḓo ita uri ri kone u konḓelela thaidzo dzine ra nga ṱangana nadzo. Yehova u dovha a ṋea muya mukhethwa vhane vha ḓitika nga Ipfi ḽawe. Muya mukhethwa u nga ri ṋea “maanḓa a songo ḓoweleaho” uri ri kone u konḓelela thaidzo naho i ifhio.—2 Vhakor. 4:7-10.
13. Zwithu zwine Yehova a ri ṋea zwone a tshi shumisa “mulanda a fhulufhedzeaho na wa vhuṱali” zwi ri thusa hani uri ri kone u konḓelela milingo?
13 Yehova u khou thusa “mulanda a fhulufhedzeaho na wa vhuṱali” uri a ri ṋee dzithero, dzividio na muzika, zwine zwa ri thusa uri ri dzule ri na lutendo lwo khwaṱhaho na uri ri dzule ri khonani dza Yehova. (Mat. 24:45) Ri tea u shumisa zwithu zwoṱhe zwine Yehova a ri ṋea zwone. Muṅwe wahashu wa tshifumakadzini wa ngei Amerika u dzhiela nṱha zwithu zwine Yehova a ri ṋea zwone. O ri: “Ndi na miṅwaha ya 40 ndi tshi khou shumela Yehova nahone u fhulufhedzea hanga khae zwo no lingwa lunzhi.” O no ṱangana na thaidzo nnzhi. Sa tsumbo, makhulu wawe vha mukalaha vho vhulawa kha khombo ya goloi nga mureili we a vha o kambiwa, vhabebi vhawe vho lwala nahone vha lovha, ene a vha na khentsara luvhili. Ndi mini zwe zwa mu thusa uri a konḓelele? O ri: “Yehova u dzula a tshi nṱhogomela. Zwithu zwine a ri ṋea zwone a tshi shumisa mulanda a fhulufhedzeaho na wa vhuṱali zwo nthusa uri ndi kone u konḓelela. Zwenezwo zwi ita uri ndi kone u amba u fana na Yobo ndi ri: ‘Ndi ḓo dzula ndi tshi fhulufhedzea u swika ndi tshi fa!’”—Yobo 27:5.
Ri nga thusa hani vhaṅwe tshivhidzoni? (Sedzani phara 14)
14. Yehova u shumisa hani vhahashu uri vha ri thuse musi ri na thaidzo? (1 Vhathesalonika 4:9)
14 Yehova o gudisa vhathu vhawe uri vha sumbedzane lufuno na u khuthadzana musi wa khombo. (2 Vhakor. 1:3, 4; Vhalani 1 Vhathesalonika 4:9.) U fana na Elihu, vhahashu vho ḓiimisela u ri thusa uri ri dzule ri tshi fhulufhedzea musi ri khou ṱangana na dzithaidzo. (Mish. 14:22) Sa tsumbo, ṱhogomelani nḓila ye vhahashu vha khuthadza ngayo Vho Diane uri vha dzule vha tshi fhulufhedzea kha Yehova nga murahu ha musi munna wavho vho vha na thaidzo ya mutakalo. Vho Diane vho ri: “Ro vha ro fara ludongo nga hu fhisaho. Fhedzi ro vhona nḓila ine Yehova a ri funa ngayo kha yeneyo miṅwedzi. Vhahashu vho ita zwithu zwinzhi u itela u ri thusa. Zwe zwa ri thusa u konḓelela ndi uri vho vha vha tshi ri dalela, vha tshi ri founela na u ri kuvhatedza. Naho ndo vha ndi sa koni u reila, vhahashu vho vha vha tshi ita vhungoho ha uri ndi a ya miṱanganoni na tsimuni musi zwi tshi konadzea.” Ri a takala vhukuma ngauri ri na vhahashu vhane vha ri funa.
RI LIVHUWA NḒILA INE YEHOVA A RI ṰHOGOMELA NGAYO NGA LUFUNO
15. Ndi ngani ri tshi nga vha na vhungoho ha uri ri nga kona u konḓelela thaidzo dzine ra khou ṱangana nadzo?
15 Roṱhe ri ḓo ṱangana na dzithaidzo. Fhedzi a ri nga sedzani na dzenedzo thaidzo ri roṱhe. Yehova u vhona zwoṱhe zwine ra khou ṱangana nazwo, u fana na khotsi ane a ri funa. U dzula e tsini na riṋe, o lindela u ri thusa musi ri tshi ṱoḓa thuso na u ri tikedza. (Yes. 43:2) Ri nga vha na vhungoho ha uri ri nga kona u konḓelela thaidzo dzine ra khou ṱangana nadzo ngauri o ri ṋea zwithu zwoṱhe zwine ra zwi ṱoḓa uri ri kone u dzi konḓelela. Zwenezwo ndi tshifhiwa tsha thabelo, Ipfi ḽawe, vhulivhisi vhu bvaho Bivhilini na vhahashu vhane vha ri thusa musi wa khombo.
16. Ri tea u ita mini uri Yehova a dzule a tshi ri ṱhogomela?
16 Ri a takala vhukuma ngauri ri na Khotsi ashu wa ṱaḓulu ane a ri tsireledza. “Mbilu dzashu dzi a mu takalela.” (Ps. 33:21) Ri nga sumbedza uri ri dzhiela nṱha nḓila ine Yehova a ri ṱhogomela ngayo nga u shumisa zwoṱhe zwe a ri ṋea zwone u itela u ri thusa. Hu na zwiṅwe zwine ra tea u zwi ita uri a dzule a tshi ri ṱhogomela. Ri tea u bvela phanḓa ri tshi mu thetshelesa na u ita zwo lugaho, ndi hone a tshi ḓo ri tsireledza lwa tshoṱhe.—1 Pet. 3:12.
LUIMBO 30 Khotsi Anga, Mudzimu Wanga Na Khonani