1, 2. Musi Yesu o no humela ṱaḓulu, vhaapostola vha nga vha vho ḓivhudzisa mini?

VHAAPOSTOLA vha Yesu vho vha vho ima kha Thavha ya Miṱwari, vho lavhelesa nṱha. Vho vha vha kha ḓi tou bva u vhona Yesu ane a vha muṋe na khonani yavho a tshi khou takuselwa nṱha nahone a tsirwa nga gole. (Mish. 1:9, 10) Lwa miṅwaha mivhili, Yesu o vha funza, u vha ṱuṱuwedza na u vha livhisa. Zwino o vha a si tsheeho. Vho vha vha tshi ḓo ita mini?

² Yesu o vha o ṋea vhatevheli vhawe ndaela ine ya ri: “Ni ḓo vha ṱhanzi dzanga Yerusalema na kha ḽoṱhe ḽa Yudea na ḽa Samaria, u swika tshipiḓani tsha kule vhukuma tsha ḽifhasi.” (Mish. 1:8) Vho vha vha tshi ḓo ita hani wonoyo mushumo? Yesu o vha o vha khwaṱhisedza uri hu si kale vha ḓo wana muya mukhethwa. (Mish. 1:5) Zwiṅwe hafhu, wonoyo mushumo wo vha u tshi ṱoḓa muthu ane a ḓo u livhisa na u u dzudzanya. Yehova o shumisa muimeli wawe a sa vhonali u itela u livhisa na u dzudzanya vhathu vhawe vha tshifhingani tsho fhiraho. Zwiṅwe hafhu, vhaapostola vha nga vha vho ḓivhudzisa uri, ‘Naa Yehova u ḓo khetha muṅwe murangaphanḓa muswa?’

3. (a) Musi Yesu o no humela ṱaḓulu, ndi phetho ifhio ya ndeme ye vhaapostola vha fulufhedzeaho vha i dzhia? (b) Ri ḓo haseledza mini kha ino thero?

 ³ Musi hu sa athu u fhela vhege mbili Yesu o no fa, vhaapostola vha Yesu vho vhala Maṅwalo, u humbela Mudzimu uri a vha livhise nga thabelo nahone vho khetha Mathia uri a dzhene vhuimoni ha Yudasi Iskariote sa muapostola wa vhu-12. (Mish. 1:15-26) Ndi ngani zwenezwi zwo vha zwi zwa ndeme khavho na kha Yehova? Vhafunziwa vho ṱhogomela uri ndi zwa ndeme uri vha vhe vhaapostola vha 12. * Yesu ho ngo khetha vhaapostola uri vha mu fhelekedze vhuḓinḓani hawe, fhedzi o vha gudisa u ita mushumo wa ndeme kha vhathu vha Mudzimu. Wo vha u ufhio wonoyo mushumo nahone Yehova o shumisa hani Yesu uri vha kone u ita wonoyo mushumo? Ndi mushumo ufhio u fanaho na une wa khou itwa nga vhathu vha Mudzimu ṋamusi? Ri nga “[humbula] vhane vha ranga phanḓa” vhukati hashu nga nḓila-ḓe, zwihuluhulu “mulanda a fulufhedzeaho na wa vhuṱali”?—Vhaheb. 13:7; Mat. 24:45.

4. Ndi mushumo ufhio we wa itwa nga vhaapostola na vhaṅwe vhahulwane ḓanani ḽa u thoma ḽa miṅwaha ngei Yerusalema?

⁴ Nga Pentekoste ya 33 C.E., vhaapostola vho thoma u ranga phanḓa tshivhidzo tsha Vhukriste. Kha tshenetsho tshiitea, “Petro [o] takuwa e na vhaapostola vha fumi-nthihi” nahone a funza tshigwada tshihulwane tsha Vhayuda na vhaṅwe ngoho i tshidzaho. (Mish. 2:14, 15) Vhunzhi ha vhenevho vhathu vho vha vhatendi. Nga murahu, vhenevho Vhakriste vhaswa vho “bvela phanḓa vha tshi ḓiṋekedzela pfunzo ya vhaapostola.” (Mish. 2:42) Vhaapostola vho vha vha tshi langa masheleni a tshivhidzo. (Mish. 4:34, 35) Vho funza vhathu vha Mudzimu nahone vha vha rabelela vha ri: “Ri ḓo ḓikumedza kha u rabela na kha u funza ipfi ḽa Mudzimu.” (Mish. 6:4) Nahone vho dovha vha ruma Vhakriste vha re na tshenzhelo u huwelela huṅwe fhethu. (Mish. 8:14, 15) Nga u ya ha tshifhinga, vhaṅwe vhaḓodzwa vhe vha vha vhe vhahulwane vha tshivhidzo vho shuma na vhaapostola kha u ranga phanḓa tshivhidzo. Sa tshigwada tshi langaho, vho ṋea vhulivhisi zwivhidzo zwoṱhe.—Mish. 15:2.

5, 6. (a) Muya mukhethwa wo thusa hani tshigwada tshi langaho? (Sedzani tshifanyiso tsha u thoma.) (b) Vharuṅwa vho tikedza hani tshigwada tshi langaho? (c) Bivhili yo livhisa hani tshigwada tshi langaho?

⁵ Vhakriste vha ḓanani ḽa u thoma ḽa miṅwaha, vho vha vha tshi zwi ḓivha uri tshigwada tshi langaho tshi khou livhiswa nga Yehova Mudzimu a tshi shumisa Murangaphanḓa wavho Yesu. Vho vha vha tshi zwi ḓivha hani zwenezwo? Tsha u thoma, tshigwada tshi langaho tsho thuswa nga muya mukhethwa. (Yoh. 16:13) Vhakriste vhoṱhe vho ḓodzwaho vho wana muya mukhethwa, zwihuluhulu wo thusa vhaapostola na vhaṅwe vhahulwane vha Yerusalema uri vha ite mushumo wavho sa vhalavhelesi. Sa tsumbo, nga 49 C.E., muya mukhethwa wo livhisa tshigwada tshi langaho u dzhia phetho malugana na u fumba. Zwivhidzo zwo tevhela honoho vhulivhisi nahone zwa “bvela phanḓa zwi tshi khwaṱhiswa lutendoni na u engedzea ḓuvha ḽiṅwe na ḽiṅwe.” (Mish. 16:4, 5) Luṅwalo lu ambaho nga ha u fumba lwe lwa ya zwivhidzoni, lwo sumbedza uri tshigwada tshi langaho tsho vha tshi tshi khou livhiswa nga muya mukhethwa nahone tsho sumbedza pfaneleo dzi ngaho lufuno na lutendo.—Mish. 15:11, 25-29; Vhagal. 5:22, 23.

⁶ Tsha vhuvhili, tshigwada tshi langaho tsho tikedzwa nga vharuṅwa. Musi a sa athu u lovhedzwa, Koronelio wa Vhannḓa a songo fumbaho o rumiwa nga muruṅwa uri a ye u ṱoḓa  muapostola Petro. Musi Petro o no huwelela kha Koronelio na mashaka awe, vho ḓodzwa nga muya mukhethwa naho vha vhanna vho vha vha songo fumba. Zwenezwi zwo ṱuṱuwedza vhaapostola na vhaṅwe vhahashu u ita zwine Mudzimu a zwi funa nahone vho ṱanganedza Vhannḓa vha songo fumbaho tshivhidzoni tsha Vhukriste. (Mish. 11:13-18) Zwiṅwe hafhu, vharuṅwa vho tikedza nahone vha ita uri mushumo we wa vha u tshi khou langwa nga tshigwada tshi langaho u bvele phanḓa. (Mish. 5:19, 20) Tsha vhuraru, tshigwada tshi langaho tsho livhiswa nga Ipfi ḽa Mudzimu. Tshigwada tshi langaho tsho livhiswa nga Maṅwalo u itela uri tshi kone u dzhia phetho nga ha pfunzo dza Vhukriste dzi re Bivhilini kana u livhisa tshivhidzo.—Mish. 1:20-22; 15:15-20.

7. Ndi ngani ri tshi nga amba uri Yesu o ranga phanḓa Vhakriste vha tshifhingani tsha kale?

⁷ Naho tshenetsho tshigwada tshi langaho tsho vha tshi na maanḓa zwivhidzoni, vho vha vha tshi pfesesa uri Murangaphanḓa wavho ndi Yesu. Muapostola Paulo o ṅwala uri: “[Kristo] o ṋea vhaṅwe uri vha vhe vhaapostola.” O dovha a ṅwala uri: “Kha ri alutshele kha Kristo nga lufuno, ane a vha ṱhoho kha zwithu zwoṱhe.” (Vhaef. 4:11, 15) Nṱhani ha u ḓiira madzina a vhaapostola, “vhafunziwa [vho] thoma u vhidzwa Vhakriste nga fhasi ha vhulivhisi ha Mudzimu.” (Mish. 11:26) Vhukuma, Paulo o vha a tshi ḓivha ndeme ya u “tevhedza zwenezwo zwithu” kana u tevhedza pfunzo dzo thewaho Maṅwaloni dze dza ṋewa nga vhaapostola na vhaṅwe vhanna vhe vha vha vha tshi khou ranga phanḓa. O dovha a ri: “Fhedzi ndi ṱoḓa ni tshi ḓivha uri ṱhoho ya munna muṅwe na muṅwe [u katela muraḓo muṅwe na muṅwe wa tshigwada tshi langaho] ndi Kristo; . . . na uri ṱhoho ya Kristo ndi Mudzimu.” (1 Vhakor. 11:2, 3) Vhukuma, Yehova Mudzimu ane a vha ṱhoho ya Yesu Kristo o mu khetha uri a range phanḓa tshivhidzo.

8, 9. Mathomoni a ḓana ḽa vhu-19 ḽa miṅwaha, ndi mushumo ufhio wa ndeme we wa itwa nga Wahashu Russell?

⁸ Mafheloni a ḓana ḽa vhu-19 ḽa miṅwaha, Charles Taze Russell na dziṅwe khonani dzawe vho ita vhuḓidini ha u vusulusa vhurabeli ha Vhukriste. Vho thusa u phaḓaladza ngoho i re Bivhilini nga nyambo dzo fhamba-fhambanaho, Zion’s Watch Tower Tract Society yo thoma u vha mulayoni nga 1884 nahone Wahashu Russell o vha e muphuresidennde wayo. * O vha e mugudi wavhuḓi wa Bivhili nahone nga tshivhindi o bvukulula pfunzo dza mazwifhi dzi ngaho Vhuraruthihi na u sa fa ha muya. O guda uri u vhuya ha Kristo hu nga si vhonale nahone “zwifhinga zwo vhewaho zwa dzitshaka” zwi ḓo fhela nga 1914. (Luka 21:24) Wahashu Russell o ṋekedzela tshifhinga tshawe, nungo na tshelede u itela u gudisa vhaṅwe ngoho. Vhukuma, nga tshenetsho tshifhinga tsha ndeme, Yehova na Yesu ane a vha ṱhoho ya tshivhidzo vho shumisa Wahashu Russell.

⁹ Wahashu Russell o vha a sa ṱoḓi u huliswa nga vhathu. Nga 1896, o ṅwala uri: “A ri ṱoḓi u ṱhonifhiwa, u huliswa kana u hulisa zwe ra zwi ṅwala; nahone a ri tami u vhidzwa Mufunzi kana Rabi. Nahone a ri tami uri hu vhe na muthu ane a vhidzwa nga dzina ḽashu.” O dovha a ri: “Hoyu a si mushumo wa vhathu.”

10. (a) Yesu o khetha lini “mulanda a fulufhedzeaho na wa vhuṱali”? (b) Ṱalutshedzani uri zwo vha hani khagala uri Tshigwada tshi Langaho tsho fhambana na Watch Tower Society.

¹⁰ Nga 1919, ho no fhela miṅwaha miraru Wahashu Russell o no fa, Yesu o khetha “mulanda a fulufhedzeaho na wa vhuṱali.” Ndi ngani o ita nga u ralo? U itela uri vha ṋee vha nnḓu yawe “zwiḽiwa . . . nga tshifhinga tsho teaho.” (Mat. 24:45) Kha yeneyo miṅwaha yoṱhe, tshigwada tshiṱuku tsha vhahashu vho  ḓodzwaho vhe vha vha vha tshi shuma ofisini khulwane ya shango ḽoṱhe ngei Brooklyn, New York, vho lugisa nahone vha ṋea vhatevheli vha Yesu zwiḽiwa zwa lwa muya. Mubulo une wa ri “tshigwada tshi langaho” wo thoma u vhonala kha dzikhandiso nga vho-1940 musi u tshi vho pfeseswa uri u tshimbidzana na Watch Tower Bible and Tract Society. Naho zwo ralo, nga 1971 zwo vha khagala uri hu na phambano vhukati ha Tshigwada tshi Langaho na Watch Tower Society—ine ya hwala vhuḓifhinduleli ha zwa mulayo hu si zwithu zwa lwa muya—na vhalanguli vhayo. Naho zwo ralo, Tshigwada tshi Langaho tshi katela vhahashu vho ḓodzwaho vhane vha si vhe vhalanguli vha Ndangulo. Miṅwahani ya zwenezwino, vhahashu vha “dziṅwe nngu” vhane vha hwala vhuḓifhinduleli, vho shuma sa vhalanguli vha zwa mulayo Ndanguloni na miṅwe mihasho ine ya shumiswa nga vhathu vha Mudzimu. Zwenezwo zwo ita uri Tshigwada tshi Langaho tshi livhise ṱhogomelo kha u funza zwithu zwa lwa muya na u livhisa. (Yoh. 10:16; Mish. 6:4) Thero ya Tshiingamo tsha ḽa 15 July 2013, yo amba uri “mulanda a fulufhedzeaho na wa vhuṱali” ndi tshigwada tshiṱuku tsha vhahashu vho ḓodzwaho vhane vha vhumba Tshigwada tshi Langaho.

11. Tshigwada tshi Langaho tshi shuma hani?

¹¹ Tshigwada tshi Langaho tshi dzhia phetho sa tshigwada. Nga nḓila-ḓe? Miraḓo ya Tshigwada tshi Langaho i ṱangana vhege iṅwe na iṅwe nahone zwenezwo zwi ita uri vha dzule vha tshi davhidzana na u vha na vhuthihi. (Mir. 20:18) Ṅwaha muṅwe na muṅwe, hu khethwa mudzulatshidulo muswa ane a ḓo fara muṱangano, ngauri a huna muraḓo wa Tshigwada tshi Langaho ane a dzhiiwa e wa ndeme u fhira muṅwe. (1 Pet. 5:1) Na kha muraḓo muṅwe na muṅwe wa komiti dza rathi dza Tshigwada tshi Langaho, hu khethwa mudzulatshidulo muswa ane a ḓo fara muṱangano. Nahone muraḓo muṅwe na muṅwe wa tshenetsho tshigwada a u ḓidzhii sa murangaphanḓa wa vhahashu, fhedzi u ḓidzhia sa muṅwe wa “vha nnḓu” ane a ṋewa zwiḽiwa nga mulanda a fulufhedzeaho na u livhiswa nga Yesu.

12. Samusi Tshigwada tshi Langaho tshi songo hevhedzwa nahone tshi songo fhelela, hu takuwa mbudziso dzifhio?

¹² Tshigwada tshi Langaho a tsho ngo hevhedzwa nahone a tsho ngo fhelela. Nga zwenezwo, tshi nga ita vhukhakhi musi tshi tshi ṱalutshedza Bivhili kana u livhisa ndangulo. Sa tsumbo, Watch Tower Publications Index i na tshiṱoho tshine tsha ri “Beliefs Clarified” ine ya vha na mutevhe wa tshanduko ya nḓila ye ra vha ri tshi pfesesa ngayo Maṅwalo u bva nga vho-1870. Vhukuma, Yesu ho ngo amba uri mulanda a fulufhedzeaho u ḓo ri ṋea zwiḽiwa zwa muya zwo fhelelaho. Nga zwenezwo, ri nga fhindula hani mbudziso ya Yesu ine ya ri: “Ndi nnyi ane zwa vhukuma a vha mulanda a fulufhedzeaho na wa vhuṱali?” (Mat. 24:45) Ndi mini zwine zwa sumbedza uri Tshigwada tshi Langaho tshi khou ita wonoyo mushumo? Kha ri ṱolisise zwithu zwiraru zwe zwa livhisa tshigwada tshi langaho tsha ḓanani ḽa u thoma ḽa miṅwaha.

13. Muya mukhethwa wo thusa hani Tshigwada tshi Langaho?

¹³ U thuswa nga muya mukhethwa. Muya mukhethwa wo thusa Tshigwada tshi Langaho u pfesesa ngoho i re Bivhilini ye ya vha i sa pfeseswi mathomoni. Sa tsumbo, humbulani nga ha mutevhe wa “Beliefs Clarified” we ha ambiwa nga hawo kha phara yo fhiraho. Vhukuma, a huna muthu ane a nga kona u dzumbulula na u ṱalutshedza “zwiphiri zwo dzikaho zwa Mudzimu”! (Vhalani 1 Vhakorinta 2:10.) Tshigwada tshi Langaho tshi ḓipfa nga nḓila i fanaho na ya muapostola Paulo we a ṅwala uri: “A ri ambi zwenezwi zwithu nga maipfi o funzwaho nga vhuṱali ha muthu, fhedzi ri  amba nga maipfi o funzwaho nga muya.” (1 Vhakor. 2:13) Naho ho vha na vhagunei na pfunzo dza mazwifhi lwa miṅwaha minzhi, u bva nga 1919 a huna we a kona u ri thusa u pfesesa nga ho engedzeaho zwithu zwa lwa muya nga nnḓa ha u thuswa nga muya mukhethwa.

14. U ya nga Nzumbululo 14:6, 7, vharuṅwa vha tikedza hani vhathu vha Mudzimu ṋamusi?

¹⁴ U tikedzwa nga vharuṅwa. Tshigwada tshi Langaho ṋamusi tshi na mushumo munzhi wa u livhisa vhahuweleli vha fhiraho milioni dza malo kha mushumo wa u huwelela shangoni ḽoṱhe. Ndi ngani wonoyo mushumo wo vha u bvelelaho? Ndi ngauri ri khou thuswa nga vharuṅwa. (Vhalani Nzumbululo 14:6, 7.) Kha zwiitea zwinzhi, vhahuweleli vho ya kha muthu we a vha tshi kha ḓi tou bva u humbela thuso nga thabelo! * Mushumo wa u huwelela na u ita vhafunziwa u khou bvela phanḓa u tshi engedzea nga thuso ya vharuṅwa naho kha maṅwe mashango vhahuweleli vha tshi tovholwa.

15. Ndi ifhio phambano ine ya vha hone vhukati ha Tshigwada tshi Langaho na vharangaphanḓa vha vhurereli? Ṋeani tsumbo.

¹⁵ U livhiswa nga Ipfi ḽa Mudzimu. (Vhalani Yohane 17:17.) Ṱhogomelani zwe zwa itea nga 1973. Thero ya Tshiingamo tsha ḽa 1 June (nga Luisimane) yo vhudzisa uri: “Naa . . . vhathu vha songo litshaho dzema ḽa u daha fola vha a fanelea uri vha lovhedzwe?” Yo fhindula ya ri: “Maṅwalo a sumbedza uri a vha fanelei.” Tshiingamo tsho  redza maṅwalo a si gathi a tshimbidzanaho na eneo mafhungo nahone tsho dovha tsha ṱalutshedza zwiitisi zwi itaho uri muthu a sa litshi u daha a bviswe tshivhidzoni. (1 Vhakor. 5:7; 2 Vhakor. 7:1) Tsho amba uri: “Zwenezwi zwithu zwo vha zwi sa bvi kha muthu kana hu milayo ya muthu. Fhedzi zwo vha zwi tshi bva kha Mudzimu ane a ḓiṱalusa a tshi shumisa Ipfi ḽawe.” Naa hu na vhurereli ho ḓiimiselaho u ḓitika tshoṱhe nga Ipfi ḽa Mudzimu naho u ita nga u ralo zwi tshi ḓo konḓela miraḓo ya vhurereli? Bugu ya ngei United States ya musalauno i ambaho nga ha vhurereli, yo ri: “Tshifhinga tshoṱhe, vharangaphanḓa vha vhurereli vha vusulusa pfunzo dzavho u itela uri dzi tshimbidzane na zwine vha zwi tenda na mahumbulele avho u itela uri vha tikedzwe nga miraḓo ya vhurereli havho na vhathu vhoṱhe.” Arali Tshigwada tshi Langaho tshi tshi tenda u livhiswa nga Ipfi ḽa Mudzimu nṱhani ha u livhiswa nga mavhonele a vhathu musi tshi tshi dzhia phetho, ndi nnyi zwa vhukuma ane a khou ranga phanḓa vhathu vha Mudzimu ṋamusi?

16. Ndi ifhio iṅwe nḓila ine ra nga humbula ngayo Tshigwada tshi Langaho?

¹⁶ Vhalani Vhaheberu 13:7. Bivhili i amba uri ri “humbule vhane vha ranga phanḓa.” Iṅwe nḓila ine ra nga zwi ita ngayo ndi u bula Tshigwada tshi Langaho kha thabelo dzashu. (Vhaef. 6:18) Musi ni tshi khou rabela, ambani nga ha vhuḓifhinduleli vhune vha vha naho ha u ri ṋea zwiḽiwa zwa lwa muya, u livhisa mushumo wa u huwelela wa shango ḽoṱhe na u ṱhogomela miṋeelo. Vhukuma, vha a ṱoḓa ri tshi vha rabelela tshifhinga tshoṱhe!

17, 18. (a) Ri tevhela hani vhulivhisi ha Tshigwada tshi Langaho? (b) Mushumo washu wa u huwelela u tikedza hani mulanda a fulufhedzeaho na Yesu?

¹⁷ U humbula Tshigwada tshi Langaho a zwi kateli maipfi fhedzi, fhedzi zwi ṱoḓa uri ri thetshelese vhulivhisi havho. Tshigwada tshi Langaho tshi ri ṋea vhulivhisi tshi tshi shumisa khandiso dzashu na miṱangano yashu, maguvhangano na mabuthano. Zwiṅwe hafhu, tshi khetha vhalavhelesi vha ḽiisela vhane vha khetha vhahulwane vha tshivhidzo. Vhalavhelesi vha ḽiisela na vhahulwane vha tshivhidzo vha humbula Tshigwada tshi Langaho nga u tevhela nga vhuronwane vhulivhisi vhune vha ṋewa. Roṱhe ri ṱhonifha Murangaphanḓa washu Yesu nga u thetshelesa na u ṱhonifha vhanna vhane a khou vha shumisa u ri livhisa.—Vhaheb. 13:17.

¹⁸ Iṅwe nḓila ine ra humbula ngayo Tshigwada tshi Langaho ndi nga u ita zwoṱhe zwine ra nga kona kha mushumo wa u huwelela. Naho zwo ralo, Paulo o ṱuṱuwedza Vhakriste uri vha edzise lutendo lwa vhane vha khou ranga phanḓa vhukati havho. Mulanda a fulufhedzeaho o sumbedza lutendo nga u tikedza na u phaḓaladza mafhungo maḓifha a Muvhuso nga u fhisea. Naa ni muṅwe wa vha dziṅwe nngu vhane vha khou tikedza vhaḓodzwa kha u ita wonoyu mushumo wa ndeme? Ni ḓo takala vhukuma musi Murangaphanḓa waṋu Yesu a tshi ri: “Zwe na ita muthihi wa vhenevha vhahashu vhaṱuku-ṱuku, no zwi ita kha nṋe.”—Mat. 25:34-40.

19. Ndi ngani no ḓiimisela u tevhela Murangaphanḓa washu Yesu?

¹⁹ Musi Yesu a tshi humela ṱaḓulu, ho ngo laṱedza vhatevheli vhawe. (Mat. 28:20) O vha a tshi ḓivha nḓila ye muya mukhethwa, vharuṅwa na Ipfi ḽa Mudzimu zwa mu thusa ngayo u ranga phanḓa musi a tshee kha ḽifhasi. Nga zwenezwo, u khou thusa mulanda a fulufhedzeaho ṋamusi nga nḓila i fanaho. Tshigwada tshi Langaho tshi dzula tshi tshi “tevhela Ngwana huṅwe na huṅwe hune ya ya hone.” (Nzumb. 14:4) Musi ri tshi tevhela vhulivhisi havho, ri vha ri tshi khou tevhela Murangaphanḓa washu Yesu. Hu si kale, u ḓo ri livhisa vhutshiloni vhu sa fheli. (Nzumb. 7:14-17) Nahone a huna muthu na muthihi ane a nga fulufhedzisa zwenezwo!