VHAFUMAKADZI vhavhili vho vha vha tshi khou tshimbila vhoṱhe ḓoroboni ya Baguio ngei Philippines. Musi vha tshi khou tshimbila, vho vhona tshigariki, fhedzi vha si ye khatsho. Wahashu wa tshifumakadzini ane a pfi Helen we a vha o ima tsini na tshigariki, o vha sedza a ṅwethuwa. Vhenevho vhafumakadzi vhavhili vho bvela phanḓa na lwendo lwavho, fhedzi vho takadzwa nga nḓila ye Helen a ṅwethuwa ngayo.

Musi vhenevho vhafumakadzi vha tshi khou ya hayani vho ṋamela bisi, vho vhona tshifhaṱo tsha Holo tshi na bodo khulwane yo ṅwalwaho jw.org. Vho zwi ṱhogomela uri eneo o vha e maipfi e vha a vhona kha tshigariki ngei murahu. Vho mbo ḓi tsa bisini vha livha kha tshenetsho tshifhaṱo. Musi vhe henefho, vho vhona bodo ine ya sumbedza zwifhinga zwo fhambanaho zwa miṱangano.

Vhenevho vhafumakadzi vhavhili vho ya kha muṅwe wa miṱangano i tevhelaho. Musi vha tshi dzhena Holoni, vho mangala vhukuma musi vha tshi vhona Helen. Vho ṱavhanya vha zwi humbula uri ndi houḽa mufumakadzi we vha mu vhona a tshi khou ṅwethuwa. Helen u ri: “Ndo vha ndo tshuwa musi ndi tshi vhona vha tshi khou ḓa vho tou nndivha. Ndo vhona u nga hu na zwe nda vha khakhela ngazwo.” Fhedzi vhenevho vhafumakadzi vho ṱalutshedza Helen uri vho mu vhona o ima tsini na tshigariki.

Vhenevho vhafumakadzi vho takalela yeneyo miṱangano nahone vho ḓipfa vho ṱanganedzea. Musi vha tshi vhona vhaṅwe vha tshi khou kunakisa Holo nga murahu ha miṱangano, vho humbela u shela mulenzhe. Muṅwe wa vhenevho vhafumakadzi ha tsha dzula Philippines, fhedzi muṅwe o no thoma u ya miṱanganoni na u gudiswa Bivhili. U ṅwethuwa zwo ita uri hu vhe na mbuyelo dzavhuḓi!