Musi Yehova a tshi vhudza vhathu uri vha ‘ḓadze ḽifhasi vha ḽi vhuse’ o vha a tshi khou amba uri ḽo vha ḽi tshi ḓo fheleledza ḽi pharadiso. (Gen. 1:28) Vhane vha ḓo tshila tshoṱhe vha ḓo tea u tevhedza yeneyo ndaela. Ḽifhasi a ḽi nga ḓo thoma ḽi pharadiso, sa izwi ngade ya Edeni i si tsheeho. Nga murahunyana ha Haramagedo, hu ḓo vha na mushumo munzhi wa u kunakisa zwipiḓa zwa ḽifhasi zwo tshinyadzwaho. U ḓo vha u mushumo u si na vhukono.

Zwi ri humbudza mushumo we Vhaisiraele vha vha vho tea u u ita musi vha tshi vhuya Babele. Shango ḽavho ḽo vha ḽo no fhedza miṅwaha ya 70 ḽi shubi. Fhedzi Yesaya o vha o dzula o zwi amba uri Yehova o vha a tshi ḓo vha fhaṱutshedza uri vha kone u ḽi vusulusa. Honoho vhuporofita ho ri: “[U ḓo] ita uri masoga awo a nge Edeni na midavhi yawo ya sogani i nge tsimu ya Yehova.” (Yes. 51:3) Yehova o thusa Vhaisiraele uri vha ite uri shango ḽavho ḽi vhe fhethu ho nakaho. Zwi fanaho na zwenezwo, Yehova u ḓo fhaṱutshedza vhane vha ḓo vha vhaṋe vha ḽifhasi uri vha kone u ḽi ita  pharadiso yo nakaho. Hu na zwine na nga zwi ita zwino u sumbedza uri ni a takalela u shela mulenzhe kha wonoyo mushumo.

Iṅwe nḓila ine na nga zwi ita ngayo ndi nga u ita uri haya haṋu hu dzule ho kuna na u dzudzanyea, zwenezwo ni nga zwi ita naho vhahura vhaṋu vha songo kuna. Ni nga dovha na thusa u kunakisa na u ṱhogomela Holo ine na ṱanganela khayo na Holo ya guvhangano. Arali zwiimo zwaṋu zwi tshi ni tendela, ni nga kha ḓi ita khumbelo ya uri ni phalale vho welwaho nga khombo. Zwenezwo zwi ḓo sumbedza uri ni nga takalela u thusa vhahaṋu arali hu na ṱhoḓea. Ni nga ḓigudisa vhutsila vhuṅwe vhune na nga vhu shumisa arali Yehova a nga ni tendela u tshila kha ḽifhasi nga hu sa fheli.

Musi Yesu a tshi kha ḓi bva u vusa ṅwana wa Yairo, o ri onoyo ṅwana a ṋewe zwiḽiwa. (Marko 5:42, 43) Zwo vha zwi sa konḓi u ṱhogomela onoyo musidzana a re na miṅwaha ya 12. Humbulani uri ri ḓo vha ri na mushumo mungafhani musi Yesu a tshi ita zwe a fhulufhedzisa musi a tshi ri: “Vhoṱhe vha re mavhiḓani vha ḓo pfa ipfi ḽawe vha bva.” (Yoh. 5:28, 29) Naho Bivhili i si na zwidodombedzwa zwinzhi, khamusi zwi nga ṱoḓea uri ri thuse vho vuswaho nga zwiḽiwa, vhudzulo na zwiambaro. Ni nga zwi sumbedza zwino uri no ḓiimisela u thusa. Hu na zwithu zwi si gathi zwine na nga zwi ita.

Musi tshivhidzo tsha haṋu tshi tshi ḓivhadziwa uri tshi ḓo dalelwa nga mulavhelesi wa ḽiisela, ni nga ṅwalisa uri ni ḽe nae zwiḽiwa. Musi vha re kha tshumelo yo khetheaho ya tshifhinga tshoṱhe vha re Bethele vha tshi ṋewa mushumo muswa wa uri vha ye tsimuni, vha ḓa vha shuma na tshivhidzo tsha haṋu, kana musi mulavhelesi wa ḽiisela a si tsha shuma sa mulavhelesi wa ḽiisela, naa ni nga vha thusa nga u vha wanela vhudzulo? Arali buthano ḽa dzingu kana buthano ḽo khetheaho ḽi tshi ḓo farelwa hune na dzula hone, naa ni nga thusa musi ḽeneḽo buthano ḽi sa athu u vha hone kana musi ḽi tshi fhela? Kana naa ni nga ṱanganedza vhaeni vha bvaho kha maṅwe mashango vho ḓaho buthanoni?

U ya nga zwine ra zwi vhala kha Mishumo 24:15, ro lavhelela uri hu ḓo vuswa vhathu vha dzibiḽioni. Vhunzhi havho a vho ngo vha na tshibuli tsha u ḓivha Yehova musi vha sa athu u lovha. Fhedzi vha ḓo wana tshenetsho tshibuli musi vho no vuswa vhafuni. a Vha ḓo funzwa nga vhashumeli vha Mudzimu vha fhulufhedzeaho vha re na vhukoni. (Yes. 11:9) Charlotte we a huwelela mafhungo maḓifha kha ḽa Yuropa, Amerika Tshipembe na Afurika o ḓiimisela u ita zwenezwo. U ri: “Ndo lavhelela nga maṱo matswuku u funza vhathu musi vha tshi vuswa vhafuni. Musi ndi tshi vhala nga ha muthu we a tshila tshifhingani tsho fhiraho, ndi anzela u humbula uri: ‘Arali hoyu muthu a ḓivhe Yehova, vhutshilo hawe ho vha vhu tshi ḓo vha vhu khwine.’ Ndo lindela u vhudza vho vuswaho vhafuni nga ha Yehova na uri vhutshilo havho vhu ḓo vha khwine arali vha tshi nga mu shumela.”

Na vhashumeli vha Yehova vhe vha tshila musi Yesu a sa athu u ḓa kha ḽifhasi, vha ḓo tea u guda zwithu zwinzhi. Humbulani uri zwi ḓo takadza hani na u ḓipfa ro huliswa lungafhani musi ri tshi ṱalutshedza Daniele nga ha vhuporofita he a vhu ṅwala he ha itea, fhedzi he a si vhu pfesese nga tshenetshiḽa tshifhinga. (Dan. 12:8) Kana uri zwi ḓo takadza hani u thusa Ruṱe na Naomi uri vha ḓivhe uri vhaḓuhulu vhavho vho katela na Messia. Ri ḓo ḓiphiṋa nga u funza vhathu kha ḽifhasi ḽoṱhe nahone ri si na mitsiko na zwithithisi zwa shango ḽivhi ḽine ra tshila khaḽo.

Ni nga ita mini zwino u sumbedza uri no lugela u funza vho vuswaho vhafuni? Iṅwe nḓila ya u zwi ita ndi nga u ḓidina vhukuma uri ni vhe mugudisi wa khwine na u dzula ni tshi ya tsimuni. (Mat. 24:14) Naho ni sa koni u huwelela nga nḓila ine na zwi funa ngayo zwino nga nṱhani ha vhulala kana zwiṅwe zwiitisi, ni nga sumbedza uri no ḓiimisela u funza vho vuswaho vhafuni nga u ita zwine na nga kona kha mushumo wa u huwelela zwino.

Zwi ḓo vha zwavhuḓi u humbula nga ha hedzi mbudziso: Naa zwa vhukuma no lavhelela nga maṱo matswuku u vha muṋe wa ḽifhasi? Naa no lavhelela nga maṱo matswuku u dzula kha ḽifhasi khathihi na u ṱanganedza na u funza vho vuswaho vhafuni? Ni nga zwi sumbedza uri no ḓiimisela u tshila tshoṱhe kha ḽifhasi nga u shela mulenzhe kha mishumo i fanaho na ine na ḓo i ita musi ni muṋe wa ḽifhasi.