Naa no vhala thero dza magazini dza Tshiingamo dza uno ṅwaha? Vhonani arali ni tshi nga fhindula mbudziso dzi tevhelaho:

Yehova o ri vhetshela tsumbo ifhio musi zwi tshi ḓa kha nḓila ine ra tea u fara ngayo vhafumakadzi?

Ha ṱaluli vhafumakadzi nahone ha takaleli vhanna u fhira vhafumakadzi. U a vha thetshelesa nahone u na ndavha na nḓila ine vhafumakadzi vha ḓipfa ngayo na thaidzo dzine vha sedzana nadzo. U a fhulufhela uri vha ḓo ita mushumo we a vha ṋea wone.—w24.01, masiaṱ. 15-16.

Ri nga tevhedza hani zwine zwa vha kha Vhaefesa 5:7, ine ya ri: “Ni songo ita zwine vha ita”?

Paulo o vha a tshi khou ri tsivhudza uri ri songo konana na vhathu vhane vha ita uri zwi ri konḓele u tevhedza milayo ya Yehova. Zwenezwi zwi katela vhathu vhane ra fhedza navho tshifhinga, na vhane ra fhedza navho tshifhinga ri songo livhana zwifhaṱuwo kha social media.—w24.03, masiaṱ. 22-23.

Ri nga ḓitsireledza hani kha mafhungo a mazwifhi?

Ri tea u ṱhogomela musi zwi tshi ḓa kha mafhungo ane ra si ḓivhe arali e ngoho ane a nga vha a tshi khou bva kha vhahashu vha tshi khou ṱoḓa u ri ṱuṱuwedza, kha Email dzi re na mafhungo a nyanyulaho a ambaho nga ha Ṱhanzi dza Yehova dzi bvaho kha vhathu vhane ra si vha ḓivhe, na ane a nga vha a tshi khou bva kha vhagunei vhane vha nga ḓiita u nga vha khou takalela mulaedza washu.—w24.04, siaṱ. 12.

Ndi mini zwine ra zwi ḓivha na zwine ra sa zwi ḓivhe nga ha nḓila ine Yehova a ḓo haṱula ngayo Khosi Salomo, vhathu vhe vha fheliswa Sodoma na Gomora na nga ha vhathu vhe vha fheliswa nga Maḓi Mahulu?

A ri na vhuṱanzi ha uri vhenevho vhathu vho fheliswa lwa tshoṱhe. Fhedzi zwine ra zwi ḓivha ndi uri Yehova u ḓivha mafhungo oṱhe nga vhuḓalo na uri u na khathutshelo.—w24.05, masiaṱ. 3-4.

Uri Yehova ndi “Tombo” zwi ri khwaṱhisedza uri mini? (Dot. 32:4)

Yehova ndi vhukhudo hashu. Yehova u a fhulufhedzea nahone a nga si vhuye a ri laṱa. Yehova ha shanduki, zwine a vha zwone na tshipikwa tshawe a zwi shanduki.—w24.06, masiaṱ. 26-28.

Ndi mini zwine zwa nga ni thusa uri ni ḓowele tshivhidzo tshiswa?

Ḓitikeni nga Yehova, u ḓo ni thusa samusi o thusa vhashumeli vhawe tshifhingani tsho fhiraho. Ni songo vhambedza tshivhidzo tshaṋu tshiswa na tsha kale. Dzulani no farakanea kha tshivhidzo tshaṋu tshiswa nahone ni ite khonani ntswa.—w24.07, masiaṱ. 26-28.

Ndi ngudo dzifhio dzine ra dzi wana kha zwifanyiso zwiraru zwi re kha Mateo ndima ya 25?

Tshifanyiso tsha nngu na mbudzi tshi ri ṱuṱuwedza uri ri fhulufhedzee. Tshifanyiso tsha vhasidzana vho ṱalifhaho na vha matsilu tshi sumbedza uri ndi zwa ndeme u dzula ro ḓilugiselela. Tshifanyiso tsha dzitalente tshi sumbedza uri ndi zwa ndeme u vha mushumi wa biko.—w24.09, masiaṱ. 20-24.

Vurannḓa ya thembele ya Salomo yo vha yo lapfa lungafhani u bva fhasi u swika nṱha?

Kha 2 Koronika 3:4, dziṅwe ṱhalutshedzelo dzi amba uri yo vha yo lapfa “khubithi dza 120” zwine zwa amba uri yo vha yo lapfa mithara dza 53. Fhedzi maṅwe maṅwalwa a kale ane a fhulufheliwa a amba uri ndi “khubithi dza 20,” zwine zwa amba uri yo vha yo lapfa mithara dza ṱahe. Zwenezwi zwi a pfala musi ri tshi sedza vhudenya ha luvhondo lwa hune ha dzheniwa ngaho thembeleni.—w24.10, siaṱ. 31.

Zwi amba mini uri wahashu o vhingaho ane a vha mushumeli tshivhidzoni u tea u vha “munna a re na mufumakadzi muthihi”? (1 Tim. 3:12)

Zwenezwi zwi amba uri u tea u dzula a tshi fhulufhedzea kha mufumakadzi wawe nahone ho ngo tea u ḓifara luvhi nga zwa vhudzekani. Nga zwenezwo, ho ngo tea u sumbedza vhaṅwe vhafumakadzi uri u a vha takalela.—w24.11, siaṱ. 19.

Ndi ngani ri tshi nga amba uri zwe Yesu a amba kha Yohane 6:53 o vha a sa khou ṱalutshedza zwine zwa ḓo itea nga Tshilalelo Tsha Murena?

Kha Yohane 6:53, Yesu o amba uri ri tea u ḽa ṋama yawe na u nwa malofha awe. Musi a tshi amba eneo maipfi nga 32 C.E. ngei Galilea, o vha a tshi khou amba na Vhayuda vhe vha vha vha tshi tea u vha na lutendo khae. Fhedzi Tshilalelo Tsha Murena tsho vha hone ngei Yerusalema nga murahu ha ṅwaha musi o no amba eneo maipfi. Yesu o vha a tshi khou amba na vhe a vha a tshi ḓo vhusa navho ṱaḓulu.—w24.12, masiaṱ. 10-11.