Muapostola Paulo o ṅwalela Timotheo we na ene a vha e muhulwane wa tshivhidzo uri: “Ndi a u laya phanḓa ha Mudzimu na Kristo Yesu na vharuṅwa vho nangwaho uri u tevhedze zwe nda u laya u si na luvhengelambiluni kana tshiṱalula.”​—1 Tim. 5:21.

Uri ri kone u ḓivha uri vhenevho vharuṅwa ndi vhonnyi, ri ḓo thoma nga u amba uri musi lwonolwo luṅwalo lu tshi amba nga ha vharuṅwa vho nangiwaho a lu khou ambela kha vhafhio. Zwi khagala uri a si vha 144 000. Musi Paulo a tshi ṅwalela Timotheo honovhu vhurifhi, vhaḓodzwa vho vha vha sa athu thoma u vuselwa ṱaḓulu. Vhaapostola na vhaṅwe vhaḓodzwa vho vha vha sa athu vha zwivhumbiwa zwa muya, nga zwenezwo, musi Paulo a tshi amba nga ha “vharuṅwa vho nangwaho” o vha a sa khou amba nga ha vha 144 000.​—1 Vhakor. 15:50-54; 1 Vhathes. 4:13-17; 1 Yoh. 3:2.

Vhenevho “vharuṅwa vho nangwaho” vha nga si vhe vha tshi ambela kha vharuṅwa vhe vha si thetshelese nga tshifhinga tsha Maḓi Mahulu. Vhenevho vharuṅwa vho ima na Saṱhane nahone ndi maswina a Yesu. (Gen. 6:2; Luka 8:30, 31; 2 Pet. 2:4) Tshifhingani tshi ḓaho, Yesu u ḓo vha posa mugodini lwa miṅwaha ya 1 000. Nga murahu a vha fhelisa tshoṱhe na Saṱhane.​—Yuda 6; Nzumb. 20:1-3, 10.

“Vharuṅwa vho nangwaho” vha tea u vha vhe vharuṅwa vha ṱaḓulu vhane vha tikedza “Mudzimu na Kristo Yesu” vhe vha ambiwa kha yeneyo vese.

Hu na vharuṅwa vhanzhi ṱaḓulu. (Vhahev. 12:22, 23) Zwi vhonala uri a vha iti mishumo i fanaho nga tshifhinga tshithihi. (Nzumb. 14:17, 18) Sa tsumbo, Yehova o shumisa muruṅwa muthihi fhedzi u itela u vhulaya maswole a 185 000 a Vhaasuri. (2 Dzikh. 19:35) Hu nga vha hu na vharuṅwa vhanzhi vhane vha ita mushumo wa u ‘kuvhanganya vha bvisa zwikhukhulisi zwoṱhe na vhaitazwivhi Muvhusoni wa Yesu.’ (Mat. 13:39-41) Vhaṅwe vha shuma u kuvhanganya vhaḓodzwa uri vha ye ṱaḓulu. (Mat. 24:31) Nahone vhaṅwe vharuṅwa ‘vha ri linda nḓilani dzashu dzoṱhe.’​—Ps. 91:11; Mat. 18:10; vhambedzani Mateo 4:11; Luka 22:43.

“Vharuṅwa vho nangwaho” vhe ha ambiwa nga havho kha 1 Timotheo 5:21 vha nga vha vhe vharuṅwa vhane vha ita mishumo ine ya kwama tshivhidzo nga ho livhaho. Musi Paulo a tshi ṅwalela Timotheo honovhu vhurifhi, o ṋea vhahulwane nyeletshedzo nga ha nḓila ine vha tea u ita ngayo mushumo wavho na u amba uri vhaṅwe tshivhidzoni vha tea u ṱhonifha vhahulwane. Paulo o vhudza vhahulwane uri vha songo vha “na luvhengelambiluni kana tshiṱalula” na uri musi vha tshi ita phetho vha fanela u thoma vha humbulisisa nga hadzo. Paulo o dovha a vha vhudza uri ndi ngani vha tshi tea u ita nga u ralo. O vha vhudza uri vha shumela vhahavho vhe “phanḓa ha Mudzimu na Kristo Yesu na vharuṅwa vho nangwaho.” Nga zwenezwo, Yehova na Yesu na “vharuṅwa vho nangwaho” vha vha vho lavhelesa nḓila ine vha fara ngayo tshivhidzo. Zwi khagala uri vhaṅwe vharuṅwa vha shuma u thusa tshivhidzo. Zwine vha zwi ita zwi katela u tsireledza vhathu vha Mudzimu, u vha thusa nga mushumo wa u huwelela na u vhudza Yehova nga ha zwine zwa vha zwi tshi khou itea kha yeneyi mishumo.​—Mat. 18:10; Nzumb. 14:6.