THERO I GUDWAHO 34
LUIMBO 107 Tsumbo Ya Lufuno Lwa Mudzimu
U Sumbedza Lufuno Na Khathutshelo Kha Muthu O Itaho Tshivhi
“Mudzimu nga vhuthu hawe u lingedza uri u rembuluwe.” —VHAROMA 2:4.
ZWINE RA ḒO ZWI GUDA
Ri ḓo guda uri vhahulwane vha nga lingedza hani u thusa muthu o itaho tshivhi tshihulwane.
1. Ndi mini zwine zwa nga itea musi muthu o ita tshivhi tshihulwane?
KHA thero yo fhiraho, ro guda nga ha zwe Paulo a zwi vhudza vha tshivhidzo tsha Korinta uri vha zwi ite musi hu na munna o itaho vhukhakhi vhuhulwane tshivhidzoni. Onoyo munna o bviswa tshivhidzoni ngauri o vha a songo rembuluwa. Naho zwo ralo, samusi ndimana ye ino thero ya thewa khayo i tshi zwi sumbedza, Mudzimu a nga thusa vhathu vho itaho tshivhi uri vha rembuluwe. (Vharoma 2:4) Vhahulwane vha nga thusa hani muthu o itaho tshivhi uri a rembuluwe?
2-3. Ri tea u ita mini arali ra ḓivha uri muṅwe wahashu o ita vhukhakhi nahone ndi ngani?
2 Vhahulwane vha nga si kone u thusa muthu o itaho vhukhakhi vhuhulwane arali vha sa zwi ḓivhi. Nga zwenezwo, ri fanela u ita mini arali ra ḓivha uri muṅwe wahashu o ita vhukhakhi vhune ha nga ita uri a bviswe tshivhidzoni? Ri tea u ṱuṱuwedza onoyo wahashu uri a humbele thuso kha vhahulwane.—Yes. 1:18; Mish. 20:28; 1 Pet. 5:2.
3 Hu pfi mini arali onoyo wahashu o itaho vhukhakhi a si ye a amba na vhahulwane? Muthu ane a ḓivha nga ha honoho vhukhakhi u tea u ya a vhudza vhahulwane uri vha kone u thusa onoyo wahashu. Musi a tshi ita zwenezwo, u ḓo vha a tshi khou sumbedza uri u a funa onoyo wahawe ngauri u a zwi ḓivha uri vhahulwane vha ḓo mu thusa. Arali o itaho vhukhakhi a bvela phanḓa na u vhu ita, u ḓo vha a tshi khou bvela phanḓa a tshi tshinya vhushaka hawe na Yehova. Nahone arali vhathu vhane vha si vhe Ṱhanzi dza Yehova vha ḓivha nga ha zwe a zwi ita, vha nga thoma u amba luvhi nga ha Yehova na vhathu vhawe. Naho u vhudza vhahulwane zwi tshi nga vha zwi songo leluwa, ri tea u vha vhudza nga nṱhani ha uri ri funa Yehova na uri ri funa onoyo wahashu o itaho vhukhakhi.—Ps. 27:14.
NḒILA INE VHAHULWANE VHA THUSA NGAYO MUTHU O ITAHO TSHIVHI TSHIHULWANE
4. Vhahulwane vha vha vhe na tshipikwa tshifhio musi vha tshi ya u amba na muthu o itaho tshivhi tshihulwane?
4 Musi hu na muthu o itaho tshivhi tshihulwane tshivhidzoni, tshigwada tsha vhahulwane tshi khetha vhahulwane vhararu uri vha vhumbe komiti. a Vhenevho vhanna vhane vha khethiwa, vha tea u ḓiṱukufhadza. Musi vha tshi khou lingedza u thusa muthu o itaho tshivhi uri a rembuluwe, vha tea u zwi humbula uri vha nga si mu kombetshedze uri a shanduke. (Dot. 30:19) Naho Khosi Davida o rembuluwa, vhahulwane vha a zwi ḓivha uri a si vhathu vhoṱhe vhane vha ḓo rembuluwa. (2 Sam. 12:13) Vhaṅwe vhathu vho itaho vhukhakhi vha nga khetha u sa thetshelesa musi vha tshi kaidzwa nga Yehova. (Gen. 4:6-8) Naho zwo ralo, tshipikwa tsha vhahulwane ndi u thusa muthu o itaho tshivhi uri a rembuluwe arali zwi tshi konadzea. Ndi mini zwine vhahulwane vha tea u zwi humbula musi vha tshi ya u amba na muthu o itaho vhukhakhi?
5. Vhahulwane vha tea u ita hani zwithu musi vha tshi ya u amba na muthu o itaho vhukhakhi? (2 Timotheo 2:24-26) (Sedzani tshifanyiso.)
5 Vhahulwane vha a zwi ḓivha uri naho muthu o ita vhukhakhi vhuhulwane, u vha a tshi kha ḓi vha wa ndeme kha Yehova. (Luka 15:4, 6) Nga zwenezwo, musi vhahulwane vha tshi ya u amba na muthu o itaho tshivhi, vha amba nae nga nḓila yavhuḓi, vha mu sumbedza vhuthu. Vhahulwane a vha humbuli uri zwine vha fanela u ita ndi u sokou vhudzisa mbudziso fhedzi na u wana mafhungo oṱhe nga vhuḓalo. Nṱhani hazwo, vha edzisa zwo ambiwaho kha 2 Timotheo 2:24-26. (Vhalani.) Vhahulwane vha lwela u dzika, u vha na vhulenda na u sumbedza vhuthu kha muthu o itaho vhukhakhi ngauri vha vha vha tshi khou ṱoḓa u mu thusa uri a shandule nḓila ine a humbula ngayo.
U fana na vhalisa vha tshifhingani tsha kale, vhahulwane vha ita zwoṱhe zwine vha nga kona uri vha wane na u thusa nngu yo xelaho (Sedzani phara 5)
6. Vhahulwane vha nga ḓilugiselela hani musi vha sa athu u ya u amba na muthu o itaho vhukhakhi? (Vharoma 2:4)
6 Vhahulwane vha lugiselela mbilu dzavho musi vha sa athu u ya u amba na muthu o itaho vhukhakhi. Vha tea u humbula maipfi a Paulo ane a ri “Mudzimu nga vhuthu hawe u lingedza uri u rembuluwe.” Nga zwenezwo, vha lingedza u edzisa nḓila ine Yehova a sumbedza ngayo vhuthu kha vhaitazwivhi. (Vhalani Vharoma 2:4.) Vhahulwane vha tea u humbula uri vha vhalisa na uri vha tea u tevhedza vhulivhisi ha Kristo na u mu edzisa musi vha tshi ṱhogomela tshivhidzo. (Yes. 11:3, 4; Mat. 18:18-20) Musi komiti ya vhahulwane i sa athu u ya u amba na muthu o itaho vhukhakhi, vha nga thoma vha ṱangana, vha rabela nga ha tshipikwa tshavho tsha u thusa onoyo muthu uri a rembuluwe. Vha tea u ita ṱhoḓisiso Maṅwaloni, kha khandiso dzashu na u rabela uri Yehova a vha thuse u pfesesa onoyo muthu na vhuimo vhune a vha khaho. Vha tea u humbulisisa nga ha zwine vha tea u zwi ḓivha nga ha onoyo muthu, zwine zwa nga vha zwo ita uri a humbule na u ita zwithu nga nḓila ye a zwi ita ngayo.—Mir. 20:5.
7-8. Vhahulwane vha nga edzisa hani u sa fhela mbilu ha Yehova musi vha tshi ya u amba na muthu o itaho vhukhakhi?
7 Vhahulwane vha tea u edzisa Yehova nga u sa fhela mbilu. Vha tea u humbula nḓila ye Yehova a lingedza ngayo u thusa vhathu vho itaho vhukhakhi tshifhingani tsho fhiraho. Sa tsumbo, Yehova ho ngo fhelela Kaini mbilu. O mu vhudza zwe zwa vha zwi tshi ḓo itea arali a sa shandula nḓila dzawe na uri o vha a tshi ḓo mu fhaṱutshedza arali a thetshelesa. (Gen. 4:6, 7) Yehova o rumela muporofita Nathani uri a kaidze Davida. Nathani o anetshela tshifanyiso tshe tsha thusa Davida uri a rembuluwe. (2 Sam. 12:1-7) Nahone musi Vhaisiraele vha sa thetshelesi Yehova, o bvela phanḓa a tshi rumela vhaporofita vhawe khavho “lunzhi-lunzhi” a sa neti. (Yer. 7:24, 25) Ho ngo lindela uri vhathu vhawe vha thome vha rembuluwe uri a kone u vha thusa. Nṱhani hazwo, o lingedza u vha thusa uri vha rembuluwe naho vho vha vha tshi kha ḓi bvela phanḓa na u ita tshivhi.
8 Vhahulwane vha edzisa tsumbo ya Yehova musi vha tshi lingedza u thusa muthu o itaho tshivhi tshihulwane. Bugu ya 2 Timotheo 4:2 i amba uri musi vha tshi amba na muthu o itaho tshivhi, vha tea u sumbedza ‘u sa fhela mbilu.’ Nga zwenezwo, muhulwane u tea u dzika na u sa fhela mbilu uri a kone u thusa muthu o itaho tshivhi uri a ṱoḓe u ita zwo lugaho. Arali muhulwane a sinyuwa kana a fhela mbilu, muthu o itaho tshivhi a nga kha ḓi sa thetshelesa nyeletshedzo ine a ḓo vha a tshi khou mu ṋea yone kana a si rembuluwe.
9-10. Vhahulwane vha nga thusa hani muthu o itaho tshivhi u humbulisisa nga ha tshivhi tshe a tshi ita na zwe zwa ita uri a fhedzisele o ita tshenetsho tshivhi?
9 Vhahulwane vha ḓo lingedza u sedza uri ndi mini tsho itaho uri wahashu a ite tshivhi. Vha ḓo sedza uri ndi mini tshe tsha tshinya vhushaka hawe na Yehova. Naa o vha a si tsha ita ngudo yawe ya muthu nga eṱhe tshifhinga tshoṱhe kana u ya tsimuni tshifhinga tshoṱhe? Naa ha tsha dzula a tshi rabela kha Yehova kana ha tsha rabela zwi tshi bva mbiluni? Naa o vha a si tsha ita vhuḓidini ha u iledza nyemulo mmbi? Naa o ṱuṱuwedzwa nga khonani dzi si dzavhuḓi kana vhuḓimvumvusi vhu si havhuḓi? Zwenezwo zwithu zwi nga vha zwo kwama hani nḓila ine a humbula ngayo na nyemulo dzawe? Naa u a pfesesa nḓila ine Khotsi awe wa ṱaḓulu Yehova a ḓipfa ngayo nga ha zwe a zwi ita?
10 Vhahulwane vha ḓo vhudzisa muthu o itaho vhukhakhi mbudziso dzine dza ḓo mu thusa u humbula nga ha zwithu zwe zwa tshinya vhushaka hawe na Yehova nga zwiṱuku nga zwiṱuku, zwa fhedzisela zwo ita uri a ite vhukhakhi. Musi vha tshi mu vhudzisa dzenedzo mbudziso, vha zwi ita nga vhuthu nahone vha iledza u mu vhudzisa nga ha zwidodombedzwa zwi sa ṱoḓei. (Mir. 20:5) Zwiṅwe hafhu, vha nga shumisa zwifanyiso u itela u thusa onoyo muthu u humbulisisa nga ha zwe a zwi ita na uri a vhone uri ndi ngani zwo khakhea, u fana na zwe Nathani a zwi ita musi a tshi thusa Davida. Nga lwa u thoma musi vhahulwane vha tshi ya u amba na muthu o itaho vhukhakhi, khamusi a nga sumbedza u ṱungufhadzwa nga vhukhakhi he a vhu ita na nga zwithu zwe zwa ita uri a fhedzisele o ita honoho vhukhakhi. Khamusi a nga ita na u rembuluwa.
11. Yesu o thusa hani vhathu vho itaho tshivhi uri vha rembuluwe?
11 Vhahulwane vha lwela u edzisa tsumbo ya Yesu Kristo. Yesu o thusa Saulo wa Tariso uri a rembuluwe nga u mu vhudzisa uri: “Saulo, Saulo, ndi ngani u tshi khou ntovhola?” Yeneyo mbudziso ye Yesu a i vhudzisa Saulo yo mu thusa u humbulisisa nga ha zwe a vha a tshi khou zwi ita na uri a vhone uri zwo vha zwo khakhea. (Mish. 9:3-6) Nahone musi zwi tshi ḓa kha mafhungo a “mufumakadzi a ngaho Isabele,” Yesu o amba uri: “Ndo mu ṋea tshifhinga tsha u rembuluwa.”—Nzumb. 2:20, 21.
12-13. Vhahulwane vha nga ita mini u itela u ṋea muthu o itaho vhukhakhi tshifhinga tsha uri a rembuluwe? (Sedzani tshifanyiso.)
12 Vhahulwane vha edzisa Yesu nga u sa ṱavhanya vha ita phetho ya uri muthu o itaho vhukhakhi a nga si rembuluwe. Naho vhaṅwe vhathu vho itaho vhukhakhi vha tshi nga rembuluwa musi vha tshi ṱangana na komiti lwa u tou thoma, vhaṅwe zwi nga vha dzhiela tshifhinga. Nga zwenezwo, u itela u thusa muthu o itaho vhukhakhi, vhahulwane vha nga ita ndugiselelo ya u mu dalela lu fhiraho luthihi. Khamusi nga murahu ha u ṱangana nae lwa u thoma, onoyo muthu o itaho vhukhakhi a nga thoma u humbulisisa nga ha zwe vha amba nae nga hazwo. Zwenezwo zwi nga ita uri a ḓiṱukufhadze na uri a humbele Yehova uri a mu hangwele. (Ps. 32:5; 38:18) Nahone musi vha tshi dovha vha ya u amba na onoyo muthu, vha nga wana uri zwa zwino o no shandula mahumbulele awe.
13 Vhahulwane vha tea u pfela vhuṱungu muthu o itaho tshivhi na u mu sumbedza vhuthu u itela u mu thusa uri a rembuluwe. Vha tea u rabela kha Yehova uri a fhaṱutshedze vhuḓidini havho nahone vha tea u vha na fhulufhelo ḽa uri muthu o itaho tshivhi u ḓo humbulisisa nga zwe a zwi ita, a rembuluwa.—2 Tim. 2:25, 26.
U itela u thusa muthu o itaho vhukhakhi, vhahulwane vha nga ita ndugiselelo ya u mu dalela lu fhiraho luthihi (Sedzani phara 12)
14. Ndi nnyi ane a tea u khoḓiwa musi muthu o itaho tshivhi a tshi rembuluwa nahone ndi ngani?
14 Ri a takala musi muthu o itaho tshivhi a tshi rembuluwa. (Luka 15:7, 10) Naho hu vhahulwane vhane vha ita zwoṱhe zwine vha nga kona u itela u thusa muthu o itaho tshivhi uri a rembuluwe, ndi nnyi ane a tea u khoḓiwa musi muitazwivhi a tshi rembuluwa? Humbulani zwe Paulo a zwi amba nga ha vho itaho zwivhi. O ri: “Khamusi Mudzimu u ḓo ita uri vha rembuluwe.” (2 Tim. 2:25) Nga zwenezwo, ndi Yehova ane a thusa muthu o itaho tshivhi uri a shandule nḓila ine a humbula ngayo na uri a rembuluwe. Paulo o amba na nga ha zwithu zwavhuḓi zwine zwa itea musi muthu o no rembuluwa. Muthu ane a rembuluwa u wana nḓivho yo teaho ya ngoho, a dzivhuluwa na u ponyoka tshikwekweni tsha Saṱhane Diabolo.—2 Tim. 2:26.
15. Vhahulwane vha nga bvela hani phanḓa vha tshi thusa muthu o itaho vhukhakhi we a rembuluwa?
15 Musi muthu o itaho vhukhakhi a tshi rembuluwa, vhahulwane vha ḓo bvela phanḓa na u mu dalela u itela u mu thusa uri a khwaṱhise lutendo lwawe na u mu thusa uri a bvele phanḓa a tshi iledza milingo ya Saṱhane, uri a dzule a tshi ita zwo lugaho. (Vhahev. 12:12, 13) Zwi tou pfala uri vhahulwane vha nga si vhudze vhaṅwe tshivhi tshe wahashu a tshi ita na zwidodombedzwa zwi tshimbidzanaho na eneo mafhungo. Fhedzi ndi mini zwine zwa nga tea u ḓivhadzwa tshivhidzo?
“U VHA KAIDZE PHANḒA HA VHOṰHE”
16. U ya nga 1 Timotheo 5:20, musi Paulo a tshi ri “phanḓa ha vhoṱhe” o vha a tshi khou ambela kha vhonnyi?
16 Vhalani 1 Timotheo 5:20. Paulo o vhudza Timotheo we a vha e muhulwane tshivhidzoni uri a kaidze muthu o itaho tshivhi “phanḓa ha vhoṱhe.” Naa Paulo o vha a tshi khou amba uri muthu o itaho tshivhi u fanela u kaidzwa phanḓa ha tshivhidzo tshoṱhe? Musi a tshi ri “phanḓa ha vhoṱhe,” o vha a sa khou ambela kha uri zwi ḓo dzula zwi tshi katela tshivhidzo tshoṱhe. Nṱhani hazwo, o vha a tshi khou ambela kha vhane vha ḓivha nga ha tshivhi tshe onoyo muthu a tshi ita. Zwenezwi zwi nga katela vhathu vhe vha mu vhona a tshi ita honoho vhukhakhi kana vhe a vha vhudza nga haho. Vhahulwane vha ḓo vhudza vhenevho vhathu fhedzi uri vho dzudzanya mafhungo na muthu o itaho tshivhi na uri vho mu kaidza.
17. Ndi kha vhuimo vhufhio vhune ha tea u itwa nḓivhadzo ya uri muthu o kaidziwa nahone ndi ngani?
17 Nga tshiṅwe tshifhinga, vhunzhi ha vhathu tshivhidzoni vha nga vha vha tshi vho ḓivha nga ha vhukhakhi he onoyo wahashu a vhu ita, kana zwi tshi nga itea vha ḓivha nga haho musi tshifhinga tshi tshi khou ḓi ya. Kha honoho vhuimo, “phanḓa ha vhoṱhe” zwi nga katela tshivhidzo tshoṱhe. Nga zwenezwo, muhulwane u ḓo tea u ita nḓivhadzo phanḓa ha tshivhidzo tshoṱhe ya uri onoyo wahashu o itaho vhukhakhi o kaidziwa. Ndi ngani? Paulo o ri: “Uri zwi vhe tsevho kha vhoṱhe” uri na vhone vha si ite tshivhi tshihulwane.
18. Vhahulwane vha tea u ita mini arali ṅwana o lovhedzwaho, a sa athu swikisaho miṅwaha ya 18 a ita vhukhakhi vhuhulwane? (Sedzani tshifanyiso.)
18 Ndi mini zwine vhahulwane vha tea u zwi ita musi ṅwana o lovhedzwaho, a sa athu swikisaho miṅwaha ya 18 o ita vhukhakhi vhuhulwane? Tshigwada tsha vhahulwane tshi ḓo dzudzanya uri vhahulwane vhavhili vha ye u amba na onoyo ṅwana na vhabebi vhawe vha Dziṱhanzi. b Vhenevho vhahulwane vha ḓo vhudzisa vhabebi vha onoyo ṅwana uri vho no ita mini u itela u lingedza u thusa ṅwana wavho uri a ite tshanduko na uri a rembuluwe. Arali onoyo ṅwana a tshi khou thetshelesa musi vhabebi vhawe vha tshi mu kaidza nahone a tshi khou ita tshanduko kha nḓila ine a humbula na u ḓifara ngayo, vhenevho vhahulwane vha nga ita phetho ya u tendela vhabebi vhawe vha tshi bvela phanḓa na u mu thusa. Vhahulwane vha a zwi ḓivha uri Yehova o ṋea vhabebi vhuḓifhinduleli ha u kaidza vhana vhavho nga nḓila ya lufuno. (Dot. 6:6, 7; Mir. 6:20; 22:6; Vhaef. 6:2-4) Nga murahu, vhahulwane vha ḓo ita vha tshi amba na vhabebi vha onoyo ṅwana u itela u ita vhungoho ha uri ṅwana u khou wana thuso ine a i ṱoḓa. Fhedzi vhahulwane vha ḓo ita mini arali onoyo ṅwana a bvela phanḓa na u ita vhukhakhi a sa ṱoḓi u shanduka? Kha honoho vhuimo, komiti ya vhahulwane i ḓo dzudzanya u ya u amba na onoyo ṅwana na vhabebi vhawe vha Dziṱhanzi.
Musi ṅwana a sa athu swikisaho miṅwaha ya 18 o ita vhukhakhi vhuhulwane, vhahulwane vhavhili vha ḓo ya u amba nae e na vhabebi vhawe vha Dziṱhanzi (Sedzani phara 18)
“YEHOVA U NA LUFUNO LUHULU NA KHATHUTSHELO”
19. Vhahulwane vha lingedza hani u edzisa Yehova musi vha tshi khou thusa muthu o itaho vhukhakhi?
19 Yehova u ṱoḓa vhahulwane vha tshi tsireledza tshivhidzo kha vhathu vhane vha hana u tevhedza milayo yawe. (1 Vhakor. 5:7) Fhedzi vhahulwane vha ṱoḓa u ita zwoṱhe zwine vha nga kona u itela u thusa muthu o itaho vhukhakhi uri a rembuluwe arali a tshi khou ṱoḓa. Musi vha tshi khou thusa onoyo muthu, vha vha vha tshi khou fhulufhela uri u ḓo tenda u khakhululwa nahone a shanduka. Ndi ngani? Ndi ngauri vha vha vha tshi khou ṱoḓa u edzisa Yehova ane a vha “na lufuno luhulu na khathutshelo.” (Yak. 5:11) Ṱhogomelani nḓila ye muapostola Yohane a fara ngayo vhahawe nga nḓila ya lufuno. O ṅwala uri: “Vhananga, ndi khou ni ṅwalela zwenezwi uri ni si ite tshivhi. Ane a ita tshivhi a ḓivhe uri ri na Yesu Kristo muthusi o lugaho ane a bva kha Khotsi.”—1 Yoh. 2:1.
20. Ri ḓo amba nga ha mini kha thero i tevhelaho?
20 Zwi pfisaho vhuṱungu ndi uri nga tshiṅwe tshifhinga Mukriste o itaho tshivhi u vha a sa ṱoḓi u rembuluwa. Arali zwo ralo, u tea uri a bviswe tshivhidzoni. Vhahulwane vha tea u ita mini musi zwenezwi zwi tshi itea? Ri ḓo haseledza nga hazwo kha thero i tevhelaho.
LUIMBO 103 Vhalisa—Zwifhiwa Zwa Vhathu
a Tshifhingani tsho fhiraho, tshenetshi tshigwada tsha vhahulwane tsho vha tshi tshi vhidzwa komiti ya khaṱhulo. Fhedzi a ri tsha ḓo shumisa ḽeneḽo dzina, sa izwi mushumo wavho hu si u haṱula fhedzi. Nṱhani hazwo, ri ḓo vha vhidza komiti ya vhahulwane.
b Zwenezwo zwi nga dovha zwa ambela kha muunḓi wawe ane a vha Ṱhanzi kana vhaṅwe vhane vha vha na vhuḓifhinduleli ha u ṱhogomela onoyo ṅwana vhane vha vha Dziṱhanzi.
