THERO I GUDWAHO 31
LUIMBO 12 Yehova, Mudzimu Muhulwane
Zwe Yehova A Zwi Ita U Itela U Ri Tshidza Kha Tshivhi Na Lufu
“Mudzimu o funa shango zwihuluhulu a vhuya a ṋekedza Murwa wawe muthihi fhedzi.”—YOH. 3:16.
ZWINE RA ḒO ZWI GUDA
Ri ḓo guda uri Yehova o dzhia hani vhukando ha u ri thusa uri ri kunde tshivhi na uri o ita hani uri zwi konadzee uri ri wane vhutshilo vhu sa fheli ri si tsheena tshivhi.
1-2. (a) Tshivhi ndi mini nahone ri nga tshi kunda hani? (Sedzani “Ṱhalutshedzo Ya Maipfi.”) (b) Ri ḓo amba nga ha mini kha ino thero na kha dziṅwe thero dzi re kha itshi Tshiingamo? (Sedzani “Ha Vhavhali” kha tshenetshi Tshiingamo.)
NAA ni a ṱoḓa u ḓivha uri Yehova u ni funa lungafhani? Wanani phindulo nga u guda uri o ita mini uri a ni tshidze kha tshivhi na lufu. Tshivhi a ndi swina ḽi ofhisaho ḽine na sa ḓo ḽi kunda ni noṱhe. Roṱhe ri a ita tshivhi ḓuvha ḽiṅwe na ḽiṅwe nahone ri a fa nga nṱhani ha uri ri na tshivhi. (Vharoma 5:12) Naho zwo ralo, hu na mafhungo a takadzaho. Yehova a nga ri thusa u kunda tshivhi. Zwavhuḓivhuḓi u ḓo ri thusa uri ri tshi kunde nga ho fhelelaho.
2 Ho no fhela miṅwaha i ṱoḓaho u vha 6 000 Yehova a tshi khou thusa vhathu uri vha lwe na tshivhi. O zwi ita nga nṱhani ha uri u a ri funa. Yehova o funa vhathu u bva musi a tshi tou vha sika, nga zwenezwo o ita zwithu zwinzhi u itela u vha thusa musi vha tshi khakha. Mudzimu u a zwi ḓivha uri tshivhi tshi ḓisa lufu nahone ha ṱoḓi ri tshi fa. U ṱoḓa ri tshi tshila tshoṱhe. (Vharoma 6:23) U khou ṱoḓa na inwi ni tshi tshila tshoṱhe. Kha ino thero ri ḓo fhindula mbudziso tharu: Ya u thoma, Yehova o ṋea hani vhathu vha re na tshivhi fhulufhelo? Ya vhuvhili, zwifhingani zwa Bivhili vhathu vha re na tshivhi vho ita mini uri vha takadze Yehova? Ya vhuraru, Yesu o ita mini uri a tshidze vhathu kha tshivhi na lufu?
YEHOVA O ṊEA HANI VHATHU VHA RE NA TSHIVHI FHULUFHELO?
3. Ndi mini zwo itaho uri Adamu na Eva vha ite tshivhi?
3 Musi Yehova a tshi sika munna na mufumakadzi vha u thoma, o vha a tshi khou ṱoḓa uri vha takale. O vha ṋea haya ho nakaho, a vha ṋea tshifhiwa tsha mbingano na mushumo u takadzaho. Vho vha vha tshi khou tea u ḓadza ḽifhasi nga vhana vhavho, vha ita uri ḽi vhe pharadiso ḽi fane na tsimu ya Edeni. O vha ṋea mulayo muthihi fhedzi, u sa konḓi. O vha vhudza uri arali vha pfuka wonoyo mulayo vha ḓo fa. Ri a zwi ḓivha uri ho itea mini. Ho ḓa muruṅwa muvhi we a vha a sa funi vhathu na Mudzimu, a linga Adamu na Eva uri vha si thetshelese Mudzimu. Adamu na Eva vho ita zwe onoyo muruṅwa a vha vhudza zwone. Vho ita tshivhi nge vha kundelwa u thetshelesa Khotsi avho wa ṱaḓulu. Zwe Yehova a amba zwo mbo ḓi itea. Vho sedzana na masiandoitwa a u sa thetshelesa lwa vhutshilo havho hoṱhe. Vho vha vhalala, vha fa.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Ndi ngani Yehova a tshi vhenga tshivhi nahone ndi ngani a tshi ri thusa uri ri sendele tsini nae? (Vharoma 8:20, 21)
4 Yehova o ita uri enea mafhungo a ṅwalwe Bivhilini u itela uri a ri thuse u pfesesa zwithu zwa ndeme. A ita uri ri pfesese uri ndi ngani Yehova a tshi vhenga tshivhi. Tshivhi tshi tshinya vhushaka hashu na Khotsi ashu Yehova nahone tshi ita uri ri fe. (Yes. 59:2) Saṱhane u a vhenga Yehova na vhathu, ndi ngazwo o linga Adamu na Eva uri vha ite tshivhi nahone u bvela phanḓa na u linga vhathu na ṋamusi. Musi Adamu na Eva vha tshi ita tshivhi, khamusi Saṱhane o humbula uri o tshinya tshipikwa tsha Yehova nga ha vhathu. Fhedzi o vha a sa pfesesi nḓila ine Yehova a vha na lufuno luhulwane ngayo. Yehova ho ngo vhuya a shandula tshipikwa tshawe nga ha vhana vha Adamu na Eva. Yehova u a funa vhathu, ngauralo o mbo ḓi ṱavhanya a vha ṋea fhulufhelo. (Vhalani Vharoma 8:20, 21.) Yehova o vha a tshi zwi ḓivha uri vhaṅwe vha vhana vha Adamu na Eva vho vha vha tshi ḓo mu funa na u ṱoḓa a tshi vha thusa u lwa na tshivhi. O ita uri zwi konadzee uri vha sendele tsini nae uri vha tshidzwe kha tshivhi na lufu. Zwenezwo o zwi itisa hani?
5. Ndi mini zwe Yehova a zwi amba u itela u ṋea vhathu vha re na tshivhi fhulufhelo? Ṱalutshedzani. (Genesi 3:15)
5 Vhalani Genesi 3:15. Yehova o ṱavhanya a ṋea vhathu fhulufhelo nga u amba uri u ḓo fhelisa Saṱhane. O amba uri ho vha hu tshi ḓo vha na “ṅwana” we a vha a tshi ḓo tshidza vhathu. Onoyo ṅwana o vha a tshi ḓo fhelisa Saṱhane na thaidzo dzoṱhe dze Saṱhane a dzi bveledza tsimuni ya Edeni. (1 Yoh. 3:8) Fhedzi Saṱhane o vha a tshi ḓo thoma a “luma” onoyo ṅwana kana u mu vhulaya. Zwenezwo zwo vha zwi tshi ḓo pfisa Yehova vhuṱungu vhukuma. Fhedzi Yehova o tenda u pfiswa vhuṱungu na u tenda “ṅwana” wawe a tshi tambula a tshi itela u tshidza vhathu.
ZWIFHINGANI ZWA BIVHILI, VHATHU VHA RE NA TSHIVHI VHO ITA MINI URI VHA TAKADZE YEHOVA?
6. Vhathu vha re na lutendo vha nga ho Abele na Noaxe vho ita mini uri vha sendele tsini na Yehova?
6 Musi miṅwaha i tshi khou ḓi ya, Yehova o bvisela khagala nga zwiṱuku nga zwiṱuku uri vhathu vha re na tshivhi vha nga sendela hani tsini nae. Musi Adamu na Eva vho no shandukela Yehova tsimuni ya Edeni, Abele murwa wavho wa vhuvhili o vha ene we a thoma u vha na lutendo kha Yehova. O ṋekedza Yehova tshiṱhavhelo ngauri o vha a tshi ṱoḓa u mu takadza na u sendela tsini nae. Abele o vha e mulisa, nga zwenezwo o dzhia ngwana a dzi shidzha a dzi ṋekedza Yehova sa tshiṱhavhelo. Yehova o ḓipfa hani? Yehova o “takalela Abele na tshifhiwa tshawe.” (Gen. 4:4) Yehova o takalela zwiṱhavhelo zwi fanaho na zwenezwo zwe zwa ṋekedzwa nga vhathu vhe vha vha vha tshi mu funa na u mu fhulufhela, vha nga ho Noaxe. (Gen. 8:20, 21) Musi a tshi ṱanganedza zwiṱhavhelo zwo raloho, o vha a tshi khou sumbedza uri vhathu vha re na tshivhi vha nga ita zwithu zwine zwa nga ita uri a vha fune na u sendela tsini nae. b
7. Ri guda mini kha tsumbo ya Abrahamu?
7 Abrahamu o vha e na lutendo lwo khwaṱhaho vhukuma. Yehova o mu humbela uri a ite zwiṅwe zwithu zwi konḓaho. O mu vhudza uri a ṋekedze Isaka murwa wawe sa tshiṱhavhelo. Zwi tou pfala uri musi Abrahamu a tshi humbula nga ha zwe a vha a khou tea u zwi ita, zwo mu pfisa vhuṱungu vhukuma. Naho zwo ralo, o vha o ḓiimisela u zwi ita. Musi Abrahamu a tshi khou ṱoḓa u vhulaya murwa wawe, Mudzimu o mu kaṱudza. Yeneyi tsumbo ya Abrahamu i ri gudisa uri Yehova o vha a tshi ḓo ṋekedza murwa wawe ane a mu funa uri a vhe tshiṱhavhelo. Zwenezwo a tshi khou zwi itiswa ngauri u a ri funa.—Gen. 22:1-18.
8. Ri guda mini kha zwiṱhavhelo zwa zwifuwo zwe zwa vha zwi tshi ṋekedzwa nga fhasi ha Mulayo? (Levitiko 4:27-29; 17:11)
8 Musi Yehova a tshi ṋea Vhaisiraele Mulayo, o vha vhudza uri vha ṋekedze zwifuwo sa zwiṱhavhelo uri vha hangwelwe zwivhi. (Vhalani Levitiko 4:27-29; 17:11.) Zwenezwo zwiṱhavhelo zwo vha zwi tshi sumbedza uri Yehova o vha a tshi ḓo ri ṋea tshiṱhavhelo tsha khwiṋe, tshe tsha vha tshi tshi ḓo tshidza vhathu kha tshivhi. Mudzimu o vhudza vhaporofita uri vha ṅwale nga ha ṅwana o fhulufhedziswaho we a vha a tshi ḓo tambudzwa a vhulaiwa. Vho ṱalutshedza uri onoyo ṅwana o vha a tshi ḓo vhulaiwa sa nngu ya tshiṱhavhelo. Zwenezwi zwithu zwoṱhe zwo itea kha Yesu Kristo ane a vha Murwa wa Mudzimu ane a mu funa. (Yes. 53:1-12) Humbulani, Yehova o vha a tshi ḓo ita uri Murwa wawe ane a mu funa a ṋekedzwe sa tshiṱhavhelo uri a tshidze vhathu kha tshivhi na lufu, u katela na inwi.
YESU O ITA MINI URI A TSHIDZE VHATHU?
9. Yohane Mulovhedzi o ri mini nga ha Yesu? (Vhahevheru 9:22; 10:1-4, 12)
9 Nga 29 C.E. musi Yohane Mulovhedzi we a vha e mushumeli wa Mudzimu a tshi vhona Yesu wa Nazaretha, o ri: “Vhonani Ngwana ya Mudzimu ine ya fhelisa zwivhi zwa shango!” (Yoh. 1:29) Eneo maipfi a sumbedza uri Yesu o vha e ene ṅwana o fhulufhedziswaho. Yesu we a vha o lindelwa, o vha a tshi ḓo ṋekedza vhutshilo hawe u itela u tshidza vhathu kha tshivhi lwa tshoṱhe.—Vhalani Vhahevheru 9:22; 10:1-4, 12.
10. Yesu o sumbedza hani uri o ‘ḓa u vhidza vhaitazwivhi’?
10 Yesu o vha a tshi thusesa vhathu vhe vha vha vho tsikeledzwa nga nṱhani ha tshivhi nahone a tshi vha ramba uri vha mu tevhele. O vha a tshi zwi ḓivha uri tshiitisi tshihulwane tsha u tambula ha vhathu ndi uri vha na tshivhi. Ngauralo o vha a tshi thusa vhanna na vhafumakadzi vhe vha vha vha tshi ḓivhelwa u ita zwivhi. Yesu o zwi fanyisa nga heyi nḓila, o ri: “Vhathu vha sa lwaliho a vha ṱoḓi dokotela, fhedzi u ṱoḓwa nga vha lwalaho.” O dovha a ri: “Ndo ḓela u vhidza vhaitazwivhi, hu si vho lugaho.” (Mat. 9:12, 13) Nahone zwenezwo ndi zwe Yesu a zwi ita musi e kha ḽifhasi. Musi muṅwe mufumakadzi wa muitazwivhi a tshi ṱanzwa milenzhe ya Yesu nga miṱodzi yawe, Yesu o mu hangwela zwivhi. (Luka 7:37-50) Yesu o funza mufumakadzi wa Musamaria ngoho ya ndeme naho o vha a tshi zwi ḓivha uri onoyo mufumakadzi o vha a tshi khou dzula na munna we a vha a si munna wawe. (Yoh. 4:7, 17-19, 25, 26) Vhathu vha a fa nga nṱhani ha tshivhi, fhedzi Mudzimu o ṋea Yesu maanḓa a u vusa vhanna, vhafumakadzi na vhana vhafuni.—Mat. 11:5.
11. Ndi ngani vhaitazwivhi vho vha vha sa ofhi u amba na Yesu?
11 Ri a zwi pfesesa uri ndi ngani vhaitazwivhi vho vha vha tshi takalela u vha tsini na Yesu. Yesu o vha tshi pfesesa nḓila ine vha ḓipfa ngayo nahone o vha a tshi vha pfela vhuṱungu. Vho vha vha sa ofhi u amba nae. (Luka 15:1, 2) Yesu o khoḓa vhathu vhe vha sumbedza lutendo khae na u vha sumbedza vhuthu. (Luka 19:1-10) Tsumbo ya Yesu yo thusa vhathu u vhona nḓila ine Yehova a khathutshela ngayo. (Yoh. 14:9) Nḓila ye Yesu a amba ngayo na vhathu na nḓila ye a vha fara ngayo, i ri gudisa uri Yehova u a khathutshela na uri u a funa vhathu nahone u khou ṱoḓa u vha thusa uri vha lwisane na tshivhi. Yesu o thusa vhathu vha re na tshivhi uri vha ṱoḓe u shandula nḓila dzavho na uri vha mu tevhele.—Luka 5:27, 28.
12. Yesu o vhudza vhafunziwa vhawe mini nga ha lufu lwawe?
12 Yesu o vha a tshi zwi ḓivha uri u ḓo ṋekedza vhutshilo hawe sa tshiṱhavhelo. O vhudza vhafunziwa vhawe lu fhiraho luthihi uri o vha a tshi ḓo fheṱiwa a vhulayelwa kha danda. (Mat. 17:22; 20:18, 19) O vha a tshi zwi ḓivha uri tshiṱhavhelo tshawe tsho vha tshi tshi ḓo bvisa tshivhi tsha shango, sa zwe Yohane Mulovhedzi na vhaporofita vha vha vho dzula vho amba. Yesu o dovha amba uri musi o no fa o vha a tshi “ḓo kokodza vhathu vhoṱhe.” (Yoh. 12:32) Vhathu vha re na tshivhi vho vha vha tshi nga takadza Yehova nga u ṱanganedza Yesu sa Murena wavho na nga u mu tevhela. Arali vha ita zwenezwo vho vha vha tshi ḓo “vhofhololwa kha tshivhi.” (Vharoma 6:14, 18, 22; Yoh. 8:32) Yesu o vha na tshivhindi nahone a tenda u fa nga nḓila i vhavhaho uri a ri tshidze.—Yoh. 10:17, 18.
13. Yesu o fa hani nahone lufu lwawe lwo ri gudisa mini nga ha Yehova? (Sedzani tshifanyiso.)
13 Yesu o fheṱiwa, a farwa, a semiwa, a pomokiwa, a hweswa mulandu a ita na u tambudzwa. Mafheleloni, maswole vho mu ombela kha danda uri vha mu vhulaye. Yehova o vha a tshi khou pfa vhuṱungu vhukuma musi Yesu a tshi khou konḓelela nga u fhulufhedzea. Yehova u na maanḓa nahone o vha a tshi nga ita uri Murwa wawe a si tambule, fhedzi ho ngo zwi ita. Ndi ngani Yehova o tendela Murwa wawe a tshi pfiswa vhuṱungu? O zwi itiswa nga lufuno. Yesu o ri: “Mudzimu o funa shango zwihuluhulu a vhuya a ṋekedza Murwa wawe muthihi fhedzi, uri ane a mu tenda a si fheliswe, fhedzi a wane vhutshilo vhu sa fheli.”—Yoh. 3:16.
Musi Yehova a tshi tenda uri Murwa wawe a vhulawe u itela u ri vhofholola kha tshivhi na lufu, o pfa vhuṱungu vhuhulu (Sedzani phara 13)
14. Tshiṱhavhelo tsha Yesu tshi ni funza mini?
14 Tshiṱhavhelo tsha Yesu ndi vhuṱanzi vhuhulwane vhukuma ha uri Yehova u a funa vhana vha Adamu na Eva. Tshi sumbedza uri Yehova u a ni funa nga maanḓa. O ṋekedza Murwa wawe ane a mu funa nahone a konḓelela vhuṱungu vhuhulu a tshi itela u ni tshidza kha tshivhi na lufu. (1 Yoh. 4:9, 10) U khou ṱoḓa u thusa muṅwe na muṅwe washu uri ri mu shumele naho ri na tshivhi nahone u ṱoḓa u fhelisa tshivhi lwa tshoṱhe.
15. Ri tea u ita mini uri ri vhuyelwe nga tshifhiwa tsha Mudzimu tsha tshiṱhavhelo tsha Yesu?
15 Tshifhiwa tsha Mudzimu tshine tsha vha tshiṱhavhelo tsha Murwa wawe muthihi fhedzi tshi ita uri zwi konadzee uri ri hangwelwe zwivhi. Fhedzi hu na zwine ra tea u ita uri Mudzimu a ri hangwele. Ri tea u ita mini? Yohane Mulovhedzi na Yesu nga dzawe vho fhindula yeneyo mbudziso nga u ri vhudza uri: “Rembuluwani, ngauri Muvhuso wa ṱaḓulu u tsini.” (Mat. 3:1, 2; 4:17) Ri fanela u rembuluwa kha zwivhi zwashu arali ri tshi ṱoḓa u sendela tsini na Yehova na uri ri hangwelwe zwivhi. U rembuluwa zwi amba mini nahone zwi ri thusa hani u takadza Yehova naho ri vhaitazwivhi? Yeneyo mbudziso i ḓo fhindulwa kha thero i tevhelaho.
LUIMBO 18 Ri Livhuwa Tshirengululi
a ṰHALUTSHEDZO YA MAIPFI: Bivhilini ipfi “tshivhi” ḽi nga ambela kha mishumo yo khakheaho kana u kundelwa u tshila nga milayo ya Yehova. Fhedzi ḽi nga dovha ḽa amba uri roṱhe ri na tshivhi tshe ra tshi wana kha Adamu. Tshenetsho tshivhi tshe ra tshi wana kha Adamu ndi tshone tshine tsha ita uri ri fe.
b Yehova o vha a tshi ṱanganedza zwiṱhavhelo zwa vhenevho vhathu vha fhulufhedzeaho ngauri o vha a tshi zwi ḓivha uri tshifhingani tshi ḓaho Yesu o vha a tshi ḓo ṋekedza vhutshilo hawe a tshidza vhathu vhoṱhe.—Vharoma 3:25.
