Naa no vhala nga vhuronwane thero dza zwenezwino dza Tshiingamo? Vhonani arali ni tshi nga fhindula mbudziso dzi tevhelaho:

Ndi vhuṱanzi vhufhio vhune ha vha Maṅwaloni vhune ha sumbedza uri Mudzimu u a ri pfela vhuṱungu?

Mudzimu o vha a tshi pfesesa u tsikeledzea ha Vhaisiraele vha kale na u pfa vhuṱungu he vha vhu pfa musi vhe vhupulini ha ngei Egipita. (Ek. 3:7; Yes. 63:9) Ri nga kona u pfela vhuṱungu ngauri ro sikwa nga tshifanyiso tsha Mudzimu. Mudzimu u a ri pfela vhuṱungu naho ri tshi nga ḓipfa u nga a ro ngo fanela u funwa ngae.—wp18.3, masiaṱ. 8-9.

Pfunzo dza Yesu dzo thusa hani vhathu uri vha kunde tshiṱalula?

Vhayuda vhanzhi vha misini ya Yesu vho vha vhe na tshiṱalula. Kristo o ombedzela uri u ḓiṱukufhadza ndi zwa ndeme na uri zwo khakhea u ḓihudza nga nṱhani ha muvhala wa lukanda. O ṱuṱuwedza vhatevheli vhawe uri vha fanela u dzhiana sa vharathu na vhakomana.​—w18.06, masiaṱ. 9-10.

Ri guda mini kha uri ndi ngani Mudzimu a songo tendela Mushe a tshi dzhena Shangoni ḽo Fulufhedziswaho?

Mushe o vha e na vhushaka ha tsini na Yehova. (Doit. 34:10) Musi miṅwaha ya 40 i tsini na u fhela, vhathu vhe vha vha vhe sogani vho gungula lwa vhuvhili nga u sa vha na maḓi. Mudzimu o vhudza Mushe uri a ambe na tombo. Nṱhani hazwo, Mushe o rwa tombo. Yehova a nga vha o sinyutshela Mushe nga nṱhani ha uri o kundelwa u tevhela vhulivhisi hawe kana ngauri Mushe ho ngo mu ṋea vhugala kha vhuṱolo he a vhu ita. (Num. 20:6-12) Zwenezwo zwi fanela uri funza ngudo ya ndeme ya uri ri fanela u thetshelesa Yehova na u mu ṋea vhugala.​—w18.07, masiaṱ. 13-14.

Ndi ngani zwi tshi nga ri lelutshela uri ri haṱule nga nḓila i si yone arali ro sedza mbonalo ya nga nnḓa?

Hu na masia mararu ane a ita uri vhathu vha haṱule u ya nga zwine vha zwi vhona: vhubvo kana u haṱula nga muvhala wa lukanda, u pfuma na miṅwaha. Ndi zwa ndeme uri ri lingedze u vhona vhaṅwe nga nḓila ine Mudzimu a si na tshiṱalula a vha vhona ngayo! (Mish. 10:34, 35)​—w18.08, masiaṱ. 8-12.

Ndi dzifhio dziṅwe nḓila dzine Vhakriste vho no vhaho vhaaluwa vha nga thusa ngadzo vhaṅwe?

Mukriste o no vhaho mualuwa ane a si tsha ita mushumo we a vha a tshi u ita u thomani, u kha ḓi dzhielwa nṱha nga Mudzimu nahone a nga ita zwo engedzeaho u itela u thusa vhaṅwe. A nga thusa mufarisi wa wahashu ane a si vhe ngohoni, u thusa vho fholaho muyani, u fara pfunzo dza Bivhili na u ita zwo engedzeaho vhuḓinḓani.​—w18.09, masiaṱ. 8-11.

Ndi mini zwine Vhakriste vha vha nazwo kha Bogisi Ḽa Zwishumiswa Zwa U Funza?

Hu na garaṱa dza vhukwamani na zwibammbiri zwa u ramba. Hu dovha ha vha na zwibammbiri zwi kungaho zwa malo u katela na Tshiingamo na Awake! Bogisi ḽa zwishumiswa ḽi dovha ḽa vha na bugwana dzi si gathi, bugu mbili dza u fara pfunzo ya Bivhili na vidio nṋa, iṅwe yadzo ndi ine ya ri, Ndi Ngani Ni Tshi Fanela U Guda Bivhili?—w18.10, siaṱ. 16.

Mukriste a nga “renga ngoho” nga nḓila-ḓe, samusi Mirero 23:23, [NW] yo zwi amba?

A ri badeli tshelede u itela u wana ngoho. Fhedzi ri fanela u ḓiṋea tshifhinga na u ita vhuḓidini u itela u i wana.​—w18.11, siaṱ. 4

Ri guda mini kha nḓila ye Hosea a shumisana ngayo na mufumakadzi wawe Gomere?

Gomere o ita vhupombwe lunzhi, fhedzi Hosea o mu farela na u dzula o vhingana nae. Arali mufarisi wa Mukriste o ita vhupombwe, mufarisi a si na mulandu a nga mu hangwela. Musi mufarisi a si na mulandu a tshi dovha a ita zwa vhudzekani na mufarisi wawe zwi amba uri ha tsheena tshiitisi tshi bvaho Maṅwaloni tsha u mu ṱala.​—w18.12, siaṱ. 13.