NGA ḽa 26 March 1937, vhanna vhavhili vha vhonalaho vho neta vho vha vha tshi khou reila ṱiraka yo ḓalaho buse vho livha ngei Sydney, Australia. Ho vha ho no fhela ṅwaha vho bva kha yeneyo ḓorobo vha tshi khou ya fhethu hu re kule kha ḽeneḽo shango, vho tshimbila khilomithara dzi fhiraho 19 300 vha tshi khou pfuka mahayani na fhethu hu sa tshimbilei. Vhenevho vhanna vho vha vhe si vhaendelamashango. Arthur Willis na Bill Newlands vho vha vhe vhavulanḓila vha fhiseaho nahone vho vha vho ḓiimisela u huwelela mafhungo maḓifha a Muvhuso wa Mudzimu fhethu hune ha vha kule na ḓorobo ngei Australia.

U swika mafheleloni a vho-1920, tshigwada tshiṱuku tsha Vhagudi vha Bivhili * tsha ngei Australia tsho huwelela ḓoroboni dzi re tsini na lwanzhe. Ho vha hu na vhadzulapo vhane vha dzula fhethu ho omaho hu re kule na ḓorobo, tshipiḓa tsha henefho fhethu tsho vha tshi tshi fhira hafu ya shango ḽa United States. Naho zwo ralo, vhahashu vho vha vha tshi zwi ḓivha uri vhatevheli vha Yesu vho vha vha tshi fanela u ṱanziela nga hae “u swika tshipiḓani tsha kule vhukuma tsha ḽifhasi” u katela na fhethu hu re kule na ḓorobo ngei Australia. (Mish. 1:8) Fhedzi vho vha vha tshi nga kona hani u khunyeledza wonoyo mushumo muhulwane? Vho vha vho ḓiimisela u ita zwoṱhe zwine vha nga kona ngauri vho vha vhe na lutendo lwo khwaṱhaho lwa uri Yehova u ḓo fhaṱutshedza vhuḓidini havho.

Nga 1929, zwivhidzo zwa ngei Queensland na Vhukovhela ha Australia zwo ḓiitela goloi dza veni uri zwi kone u ya mashangoni a re kule. Dzenedzo goloi dzo vha dzi tshi reilwa nga vhavulanḓila vha re na maanḓa vhe vha vha vha tshi kona u imelana na zwiimo zwi konḓaho na u dzi lugisa musi dzi tshi tshinyala. Vhenevho vhavulanḓila vho ya fhethu hunzhi hu sa athu u ṱanzielwaho.

Vhavulanḓila vhe vha vha vhe si na goloi, vho shumisa baisigira u ya fhethu hu re kule. Sa tsumbo, nga 1932, Bennett Brickell we a vha e na miṅwaha ya 23 o bva ngei Rockhampton, Queensland a ya u huwelela devhula ha ḽeneḽo shango lwa miṅwedzi miṱanu. Kha baisigira yawe, o vha a tshi hwala nguvho, zwiambaro, zwiḽiwa na bugu nnzhi. Musi thaela ḽa baisigira yawe ḽi tshi xa, o bvela phanḓa na lwendo e na vhungoho ha uri Yehova u ḓo mu livhisa. O tshimbila  khilomithara dza 320 nga yeneyo baisigira a fhira fhethu he vhathu vhanzhi vha lovha nga nṱhani ha ḓora. Lwa miṅwaha i fhiraho 30, Wahashu Brickell o tshimbila khilomithara nnzhi u mona na Australia nga baisigira, nga thuthuthu na nga goloi. O huwelela kha vhadzulapo vha henefho nahone a thusa uri hu thomiwe zwivhidzo, o vha a tshi ḓivhea vhukuma na u ṱhonifhiwa fhethu hoṱhe.

Australia hu na vhadzulapo vhaṱuku u fhira mashangoni oṱhe, zwihuluhulu fhethu hu re kule na ḓorobo. Nga zwenezwo, vhathu vha Yehova vho ita vhuḓidini ha u huwelela kha vhathu vhane vha dzula kule na ḓorobo.

Stuart Keltie na William Torrington vhane vha vha vhavulanḓila vho sumbedza honoho u ḓiimisela. Nga 1933, vho pfuka Sogani ḽa ngei Simpson ho ḓalaho muṱavha u itela u huwelela ngei Alice Springs hune ha vha vhukati ha Australia. Musi goloi yavho i tshi tshinyala vho vha vha tshi fanela u i sia henefho, Wahashu Keltie—we a vha e na mulenzhe wa bulannga—o bvela phanḓa na mushumo wa u huwelela a tshi shumisa gamela! Vhuḓidini ha vhavulanḓila ho vha vhu bvelelaho musi vha tshi ṱangana na mulanguli wa hodela ya ngei William Creek vhuimazwidimela. Mulanguli wa hodela ane a pfi Charles Bernhardt o ṱanganedza ngoho, a rengisa hodela yawe nahone a vula nḓila lwa miṅwaha ya 15 fhethu ho omaho na hu re kule na ḓorobo ya Australia.

Vhavulanḓila vha u thoma vho vha vha tshi fanela u konḓelela na u vha na tshivhindi u itela u kunda thaidza nnzhi dze vha sedzana nadzo. Musi vhe kha fulo ḽavho ḽa u huwelela fhethu hu re kule na ḓorobo ya Australia, Arthur Willis na Bill Newlands vhe vha bulwa mathomoni, lwendo lwavho lwo vha lu konḓaho vhukuma nga nṱhani ha uri vho tshimbila khilomithara dza 32 vhege mbili ngauri mvula yo na vhukuma nahone zwo ita uri hu vhe na matope. Nga zwiṅwe zwifhinga, vho vha vha tshi tshimbila ḽi tshi khou gotsha ḓula, zwi tshi vha konḓela u gonya zwikwara nga ṱiraka nahone vho vha vha tshi tshimbila fhethu hu re na matombo na muṱavha. Musi ṱiraka ḽavho ḽi tshi tshinyala samusi zwo vha zwi tshi anzela u itea, vho vha vha tshi ya ḓoroboni i re tsini nga milenzhe kana nga baisigira lwa maḓuvha nahone musi vha tshi swika, vho vha vha tshi lindela dzivhege dzi si gathi u swika vha tshi wana kutsimbi kwa u lugisa goloi. Hu sa londwi honoho vhuimo vhu konḓaho, vho dzula vhe na mavhonele avhuḓi. Arthur Willis o amba maipfi a ṱoḓaho u fana na e a vhuya a ṅwalwa kha magazini ya The Golden Age, a ri: “A huna nḓila i sa tshimbilei kana ndapfu vhukuma kha mushumo Wawe wa u ṱanziela.”

Charles Harris we a vula nḓila lwa miṅwaha minzhi, o ṱalutshedza uri u shuma fhethu hune ha vha kule na u sedzana na milingo zwo mu sendedza tsini na Yehova. O ri: “U vha na zwithu zwi si gathi zwi leludza vhutshilo. Arali Yesu o ḓiimisela u eḓela nnḓa musi zwi tshi ṱoḓea, na riṋe ri fanela u takala musi ri tshi ita nga u ralo arali mushumo washu u tshi ri tendela.” Nahone zwenezwo zwo itwa nga vhavulanḓila vhanzhi. Ri livhuha vhuḓidini he vha vhu ita, mafhungo maḓifha o phaḓalala fhethu hoṱhe nahone vho thusa vhathu vhanzhi uri vha vhe vhashumeli vha Mudzimu.