Dzulani Ni Tshi Shumela Yehova No Takala
HUMBULANI nga ha ḓuvha ḽe ḽa ni takadza vhukuma vhutshiloni haṋu. Naa ho vha hu ḓuvha ḽaṋu ḽa mbingano kana ho vha hu musi ṅwana waṋu wa tanzhe a tshi bebiwa? Kana naa ho vha hu ḓuvha ḽe na lovhedzwa ngaḽo? Khamusi ḽeneḽo ḽo vha ḽi ḓuvha ḽa ndeme vhukuma na ḽi takadzaho vhutshiloni haṋu. Nahone nga ḽeneḽo ḓuvha, vhahashu vho vha vho takala musi vha tshi ni vhona ni tshi sumbedza uri ni funa Mudzimu nga mbilu yaṋu yoṱhe, zwoṱhe zwine na vha zwone, ṱhalukanyo na nga nungo dzaṋu dzoṱhe!—Marko 12:30.
Khamusi, no no tshenzhela dakalo ḽihulwane ḽa u shumela Yehova u bva tshee na lovhedzwa. Naho zwo ralo, vhahuweleli vhanzhi a vho ngo tsha takala u fana na mathomoni. Ndi ngani zwo ralo? Ndi tshifhio tshiitisi tshine ra vha natsho tsha u bvela phanḓa ri tshi shumela Yehova ro takala?
NDI NGANI VHAṄWE VHA SONGO TSHA TAKALA
Mulaedza wa Muvhuso u ita uri ri takale vhukuma. Ndi ngani? Ngauri Yehova u fulufhedzisa uri hu si kale Muvhuso u ḓo fhelisa ḽeneḽi shango ḽivhi nahone wa ḓisa shango ḽiswa ḽa Mudzimu. Tsefanya 1:14 i ri: “Ḽi tsini ḽeneḽo ḓuvha ḽihulu ḽa Yehova; ḽi tsini, ḽi khou tou vhilula ḽi tshi ḓa.” Fhedzi arali ri tshi vhona u nga ri fanela u ḽi lindela lwa tshifhinganyana u fhira nḓila ye ḽa lavhelelwa ngayo, ri nga si tsha takala u fana na mathomoni. Zwenezwi zwi nga ita uri ri si tsha shuma nga nungo dzoṱhe tshumeloni ya Mudzimu.—Mirero 13:12.
Arali ri tshi fhedza tshifhinga na vhahashu, ri ḓipfa ro ṱuṱuwedzea u dzula ri tshi shumela Yehova ro takala. Vhuḓifari ha vhathu vha Yehova vhu nga vha ho ri kungela vhurabelini ha ngoho nahone ho ri thusa u thoma u shumela Mudzimu ro takala. (1 Petro 2:12) Naho zwo ralo, hu nga itea mini arali muṅwe wahashu o kaidzwa nga nṱhani ha u sa thetshelesa ndaela dza Mudzimu? Zwenezwi zwi nga ita uri vhaṅwe tshivhidzoni vha kulee nungo na u ita uri vha si tsha takala.
U funesa zwithu zwi vhonalaho zwi nga ita uri ri si tsha takala. Nga nḓila-ḓe? Shango ḽa Sathane ḽi lingedza u ri ṱuṱuwedza uri ri renge zwithu zwi si zwa ndeme. Zwi nga vha zwavhuḓi arali ra humbula maipfi a Yesu ane a ri: “A hu na ane a nga kona u shumela vhaṋe vhavhili, ngauri u ḓo vhenga muṅwe a funa muṅwe kana u ḓo nambatela muṅwe, a nyadza muṅwe. Ni nga si kone u shumela Mudzimu na Lupfumo.” (Mateo 6:24) Ri nga si kone u shumela Yehova ro takala ngeno ri tshi khou lingedza u wana zwithu zwoṱhe zwa ḽino shango.
U TAKALA TSHUMELONI YA YEHOVA
U shumela Yehova a si muhwalo kha vhane vha mu funa. (1 Yohane 5:3) Humbulani zwe Yesu a zwi amba musi a tshi ri: “Iḓani ha nṋe noṱhe no netaho ni lemelwaho, ndi ḓo ni homolosa. Hwalani dzhogo yanga, ni gude kha nṋe, ngauri ndo vuḓa nahone ndi a ḓiṱukufhadza mbiluni, mimuya yaṋu i ḓo homoloswa. Ngauri dzhogo yanga a i gogoni na muhwalo wanga u a leluwa.” (Mateo 11:28-30) U vha Mukriste wa ngoho zwi a homolosa nahone zwi ri ḓisela dakalo. Vhukuma, ri na tshiitisi tshavhuḓi tsha u takala tshumeloni ya Yehova. Kha ri ṱolisise nḓila tharu dzine ra nga takala ngadzo.—Habakuku 3:18.
Ri shumela Muṋei wa Vhutshilo, Mudzimu o takalaho. (Mishumo 17:28; 1 Timotheo 1:11) Ri ṱhogomela uri ri koloda vhutshilo hashu Musiki washu. Nga zwenezwo, kha ri bvele phanḓa ri tshi mu shumela ro takala, hu sa londwi uri ho no fhela miṅwaha mingana ro lovhedzwa.
Héctor u dzula o takala nga u humbula nga ha fulufhelo ḽa Muvhuso na u dzula a tshi fhisea
Ṱhogomelani Héctor we a shumela Yehova sa mulavhelesi a dalelaho lwa miṅwaha ya 40. ‘Naho o no vha wa maḓuvha’ u kha ḓi takalela u shumela Yehova. (Psalme ya 92:12-14) U lwala ha mufumakadzi wawe zwo ita uri a si tsha shuma nga vhuḓalo tshumeloni ya Mudzimu, fhedzi Héctor u kha ḓi vha o takala. U ri: “Naho zwi tshi vhavha u vhona mufumakadzi wanga a tshi khou ṋaṋa u lwala nahone zwi khaedu u mu ṱhogomela, a tho ngo tendela zwenezwi zwi tshi fhedza dakalo ḽanga ḽa u shumela Mudzimu wa ngoho. U ḓivha uri ndi koloda Yehova vhutshilo hanga, we a sika muthu e na ndivho, zwenezwi zwi nṋea tshiitisi tsha u mu funa zwi tshi bva mbiluni na u mu shumela nga mbilu yanga yoṱhe. Ndi lwela u dzula ndi tshi fhisea mushumoni wa u huwelela nahone ndi ita uri fulufhelo ḽa Muvhuso ḽi dzule ḽi muhumbuloni wanga u itela uri ndi dzule ndo takala.”
Yehova o ita nzudzanyo ya tshiṱhavhelo tshi rengululaho, u itela uri zwi konadzee u vha na vhutshilo vhu takadzaho. Vhukuma, “Mudzimu o funa shango zwihuluhulu a vhuya a kumedza Murwa wawe mubebwa e eṱhe, uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.” (Yohane 3:16) Vhukuma, zwivhi zwashu zwi nga hangwelwa nahone ri nga wana vhutshilo vhu sa fheli arali ri tshi tenda kha tshifhiwa tsha Mudzimu tsha lufuno tshine tsha vha tshirengululi. Tshenetshi ndi tshiitisi tshavhuḓi vhukuma tshine ra fanela u tshi livhuha! Nahone u livhuha hashu tshirengululi zwi ḓo ri ṱuṱuwedza u shumela Yehova ro takala.
Jesús u tshila vhutshilo ho leluwaho nahone o shumela Yehova o takala lwa miṅwaha minzhi
Muṅwe wahashu ane a pfi Jesús we a vha a tshi dzula ngei Mexico o ri: “Ndo vha ndi phuli ya mushumo wanga, nga zwiṅwe zwifhinga ndi tshi shuma awara dzo engedzeaho naho zwo vha zwi si khombe-khombe. Ndo zwi ita u itela u hola tshelede yo engedzeaho. Nga murahu nda guda nga ha Yehova na nga nḓila ye a ṋeela ngayo Murwa wawe a tshi itela vhathu. Ndo vha na lutamo luhulwane lwa u mu shumela. Nga zwenezwo, nda ṋekedzela vhutshilo hanga kha Yehova nahone nda dzhia phetho ya u litsha mushumo we nda u shuma lwa miṅwaha ya 28 nda dzhenela tshumelo ya tshifhinga tsho ḓalaho.” Yeneyo ndi nḓila ye Jesús a thoma ngayo u shumela Yehova o takala.
Ri tshila vhutshilo ho kunaho, zwenezwi zwi ita uri ri takale. Naa ni kha ḓi humbula uri vhutshilo haṋu ho vha vhu hani musi ni sa athu u ḓivha Yehova? Muapostola Paulo o humbudza Vhakriste vha ngei Roma uri vho vha vhe “vhalanda vha tshivhi,” fhedzi vho no vha “vhalanda vha u luga.” Ngauri vha vho Vharoma 6:17-22) Na riṋe ri thetshelesa zwilinganyo zwa Yehova, nga zwenezwo, a ri pfiswi vhuṱungu nga masiandoitwa a ḓiswaho nga vhuḓifari vhu si havhuḓi kana u tshila nga nḓila ya dzikhakhathi. Zwenezwo zwi takadza lungafhani!
tshila vhutshilo ho kunaho nahone vha nga lavhelela vhutshilo vhu sa fheli. (“Miṅwaha i takadzaho vhutshiloni hanga yo vha ya musi ndi tshi shumela Yehova.”—Jaime
Ṱhogomelani Jaime we a vha a sa tendi uri Mudzimu u hone nahone a tshi tenda uri zwithu zwo sokou bvelela nahone e ramavili. Jaime o thoma u ya miṱanganoni ya Vhukriste nahone o kwamea nga lufuno lwe a lu vhona. U itela uri Jaime a litshe nḓila ye a vha a tshi tshila ngayo, o vha a tshi fanela u humbela thuso kha Yehova uri a tende khae. Jaime o ri: “Nga zwiṱuku nga zwiṱuku, ndo guda uri Khotsi ane a vha Mudzimu wa khathutshelo u hone. U tshila nga zwilinganyo zwa Yehova zwo lugaho zwo ntsireledza. Arali ndo vha ndi songo shanduka, khamusi ndo vha ndi tshi ḓo vha ndo vhulahwa, u fana na khonani dzanga dza kale dze dza vha dzi vho ramavili. Miṅwaha i takadzaho vhutshiloni hanga yo vha ya musi ndi tshi shumela Yehova.”
NI SONGO LAṰELA THAULA!
Ri fanela u ḓipfa hani musi ro lindela vhufhelo ha ḽino shango ḽivhi? Humbulani uri ri khou ita zwine Mudzimu a zwi funa nahone ri khou lavhelela u wana vhutshilo vhu sa fheli. “Nga zwenezwo, ri songo litsha u ita zwo lugaho, ngauri nga tshifhinga tsho teaho ri ḓo kaṋa arali ri sa neti.” (Vhagalata 6:8, 9) Nga thuso ya Yehova, kha ri konḓelele, u shuma nga nungo dzoṱhe uri ri ṱahulele pfaneleo dzine ra dzi ṱoḓa u itela u ponyoka “maṱunguni mahulu” na u bvela phanḓa ri tshi shumela Yehova ro takala.—Nzumbululo 7:9, 13, 14; Yakobo 1:2-4.
Ri nga vha na fulufhelo ḽa uri Yehova u ḓo lambedza u konḓelela hashu ngauri u a ḓivha mushumo une ra khou u ita na nḓila ine ra mu funa ngayo na dzina ḽawe. Arali ra bvela phanḓa ri tshi mu shumela ro takala, ri ḓo fana na mupsalme Davida we a ri: “Ndo dzula ndó lavhelesa Yehova; u ima na nṋe uri ndi si dzinginyee. Ndi zwiné mbilu yanga ya zwi takalela, ndi zwiné muya wanga wa fhululedza; na ṋama yanga i ḓo awela yó fulufhela.”—Psalme ya 16:8, 9.