THERO I GUDWAHO 51
Ni Ḓivha Yehova U Swika Gai?
“U fulufhelwa nga vha ḓivhaho dzina ḽau, ngauri a U laṱedzi vha U [ṱoḓaho].”—PS. 9:10.
LUIMBO 56 Funani Ngoho
MANWELEDZO *
1-2. Tsumbo ya Angelito i ri thusa uri ri ite mini?
NAA vhabebi vhaṋu ndi Ṱhanzi Dza Yehova? Arali zwo ralo, ḓivhani uri arali vhabebi vhaṋu vhe na vhushaka havhuḓi na Yehova a zwi ambi uri na iṅwi ni naho. A hu na muthu ane a nga ita uri vhushaka haṋu na Yehova vhu khwaṱhe nga nnḓa ha inwi muṋe.
2 Kha ri ṱhogomele tsumbo ya Angelito. O aluswa muṱani wa Dziṱhanzi. Fhedzi musi a tshee muṱuku o vha a tshi pfa u nga vhushaka hawe na Yehova a ho ngo khwaṱha. O ri: “Ndo vha ndi tshi khou shumela Yehova ngauri ndo vha ndi sa khou ṱoḓa u ita phambana nadzo.” Fhedzi Angelito o ḓivhetshela tshipikwa tsha u guda Bivhili na u elekanya nga hayo nahone a thoma u dzula a tshi rabela. Zwenezwo zwo mu thusa hani? O ri: “Ndo guda uri arali ndi tshi ṱoḓa u vha na vhushaka ho khwaṱhaho na Khotsi anga wa ṱaḓulu ane a vha Yehova ndi tea u mu ḓivha khwine.” Tsumbo ya Angelito i ita uri ri ḓivhudzise mbudziso dza ndeme dzi ngaho: Ndi ifhio phambano i re hone vhukati ha u sokou ḓivha Yehova na u mu ḓivha zwavhuḓi? Nahone ri nga ita mini uri ri mu ḓivhe?
3. Ndi ifhio phambano i re hone vhukati ha u sokou ḓivha Yehova na u mu ḓivha zwavhuḓi?
3 Ri nga vha ri tshi vhona u nga ri a ḓivha Yehova ngauri ri ḓivha dzina ḽawe, zwe a zwi ita na u zwi amba. Fhedzi a zwi fheleli henefho. Ri tea u fhedza tshifhinga ri tshi khou guda nga ha Yehova na nḓila ine a vha ngayo. Ndi zwone zwine zwa ḓo ri thusa u pfesesa uri ndi ngani Yehova a tshi amba na u ita zwiṅwe zwithu. Zwenezwo zwi ḓo ri thusa u vhona arali nḓila ine ra humbula ngayo, phetho dzine ra dzi dzhia na zwine ra zwi ita zwi tshi mu takadza. Musi ro no ḓivha zwine Yehova a ṱoḓa ri tshi zwi ita, ri tea u zwi ita.
4. U guda nga ha tsumbo dzi re Bivhilini zwi ḓo ri thusa hani?
4 Vhaṅwe vha nga ri fara nga nḓila i si yavhuḓi musi ri tshi khetha u shumela Yehova nahone vha nga ṋaṋa u ri tovhola musi ri tshi ḓikonanya na vhathu vhawe. Fhedzi arali ra fhulufhela Yehova, a nga si vhuye a ri laṱa. Musi ri tshi ita zwenezwo ri ḓo vha na vhushaka ho khwaṱhaho nae nahone vhu ḓo dzula vhu hone. Naa zwi a konadzea u ḓivha Yehova zwavhuḓi? Ee! Tsumbo ya Mushe na Davida vhe vha vha vha songo fhelela i sumbedza uri zwi a konadzea. Ri ḓo fhindula mbudziso mbili musi ri tshi guda nga havho: Vho ita mini uri vha ḓivhe Yehova? Nahone ri guda mini khavho?
MUSHE O VHONA “ANE A SI VHONALE”
5. Mushe o khetha u ita mini?
5 Mushe o ita zwe a zwi guda. Musi e na miṅwaha i ṱoḓaho u vha 40, o khetha u ḓikonanya na vhathu vha Yehova vha Vhaisiraele nṱhani ha u ḓivhiwa sa “murwa wa ṅwananyana wa Farao.” (Vhaheb. 11:24) Mushe o ṱutshela vhuimo ha nṱha. Musi Mushe a tshi khetha u ima na vhathu vha Yehova, o vha a tshi zwi ḓivha uri Farao muvhusi a re na maanḓa we a vha a tshi dzhiiwa sa mudzimu o vha a tshi ḓo sinyuwa zwihulu. Zwenezwo zwi sumbedza uri o vha e na lutendo luhulu! O vha a tshi fhulufhela Yehova. Zwenezwo zwo ita uri a dzule e na vhushaka havhuḓi na Yehova.—Mir. 3:5.
6. Ri guda mini kha tsumbo ya Mushe?
6 Ri guda mini? Na riṋe ri na phetho ine ra tea u i ita u fana na Mushe ya uri naa ri ḓo khetha u shumela Yehova na u ḓikonanya na vhathu vhawe? Ri nga tea u ḓidzima zwiṅwe zwithu u itela u shumela Yehova nahone vhane vha si mu ḓivhe vha nga ri tovhola. Fhedzi arali ra fhulufhela Khotsi ashu wa ṱaḓulu, u ḓo ri tikedza!
7-8. Ndi zwifhio zwiṅwe zwe Mushe a zwi guda?
7 Mushe o bvela phanḓa a tshi guda nga ha nḓila ine Yehova a vha ngayo na u ita zwine a ṱoḓa. Sa tsumbo, musi Mushe a tshi humbelwa uri a bvise Vhaisiraele vhupulini ha Egipita, o vha a sa ḓifhulufheli nahone o vhudza Yehova lunzhi uri a nga si zwi kone. Yehova o sumbedza uri u a pfela vhuṱungu nga u thusa Mushe. (Ek. 4:10-16) Zwenezwo zwo thusa Mushe uri a kone u vhudza Farao khaṱhulo dza Yehova. Mushe o vhona Yehova a tshi shumisa maanḓa awe u itela u tshidza Vhaisiraele na u fhelisa Farao na mmbi yawe Lwanzheni Lutswuku.—Ek. 14:26-31; Ps. 136:15.
8 Musi Mushe a tshi bvisa Vhaisiraele Egipita, vho vha vha tshi dzula vha tshi gungula nga tshino na tshiḽa. Mushe o vhona Yehova a sa fheleli mbilu vhenevho vhathu vhawe vhe a vha bvisa vhupulini. (Ps. 78:40-43) O dovha a vhona nḓila ine Yehova a ḓiṱukufhadza ngayo musi a tshi vhona Yehova a tshi shandula muhumbulo wawe a ita zwe Mushe a mu humbela uri a zwi ite.—Ek. 32:9-14.
9. U ya nga Vhaheberu 11:27, vhushaka ha Yehova na Mushe ho vha ho khwaṱha lungafhani?
9 Musi Mushe o no bvisa Vhaisiraele vhupulini, vhushaka hawe na Yehova ho bvela phanḓa ho khwaṱha zwa tou nga u khou vhona Khotsi awe wa ṱaḓulu nga awe maṱo. (Vhalani Vhaheberu 11:27.) Bivhili i sumbedza uri vho vha vhe na vhushaka havhuḓi vhukuma musi i tshi ri: “Yehova o vha a tshi amba na Mushe vho livhana zwifhaṱuwo, vhunga muthu a tshi amba na khonani yawe.”—Ek. 33:11.
10. Ri tea u ita mini uri ri ḓivhe Yehova zwavhuḓi?
10 Ri guda mini? Arali ri tshi ṱoḓa u ḓivha Yehova zwavhuḓi, ri tea u guda nḓila ine a vha ngayo na zwine a zwi ṱoḓa. Yehova u ṱoḓa “vhathu vha mifuda yoṱhe vha tshi tshidzwa nahone vha vha na nḓivho yo teaho ya ngoho.” (1 Tim. 2:3, 4) Iṅwe nḓila ine ra ita zwine zwa funwa nga Yehova ndi nga u funza vhaṅwe nga hae.
11. U funza vhaṅwe nga ha Yehova zwi ita hani uri ri mu ḓivhe khwine?
11 Kanzhi musi ri tshi gudisa vhaṅwe nga ha Yehova zwi ri thusa uri ri mu ḓivhe khwine. Sa tsumbo, ri a zwi vhona uri Yehova u a pfela vhuṱungu musi a tshi ri livhisa kha vhathu vhane vha ṱoḓa u guda nga hae. (Yoh. 6:44; Mish. 13:48) Ri dovha ra vhona uri Yehova u na maanḓa musi vhathu vhane ra guda navho vha tshi litsha dzema ḽivhi vha ambara vhumuthu vhuswa. (Vhakol. 3:9, 10) Nahone ri vhona uri Yehova ha fheli mbilu musi a tshi thusa vhathu vha tsimuni yashu uri vha gude nga hae na uri vha tshidzwe.—Vharoma 10:13-15.
12. U ya nga Ekisodo 33:13, Mushe o humbela Yehova uri a ite mini nahone ndi ngani?
12 Mushe o vha a tshi dzhiela nṱha vhushaka hawe na Yehova. Yehova o shumisa Mushe u ita vhuṱolo vhunzhi, zwenezwi zwi amba uri o vha a tshi ḓivha Yehova khwine, naho zwo ralo, o humbela Yehova uri a mu thuse uri a mu ḓivhe nga nḓila yo engedzeaho. (Vhalani Ekisodo 33:13.) Mushe o ita yeneyo khumbelo naho e miṅwahani ya vhu 80 ngauri o vha a tshi zwi ḓivha uri hu na zwithu zwinzhi zwine a kha ḓi tea u zwi guda nga ha Khotsi awe wa ṱaḓulu.
13. Ndi ifhio iṅwe nḓila ine ra nga sumbedza ngayo uri ri dzhiela nṱha vhushaka hashu na Yehova?
13 Ri guda mini? Hu sa londwi uri ri na tshifhinga tshingafhani ri tshi khou shumela Yehova, a ro ngo tea u dzhiela fhasi vhushaka hashu nae. Iṅwe nḓila ine ra nga sumbedza uri ri dzhiela nṱha vhushaka hashu na Yehova ndi nga u amba nae nga thabelo.
14. Ndi ngani thabelo i ya ndeme arali ri tshi ṱoḓa u ḓivha Yehova khwine?
14 Ndi zwa ndeme uri vhathu vhane vha ṱoḓa u vha na vhushaka ho khwaṱhaho vha dzule vha tshi amba. Nga zwenezwo, uri ni vhe na vhushaka ho khwaṱhaho na Yehova, ndi zwa ndeme uri ni dzule ni tshi rabela khae na u mu somolela zwa haṋwani. (Vhaef. 6:18) Krista wa ngei Turkey u ri: “Ndi funa na u fhulufhela Yehova nga ho engedzeaho musi ndi tshi mu vhudza zwi re mbiluni na u vhona a tshi nthusa. U vhona Yehova a tshi fhindula thabelo dzanga, zwo ita uri ndi mu dzhie e Khotsi na Khonani yanga.”
O TAKADZA MBILU YA YEHOVA
15. Yehova o ṱalusa hani Khosi Davida?
15 Lushaka lwe Khosi Davida a vha a tshi bva khalwo lwo vha lu tshi gwadamela Yehova. Fhedzi zwenezwo a si zwone zwo itaho uri Davida a gwadamele Yehova. Davida o shumela kha u vha na vhushaka ho khwaṱhaho na Yehova nahone Yehova o vha a tshi mu funa nga maanḓa. Yehova o ṱalusa Davida sa ‘munna ane mbilu yawe ya mu takalela.’ (Mish. 13:22) Ndi mini zwo itaho uri Davida a vhe na vhushaka ho khwaṱhaho na Yehova?
16. Davida o guda mini nga ha Yehova musi a tshi lavhelesa tsiko?
16 Davida o guda nga ha Yehova kha tsiko. Musi Davida a tshee muṱuku o vha a tshi fhedza tshifhinga tshinzhi a tshi khou lisa nngu dza khotsi awe. Khamusi o vha a tshi shumisa tshenetsho tshifhinga u itela u elekanya nga ha tsiko ya Yehova. Sa tsumbo, musi Davida a tshi lavhelesa nṱha nga madekwana, a nga vha a songo guma kha u vhona ṋaledzi nnzhi, fhedzi o humbula na nga Musiki wadzo. Zwenezwo zwo mu ṱuṱuwedza uri a ṅwale uri: “Ḽiṱaḓulu ḽi amba vhurena ha Mudzimu; lutombo lu bula mishumo ya zwanḓa zwawe.” (Ps. 19:1, 2) Davida o ṱhogomela uri Yehova u na vhuṱali musi a tshi vhona nḓila ye vhathu vha sikwa ngayo. (Ps. 139:14) Musi a tshi humbula nga zwoṱhe zwe Yehova a zwi sika, zwo ita uri a ḓipfe e si tshithu musi a tshi ḓivhambedza na Yehova.—Ps. 139:6.
17. Ri nga guda mini arali ra elekanya nga ha tsiko?
17 Ri guda mini? Gudani zwinzhi nga ha tsiko. Musi ni tshi vhona zwithu zwavhuḓi zwe Yehova a zwi sika, ni songo sokou fhirisa maṱo, fhedzi ni humbule nga ha nḓila ye a zwi sika ngayo. Ḓuvha na ḓuvha ni tea u elekanya nga ha zwine na zwi guda nga ha Yehova kha zwimela, zwipuka na vhathu. Nga yeneyo ndila ni ḓo guda zwithu zwinzhi nga ha Yehova ḓuvha na ḓuvha. (Vharoma 1:20) Nahone zwenezwo zwi ḓo ita uri ni mu fune nga ho engedzeaho ḓuvha na ḓuvha.
18. U ya nga Psalme ya 18, ndi mini zwe Davida a vha a tshi zwi ḓivha?
18 Davida o vha a tshi zwi ḓivha uri u khou thuswa nga Yehova. Sa tsumbo, musi Davida a tshi tsireledza nngu dza khotsi awe kha ndau na tshivhingwi, o vha a tshi zwi ḓivha uri ndi Yehova we a mu thusa u lwa na zwenezwo zwivhanda zwi re na khombo. Musi a tshi kunda Goliata we a vha e muhali nahone o lapfa vhukuma, o vha a tshi zwi ḓivha uri ndi Yehova we a mu thusa. (1 Sam. 17:37) Musi a tshi ponyoka Khosi Saulo we a vha e na vivho, o vha a tshi zwi ḓivha uri ndi Yehova o mu thusaho. (Ṱhalusandima ya Psalme ya 18) Muthu ane a ḓihudza o vha a tshi ḓo ri o zwi kona nga ene muṋe. Fhedzi ngauri Davida o vha a tshi ḓiṱukufhadza, o vha a tshi zwi ḓivha uri o vha a sa ḓo kona u zwi ita arali a vhe a songo thuswa nga Yehova.—Ps. 138:6.
19. Ri guda mini kha tsumbo ya Davida?
19 Ri guda mini? A ro ngo tea u sokou humbela thuso kha Yehova. Fhedzi ri tea u ṱhogomela nḓila ine a ri thusa ngayo na tshifhinga tshine a ri thusa ngatsho. Arali ra ṱanganedza uri a ri vhomakonazwoṱhe, ri ḓo zwi vhona uri Yehova u ri itela zwine ri si kone u zwi ita. Tshifhinga tshoṱhe musi ri tshi vhona Yehova a tshi ri thusa, vhushaka hashu nae vhu ḓo khwaṱha. Zwenezwo zwo itea na kha muṅwe wahashu wa ngei Fiji ane a pfi Isaac ane ndi kale a tshi khou shumela Yehova, u ri: “Ndi a kona u zwi vhona uri Yehova o nthusa u bva musi ndi tshi guda Bivhili u vhuya u swikela zwino. Zwenezwo zwi ita uri ndi mu dzhie e wa vhukuma.”
20. Ri guda mini kha vhushaka he Davida a vha e naho na Yehova?
20 Davida o edzisa Yehova. Yehova o ri sika ri na vhukoni ha u mu edzisa. (Gen. 1:26) Musi ri tshi guda nga ha nḓila ine Yehova a vha ngayo, zwi a ri lelutshela uri ri mu edzise. Ngauri Davida o vha a tshi ḓivha nḓila ine Yehova a vha ngayo, zwo mu lelutshela uri a mu edzise kha nḓila ye a vha a tshi fara ngayo vhaṅwe. Kha ri haseledze tsumbo i tevhelaho. Davida o khakhela Yehova nga u ita vhupombwe na Batseba na nga u vhulaya munna wawe. (2 Sam. 11:1-4, 15) Yehova o khathutshela onoyo munna we na ene a vha a tshi khathutshela. Vhushaka hawe havhuḓi na Yehova ho ita uri vhathu vha Isiraele vha mu fune sa khosi yavho na uri Yehova a mu shumise sa tsumbo kha dziṅwe khosi.—1 Dzikh. 15:11; 2 Dzikh. 14:1-3.
21. U ya nga Vhaefesa 4:24 na 5:1, ri vhuyelwa hani nga u vha “vha edzisaho Mudzimu”?
21 Ri guda mini? Ri tea u vha “vha edzisaho Mudzimu.” U ita zwenezwi zwi a ri vhuyedza nahone zwi ri thusa uri ri mu ḓivhe khwine. Musi ri tshi mu edzisa ri vha ri tshi khou sumbedza uri ri vhana vhawe.—Vhalani Vhaefesa 4:24; 5:1.
ḒIVHANI YEHOVA KHWINE
22-23. Hu ḓo itea mini arali ra shumisa zwine ra zwi guda nga ha Yehova?
22 Samusi ro zwi guda, nḓila ya u ḓivha Yehova khwine ndi nga u guda nga hae kha tsiko na kha Ipfi ḽawe Bivhili. Bivhilini ri guda nga ha vhathu vha fhulufhedzeaho vhane ra nga vha edzisa vha ngaho Mushe na Davida. A hu na zwe Yehova a si ri itele zwone. Ho sala uri riṋe ri gude nga hae.
23 U guda nga ha Yehova a zwi na magumo. (Muh. 3:11) Tsha ndeme a si zwine ra zwi ḓivha nga hae, fhedzi ndi zwine ra zwi ita nga zwine ra zwi ḓivha. Ri ḓo vha na vhushaka ho khwaṱhaho na Khotsi ashu ane a ri funa arali ra shumisa zwe ra zwi guda nahone ra mu edzisa. (Yak. 4:8) Yehova u shumisa Bivhili u itela u ri khwaṱhisedza uri a nga si vhuye a laṱa vhane vha ṱoḓa u mu ḓivha khwine.
LUIMBO 80 ‘Thetshelani Ni Vhone, Yehova Ndi Wavhuḓi’
^ phar. 5 Vhathu vhanzhi vha a tenda uri Mudzimu u hone, fhedzi a vha mu ḓivhi zwavhuḓi. Zwi amba mini u ḓivha Yehova? Tsumbo ya Mushe na Khosi Davida i ri thusa hani u khwaṱhisa vhushaka hashu na Yehova? Ino thero i ḓo fhindula dzenedzo mbudziso.
