Kha 2 Vhakorinta 12:2, 3, Paulo o vha tshi khou ambela kha muṅwe munna we a “iswa kha ḽiṱaḓulu ḽa vhuraru.” Onoyo munna o vha e nnyi? Musi Paulo a tshi ṅwalela tshivhidzo tsha Korinta, o ombedzela uri Mudzimu o vha tshi khou shumisa onoyo munna sa muapostola. (2 Vhakor. 11:5, 23) O dovha a amba nga ha “mabono na u dzumbululelwa nga Murena.” Kha enea mafhungo, Paulo ho ngo amba nga vhaṅwe vhahawe. Nga zwenezwo, zwi tou pfala uri munna we a vhona eneo mabono na u dzumbululelwa ndi ene muṋe.—2 Vhakor. 12:1, 5.

Nga zwenezwo, Paulo ndi ene we a “iswa kha ḽiṱaḓulu ḽa vhuraru” na u “iswa paradisoni.” (2 Vhakor. 12:2-4) O shumisa ipfi u “dzumbululelwa,” a tshi khou ambela kha zwithu zwe a vhudziwa uri zwi ḓo itea tshifhingani tshi ḓaho.

Ndi mini zwe Paulo a zwi vhona kha “ḽiṱaḓulu ḽa vhuraru”?

Bivhilini, “ḽiṱaḓulu” ḽi nga ambela kha ḽiṱaḓulu ḽa vhukuma. (Gen. 11:4; 27:28; Mat. 6:26) Fhedzi “ḽiṱaḓulu” ḽi nga dovha ḽa ambela kha zwiṅwe zwithu. Nga zwiṅwe zwifhinga ḽi nga ambela kha mivhuso ya vhathu. (Dan. 4:20-22) Kana ḽa ambela kha Muvhuso wa Mudzimu.—Nzumb. 21:1.

Paulo o vhona “ḽiṱaḓulu ḽa vhuraru.” O vha a tshi khou amba mini? Bivhili i anzela u bula maipfi luraru u itela u ombedzela kana u khwaṱhisedza. (Yes. 6:3; Hesek. 21:32; Nzumb. 4:8) Zwi vhonala u nga musi Paulo a tshi amba nga “ḽiṱaḓulu ḽa vhuraru,” o vha a tshi khou ṱalusa Muvhuso wa Vhumessia une Muvhusi wawo ha vha Yesu Kristo na vha 144 000. (Sedzani Insight on the Scriptures, Vol. 1, masiaṱ. 1059, 1062.) Samusi muapostola Petro o amba, ro lindela “maṱaḓulu maswa” samusi Mudzimu o fulufhedzisa.—2 Pet. 3:13.

Paulo o vha a tshi khou amba mini nga ha ‘paradiso’?

Ipfi ‘paradiso’ ḽi ambela kha zwithu zwinzhi: (1) Ḽi nga ambela kha Paradiso ine ya ḓo vha hone kha ḽifhasi. (2) Ḽi nga dovha ḽa ambela kha mulalo une Yehova a u ṋea vhathu vhawe, une vha ḓo ḓiphina ngawo shangoni ḽiswa. (3) Zwiṅwe hafhu, ḽi nga dovha ḽa ambela kha zwithu zwavhuḓi zwine zwa vha hone “paradisoni ya Mudzimu” ngei ṱaḓulu, yeneyo paradiso yo bulwa kha Nzumbululo 2:7.—Sedzani Tshiingamo tsha ḽa 15 July 2015, siaṱ. 8. phara. 8.

Musi Paulo a tshi amba nga ha tshenzhelo yawe ine ya wanala kha 2 Vhakorinta 12:4, khamusi o vha a tshi khou katela na zwenezwo zwithu zwiraru.

Manweledzo:

“Ḽiṱaḓulu ḽa vhuraru” ḽe ḽa bulwa kha 2 Vhakorinta 12:2 ḽi nga ambela kha Muvhuso wa Vhumessia une wa khou vhuswa kha “maṱaḓulu maswa” nga Yesu Kristo na vha 144 000.—2 Pet. 3:13.

Ndi “ḽiṱaḓulu ḽa vhuraru” nga nṱhani ha uri ndi Muvhuso wa nṱhesa u sa vhambedzwi na tshithu.

‘Paradiso’ ye Paulo a “iswa” khayo kha bono i nga ambela kha (1) paradiso ine ya ḓo vha hone kha ḽifhasi, (2) mulalo na vhuthihi zwine zwa ḓo vha hone vhukati ha vhathu vha Mudzimu zwine zwa ḓo fhira mulalo na vhuthihi vhune ra khou ḓiphina ngaho zwino, na (3) ‘paradiso ya Mudzimu’ ine ya ḓo vha hone ṱaḓulu na shangoni ḽiswa.

Shango ḽiswa hu ḓo vha hu ḽiṱaḓulu ḽiswa na ḽifhasi ḽiswa. Hu ḓo vha hu nzudzanyo ntswa ine ya katela Muvhuso wa ngei ṱaḓulu na vhathu vhane vha ḓo vha vha tshi khou shumela Yehova paradisoni kha ḽifhasi.