1, 2. (a) Yehova o ri dzumbululela mini? (b) Ndi khwaṱhisedzo ifhio ine ra i wana kha Yesaya 46:10, 11 na 55:11?

MAIPFI a u thoma Bivhilini a ri: “U rangani Mudzimu o sika ḽiṱaḓulu na ḽifhasi.” (Gen. 1:1) Ndi ngoho uri ri kona u pfesesa zwithu zwi si gathi fhedzi zwe Mudzimu a zwi sika, zwithu zwi ngaho tshikhala, tshedza na maanḓa a u kokodzela zwithu fhasi naho ri sa athu u vhona zwipiḓa zwoṱhe zwa fhethu hoṱhe. (Muh. 3:11) Naho zwo ralo, Yehova o ri dzumbululela ndivho yawe nga ha ḽifhasi na vhathu. Ndivho ya Mudzimu yo vha i ya uri vhanna na vhafumakadzi vha dzule kha ḽifhasi. (Gen. 1:26) Vho vha vha tshi ḓo vha vhana vhawe nahone Yehova o vha a tshi ḓo vha Khotsi avho.

² Samusi zwo ṱalutshedzwa kha Genesi ndima ya vhuraru, ndivho ya Yehova yo itelwa khaedu. (Gen. 3:1-7) Naho zwo ralo, a huna thaidzo ine Mudzimu a nga kundelwa u i tandulula. A huna ane a nga ima phanḓa ha Yehova. (Yes. 46:10, 11; 55:11) Nga zwenezwo, ri na vhungoho ha uri ndivho ya Yehova ya mathomoni i ḓo ḓadzea nga tshifhinga tsho teaho!

3. (a) Ndi ngoho ifhio ya ndeme ine ya ri thusa u pfesesa Bivhili? (b) Ndi ngani ri tshi khou guda nga ha zwenezwi zwino? (c) Ndi mbudziso dzifhio dzine ra ḓo dzi haseledza?

³ A zwi timatimisi uri ri a ḓivha ngoho i re Bivhilini nga ha ndivho ya Mudzimu nga ḽifhasi na vhathu na nga mushumo une Yesu Kristo a ḓo u ita u itela uri yeneyo ndivho i ḓadzee. Zwenezwo  zwithu ndi zwa ndeme nahone khamusi ho vha hu zwithu zwa u thoma zwe ra zwi guda musi ri tshi thoma u guda Ipfi ḽa Mudzimu. Nahone na riṋe ri ṱoḓa u thusa vhathu uri vha ḓivhe yeneyi ngudo ya ndeme. Zwa zwino samusi ri tshi khou haseledza ino thero sa tshivhidzo, ro ḓiimisela u ramba vhathu vhanzhi nga hune zwa nga konadzea ngaho Tshihumbudzoni tsha lufu lwa Kristo. (Luka 22:19, 20) Vhane vha ḓo vha vhe hone Tshihumbudzoni vha ḓo guda zwinzhi nga ha ndivho ya Mudzimu. Nga zwenezwo, kha enea maḓuvha a si gathi o salaho Tshihumbudzo tshi sa athu u thoma, ndi tshifhinga tsha uri ri humbule nga ha mbudziso dzine ra ḓo dzi shumisa u itela u vusa dzangalelo ḽa vhagudiswa vhashu vha Bivhili na vhaṅwe nga ha tshenetshi tshiitea tsha ndeme. Kha ino thero, ri ḓo haseledza mbudziso tharu: Yo vha i ifhio ndivho ya Mudzimu ya mathomoni nga ha ḽifhasi na vhathu? Ho tshinyala mini? Nahone ndi ngani tshirengululi tsha tshiṱhavhelo tsha Yesu tshi tshone tshine tsha ita uri ndivho ya Mudzimu i ḓadzee?

4. Tsiko i sumbedza hani vhugala ha Yehova?

⁴ Yehova ndi Musiki a mangadzaho vhukuma. Zwoṱhe zwine a zwi sika ndi zwa maṱhakheni. (Gen. 1:31; Yer. 10:12) Ndi mini zwine ra nga zwi guda kha lunako na u dzudzanyea ha tsiko? Musi ri tshi lavhelesa tsiko, ri guda uri zwithu zwoṱhe zwe Yehova a zwi sika u bva kha zwiṱuku na zwihulwane, zwi a vhuyedza. Ndi nnyi ane a si mangadzwe nga nḓila ine tsiki dza muvhili wa muthu dza shuma ngayo, nḓila ine ṅwana ane a kha ḓi tou bva u bebwa a vha ngayo kana lunako lwa ḓuvha ḽi tshi khou kovhela? Ri takalela yeneyi tsiko ngauri Yehova o ri sika ri na vhukoni ha u ḓivha zwithu zwo nakaho.—Vhalani Psalme ya 19:1; 104:24.

5. Yehova o ita hani vhungoho ha uri zwithu zwoṱhe zwe a zwi sika zwi a shumisana?

⁵ Zwoṱhe zwe Yehova a zwi sika zwi na mikano. O ita uri hu vhe na milayo ya tsiko na milayo ya vhuḓifari u itela uri zwoṱhe zwi shumisane. (Ps. 19:7-9) Nga zwenezwo, Mudzimu o vhea zwithu zwoṱhe vhudzuloni hazwo nahone zwi ita mushumo we zwa sikelwa wone. Yehova o vhea mulayo wa nḓila ine zwe a zwi sika zwa fanela u shumisana ngayo. Sa tsumbo, maanḓa a u kokodzela zwithu fhasi a ita uri zwithu zwoṱhe zwi dzule zwi kha ḽifhasi, a langa magabelo na lwanzhe. Hu nga si vhe na vhutshilo kha ḽifhasi arali hu si na maanḓa a u kokodzela zwithu fhasi. Tsiko yoṱhe u katela na vhathu, zwi langwa nga eneo maanḓa a u kokodzela zwithu fhasi. Vhukuma, nḓila ye Mudzimu a sika ngayo zwithu i sumbedza uri u na ndivho nga ha ḽifhasi na vhathu. Musi ri vhuḓinḓani, naa ri nga thusa vhaṅwe uri vha ḓivhe Musiki we a sika zwithu zwoṱhe nga nḓila i mangadzaho?—Nzumb. 4:11.

6, 7. Ndi zwifhio zwiṅwe zwifhiwa zwe Yehova a zwi ṋea Adamu na Eva?

⁶ Ndivho ya Yehova ya u thoma yo vha i ya uri vhathu vha tshile tshoṱhe kha ḽifhasi. (Gen. 1:28; Ps. 37:29) O ṋea Adamu na Eva zwifhiwa zwinzhi zwo khetheaho u itela uri vha takalele vhutshilo. (Vhalani Yakobo 1:17.) Yehova o vha ṋea mbofholowo ya u ḓikhethela, vhukoni ha u humbula, u kona u funa na u ḓiphina nga vhukonani. Musiki o amba na Adamu nahone a mu vhudza nḓila ine a fanela u mu thetshelesa ngayo. Adamu o dovha a guda nḓila ine a fanela u ṱhogomela ngayo zwishaiwa zwawe na nḓila ine a fanela u ṱhogomela ngayo zwipuka na ḽifhasi. (Gen. 2:15-17, 19, 20) Yehova o sika Adamu na Eva vhe na vhukoni ha u thetshela, u kwama, u vhona, u pfa na u nukhedza. Zwenezwo zwo ita uri vha takalele nga vhuḓalo lunako lwa haya havho ha Paradiso. Vhenevho vhavhingani vha u thoma vho vha vhe na  tshibuli tsha u ita mushumo u takadzaho, u guda zwo engedzeaho na u ḓivha zwithu zwiswa u ya nga hu sa fheli.

⁷ Yo vha i ifhio iṅwe ndivho ya Mudzimu? Yehova o sika Adamu na Eva vhe na vhukoni ha u beba vhana vhane vha si vhe na tshivhi. Ndivho ya Mudzimu yo vha i ya uri vhana vhavho vha vhe na vhana u swika vha tshi ḓadza ḽifhasi. Yehova o vha a tshi ṱoḓa uri vhabebi vhoṱhe vha fune vhana vhavho samusi na ene o vha a tshi funa vhana vhawe vha u thoma vhane vha vha Adamu na Eva. Ḽifhasi ḽoṱhe na zwithu zwoṱhe zwi re khaḽo zwo vha zwi tshi ḓo vha haya havho lwa tshoṱhe.—Ps. 115:16.

8. Ndi ngani Mudzimu o ṋea Adamu na Eva mulayo u re kha Genesi 2:16, 17?

⁸ Zwithu a zwo ngo tshimbila nga nḓila ye Mudzimu a vha a tshi ṱoḓa zwi tshi tshimbila ngayo. Ndi ngani? Yehova o ṋea Adamu na Eva mulayo wo leluwaho u itela uri vha ḓivhe uri mbofholowo yavho ya u ḓikhethela i na mikano. O ri: “Miri yoṱhe ya tsimu i ḽe zwau, Hone uḽa muri wa u ṱalukanya vhuḓi na vhuvhi U sóngo u ḽa; ngauri ḓuvha ḽine wa ḓo ḽa wonoyo, U ḓo vha wa u fa.” (Gen. 2:16, 17) Zwo vha zwi sa konḓi uri Adamu na Eva vha pfesese wonoyu mulayo; nahone zwo vha zwi si muhwalo u u thetshelesa. Ho vha hu si na tshiitisi tsha u sa thetshelesa ngauri zwiḽiwa zwo vha zwo wa mpale.

9, 10. (a) Ndi mazwifhi afhio e Sathane a amba nga ha Yehova? (b) Adamu na Eva vho khetha u ita mini? (Sedzani tshifanyiso tsha u thoma.)

⁹ Sathane Diabolo o shumisa ṋowa u fhura Eva uri a si thetshelese Khotsi awe Yehova. (Vhalani Genesi 3:1-5; Nzumb. 12:9) Vhathu vho vha vha songo tendelwa u ḽa “miri yoṱhe ya tsimuni,” fhedzi Sathane o zwi hanedza. Zwo vha zwi tshi tou nga u khou ri: ‘Ni khou ṱoḓa u mmbudza uri a no ngo fanela u ita zwine na funa?’ Nga murahu a mu zwifhela a ri: “A ni nga fi.” O dovha a lingedza u ita uri Eva a si thetshelese Mudzimu, a ri: “Mudzimu a tshi ralo u ḓivha zwauri musi nó ḽa wone, maṱo aṋu a ḓo bonyolowa.” Sathane o amba uri Yehova o vha a sa ṱoḓi uri vha ḽe muri ngauri arali vha ḽa vho vha vha tshi ḓo ṱalifha. Zwiṅwe hafhu, o vha fulufhedzisa mazwifhi a ri: “[Ni] ḓo nga Mudzimu, na ḓo ḓivha vhuḓi na vhuvhi.”

¹⁰ Adamu na Eva vho vha vha tshi fanela u dzhia phetho ya zwine vha ḓo zwi ita. Naa vho vha vha tshi ḓo thetshelesa Yehova kana vho vha vha tshi ḓo thetshelesa ṋowa? Vho khetha u sa thetshelesa Mudzimu. Nga u ita nga u ralo, vho vha mashandukwa u fana na Sathane. Vho landula Yehova sa Khotsi avho nahone vho vha vha si tsha vha nga fhasi ha tsireledzo ya Yehova.—Gen. 3:6-13.

11. Ndi ngani Yehova a songo konḓelela vhuvhi ha Adamu na Eva?

¹¹ U sa thetshelesa ha Adamu na Eva zwo ita uri vha si tsha vha vhathu vho fhelelaho. Zwiṅwe hafhu, u sa thetshelesa havho zwo ita uri vha si tsha vha na vhushaka havhuḓi na Yehova ngauri ‘maṱo awe a ila zwivhi; ha funi u zwi vhona.’ Nga zwenezwo, “ha koni u lavhelesa [vhuvhi].” (Hab. 1:13) Arali o vha o konḓelela zwenezwo, zwivhumbwa zwawe zwoṱhe zwi re ṱaḓulu na kha ḽifhasi, zwo vha zwi nga si thetshelese. Zwihuluhulu arali Mudzimu o vha a songo dzhia vhukando nga tshivhi tshe tsha itwa Edeni, zwivhumbiwa zwawe zwoṱhe zwo vha zwi si tsha ḓo mu fulufhela. Fhedzi Yehova u ita zwe a zwi fulufhedzisa nahone ha zwifhi. (Ps. 119:142) Nga zwenezwo, mbofholowo ya u ḓikhethela ya Adamu na Eva a yo ngo vha ṋea ndugelo ya u nyadza mulayo wa Mudzimu. U nyadza havho Yehova zwo ita uri hu vhe na masiandoitwa a si avhuḓi, vho fa nahone vha vhuyelela mavuni he vha bviswa hone.—Gen. 3:19.

12. Ho itea mini kha vhana vha Adamu?

¹² Musi Adamu na Eva vha tshi ḽa wonoyo  muri, vho ḓivhea kha vhuimo he ha ita uri Mudzimu a si tsha vha ṱanganedza sa tshipiḓa tsha muṱa wawe. Mudzimu o vha pandela Edeni nahone vho vha vha si tsheena fulufhelo ḽa u dovha vha humela. (Gen. 3:23, 24) Musi Yehova a tshi ita nga u ralo, o vha a tshi ṱoḓa uri vha sedzane na masiandoitwa a phetho dzavho dze vha dzi dzhia. (Vhalani Doiteronomio 32:4, 5.) Nga nṱhani ha uri vho vha vha songo tsha fhelela, vho vha vha si tsha kona u edzisa pfaneleo dza Mudzimu nga ho fhelelaho. Adamu ho ngo xelelwa fhedzi nga vhumatshelo hawe havhuḓi, fhedzi o dovha a ita uri vhana vhawe vha si tsha vha vho fhelelaho, vha vhe na tshivhi nahone vha fe. (Vharoma 5:12) Adamu o ita uri vhana vhawe vha xelelwe nga tshibuli tsha u tshila tshoṱhe. Zwiṅwe hafhu, Adamu na Eva a vho ngo kona u vha na vhana vho fhelelaho; na vhana vhavho a vho ngo kona u vha na vhana vho fhelelaho. U bva tshee Sathane Diabolo a ita uri Adamu na Eva vha shandukele Mudzimu, u kha ḓi bvela phanḓa a tshi xedza vhathu na ṋamusi.—Yoh. 8:44.

13. Ndi mini zwine Yehova a zwi ṱoḓela vhathu?

¹³ Mudzimu u kha ḓi funa vhathu. Hu sa londwi vhushandukwa ha Adamu na Eva, Yehova u ṱoḓa vhathu vha tshi vha na vhushaka havhuḓi nae. Ha ṱoḓi muthu naho e ufhio a tshi fa. (2 Pet. 3:9) Nga zwenezwo, musi Adamu na Eva vho no tshinya, Mudzimu o ita ndugiselelo ya uri vhathu vha dovhe vha vhe na vhushaka havhuḓi nae nahone ndivho yawe ya u thoma a yo ngo shanduka. Yehova o zwi ita hani zwenezwo?

14. (a) U ya nga Yohane 3:16, Mudzimu o lugiselela vhathu mini? (b) Ndi mbudziso ifhio ine ra nga i haseledza na vhathu?

¹⁴ Vhalani Yohane 3:16. Vhunzhi ha vhathu vhane ra ḓo vha ramba Tshihumbudzoni vha nga si hangwe yeneyi ndimana. Fhedzi hu takuwa mbudziso ine ya ri, Tshirengululi tsha Yesu tsho ita hani uri zwi konadzee u wana vhutshilo vhu sa fheli? Ri na tshibuli tsha u thusa vhathu u pfesesa phindulo ya yeneyi mbudziso musi ri tshi vha ramba Tshihumbudzoni, musi ri Tshihumbudzoni na musi ri tshi vha dalela nga murahu ha Tshihumbudzo. Musi vhenevho vhathu vha tshi vho pfesesa ndugiselelo ya tshirengululi, vha ḓo ḓivha nga ho engedzeaho nḓila ine Yehova a funa ngayo vhathu na nḓila ye a ṱalifha ngayo. Ndi zwifhio zwiṅwe zwine ra nga vha vhudza nga ha tshirengululi?

15. Yesu o vha o fhambana hani na Adamu?

¹⁵ Yehova o ri ṋea muthu o fhelelaho uri a vhe tshirengululi. Onoyo muthu o fhelelaho o vha a tshi fanela u fulufhedzea kha Yehova na u ḓiimisela u ṋekedzela vhutshilo hawe a tshi itela vhathu. (Vharoma 5:17-19) Yehova o ita uri tshivhumbiwa tshawe tsha u thoma tsha ngei ṱaḓulu tshi ḓe kha ḽifhasi sa muthu. (Yoh. 1:14) Yesu o vha muthu o fhelelaho u fana na nḓila ye Adamu a vha e ngayo. Fhedzi Yesu ho ngo ita zwi fanaho na zwa Adamu, o tshila u tendelana na zwilinganyo zwe Yehova a vha o zwi lavhelela kha muthu o fhelelaho. Naho Yesu o vha a tshi khou lingwa, ho ngo vhuya a ita tshivhi kana u vunḓa milayo ya Mudzimu.

16. Ndi ngani tshirengululi tshi tshifhiwa tsho khetheaho?

¹⁶ Sa muthu o fhelelaho, Yesu o kona u ri tshidza kha tshivhi na lufu musi a tshi ri fela. O ita zwoṱhe zwe Adamu a vha a tshi fanela u zwi ita, o vha muthu o fhelelaho, a fulufhedzea nga ho fhelelaho na u thetshelesa Mudzimu. (1 Tim. 2:6) Tshirengululi tsha Yesu tsho ita uri “vhanzhi” vha wane vhutshilo vhu sa fheli. (Mat. 20:28) Vhukuma, tshirengululi ndi tshone tshine tsha ita uri ndivho ya Mudzimu ya mathomoni i ḓadzee. (2 Vhakor. 1:19, 20) Tshirengululi tshi ṋea vhathu vhoṱhe  vha fulufhedzeaho tshilavhelelwa tsha u tshila tshoṱhe.

17. Tshirengululi tsho ita uri hu konadzee mini?

¹⁷ Yehova o ri lugiselela tshiṱhavhelo tsha thengo khulu. (1 Pet. 1:19) Yehova u funa vhathu vhukuma lwe zwa ita uri a ḓiimisele u ṋekedzela Murwa wawe mubebwa e eṱhe uri a ri fele. (1 Yoh. 4:9, 10) Nga maṅwe maipfi, Yesu o vha khotsi ashu nṱhani ha Adamu. (1 Vhakor. 15:45) Yesu o ita uri ri wane vhutshilo vhu sa fheli; a ri ṋea tshibuli tsha uri mafheleloni ri vhe tshipiḓa tsha muṱa wa Mudzimu. Nga nṱhani ha tshirengululi tsha Yesu, Yehova o kona u ṱanganedza vhathu uri vha dovhe vha vhe tshipiḓa tsha muṱa wawe a sa shanduli milayo yawe. Naa a zwi takadzi u humbula uri hu ḓo vha na tshifhinga tshine vhathu vhoṱhe vha fulufhedzeaho vha ḓo vha vho fhelelaho? Zwivhumbiwa zwoṱhe zwine zwa vha ṱaḓulu na kha ḽifhasi zwi ḓo vha na vhuthihi sa tshipiḓa tsha muṱa wawe. Zwenezwi zwi amba uri roṱhe ri ḓo vha vhana vha Mudzimu.—Vharoma 8:21.  

18. Yehova u ḓo vha “zwithu zwoṱhe kha vhoṱhe” lini?

¹⁸ Vhushandukwa ha Sathane a ho ngo thivhela Yehova u sumbedza nḓila ine a funa ngayo vhathu nahone a ho ngo thivhela vhathu vha songo fhelelaho uri vha fulufhedzee kha Yehova. Nga tshirengululi tsha Yesu, Yehova u ḓo thusa vhana vhawe vhoṱhe uri vha vhe vhathu vho lugaho. Edzani u vhona nga maṱo a muhumbulo uri vhutshilo vhu ḓo vha hani musi vhathu vhoṱhe vhe vha ‘vhona Murwa na u mu tenda’ vha tshi wana vhutshilo vhu sa fheli. (Yoh. 6:40) Nga nṱhani ha uri Yehova u a ri funa nahone o ṱalifha, u ḓo ita uri vhathu vhoṱhe vha dovhe vha vhe vho fhelelaho samusi yo vha i ndivho yawe u bva mathomoni. Khotsi ashu Yehova u ḓo vha “zwithu zwoṱhe kha vhoṱhe.”—1 Vhakor. 15:28.

19. (a) U livhuha hashu tshirengululi zwi fanela u ri sudzulusela uri ri ite mini? (Sedzani bogisi ‘ Kha Ri Dzule Ri Tshi Ṱoḓa Vha Faneleaho.’) (b) Ndi mini zwine ra ḓo zwi haseledza kha thero i tevhelaho?

¹⁹ U livhuha hashu tshiṱhavhelo zwi fanela u ri ṱuṱuwedza uri ri ite zwoṱhe zwine ra nga kona u vhudza vhaṅwe uri na vhone vha nga vhuyelwa nga tshenetshi tshifhiwa tsha ndeme. Vhathu vha fanela u ḓivha uri tshirengululi ndi tshone tshine tsha ita uri Yehova a ṋee vhathu vhoṱhe tshilavhelelwa tsha u tshila tshoṱhe. Zwiṅwe hafhu, tshirengululi tshi dovha tsha ita zwi fhiraho zwenezwi. Thero i tevhelaho i ḓo haseledza nga ha nḓila ine tshirengululi tsha Yesu tsha ḓo tandulula ngayo khaedu ye ya vuswa nga Sathane ngei tsimuni ya Edeni.