Mafhungo a re kha Doiteronomio 22:25-27 o vha a sa khou livhisa ṱhogomelo kha uri wa munna u na mulandu ngauri zwo vha zwi tshi tou vha khagala uri u tzhipa ndi mulandu. Wonoyo mulayo wo vha u tshi livhisa ṱhogomela kha u wanulusa arali musidzana e na mulandu. Ṱhogomelani ndimana dzi si gathi.

Ndimana 23 na 24 dzi amba nga ha munna we a lala na musidzana “muḓini.” Onoyo munna u vha o ita vhupombwe ngauri musidzana o fhulufhedziswaho u vhingwa o vha a tshi dzhiiwa sa o vhingwaho. Naa musidzana o vha e na mulandu? Ee, ho ngo “[ṱavha] mukosi e muḓini.” Arali a ṱavhe mukosi, vhaṅwe vho vha vha tshi ḓo mu pfa vha mu thusa. Fhedzi ho ngo ṱavha mukosi. Nga zwenezwo, u vha o ita vhupombwe nahone e na mulandu.—Doit. 22:23, 24.

Ṱhogomelani vhuṅwe vhuimo: “Arali munna o ṱangana na musidzana wa wa hawe ngei nnḓa ha muḓi a mu fara a mu [tzhipa], hone uyo munna we a mu [tzhipa] a vhulahwe e eṱhe. Musidzana ni songo mu ita tshithu, ha ngo ita tsho eḓanaho u vhulahwa; ngauri zwi nga zwa misi munna o vutshela muthu a mu vhulaha; ndi mafhungo mathihi. Ngauri o mu wana nnḓa ha muḓi . . . musidzana uyo a [ṱavha] mukosi . . . hu si [vhe] na wa u mu lamulela.”—Doit. 22:25-27.

Kha honoho vhuimo, vhahaṱuli vho fhulufhela onoyo musidzana. Ndi ngani? Vho vha vha tshi dzhia uri “musidzana uyo [o ṱavha] mukosi . . . hu si [vhe] na wa u mu lamulela.” Zwi amba uri u vha a songo ita vhupombwe. Fhedzi munna u vha e na mulandu wa u tzhipa na u ita vhupombwe ngauri o “mu fara a [lala nae].”

Naho wonoyo mulayo wo vha wo itelwa u wanulusa arali musidzana e na mulandu, wo vha u tshi dovha wa bvisela khagala uri munna u na mulandu wa u tzhipa na u ita vhupombwe. Ri nga vha na vhungoho ha uri vhahaṱuli vho vha vha tshi “[ṱoḓisisa] zwavhuḓi” na u ita phetho ine ya tshimbidzana na mulayo we Yehova a u dovholola lunzhi lunzhi.—Doit. 13:15; 17:4; Ek. 20:14.