Naa no vhala nga vhuronwane thero dza zwenezwino dza Tshiingamo? Vhonani arali ni tshi nga fhindula mbudziso dzi tevhelaho:

Ndi tshivhi tshifhio tshee Yesu a vha a tshi khou amba nga hatsho kha nyeletshedzo yo ṅwalwaho kha Mateo 18:15-17?

O vha a tshi khou amba nga ha mafhungo ane a fanela u tandululwa vhukati ha vhathu vhavhili. Fhedzi arali tshivhi tshi tshihulwane vhukuma tshi nga ita uri muthu a bviswe tshivhidzoni arali mafhungo a sa tandululwa. Sa tsumbo, tshivhi tshi nga katela u sola kana vhufhura.—w16.05, siaṱ. 7.

Ni nga ita mini u itela u vhuyelwa nga ho engedzeaho nga u vhala Bivhili?

Ni nga ita zwi tevhelaho: Vhalani ni na muhumbulo wo tshaho, ṱoḓani ngudo dzine na nga dzi shumisa; ḓivhudziseni mbudziso dzi ngaho ‘Ndi nga shumisa hani zwenezwi u itela u thusa vhaṅwe?’; nahone shumisani zwishumiswa zwine zwa vha hone u itela u ita ṱhoḓisiso ya zwine na khou zwi vhala.—w16.05, masiaṱ. 28-31.

Naa zwo khakhea uri Mukriste a lile naho a tshi tenda uri hu ḓo vha na mvuwo?

U vha na lutendo kha mvuwo a zwi fhelisi vhuṱungu vhune Mukriste a khou vhu pfa. Abrahamu o lila musi Sara a tshi fa. (Gen. 23:2) Nga u ya ha tshifhinga vhuṱungu vhu vha khwine.—wp16.3, siaṱ. 4.

Kha Hesekiele ndima ya 9, munna o kungelaho zwa u ṅwala na vhanna vha rathi vho faraho zwihali vha imela mini?

Ri a pfesesa uri vha imela mavhuthu a re ṱaḓulu e a shela mulenzhe kha u fhelisa Yerusalema na ane a ḓo shela mulenzhe kha u fhelisa shango ḽivhi nga Haramagedo. Musalauno, munna o kungelaho zwa u ṅwala u imela Yesu Kristo nahone u ḓo swaya vhane vha ḓo tshidzwa.—w16.06, masiaṱ. 31, 32.

Ndi khombo dzifhio dze Bivhili ya ponyoka khadzo?

Yo ponyoka kha (1) u sina ha mabammbiri e a vha a tshi ṅwalelwa khao, a ngaho papyrus na mikumba; (2) u hanedzwa nga vharangaphanḓa vha politiki na vharangaphanḓa vha vhurereli vhe vha lingedza u i fhelisa; na (3) u shandulwa ha mulaedza wayo.—wp16.4, masiaṱ. 4-7.

Ndi dzifhio nḓila dzine Mukriste A Nga Leludza Ngadzo Vhutshilo Hawe?

Ṅwalani fhasi zwine na zwi shaya. Iledzani u renga zwithu zwi si zwa ndeme. Itani mugaganyagwama. Rengisani kana ni ṋee vhaṅwe kana laṱani zwithu ni sa zwi shumisi. Badelani zwikolodo zwoṱhe. Fhungudzani maḓuvha ane na ya ngao mushumoni wa u ḓitshidza. Dzudzanyani nḓila ine na nga shuma lwo engedzeaho vhuḓinḓani.—w16.07, siaṱ. 10.

Ndi mini zwine Bivhili ya zwi ṱalusa sa zwine zwa vha zwa ndeme u fhira musuku kana tsimbi-tseṱha?

Yobo 28:12, 15 i sumbedza uri vhuṱali ha Mudzimu vhu fhira musuku kana tsimbi-tseṱha. Musi ni tshi vhu ṱoḓa, lwelani u dzula ni tshi ḓiṱukufhadza na u vha na lutendo lwo khwaṱhaho.—w16.08, masiaṱ. 18-19.

Naa zwo tea uri vhahashu vha tshinnani vha lele ndebvu?

Kha dziṅwe mvelele, zwi a ṱanganedzea nahone zwi a ṱhonifhea uri muthu a vhe na ndebvu dzo geredzelwaho zwavhuḓi nahone zwi nga kha ḓi sa thivhela na luthihi uri vhathu vha thetshelese mulaedza wa Muvhuso. Naho zwo ralo, vhaṅwe vhahashu vha nga kha ḓi dzhia phetho ya u sa vha na ndebvu. (1 Vhakor. 8:9) Kha dziṅwe mvelele kana huṅwe fhethu, a zwo ngo ḓowelea u lela ndebvu nahone zwi dzhiiwa zwi songo tea kha vhaḓinḓa vha Vhakriste.—w16.09, siaṱ. 21.

Ndi ngani ri tshi nga fulufhela mafhungo a Davida na Goliata o ṅwalwaho Bivhilini?

Goliata o vha o lapfa u fhira munna we ha ṅwaliwa nga hae musalauno nga senthimithara dza 15. Davida o vha e muthu wa vhukuma, zwenezwo zwo khwaṱhisedzwa nga maṅwalwa a kale ane a amba nga ha nnḓu ya Davida na zwe Yesu a zwi amba. Mafhungo a ḓivhazwakale a amba ngoho nga ha enea mafhungo.—wp16.5, siaṱ. 13.

Nḓivho, u pfesesa na u ṱalukanya zwo fhambana hani?

Muthu ane a vha na nḓivho u engedza kha zwine a zwi ḓivha kana u wana dziṅwe mbuno. Muthu ane a pfesesa u a kona u vhona nḓila ine zwithu zwa tshimbidzana ngayo. Muthu ane a ṱalukanya u a kona u shumisa nḓivho na u pfesesa nahone a ita uri zwi shume nga nḓila i bvelelaho.—w16.10, siaṱ. 18.