Muapostola Paulo o ṅwalela Vhakriste vha ngei Thesalonika a ri: “Ane a si thetshelese zwe ra zwi amba nga hovhu vhurifhi, ni mu swaye.” (2 Vhathes. 3:14) Tshifhingani tsho fhiraho, vhahulwane ndi vhone vhe vha vha vha tshi tea u swaya muthu. Arali muthu o kaidzwa lunzhi-lunzhi fhedzi a si thetshelese, vhahulwane vho vha vha tshi nga dzudzanya u ṋekedza nyambo ine ya ḓo sevha tshivhidzo. Naho onoyo muthu o swaiwaho o vha a tshi ḓo bvela phanḓa na u ya miṱanganoni na tsimuni, vhahuweleli vho vha vha sa ḓo ṱwa nae.

Ri tea u ita tshanduko kha enea mafhungo. Zwino ri vho pfesesa uri Paulo o vha a tshi khou amba uri Mukriste muṅwe na muṅwe u tea u ḓiitela phetho kha enea mafhungo. A hu na tshiitisi tsha uri vhahulwane vha ṋekedze nyambo ya u sevha tshivhidzo. Ndi ngani ro ita yeneyo tshanduko? Ṱhogomelani uri ndi ngani Paulo o ṋea yeneyo ndayo.

Paulo o ṱhogomela uri vhaṅwe tshivhidzoni vho vha “vha sa thetshelesi.” O vha o vha kaidza a tshi shumisa Bivhili, fhedzi vha si thetshelese. Musi o vha dalela tshifhingani tsho fhiraho o vha vhudza uri: “A sa shumi, na u ḽa a songo ḽa.” Naho zwo ralo, vhaṅwe vho vha vha tshi kha ḓi hana u shuma u itela u ḓiṱhogomela naho vha tshi nga kona u ita nga u ralo. Zwiṅwe hafhu, vho vha vha tshi dzhenelela na kha mafhungo a vhaṅwe. Vhakriste vho vha vha tshi tea u fara hani vhathu vha sa thetshelesi?—2 Vhathes. 3:6, 10-12.

Paulo o ri: “Ni mu swaye.” Ipfi ḽa Tshigerika ḽo shumiswaho henefha ḽi ambela kha uri ri tea u kona u vhona muthu a sa thetshelesi uri ri kone u iledza ṱhuṱhuwedzo yawe i si yavhuḓi. Paulo o vha a tshi khou amba na tshivhidzo tshoṱhe, hu si vhahulwane fhedzi. (2 Vhathes. 1:1; 3:6) Nga zwenezwo, arali Mukriste a ṱhogomela uri muṅwe Mukriste ngae ha tsha thetshelesa nyeletshedzo ine ya bva Bivhilini, u tea u litsha u “konana” na onoyo muthu.

Naa izwi zwi amba uri ri tea u dzhia onoyo muthu sa o bviswaho tshivhidzoni? Hai, ngauri Paulo o ri: “Ni bvele phanḓa ni tshi mu eletshedza.” Nga zwenezwo, Mukriste a nga bvela phanḓa a tshi ṱwa na muthu o swaiwaho musi vhe miṱanganoni ya tshivhidzo na musi vhe vhuḓinḓani ha tsimu, fhedzi ha nga ḓo ḓimvumvusa na onoyo muthu. Ndi ngani? Paulo o ri: “Uri a shone.” Musi ri tshi litsha u ṱwa na u ḓimvumvusa na onoyo wahashu, zwi nga ita uri a shone nahone a shanduke.—2 Vhathes. 3:14, 15.

Vhakriste vha ḓo zwi ḓivha hani uri vha tea u swaya muthu? Tsha u thoma, ri tea u vha ri na vhungoho ha uri onoyo muthu ha thetshelesi sa zwe Paulo a amba. Paulo o vha a sa khou amba nga ha vhathu vhane vha nga ita zwithu zwine zwa sa tendelane na luvalo lwashu, fhedzi zwi sa lwisani na milayo na vhulivhisi vhu bvaho Bivhilini. Nahone o vha a sa khou amba nga ha vhathu vhane vha vha na mavhonele o fhambanaho na ashu kana vhe vha ri vhaisa. Nṱhani hazwo, Paulo o vha a tshi khou amba nga ha vhathu vhe vha kaidzwa hu tshi shumiswa Bivhili, fhedzi vha ḓi bvela phanḓa vha sa thetshelesi.

Na ṋamusi, arali ra ṱhogomela uri muṅwe Mukriste ha thetshelesi ndayo i bvaho Ipfini ḽa Mudzimu, a riṋe vhaṋe ri ḓo ita phetho ya uri ri si tsha ṱwa na u ḓimvumvusa na onoyo muthu. Samusi yeneyi i phetho ya muthu nga eṱhe, ri nga si ḓo haseledza eneo mafhungo na vhathu vhane vha si vhe vha muṱani washu vhane vha vha Dziṱhanzi. Nahone ri ḓo bvela phanḓa ri tshi ṱwa nae musi ri miṱanganoni ya tshivhidzo na musi ri vhuḓinḓani ha tsimu. Musi a tshi shanduka ri ḓo dovha ra ṱwa na u ḓimvumvusa nae.