1, 2. (a) Lufuno na lutendo zwi tshimbidzana hani? (b) Ndi mbudziso dzifhio dzine ra ḓo dzi ṱolisisa?

RI FUNA Yehova “ngauri ndi ene o thomaho u ri funa.” (1 Yoh. 4:19) Iṅwe nḓila ine Yehova a sumbedza ngayo uri u a ri funa, ndi nga u fhaṱutshedza vhashumeli vhawe vhane vha fulufhedzea khae. Musi ri tshi funa Mudzimu nga ho engedzeaho, lutendo lwashu lu a khwaṱha nahone a ri sokou tenda fhedzi uri u hone, ri dovha ra tenda uri u lambedza vhane a vha funa.—Vhalani Vhaheberu 11:6.

² U lambedza ndi tshipiḓa tsha ndeme tsha zwine Yehova a vha zwone na zwine a zwi ita. Ri vha ri na lutendo lwo khwaṱhaho arali ri na vhungoho ha uri Mudzimu u ḓo lambedza vhane vha mu ṱoḓa zwi tshi bva mbiluni ngauri “lutendo ndi u lavhelela nga ho khwaṱhaho zwe zwa fulufhelwa.” (Vhaheb. 11:1) Lutendo lu katela phaṱhutshedzo dza Mudzimu dzo fulufhedziswaho dze ra dzi lavhelela. Ḽeneḽi fulufhedziso ḽi ri vhuyedza hani? Yehova o lambedza hani vhashumeli vhawe tshifhingani tsho fhiraho na ṋamusi? Kha ri vhone.

3. Ndi fulufhedziso ḽifhio ḽine ḽa wanala kha Maleaxi 3:10?

³ Yehova Mudzimu o fulufhedzisa uri u ḓo lambedza vhashumeli  vhawe vha fulufhedzeaho, nga zwenezwo, u ri ramba uri ri ite zwoṱhe zwine ra nga kona uri a ri fhaṱutshedze. Bivhili i ri: “Ni dzou ndinga . . . Yehova wa Mavhuthu u ralo. Ngangoho ndi hone ndi tshi ḓo ni vulela mabuli a makoleni, nda ni tevhulela phaṱhutshedzo dza tou ni hulela.” (Mal. 3:10) Ri sumbedza u dzhiela nṱha na u livhuha musi ri tshi ṱanganedza mafunda a Yehova.

4. Ndi ngani ri tshi fanela u fulufhela zwe Yesu a zwi amba kha Mateo 6:33?

⁴ Yesu o khwaṱhisedza vhafunziwa vhawe uri arali vha vhea Muvhuso u thoma, Mudzimu u ḓo vha tikedza. (Vhalani Mateo 6:33.) Yesu o amba zwenezwi ngauri zwine Yehova a zwi amba zwi dzula zwi ngoho. Yesu o vha a tshi zwi ḓivha uri mafulufhedziso a Mudzimu a dzula a tshi ḓadzea. (Yes. 55:11) Nga hu fanaho, na riṋe ri nga vha na vhungoho ha uri arali ra vha na lutendo lwo khwaṱhaho kha Yehova, u ḓo ita zwe a fulufhedzisa ngauri o ri: “Ndi nga si vhuye nda u ṱutshela nahone ndi nga si vhuye nda u laṱa.” (Vhaheb. 13:5) Eneo maipfi a tshimbidzana na zwe Yesu a zwi amba nga ha u ṱoḓa Muvhuso wa Mudzimu u thoma na u luga hawe.

5. Ndi ngani phindulo ya Yesu yo khwaṱhisa lutendo lwa Petro?

⁵ Muapostola Petro o vhuya a vhudzisa Yesu a ri: “Ro ṱutshela zwoṱhe ra u tevhela; ndi mini tshine ra ḓo tshi wana?” (Mat. 19:27) Nṱhani ha u halifhela Petro nge a vhudzisa yeneyo mbudziso, Yesu o vhudza vhafunziwa vhawe uri vha ḓo lambedzwa kha vhuḓini havho. Vhaapostola vha fulufhedzeaho na vhaṅwe vha ḓo vhusa nae ngei ṱaḓulu. Fhedzi na zwino hu na malamba. Yesu o ri: “Vhoṱhe vhe vha ṱutshela nnḓu dzavho,  vharathu kana vhakomana kana dzikhaladzi kana khotsi kana mme kana vhana kana masimu vha tshi itela dzina ḽanga, vha ḓo wana zwithu zwinzhi u fhira zwe vha zwi ṱutshela nahone vha ḓo wana na vhutshilo vhu sa fheli.” (Mat. 19:29) Vhafunziwa vhawe vha ḓo wana phaṱhutshedzo nnzhi u fhira zwe vha xelelwa ngazwo. Naho ra nga xelelwa nga zwithu zwinzhi ri tshi itela Muvhuso, ri ḓo wana khotsi, mme, khaladzi, vharathu, vhakomana na vhana.

6. Ndi ngani Yehova o fulufhedzisa vhagwadameli vhawe malamba?

⁶ U fulufhedzisa ha Yehova vhagwadameli vhawe malamba zwi vha thusa u konḓelela milingo. Hu sa londwi phaṱhutshedzo dza lwa muya dzine vhashumeli vha Yehova Mudzimu vha fulufhedzeaho vha dzi wana ṋamusi, vho lavhelela nga maṱo matswuku phaṱhutshedzo khulwane dzine vha ḓo dzi wana tshifhingani tshi ḓaho. (1 Tim. 4:8) Vhukuma, u vha na vhungoho ha uri Yehova “u lambedza vhane vha mu ṱoḓa zwi tshi bva mbiluni,” zwi ḓo ri thusa u dzula ro khwaṱha lutendoni.—Vhaheb. 11:6.

7. Fulufhelo ndi thikho yashu nga nḓila-ḓe?

⁷ Kha Pfunzo ya Yesu ya Thavhani, o ri: “Takalani ni pembele, ngauri malamba aṋu ndi manzhi ngei ṱaḓulu, na vhaporofita vhe vha vha hone phanḓa haṋu vho ḓi vha tovhola.” (Mat. 5:12) Nga nnḓa ha vhane vha ḓo wana malamba a u tshila ṱaḓulu, vhane vha vha na tshilavhelelwa tsha u tshila tshoṱhe paradisoni kha ḽifhasi vha na tshiitisi tsha u ‘takala na u pembela.’ (Ps. 37:11; Luka 18:30) Naho ri na tshilavhelelwa tsha u tshila ṱaḓulu kana kha ḽifhasi, fulufhelo ḽashu ḽi nga vha “thikho ya vhutshilo hashu, ḽa ngoho na ḽo khwaṱhaho.” (Vhaheb. 6:17-20) Samusi thikho i tshi kona u tika tshikepe uri tshi ime fhethu huthihi, u vha na fulufhelo kha malamba ane ra ḓo a wana zwi ri thusa uri ri vhe na lutendo lwo khwaṱhaho. Zwi nga dovha zwa ri thusa u konḓelela musi ro sedzana na milingo.

8. Fulufhelo ḽi na maanḓa a u fhungudza mbilaelo nga nḓila-ḓe?

⁸ Fulufhelo ḽashu ḽo thewaho Bivhilini ḽi na maanḓa a u fhungudza mbilaelo dzine ra vha nadzo ṋamusi. Mafulufhedziso a Mudzimu ndi marudza-mbilu nahone a nga ita uri ri si tsha vhilaela. Zwi a ri khuthadza vhukuma u “kumedzela Yehova zwi [ri] lemelaho” ri tshi ḓivha uri “u ḓo [ri] ṱhaḓula.” (Ps. 55:22) Ri nga vha na vhungoho ha uri Mudzimu a nga “ita zwihulwane zwi fhiraho zwoṱhe zwine ra nga zwi humbela kana u zwi elekanya.” (Vhaef. 3:20) Yehova a nga si ri thuse kha zwithu zwiṱuku fhedzi, u ḓo ri thusa na kha “zwihulwane”!

9. Ni nga vha hani na vhungoho ha uri Yehova u ḓo ni fhaṱutshedza?

⁹ U itela u wana malamba, ri fanela u vha na lutendo lwo khwaṱhaho kha Yehova na u thetshelesa vhulivhisi hawe. Mushe o vhudza lushaka lwa Isiraele uri: “Yehova u ḓo ni shudufhadza ngangoho kha shango [ḽine] a ni ṋea ḽa vha ḽaṋu. Tendá na thetshelesa zwavhuḓi zwine Yehova Mudzimu waṋu a amba, na tevhedza milayo ino, ine nda khou ni laya ṋamusi, na ita zwine ya amba. Ngauri Yehova Mudzimu wau u ḓo U shudufhadza vhunga ó amba.” (Doit. 15:4-6) Naa ni na vhungoho ha uri Yehova u ḓo ni fhaṱutshedza arali na bvela phanḓa ni tshi mu shumela nga u fulufhedzea? Ni na zwiitisi zwi pfalaho zwa u vha na ḽeneḽo fulufhelo.

10, 11. Yehova o lambedza hani Yosefa?

¹⁰ Bivhili yo ṅwalwa u itela u ri vhuyedza. I na mafhungo manzhi nga ha nḓila ye Mudzimu a lambedza ngayo vhashumeli vhawe vha fulufhedzeaho. (Vharoma 15:4) Yosefa o vha e tsumbo yavhuḓi. Vhakomana vhawe vho mu rengisa sa phuli nahone nga murahu  mufumakadzi wa muṋe wawe a mu pomoka, zwenezwo zwa ita uri a valelwe dzhele ya ngei Egipita. Naa o vha e si tsheena vhushaka na Mudzimu? Na khathihi! Bivhili i ri: “Yehova a vha na Yosefa, a mu wanisa vhuthu. . . Yehova o vha e na [Yosefa]; Yehova o vuledza zwoṱhe zwe Yosefa a zwi ita.” (Gen. 39:21-23) Yosefa o lindela Mudzimu a sa fheli mbilu musi o sedzana na yeneyo milingo.

¹¹ Nga murahu ha miṅwaha, Farao o vhofholola Yosefa dzhele nahone a mu ita muvhusi wa vhuvhili wa Egipita. (Gen. 41:1, 37-43) Musi mufumakadzi wawe a tshi mu bebela vhana vhavhili, “wa tanzhe Yosefa o mu ira dzina ḽa Manase, nga u’ a ri: Mudzimu o nkhangwisa maṱhupho oṱhe na nnḓu ya khotsi-anga. Wa vhuvhili a mu ira ḽa Efuraimi, nga u’ a ri: Mudzimu o nkhulisa shangoni ḽa vhusiwana hanga.” (Gen. 41:51, 52) Ngauri Yosefa o dzula a tshi fulufhedzea kha Mudzimu, o lambedzwa nga phaṱhutshedzo dze dza ita uri Vhaisiraele na Vhaegipita vha si sike nga nḓala. Mbuno ndi ya uri Yosefa o ṱhogomela uri ndi Yehova we a mu lambedza na u mu fhaṱutshedza.—Gen. 45:5-9.

12. Yesu o dzula hani a tshi fulufhedzea musi o sedzana na mulingo?

¹² Zwi fanaho na zwenezwo, Yesu Kristo o dzula a tshi thetshelesa Mudzimu naho lutendo lwawe lwo vha lu tshi khou lingwa nahone o lambedzwa. Ndi mini zwe zwa mu thusa u konḓelela? Bivhili i ri: “Nga nṱhani ha dakalo ḽe a vha o vhetshelwa ḽone, o konḓelela danda ḽa tshengedzo, a si londe musi a tshi shoniswa.” (Vhaheb. 12:2) Vhukuma, Yesu o wana dakalo nga u ita uri dzina ḽa Mudzimu ḽi itwe ḽikhethwa. Zwiṅwe hafhu, Khotsi awe o mu lambedza nga u mu takalela na u mu ṋea ndugelo nnzhi dzavhuḓi. Bivhili i amba uri “o dzula thungo ya tshanḓa tsha u ḽa tsha khuluṋoni ya Mudzimu.” Nahone i dovha ya ri: “Mudzimu o dovha a mu hulisa a mu ṋea vhuimo ha nṱha nahone nga vhuthu a mu ṋea dzina ḽi fhiraho madzina oṱhe.”—Vhafil. 2:9.

13, 14. Yehova u ḓipfa hani nga zwine ra mu itela zwone?

¹³ Ri nga vha na vhungoho ha uri Yehova u takalela vhuḓidini hoṱhe vhune ra vhu ita u itela u mu shumela. U a pfesesa musi ri sa ḓifulufheli kana musi ri tshi timatima. U a ri pfela vhuṱungu musi ri na thaidzo dza masheleni kana thaidzo ya mutakalo kana ri si tsha kona u ita zwoṱhe zwine ra nga kona tshumeloni yawe. Ri nga vha na fulufhelo ḽa uri Yehova u dzhiela nṱha zwine vhashumeli vhawe vha zwi ita u itela u dzula vha tshi fulufhedzea khae.—Vhalani Vhaheberu 6:10, 11.

¹⁴ Dzulani ni tshi humbula uri na riṋe ri nga amba na “Mupfi wa dzithabelo” ri na fulufhelo ḽa uri u ḓo pfa zwililo zwashu. (Ps. 65:2) “Khotsi wa u khathutshela hoṱhe na Mudzimu wa u khuthadza hoṱhe” a nga ri tikedza kha nḓila ine ra ḓipfa ngayo na nga lwa muya a tshi shumisa vhagwadameli nga riṋe. (2 Vhakor. 1:3) Yehova u a kwamea musi ri tshi pfela vhaṅwe vhuṱungu. Bivhili i ri: “Mu-tonda-vhaṱoma o adzima Yehova; u ḓo mu fha zwe a ṋea vhaḽa.” (Mir. 19:17; Mat. 6:3, 4) Musi ri tshi thusa vho sedzanaho na vhuimo vhu konḓaho, Yehova u dzhia zwenezwo zwi tshi nga ri khou itela ene. Nahone u fulufhedzisa uri u ḓo ri lambedza.

15. Ndi afhio malamba e na a lavhelela? (Sedzani tshifanyiso tsha u thoma.)

¹⁵ Vhakriste vho ḓodzwaho vho lavhelela u wana “khare ya u luga ine Murena ane a vha muhaṱuli o lugaho a ḓo [vha ṋea] yone sa malamba nga ḽeneḽo ḓuvha.” (2 Tim. 4:7, 8) Naho zwo ralo, zwenezwi a zwi ambi uri  a ni wa ndeme arali Mudzimu o ni ṋea fulufhelo ḽi sa fani na ḽa vhaḓodzwa. Vha “dziṅwe nngu” vho lavhelela nga maṱo matswuku malamba ane vha ḓo a wana tshifhingani tshi ḓaho a u tshila tshoṱhe paradisoni kha ḽifhasi. Musi vhe henefho, vha “ḓo takalela muḓalo wa mulalo.”—Yoh. 10:16; Ps. 37:11.

16. Ndi khuthadzo ifhio ine ra i wana kha 1 Yohane 3:19, 20?

¹⁶ Nga zwiṅwe zwifhinga, ri nga vhona u nga a ri khou ita zwo eḓanaho kana ra ḓivhudzisa arali Yehova a tshi takalela vhuḓidini hashu. Ri nga dovha ra timatima arali ri tshi fanelea u wana malamba. Ri songo vhuya ra hangwa uri “Mudzimu ndi muhulwane u fhira mbilu dzashu nahone u ḓivha zwithu zwoṱhe.” (Vhalani 1 Yohane 3:19, 20.) U lambedza tshumelo iṅwe na iṅwe khethwa i bvaho mbiluni ine ra i ita nga nṱhani ha uri ri na lutendo nahone ri a mu funa naho tshumelo yashu i tshi nga vhonala u nga ndi ṱhukhu.—Marko 12:41-44.

17. Ndi afhio maṅwe malamba ane ra a takalela zwino?

¹⁷ Na kha ano maḓuvha mavhi a vhufhelo ha maitele a zwithu a Sathane, Yehova u khou fhaṱutshedza vhathu vhawe. U ita vhungoho ha uri vhagwadameli vhawe vha dzule vho khwaṱha nga lwa muya nga u vha ṋea nḓivho yo engedzeaho. (Yes. 54:13) Samusi Yesu o fulufhedzisa, Yehova u ri lambedza zwino nga u ri tendela ri tshi vha tshipiḓa tsha vhurathu na vhukomana ha tshaka dzoṱhe. (Marko 10:29, 30) Zwiṅwe hafhu, vhane vha ṱoḓa Mudzimu zwi tshi bva mbiluni vha lambedzwa nga u vha na mulalo, u fushea na dakalo.—Vhafil. 4:4-7.

18, 19. Vhashumeli vha Yehova vha ḓipfa hani nga malamba ane vha a wana?

¹⁸ Vhashumeli vha Yehova u mona na shango ḽoṱhe vho no vhuya vha fhaṱutshedzwa ngae. Sa tsumbo, Bianca wa ngei Dzheremane o ri: “A thi fhidzi u livhuha Yehova nge a nthusa u sedzana na mbilaelo dzanga na u ntikedza ḓuvha ḽiṅwe na ḽiṅwe. Shango ḽo hanganea nahone ḽi a tsikeledza. Fhedzi musi ndi tshi shumela Yehova ndi ḓipfa ndo tsireledzea. Musi ndi tshi ita vhuḓidini ha u mu shumela, Yehova u nṋea phaṱutshedzo nnzhi.”

¹⁹ Kana ṱhogomelani tsumbo ya Paula ane a vha na miṅwaha ya 70 wa ngei Canada o farwaho nga vhulwadze ha spina bifida. O ri: “U vha na honoho vhulwadze a zwi iti uri ndi si tsha fhisetshela vhuḓinḓa. Ndi shumisa nḓila dzo fhamba-fhambanaho dza u ṱanziela dzi ngaho u shumisa luṱingo na u huwelela lu songo dzudzanywaho. Uri ndi kone u ṱuṱuwedzea, ndi dzula ndi na kubugwana kune nda ṅwala khakwo maṅwalo na mbuno dze nda dzi wana kha khandiso nahone ndi ku vhala tshifhinga tshoṱhe. Ndi ku vhidza ‘Bugwana Yanga Ine Ya Ntshidza.’ U nyabwa ndi ha tshifhinganyana arali ro livhisa ṱhogomelo kha mafulufhedziso a Yehova. Yehova u dzula a tshi ri thusa hu sa londwi vhuimo hashu.” Vhuimo haṋu vhu nga vha ho fhambana na ha Bianca kana Paula. Naho zwo ralo, ni nga humbula nḓila ye Yehova a ni lambedza ngayo na vhaṅwe. Ndi zwavhuḓi lungafhani u humbula uri Yehova u khou ni lambedza zwino na uri u ḓo ni lambedza tshifhingani tshi ḓaho!

20. Ndi mini zwine ra nga zwi lavhelela arali ra bvela phanḓa ri tshi shumela Yehova nga u ḓifunga?

²⁰ Ni songo vhuya na hangwa uri thabelo yaṋu i bvaho mbiluni na u amba na Mudzimu no vhofholowa zwi ḓo “lambedzwa zwihulu.” Ni nga vha na vhungoho ha uri “musi no no ita zwine Mudzimu a zwi funa, ni [ḓo wana] zwe a fulufhedzisa.” (Vhaheb. 10:35, 36) Nga zwenezwo, zwino kha ri bvele phanḓa ri tshi khwaṱhisa lutendo lwashu na u shuma ro ḓifunga ri tshi itela Yehova. Ri nga ita zwenezwi ri tshi ḓivha uri ri ḓo wana malamba a bvaho ha Yehova.—Vhalani Vhakolosa 3:23, 24.