1. Ndi ngani u lovhedzwa hu vhukando ha ndeme? (Sedzani tshifanyiso tsha u thoma.)

ṄWAHA muṅwe na muṅwe hu lovhedzwa vhagudiswa vhanzhi vha Bivhili. Vhunzhi havho ndi vhaswa na vhane vha vha tsini na u vha na miṅwaha ya vhufumi. Vha nga vha vho alutshela ngohoni. Naa na inwi ni muṅwe wavho? Arali zwo ralo, zwi a khoḓea. Uri muthu a vhe Mukriste, u fanela u lovhedzwa nahone ndi vhukando ha ndeme vhune na fanela u vhu dzhia uri ni tshidzwe.—Mat. 28:19, 20; 1 Pet. 3:21.

2. Ndi ngani ni songo fanela u ofha kana u iledza u dzhia vhukando ha u ḓiṋekedzela?

² Naho u lovhedzwa zwi tshi ni vulela tshibuli tsha u wana phaṱhutshedzo nnzhi, fhedzi zwi dovha zwa ita uri ni hwale vhuḓifhinduleli. Nga nḓila-ḓe? Nga ḓuvha ḽe na lovhedzwa ngaḽo, no fhindula uri ee kha mbudziso ine ya ri, “Nga mutheo wa tshiṱhavhelo tsha Yesu Kristo, naa no rembuluwa zwivhini zwaṋu nahone na ḓiṋekedza kha Yehova u itela uri ni ite zwine a zwi funa?” U lovhedzwa haṋu zwi sumbedza uri no ḓiṋekedzela. Ni vha no fulufhedzisa Yehova  uri ni ḓo mu funa na u ita zwine a zwi funa u fhira zwithu zwoṱhe. Wonoyo ndi muano wa ndeme. Naa ni fanela u ḓisola nga u ita wonoyo muano? Na khathihi. U ḓiṋekedzela haṋu kha Yehova a si vhukando ho khakheaho na luthihi. Ṱhogomelani zwi tevhelaho! Muthu a sa livhiswi nga Yehova u vha e nga fhasi ha vhuvhusi ha Sathane. Diabolo ha na ndavha na u tshidzwa haṋu. Zwi re zwone ndi uri u ḓo takala arali na xelelwa nga vhutshilo vhu sa fheli nga nṱhani ha uri ni ima nae kha u landula vhuvhusahoṱhe ha Yehova.

3. Ndi phaṱhutshedzo dzifhio dzine dza vha hone nga u ḓiṋekedzela kha Yehova?

³ Humbulani nga ha nḓila ye Yehova a ni fhaṱutshedza ngayo ngauri no ḓiṋekedzela khae na u lovhedzwa. Samusi zwino no ḓiṋekedzela kha Yehova, ni nga kona u amba ni na fulufhelo u fhira mathomoni uri: “Yehova u na nṋe; a thi tsha ofha; vhathu vha ḓo nyita’ni?” (Ps. 118:6) Musi ni tsini na Mudzimu ni ḓo vha na ndugelo khulwane vhukuma na u takalelwa ngae.

4, 5. (a) U ḓiṋekedzela ndi vhuḓifhinduleli ha muthu nga eṱhe nga nḓila-ḓe? (b) Ndi khaedu dzifhio dzine vhathu vhoṱhe vha sedzana nadzo?

⁴ Ni nga si dzhie vhushaka haṋu na Yehova sa vhune ha fana na founu ya konṱiraka ine ya badelwa nga vhabebi vhaṋu. Zwo fhambanaho na zwenezwo, zwino ni na vhuḓifhinduleli ha uri ni kone u tshidzwa naho ni kha ḓi vha nga fhasi ha vhabebi vhaṋu. Ndi ngani zwi zwa ndeme u humbula zwenezwo? Ndi nga nṱhani ha uri tshifhinga tshoṱhe ni nga si kone u humbulela khaedu dzine na ḓo sedzana nadzo tshifhingani tshi ḓaho. Sa tsumbo, arali no lovhedzwa ni tsini na u vha na miṅwaha vhufumi, khamusi ni ḓo thoma u ḓipfa nga iṅwe nḓila na u sedzana na mitsiko musi ni tshi vha miṅwahani ya vhufumi. Muṅwe muswa o ri: “Kanzhi ṅwana a nga si litshe u ḓivhidza Ṱhanzi ya Yehova nga nṱhani ha uri u ṱoḓa u ḽa khekhe ya u pembelela ḓuvha ḽa mabebo tshikoloni. Fhedzi nga murahu ha miṅwaha i si gathi musi lutamo lwa u ita zwa vhudzekani lu tshi thoma u hulela, u fanela u vha na vhungoho ho khwaṱhaho ha uri u thetshelesa milayo ya Yehova zwi a vhuyedza tshifhinga tshoṱhe.”

⁵ Ndi ngoho uri a si vhaswa fhedzi vhane vha sedzana na khaedu. Na vhathu vhe vha lovhedzwa vho no vha vhahulwane, vha sedzana na milingo minzhi ine ya linga lutendo lwavho. Yeneyo milingo i nga vha i ya mbingano, thaidzo dza mutakalo kana mushumo. Vhukuma, muṅwe na muṅwe hu sa londwi uri u na miṅwaha mingana, u sedzana na milingo ine ya ṱoḓa uri a fulufhedzee kha Yehova.—Yak. 1:12-14.

6. (a) U ḓiṋekedzela haṋu kha Yehova a zwi na mikano nga nḓila-ḓe? (b) Ndi mini zwine na nga zwi guda kha Vhafilipi 4:11-13?

⁶ U itela uri ni kone u dzula ni tshi fulufhedzea kha vhuimo vhuṅwe na vhuṅwe, ni songo vhuya na hangwa uri zwe na fulufhedzisa Yehova a zwi na mikano. Zwenezwo zwi amba uri no vhudza Muvhusahoṱhe uri ni ḓo bvela phanḓa ni tshi mu shumela naho khonani dzaṋu kana vhabebi vhaṋu vha litsha u mu shumela. (Ps. 27:10) Kha vhuimo hoṱhe, ni nga humbela Yehova uri a ni ṋee nungo na u ni thusa uri ni tshile u tendelana na zwe na zwi fulufhedzisa.—Vhalani Vhafilipi 4:11-13.

7. Zwi amba mini u ita vhuḓidini hoṱhe “nga nyofho na nga u tetemela” uri ni tshidzwe?

⁷ Yehova u ṱoḓa ni tshi vha khonani yawe. Fhedzi zwi ṱoḓa vhuḓidini uri ni dzule ni na vhushaka na Yehova na uri ni tshidzwe. Vhafilipi 2:12 i ri: “Itani vhuḓidini hoṱhe nga nyofho na nga u tetemela uri ni tshidzwe.” Eneo maipfi a sumbedza uri ni fanela u ṱhogomela nḓila ine na ḓo ita ngayo uri ni dzule ni na vhushaka na Yehova na u dzula ni tshi fulufhedzea khae hu sa londwi milingo naho i ifhio. Ni nga si kone u ḓifulufhela nga ho kalulaho. Na vhaṅwe vhe vha shumela Mudzimu  lwa tshifhinga tshilapfu, a vho ngo dzula vha tshi fulufhedzea. Nga zwenezwo, ndi vhukando vhufhio vhune na nga vhu dzhia uri ni ite vhuḓidini hoṱhe uri ni tshidzwe?

8. U guda Bivhili zwi katela mini, nahone ndi ngani zwi zwa ndeme?

⁸ U vha na vhushaka na Yehova zwi katela u davhidzana nga nḓila mbili—u thetshelesa na u amba. U guda Bivhili ndi nḓila khulwane ya u thetshelesa Yehova. Zwenezwo zwi katela u vhala na u elekanya Ipfi ḽa Mudzimu na khandiso dzo thewaho Bivhilini. Musi ni tshi ita nga u ralo, humbulani uri u guda Bivhili a zwi fani na u sokou ita mushumo wa tshikolo. A zwo ngo fanela u nga ni khou khirema zwe na zwi guda tshikoloni u itela u phasa mulingo. U guda nga nḓila i vhuyedzaho zwi tou nga ni khou fara lwendo lune khalwo na tumbula na u guda nga ha maṅwe masia a vhumuthu ha Yehova. Zwenezwi zwi ḓo ni thusa u sendela tsini na Mudzimu nahone na ene u ḓo sendela tsini haṋu.—Yak. 4:8.

9. Ndi zwishumiswa zwifhio zwe zwa ni thusa kha ngudo yaṋu ya muthu nga eṱhe?

⁹ Ndangulo ya Yehova i na zwishumiswa zwinzhi zwine zwa nga ni thusa u guda nga nḓila i vhuyedzaho. Sa tsumbo, kha jw.org hu na thero dza “Bible Study Activities” dzine dza wanala nga fhasi ha tshiṱoho tshine tsha ri “Teenagers.” Dzenedzo thero dzi nga ni thusa u shumisa zwine na zwi guda Bivhilini. Kha jw.org, hu dovha ha vha na mutevhe wa ngudo “What Does the Bible Really Teach?” une wa nga ni thusa uri ni vhe na fulufhelo ḽo khwaṱhaho nga ha zwine na zwi tenda. Wonoyo mutevhe u nga ni thusa u guda nḓila ine na nga ṱalutshedza ngayo vhaṅwe zwine na zwi tenda. Ni nga dovha na guda zwo engedzeaho kha thero ya Awake! ya April 2009, nga fhasi ha tshiṱoho tshine tsha ri, “Young People Ask . . . How Can I Make Bible Reading Enjoyable?” U guda na u elekanya ndi zwa ndeme kha u ita vhuḓidini hoṱhe uri ni tshidzwe.—Vhalani Psalme ya 119:105.

10. Ndi ngani thabelo i ya ndeme kha Mukriste o lovhedzwaho?

¹⁰ Samusi ngudo ya muthu nga eṱhe hu nḓila ine ra thetshelesa ngayo Yehova, thabelo ndi nḓila ine ra amba ngayo nae. Mukriste ho ngo fanela u dzhia thabelo sa mukhuvha; kana u i dzhia sa tshithu tshine tsha ḓo mu vulela nḓila uri a bvelele vhutshiloni. Nṱhani hazwo, thabelo ndi nḓila ya u davhidzana na Musiki washu. Yehova u ṱoḓa u pfa  ni tshi amba nae. (Vhalani Vhafilipi 4:6.) Musi ni na mbilaelo naho i ifhio, Bivhili i ni eletshedza uri ni ‘kumedzele Yehova zwi ni lemelaho.’ (Ps. 55:22) Naa ni a tendelana nazwo? Hu na vhahashu vhanzhi vhane vha nga ni khwaṱhisedza uri u ita zwenezwo zwo vha thusa. Na inwi zwi nga ni thusa!

11. Ndi ngani ni tshi fanela u livhuwa Yehova tshifhinga tshoṱhe?

¹¹ Thabelo i ni vulela tshibuli tsha uri ni ite zwo engedzeaho u fhira u sokou humbela Yehova uri a ni thuse. Bivhili i ri: “Ni vhe vhane vha livhuha.” (Vhakol. 3:15) Nga zwiṅwe zwifhinga, ri nga vhilaela vhukuma nga thaidzo dzine ra vha nadzo lune zwa nga ita uri ri hangwe phaṱhutshedzo nnzhi dzine ra vha nadzo. Zwi nga vha zwavhuḓi uri ni ḓivhetshele tshipikwa ḓuvha ḽiṅwe na ḽiṅwe tsha u humbula nga ha zwithu zwiraru zwine na nga zwi livhuwa. Nga zwenezwo, livhuwani Yehova nga thabelo nge a ni fhaṱutshedza nga zwenezwo zwithu. Muṅwe muswa ane a pfi Abigail we a lovhedzwa e na miṅwaha ya 12, o ri: “Ndi vhona u nga Yehova o fanelwa nga uri ri mu livhuwe u fhira zwithu zwoṱhe. Ri fanela u shumisa tshibuli tshiṅwe na tshiṅwe u livhuwa zwifhiwa zwe a ri ṋea zwone.” Nga zwiṅwe zwifhinga, Abigail u a ḓivhudzisa mbudziso ye a vhuya a ipfa, ine ya ri: ‘No vha ni tshi ḓo sala na mini arali na vuwa no xelelwa nga zwoṱhe na si zwi livhuwe Yehova mulovha?’

12, 13. Ndi ngani zwi zwa ndeme u humbula nga ha zwe Yehova a vhuya a ni itela zwone?

¹² Khosi Davida wa tshifhingani tsha kale we a thuswa u konḓelela milingo minzhi, o amba maipfi a tevhelaho: “Thetshelani ni vhone vhuthu ha Yehova uri ndi vhungafhani; mashudu, munna uyo ané a khuda nga Ene.” (Ps. 34:8) Yeneyo ndimana i sumbedza nḓila ine tshenzhelo ya muthu nga eṱhe ya vha ya ndeme ngayo. Musi ni tshi vhala Bivhili, khandiso dzashu na u ya miṱanganoni ya Vhukriste, ni pfa nga ha tshenzhelo dzi ṱuṱuwedzaho dza nḓila ye Mudzimu a thusa ngayo vhaṅwe uri vha dzule vha tshi fulufhedzea. Fhedzi musi vhushaka haṋu na Yehova vhu tshi khwaṱha, ni fanela u vhona nḓila ine a khou ni thusa ngayo. Yehova o vhuya a ni thusa hani?

¹³ Vhakriste vhoṱhe vho no vhuya vha vhona vhuthu ha Yehova. Ndi nga uri vho rambiwa uri vha sendele tsini na Mudzimu na Murwa wawe. Yesu o ri: “A hu na muthu ane a nga ḓa kha nṋe arali a songo kokodzwa nga Khotsi we a nthuma.” (Yoh. 6:44) Naa ni vhona u nga eneo maipfi a a shuma kha inwi? Muswa a nga amba uri, ‘Yehova o kokodza vhabebi vhanga, nṋe nda sokou tevhela.’ Fhedzi musi ni tshi ḓiṋekedzela kha Yehova na u lovhedzwa, no sumbedza uri ni na vhushaka ho khetheaho nae. Zwino u a ni ḓivha. Bivhili i ri khwaṱhisedza uri: “Arali muthu a tshi funa Mudzimu, onoyo u ḓivhiwa ngae.” (1 Vhakor. 8:3) Dzhielani nṱha na u livhuwa ndugelo ine na vha nayo ndanguloni ya Yehova.

14, 15. Vhuḓinḓa vhu nga ni thusa hani u khwaṱhisa lutendo lwaṋu?

¹⁴ Iṅwe nḓila ine na nga vhona ngayo vhuthu ha Yehova, ndi nga u tshenzhela nḓila ine a ni tikedza ngayo musi ni tshi vhudza vhaṅwe nga ha zwine na zwi tenda. Ni nga ita zwenezwo musi ni vhuḓinḓani na musi ni tshikoloni. Vhaṅwe vha wana zwi tshi vha konḓela u huwelela kha thangana dzavho tshikoloni. Khamusi ni a pfesesa uri ndi ngani. A ni ḓivhi nḓila ine vha ḓo aravha ngayo. Zwihuluhulu, zwi nga ni konḓela musi ni tshi khou amba na tshigwada tsha vhathu u fhira musi ni tshi amba na muthu ane na dzhena nae kilasini hu si na vhaṅwe vhathu. Ndi mini zwine zwa nga ni thusa?

¹⁵ Tsha u thoma, humbulani nga ha zwine zwa ita uri ni vhe na vhungoho ha zwine na zwi tenda. Naa mutevhe wa ngudo une wa wanala kha jw.org, u a wanala nga luambo lwaṋu? Arali ni sa ḓivhi, ḓiṋeeni tshifhinga tsha u  sedza wonoyo mutevhe. Wo itelwa u ni thusa u humbula nga ha zwine na zwi tenda, zwine zwa ita uri ni zwi tende na nḓila ine na nga ṱalutshedza ngayo vhaṅwe zwine na zwi tenda. Musi no no vha na vhungoho ha zwine na zwi tenda nahone no ḓilugiselela, ni ḓo ṱuṱuwedzea u ṱanziela nga ha Yehova.—Yer. 20:8, 9.

16. Ndi mini zwine zwa nga ni thusa u kunda u timatima u amba nga ha zwine na zwi tenda?

¹⁶ Fhedzi naho no lugiselela, ni nga timatima u amba nga ha zwine na zwi tenda. Muṅwe musidzana ane a vha na miṅwaha ya 18, we a lovhedzwa e na miṅwaha ya 13, o ri: “Ndi a ḓivha zwine nda zwi tenda, fhedzi nga zwiṅwe zwifhinga ndi a kundelwa u zwi amba.” O sedzana hani na honoho vhuleme? O ri: “Ndo vha ndi tshi lingedza u dzika. Vhane nda dzhena navho kilasini vha amba vho vhofholowa nga ha zwine vha zwi ita. Na nṋe ndi fanela u amba ndo vhofholowa. Nga zwenezwo, ndo vha ndi tshi sokou u amba uri, ‘Ḽiṅwe ḓuvha ndo vha ndi tshi khou funza nga ha Bivhili nahone . . . ’ Nga murahu nda bvela phanḓa na zwe nda vha ndi tshi ṱoḓa u zwi amba. Naho ndi songo amba nga ha Bivhili, kanzhi vhaṅwe vha a ṱoḓa u ḓivha nga ha zwine nda zwi ita musi ndi tshi khou gudisa Bivhili. Nga zwiṅwe zwifhinga vha a vhudzisa mbudziso nga hazwo. Musi ndi tshi shumisa yeneyo nḓila, zwi a nndelutshela u amba ndo vhofholowa. Nahone nga murahu, ndi pfa ndo takala!”

17. Nḓila ine na dzhia ngayo zwine na zwi tenda i nga ni thusa hani u amba na vhaṅwe?

¹⁷ Musi ni tshi ni sumbedza vhaṅwe uri ni a vha ṱhonifha na u vha na ndavha navho, zwi ḓo vha lelutshela u ṱanganedza zwine na zwi amba. Olivia ane a vha na miṅwaha ya 17, we a lovhedzwa e tsini na u vha na miṅwaha ya vhufumi, o ri: “Tshifhinga tshoṱhe ndo vha ndi tshi ofha uri arali nda amba nga ha Bivhili musi ri tshi khou haseledza, vhathu vho vha vha tshi ḓo ndzhia sa muthu ane a fhisetshela zwa vhurereli.” Nga zwenezwo, o thoma u humbula nga iṅwe nḓila. Nṱhani ha u livhisa ṱhogomelo kha u ofha hawe, o humbula uri: “Vhaswa vhanzhi a vha ḓivhi tshithu nga ha Ṱhanzi dza Yehova. Ndi riṋe fhedzi Ṱhanzi dzine vha dzi ḓivha. Nga zwenezwo, nḓila ine ra ḓifara ngayo ndi yone ine ya sumbedza nḓila ine vha ḓo aravha ngayo. Hu pfi mini arali ri tshi shona kana u kundelwa u amba nga ha zwine ra zwi tenda, kana ri tshi ofha? Zwenezwo zwi ḓo ita uri vha ri dzhie sa vhathu vha sa ḓirwi khana nga zwine ra vha zwone. Vha nga kha ḓi sa ṱanganedza zwine ra zwi amba nga nṱhani ha u sa sumbedza uri ri a fulufhela zwine ra zwi amba. Fhedzi arali ra amba ro vhofholowa, ri na vhungoho ha zwine ra zwi tenda na u amba nga lwa nzulele, zwi ḓo ita uri vha ri ṱhonifhe.”

18. U ita vhuḓidini hoṱhe uri ni tshidzwe zwi katela mini?

¹⁸ Samusi ro zwi vhona, u ita vhuḓidini hoṱhe uri ni tshidzwe ndi vhuḓifhinduleli ha ndeme. Honoho vhuḓifhinduleli vhu katela u vhala Ipfi ḽa Mudzimu, u elekanya nga haḽo, u rabela Yehova na u humbula nga ha nḓila ye Yehova a ni fhaṱutshedza ngayo. U shumisa zwenezwi zwithu zwi ḓo ita uri ni vhe na fulufhelo ḽo khwaṱhaho ḽa uri Yehova ndi khonani yaṋu. Zwenezwo zwi ḓo ni sudzulusela uri ni ambe nga ha zwine na zwi tenda.—Vhalani Psalme ya 73:28.

19. Ndi ngani u ita vhuḓidini hoṱhe uri ni tshidzwe zwi zwa ndeme?

¹⁹ Yesu o ri: “Arali muthu a tshi ṱoḓa u ntevhela, nga a ḓihangwe nahone a hwale danda ḽawe ḽa tshengedzo a ntevhele tshifhinga tshoṱhe.” (Mat. 16:24) Vhukuma, Mukriste muṅwe na muṅwe u fanela u ḓiṋekedzela na u lovhedzwa uri a kone u vha mutevheli wa Kristo. Zwenezwo zwi ḓo ita uri ri wane phaṱhutshedzo nnzhi zwino na u wana vhutshilo vhu sa fheli shangoni ḽiswa ḽa Mudzimu. Nga zwenezwo, ni na zwiitisi zwi pfalaho zwa u ita vhuḓidini hoṱhe uri ni tshidzwe!