Naa no vhala thero dza magazini dza Tshiingamo dza uno ṅwaha? Kha ri vhone arali ni tshi nga fhindula mbudziso dzi tevhelaho:

Zwi amba mini u ‘shandula nḓila ine na humbula ngayo’? (Vharoma 12:2)

Zwenezwi zwi katela zwi fhiraho u ita zwithu zwo lugaho zwi si gathi fhedzi. Zwi amba uri ri tea u sedza zwine ra vha zwone nga ngomu na u ita tshanduko dzi ṱoḓeaho u itela uri ri tshile u tendelana na nḓila ine Yehova a ṱoḓa ri tshi tshila ngayo.​—w23.01, masiaṱ. 8-9.

Ri nga linganyisela hani musi ri tshi vhona zwine zwa khou itea shangoni?

Ri a takalela u vhona nḓila ine vhuporofita vhu re Bivhilini ha khou itea ngayo zwino. Ri tea u iledza u humbulela zwine zwa ḓo itea ngauri zwi nga ita uri tshivhidzo tshi si tsha vha na vhuthihi, nṱhani hazwo, zwine ra zwi haseledza na vhaṅwe zwi tea u vha zwo thewa kha dzikhandiso dzine dza bva kha ndangulo ya Yehova. (1 Vhakor. 1:10)​—w23.02, siaṱ. 16.

Ndovhedzo ya Yesu na ya vhatevheli vhawe dzo fhambana hani?

Zwo vha zwi sa ṱoḓei uri Yesu a ḓiṋekedzele kha Yehova u fana na riṋe ngauri o bebiwa kha lushaka lwo ḓiṋekedzaho kha Mudzimu. Yesu o vha e muthu a si na tshivhi. Zwo vha zwi sa ṱoḓei uri a humbele Yehova uri a mu hangwele zwivhi.​—w23.03, siaṱ. 5.

Ri nga thusa hani vhaṅwe uri vha fhindule miṱanganoni?

Ri nga fhindula phindulo pfufhi, zwenezwi zwi ḓo ita uri vhaṅwe vha vhe na tshifhinga tsha u fhindula. Ri nga dovha ra iledza u amba mbuno nnzhi-nnzhi. Zwi ḓo ita uri hu vhe na mbuno dzine vhaṅwe vha nga fhindula khadzo.​—w23.04, siaṱ. 23.

“Nḓila khethwa” i re kha Yesaya 35:8 i ambela kha mini?

Yeneyi nḓila ya pfanyisedzo yo thoma i tshi ambela kha nḓila ye Vhayuda vha i tshimbila vha tshi bva Babele vha tshi khou vhuyelela hayani havho. Hu pfi mini nga zwifhingani zwa zwino? Miṅwahani ya musi hu sa athu swika 1919 ho itwa mushumo wa u khura nḓila, ho ṱalutshedzeliwa na u gandiswa Dzibivhili na zwiṅwe. Ndi kale vhathu vha Mudzimu vha tshi khou tshimbila kha “Nḓila Khethwa” ine ya ita uri ri tshile pharadisoni ya lwa pfanyisedzo nahone i tshi ḓo dovha ya ri swikisa pharadisoni ya tshifhingani tshi ḓaho.​—w23.05, masiaṱ. 15-19.

Mirero ndima ya vhuṱahe i ṋea nyeletshedzo i tshi shumisa mini?

Bugu ya Mirero i amba nga ha “mufumakadzi wa tsilu” ane vhane a vha ramba vha ya “vhiḓani.” I dovha ya amba nga ha “vhuṱali ha vhukuma” vhune ha ri ramba uri ri tshimbile “nḓilani ya u ṱalukanya” na uri ri wane vhutshilo. (Mir. 9:1, 6, 13, 18)​—w23.06, masiaṱ. 22-24.

Yehova o sumbedza hani u ḓiṱukufhadza na u humbulela musi a tshi shumisana na Loto?

Yehova o vhudza Loto uri a shavhele dzinguni ḽa dzithavhani. Fhedzi musi Loto a tshi humbela u shavhela Tsowari, Yehova o tenda.​—w23.07, siaṱ. 21.

Ndi mini zwine mufumakadzi a nga zwi ita arali munna wawe a tshi ṱalela pornography?

U tea u iledza u ḓivhona mulandu. U tea u livhisa ṱhogomelo yawe kha vhushaka hawe na Yehova nahone a vhale na u elekanya nga ha mafhungo a re Bivhilini a ambaho nga ha vhafumakadzi vhe vha vha vho tsikeledzea vhe vha khuthadzwa nga u amba na Yehova nga thabelo. A nga thusa munna wawe u iledza vhuimo vhune ha nga mu dzhenisa khomboni.​—w23.08, masiaṱ. 14-17.

Musi muṅwe muthu a tshi vhudzisa nga ha zwine ra zwi tenda, ṱhalukanyo i nga ri thusa hani u vuḓa?

Ri nga dzhia yeneyo mbudziso sa nḓila ya u guda uri ndi zwifhio zwine onoyo muthu o vhudzisaho mbudziso a vha na ndavha nazwo kana zwine a zwi humbula. Zwi ḓo ri thusa uri ri fhindule ro vuḓa.​—w23.09, siaṱ. 17.

Ri nga guda mini kha Maria nga ha u wana maanḓa?

Musi a tshi pfa uri u ḓo beba Messia, o ḓitika nga vhaṅwe uri vha mu thuse. Gabriele na Elisabetha vho mu ṱuṱuwedza nga Maṅwalo. Na riṋe ri nga kona u khwaṱhiswa nga vhahashu.​—w23.10, siaṱ. 15.

Yehova a nga fhindula hani thabelo dzashu?

Yehova u fhulufhedzisa uri u ḓo thetshelesa thabelo dzashu na u vhona uri dzi tshimbidzana hani na zwine a zwi funa. (Yer. 29:12) Yehova a nga fhindula thabelo dzi fanaho nga nḓila dzi sa fani, fhedzi u ḓo dzula a tshi ri tikedza.​—w23.11, masiaṱ. 21-22.

Vharoma 5:2 i amba nga ha “fhulufhelo,” zwino ndi ngani ḽi tshi dovha ḽa ambiwa kha ndimana ya vhuṋa?

Musi muthu a tshi thoma u pfa mafhungo maḓifha, a nga vha na fhulufhelo ḽa u tshila tshoṱhe pharadisoni kha ḽifhasi. Fhedzi musi a tshi sedzana na milingo, a i konḓelela na u vhona Yehova a tshi mu sumbedza uri u a mu takalela, fhulufhelo ḽawe ḽi a engedzea, ḽa vha ḽa vhukuma khae.​—w23.12, masiaṱ. 12-13.