Musi Yesu e ṱaḓulu, o guda zwithu zwe zwa mu thusa uri a kone u shumisana zwavhuḓi na vhaṅwe. Musi e kha ḽifhasi, o vha tsumbo yavhuḓi ya muthu ane a shumisana zwavhuḓi na vhaṅwe. Ri nga vhuyelwa hani nga u guda kha tsumbo ya Yesu? Musi ri tshi ṱolisisa tsumbo yawe, ri wana vhulivhisi vhuraru vhune ha nga ri thusa u shumisana zwavhuḓi na vhaṅwe. Honovhu vhulivhisi vhu ḓo ri thusa uri ri vhe na vhuthihi na vhahashu.

Muthu ane a shumisana zwavhuḓi na vhaṅwe u a ḓiṱukufhadza. U dzhia vhashumisani nae vhe vha ndeme nahone ha ḓiiti mmboneni. Yesu o guda honoho u ḓiṱukufhadza kha Khotsi awe. Naho Yehova e ene e eṱhe o fanelwaho nga u vhidzwa Musiki, o vha a tshi ṱoḓa vhaṅwe vha tshi ḓivha nga ha mushumo wa ndeme we Murwa wawe a u ita. Zwenezwo ri zwi vhona kha zwe Mudzimu a zwi amba musi a tshi ri: “Kha ri ite vhathu ri tshi ḓifanyisa.” (Gen. 1:26) Musi Yehova a tshi amba enea maipfi, Yesu o mbo ḓi zwi ḓivha uri Yehova u a ḓiṱukufhadza.—Ps. 18:35.

Musi Yesu e kha ḽifhasi, na ene o vha a tshi ḓiṱukufhadza. Musi vhathu vha tshi mu khoḓa nga zwe a ita, ene o vha a tshi ita uri hu rendiwe Mudzimu. (Marko 10:17, 18; Yoh. 7:15, 16) Yesu o ita vhuḓidini uri a vhe na mulalo na vhafunziwa vhawe nahone o vha a tshi vha dzhia sa dzikhonani, hu si vhalanda. (Yoh. 15:15) O ita na u vha ṱanzwa milenzhe a tshi khou vha gudisa uri vha ḓiṱukufhadze. (Yoh. 13:5, 12-14) Na riṋe ri tea u hulisa vhashumisani na riṋe, nṱhani ha u dzhia  zwine riṋe ra zwi takalela zwi zwa ndeme u fhira zwavho. Ri nga swikelela zwinzhi musi ri tshi “hulisa vhaṅwe” nahone ri sa ṱoḓi uri hu khoḓwe riṋe tshifhinga tshoṱhe.—Vharoma 12:10.

Muthu ane a ḓiṱukufhadza, u a pfesesa uri zwithu “zwi a khunyeledzea arali hu na vhaeletshedzi vhanzhi.” (Mir. 15:22) Hu sa londwi uri ri na tshenzhelo nngafhani kana ri na vhukoni vhungafhani, ri tea u humbula uri a hu na muthu ane a ḓivha zwoṱhe. Yesu na ene o amba uri hu na zwiṅwe zwithu zwe a vha a sa zwi ḓivhi. (Mat. 24:36) Zwiṅwe hafhu, o vha a tshi ṱoḓa u ḓivha zwine vhafunziwa vhawe vha zwi ḓivha na u zwi humbula. (Mat. 16:13-16) Ndi ngazwo vhashumisani nae vho vha vho vhofholowa musi vhe nae. Nga hu fanaho, arali ra ḓiṱukufhadza, ra humbula uri a ri ḓivhi zwoṱhe na u thetshelesa mavhonele a vhaṅwe, ri ḓo vha na mulalo navho nahone zwithu zwa “khunyeledzea.”

Ndi zwa ndeme uri na vhahulwane vha edzise u ḓiṱukufhadza ha Yesu musi vha tshi shumisana. Vha tea u zwi humbula uri muya mukhethwa u nga thusa muhulwane naho e ufhio uri a ambe zwithu zwine zwa ḓo thusa tshigwada tsha vhahulwane u ita phetho yavhuḓi. Musi vhahulwane vhe na muṱangano, arali vha ita uri muṅwe na muṅwe a pfe o vhofholowa u amba mavhonele awe, vha ḓo ita phetho dzine dza ḓo vhuyedza tshivhidzo tshoṱhe.

Muthu ane a shumisana zwavhuḓi na vhaṅwe, ha ṱoḓi hu tshi itwa zwawe fhedzi. U a tendelana na zwiimo. Yesu o vha na zwibuli zwinzhi zwa u vhona uri Khotsi awe ha iti zwine zwa funwa ngae fhedzi. Sa tsumbo, samusi vhathu vho vha vho tewa nga u fa, Yehova o ruma Yesu uri a ḓe a vha tshidze.—Yoh. 3:16.

Musi zwi tshi ṱoḓea, Yesu o vha a tshi tendelana na zwiimo. Humbulani uri naho o vha o rumiwa kha vha nnḓu ya Isiraele, o thusa mufumakadzi a bvaho dzinguni ḽa Fenikia. (Mat. 15:22-28) O vha a tshi humbulela vhafunziwa vhawe nahone o vha a sa lavheleli zwinzhi u fhira zwine vha nga zwi kona. Musi Petro khonani yawe ya tsini a tshi mu landula vhathuni, Yesu o vha o ḓiimisela u mu hangwela. Nga murahu, a ṋea Petro vhuḓifhinduleli vhuhulwane. (Luka 22:32; Yoh. 21:17; Mish. 2:14; 8:14-17; 10:44, 45) Tsumbo ya Yesu i ri sumbedza uri ri tea u ita “uri vhathu vhoṱhe vha zwi vhone uri a [ri] ṱoḓi hu tshi itiwa [zwashu] fhedzi.” Ri zwi ita nga u tendelana na zwiimo.—Vhafil. 4:5.

 U humbulela zwi ḓo ita uri ri shanduke na zwiimo uri ri shumisane nga mulalo na vhathu vhoṱhe. Yesu o vha a tshi fara vhathu vhoṱhe zwavhuḓi lwe maswina awe a vhuya a ri u “khonani ya vhathelisi na vhaitazwivhi” vhe vha ṱanganedza mulaedza wawe. (Mat. 11:19) Naa ri nga fana na Yesu nga u shumisana zwavhuḓi na vhaṅwe vhathu vha sa fani na riṋe? Louis, we a fhedza tshifhinga tshinzhi a tshi khou ita mushumo wa u dalela zwivhidzo na u shuma Bethele na vhathu vha vhubvo ho fhambanaho u ri: “Ndo lingedza u vhambedza tshigwada tshiṅwe na tshiṅwe tshe nda shuma natsho na luvhondo lwo fhaṱwaho nga matombo a sa lingani. Arali wa shandula nḓila ine wa vhea ngayo enea matombo, u nga fhedzisela u na luvhondo lwo imaho zwavhuḓi. Na nṋe ndo lingedza u ita tshanduko uri ndi kone u shumisana na vhaṅwe nga mulalo uri mushumo u shavhe zwanḓa.” Eneo ndi mavhonele avhuḓi vhukuma!

Ri na zwibuli zwifhio zwa u sumbedza vha tshivhidzoni tshashu uri ri a vha humbulela? Ri nga zwi ita musi ri na tshigwada tshine ra shuma natsho tsimuni. Ri nga shuma na vhahuweleli vha miṅwaha yo fhambanaho kana vha re na vhuḓifhinduleli ha muṱa ho fhambanaho. Ri nga fhungudza luvhilo kana ra ḓiimisela u huwelela nga nḓila ine vha i takalela uri vha takalele vhuḓinḓa.

Muthu ane a shumisana zwavhuḓi na vhaṅwe u vha o ‘ḓiimisela u kovhela vhaṅwe.’ (1 Tim. 6:18) Musi Yesu a tshi khou shuma na Khotsi awe, a nga vha o zwi ṱhogomela uri Yehova ha mu dzumbeli zwiṅwe zwithu. Yesu o vha e “hone” musi Yehova a tshi “sika ḽiṱaḓulu” nahone o vha a tshi nga guda khae. (Mir. 8:27) Nga murahu, Yesu o kovhela vhafunziwa vhawe “zwe [a] zwi pfa” kha Khotsi awe. (Yoh. 15:15) Ri nga edzisa tsumbo ya Yehova nga u vhudza vhahashu zwe ra zwi guda. Muthu ane a shumisana zwavhuḓi na vhaṅwe ha lingedzi u langa vhaṅwe nga u sa vha vhudza zwine vha tea u zwi ḓivha kana zwine zwa nga vha thusa. U a takalela u vhudza vhaṅwe zwithu zwavhuḓi zwe a zwi guda.

Ri nga dovha ra ṱuṱuwedza vhane ra shuma navho. Musi vhaṅwe vha tshi ṱhogomela mishumo yashu na u ri livhuwa, naa a zwi ri takadzi? Yesu o vha a tshi ḓiṋea tshifhinga tsha u vhudza vhashumisani nae zwithu zwavhuḓi zwe a zwi vhona khavho. (Vhambedzani Mateo 25:19-23; Luka 10:17-20.) O vha vhudza na uri vha ḓo “ita na mishumo i fhiraho” yawe. (Yoh. 14:12) Vhusiku ha musi a sa athu u vhulawa, o khoḓa vhaapostola vhawe vha fhulufhedzeaho a vha vhudza uri: “Ndi inwi vhe na konḓelela na nṋe milingoni.” (Luka 22:28) Maipfi awe o vha ṱuṱuwedza na u ita uri vha bvele phanḓa. Na riṋe arali ra ḓiṋea tshifhinga tsha u khoḓa vhane ra shuma navho, vha ḓo takala na u shuma nga ho engedzeaho.

Muṅwe wahashu ane a pfi Kayode u ri: “Muthu ane a shumisana zwavhuḓi na vhaṅwe a si muthu a sa khakhi, fhedzi u ita uri vhaṅwe vha takale na u ita uri mushumo u leluwe.” Naa ni shumisana na vhaṅwe nga yeneyo nḓila? Khamusi ni nga vhudzisa vhaṅwe vhahashu uri vha ni vhudze uri ni mushumisani wa hani. Arali vha tshi takalela u shuma na inwi, u fana na musi vhafunziwa vha Yesu vho takalela u shuma na Yesu, ni nga amba zwe muapostola Paulo a zwi amba musi a tshi ri: “Ri shumisana na inwi uri ni takale.”—2 Vhakor. 1:24.