THERO I GUDWAHO 7
Vhahulwane Vha Na Vhuḓifhinduleli Vhufhio Tshivhidzoni?
“Samusi Kristo e ṱhoho ya tshivhidzo, ndi ene ane a vha mutshidzi wa wonoyu muvhili.”—VHAEF. 5:23.
LUIMBO 137 Vhafumakadzi Vha Fulufhedzeaho
MANWELEDZO *
1. Ndi mini tshine tsha ita uri vhathu vha Yehova vha vhe na vhuthihi?
ZWI a ri takadza u vha tshipiḓa tsha muṱa wa Yehova. Ndi mini zwine zwa ita uri ri vhe na mulalo na vhuthihi? Tshiṅwe tshiitisi ndi ngauri roṱhe ri ita zwoṱhe zwine ra nga kona u ṱhonifha nzudzanyo ya Yehova ya uri hu vhe na ṱhoho. Zwavhuḓivhuḓi, musi ri tshi pfesesa yeneyi nzudzanyo nga ho engedzeaho, ndi hone ri tshi ya ri tshi vha na vhuthihi nga ho engedzeaho.
2. Ri ḓo fhindula mbudziso dzifhio kha ino thero?
2 Kha ino thero, ri ḓo amba nga ha uri ndi vhafhio vha re na vhuḓifhinduleli tshivhidzoni. Ri ḓo dovha ra fhindula hedzi mbudziso: Vhahashu vha tshifumakadzini vha na mushumo ufhio tshivhidzoni? Naa ndi ngoho uri wahashu wa tshinnani ndi ṱhoho ya wahashu wa tshifumakadzini muṅwe na muṅwe? Naa vhuḓifhinduleli vhune vhahulwane vha vha naho tshivhidzoni vhu a fana na vhune ṱhoho dza miṱa dza vha naho kha vhafumakadzi na vhana vhadzo? Kha ri thome nga u amba uri ri tea u dzhia hani vhahashu vha tshifumakadzini.
RI TEA U DZHIA HANI VHAHASHU VHA TSHIFUMAKADZINI?
3. Ri ḓo thuswa nga mini uri ri ṋaṋe u dzhiela nṱha vhahashu vha tshifumakadzini?
3 Ri dzhiela nṱha vhahashu vha tshifumakadzini vhane vha shuma nga maanḓa u ṱhogomela miṱa yavho, u huwelela mafhungo maḓifha na u thusa vhaṅwe tshivhidzoni. Ri ḓo ṋaṋa u vha dzhiela nṱha arali ra humbula nga ha nḓila ine Yehova na Yesu vha vha dzhia ngayo. Ri ḓo dovha ra guda uri ri tea u dzhia hani vhafumakadzi kha nḓila ye muapostola Paulo a vha a tshi vha dzhia ngayo.
4. Bivhili i sumbedza hani uri Yehova u dzhiela nṱha vhafumakadzi u fana na vhanna?
4 Bivhili i sumbedza uri Yehova u dzhiela nṱha vhafumakadzi u fana na vhanna. Sa tsumbo, i sumbedza uri tshifhingani tsha vhaapostola, Yehova o shululela muya mukhethwa kha vhafumakadzi na vhanna uri vha kone u ita zwithu zwi mangadzaho zwi ngaho u amba nga dzindimi. (Mish. 2:1-4, 15-18) Yehova o ḓodza vhafumakadzi na vhanna nga muya mukhethwa uri vha vhuse na Yesu. (Vhagal. 3:26-29) Malamba a u tshila tshoṱhe kha ḽifhasi a ḓo waniwa nga vhafumakadzi na vhanna. (Nzumb. 7:9, 10, 13-15) Nahone mushumo wa u huwelela na u funza mafhungo maḓifha wo ṋewa vhanna na vhafumakadzi. (Mat. 28:19, 20) Sa tsumbo, bugu ya Mishumo i amba nga ha mufumakadzi ane a pfi Prisila. Ene na munna wawe vho thusa Apolo we a vha o funzea vhukuma uri a pfesese ngoho nga vhuḓalo.—Mish. 18:24-26.
5. Luka 10:38, 39, 42 i sumbedza hani uri Yesu o vha a tshi ṱhonifha vhafumakadzi?
5 Yesu o vha a tshi hulisa na u ṱhonifha vhafumakadzi. O vha a sa fani na Vhafarisei vhe vha vha vha tshi dzhia vhafumakadzi vhe si vha ndeme nahone vhe vha vhuimo ha fhasi. Vhenevho Vhafarisei vho vha vha sa ambi na vhafumakadzi vhe vhukati ha vhathu nahone vho vha vha sa haseledzi Maṅwalo navho. Nṱhani hazwo, Yesu o vha a tshi haseledza Maṅwalo na vhafumakadzi na vhanna. * (Vhalani Luka 10:38, 39, 42.) O dovha a tendela vhafumakadzi vha tshi tshimbila nae musi a tshi ya u huwelela. (Luka 8:1-3) Yesu o dovha a vha ṋea ndugelo ya u vhudza vhaapostola uri o vuswa vhafuni.—Yoh. 20:16-18.
6. Muapostola Paulo o sumbedza hani uri u ṱhonifha vhafumakadzi?
6 Muapostola Paulo o humbudza Timotheo uri u tea u hulisa vhafumakadzi. O mu vhudza uri a dzhie ‘vhafumakadzi vhahulwane sa vhomme’ na u dzhia ‘vhafumakadzi vhaṱuku sa dzikhaladzi.’ (1 Tim. 5:1, 2) Naho ho vha hu na zwinzhi zwe Paulo a zwi ita u itela u thusa Timotheo uri a vhe na lutendo lwo khwaṱhaho, o vha a tshi zwi ḓivha uri mme a Timotheo na makhulu wawe ndi vhone vhe vha thoma u mu gudisa “maṅwalo makhethwa.” (2 Tim. 1:5; 3:14, 15) Paulo o bula madzina a vhahashu vha tshifumakadzini kha vhurifhi he a vhu ṅwalela Vhakriste vha Roma. O vha a tshi vhona mushumo we vhenevha vhahashu vha tshifumakadzini vha vha vha tshi khou u ita nahone o vha vhudza uri u dzhiela nṱha wonoyo mushumo.—Vharoma 16:1-4, 6, 12; Vhafil. 4:3.
7. Ri ḓo fhindula mbudziso dzifhio?
7 Phara dzo fhiraho dzo zwi sumbedza uri Bivhili a i ambi uri vhahashu vha tshifumakadzini ndi vha vhuimo ha fhasi kha vhahashu vha tshinnani. Vhahashu vha tshifumakadzini vha na lufuno na mafunda nahone vha a thusa vhukuma tshivhidzoni. Vhahulwane vha ḓitika ngavho uri vha thuse kha u ita uri tshivhidzoni hu dzule hu na mulalo na vhuthihi. Fhedzi ri kha ḓi tea u fhindula mbudziso dzi tevhelaho: Ndi ngani nga zwiṅwe zwifhinga Yehova a tshi ṱoḓa wahashu wa tshifumakadzini a tshi fukedza ṱhoho? Samusi vhahashu vha tshinnani vhe vhone fhedzi vhane vha vhewa sa vhahulwane kana vhashumeli, naa izwi zwi amba uri wahashu wa tshinnani u vha ṱhoho ya wahashu wa tshifumakadzini muṅwe na muṅwe tshivhidzoni?
NAA WAHASHU WA TSHINNANI NDI ṰHOHO YA WAHASHU WA TSHIFUMAKADZINI MUṄWE NA MUṄWE?
8. U ya nga Vhaefesa 5:23, naa wahashu wa tshinnani ndi ṱhoho ya wahashu wa tshifumakadzini muṅwe na muṅwe tshivhidzoni? Ṱalutshedzani.
8 Naa wahashu wa tshinnani ndi ṱhoho ya wahashu wa tshifumakadzini muṅwe na muṅwe tshivhidzoni? Hai! Kristo ndi ene ṱhoho ya vhathu vhoṱhe tshivhidzoni. (Vhalani Vhaefesa 5:23.) Munna ndi ṱhoho ya mufumakadzi wawe muṱani. Ṅwana wa mutukana o lovhedzwaho ha vhi ṱhoho ya mme awe. (Vhaef. 6:1, 2) Vhuḓifhinduleli vhune vhahulwane vha vha naho kha vhahashu vha tshinnani na vha tshifumakadzini ngomu tshivhidzoni vhu na mikano. (1 Vhathes. 5:12; Vhahev. 13:17) Hu pfi mini nga wahashu wa tshifumakadzini a songo vhingwaho ane a si tsha dzula na vhabebi vhawe? U bvela phanḓa a tshi ṱhonifha vhabebi vhawe na vhahulwane tshivhidzoni, fhedzi khotsi awe a vha tsha vha ṱhoho yawe. Ṱhoho yawe ndi Kristo fhedzi, u fana na vhahashu vha tshinnani vha re tshivhidzoni.
Yesu ndi ṱhoho ya vhahashu vha siho mbinganoni vhane vha si tsha dzula na vhabebi vhavho (Sedzani phara 8)
9. Ndi ngani nga zwiṅwe zwifhinga vhahashu vha tshifumakadzini vha tshi tea u fukedza ṱhoho?
9 Ndi ngoho uri Yehova o vhea vhanna uri vha range phanḓa kha mushumo wa u funza na wa u mu gwadamela tshivhidzoni. Ho ngo ṋea vhafumakadzi honoho vhuḓifhinduleli. (1 Tim. 2:12) Ndi ngani? Ndi ngauri o vha a tshi khou ṱoḓa uri zwithu tshivhidzoni zwi dzudzanyee. Tshenetsho ndi tshiitisi tshe tsha ita uri Yesu a vhewe sa ṱhoho ya munna. Arali zwiimo zwi tshi ṱoḓa uri wahashu wa tshifumakadzini a ite mushumo une wa tea u itwa nga wahashu wa tshinnani, Yehova u ṱoḓa uri a fukedze ṱhoho yawe musi a tshi khou ita wonoyo mushumo. * (1 Vhakor. 11:4-7) Yehova u ṱoḓa vhahashu vha tshifumakadzini vha tshi ita zwenezwi u sumbedza uri vha ṱhonifha vhe vha ṋewa vhuḓifhinduleli, hu si u vha vhea vhuimoni ha fhasi. Zwino ri ḓo fhindula mbudziso i tevhelaho: Vhahulwane na ṱhoho dza miṱa vha na vhuḓifhinduleli vhufhio?
VHAHULWANE NA ṰHOHO DZA MIṰA VHA NA VHUḒIFHINDULELI VHUFHIO?
10. Ndi ngani muhulwane a tshi nga ṱoḓa u vhetshela vhahashu milayo nga zwiṅwe zwifhinga?
10 Vhahulwane vha funa Kristo na “ngwana” dze Yehova na Yesu vha vha humbela uri vha dzi ṱhogomele. (Yoh. 21:15-17) Muhulwane a nga humbula u nga u khotsi kha vhahashu tshivhidzoni ngauri u na ndavha navho. A nga vhona u nga o tendelwa u vhea milayo ine ya ḓo tsireledza nngu dza Mudzimu samusi na ṱhoho ya muṱa yo tendelwa u vhea milayo ine ya ḓo tsireledza muṱa wayo. Vhaṅwe vhahashu vha nga ita uri vhahulwane vha wele kha tshenetshi tshikwekwe nga u vha humbela uri vha vha itele phetho kha zwiṅwe zwithu. Fhedzi naa vhahulwane vha na honoho vhuḓifhinduleli vhu fanaho na ha ṱhoho dza miṱa?
Vhahulwane vha thusa vha re tshivhidzoni uri vha vhe na vhushaka havhuḓi na Yehova, na u ita uri vha ḓipfe vha tshi funwa. Yehova o vha ṋea vhuḓifhinduleli ha uri musi hu na muitazwivhi a sa rembuluwi, vha mu bvise tshivhidzoni (Sedzani dziphara 11-12)
11. Ndi zwifhio zwine zwa fana kha vhuḓifhinduleli ha ṱhoho dza miṱa na ha vhahulwane?
11 Muapostola Paulo o sumbedza uri hu na zwiṅwe zwine zwa fana kha vhuḓifhinduleli ha ṱhoho dza miṱa na ha vhahulwane. (1 Tim. 3:4, 5) Sa tsumbo, Yehova u ṱoḓa muṱa woṱhe u tshi thetshelesa ṱhoho ya muṱa. (Vhakol. 3:20) Nahone u ṱoḓa vhahashu tshivhidzoni vha tshi thetshelesa vhahulwane. Yehova u lavhelela uri ṱhoho dza miṱa na vhahulwane vha thuse vhane vha vha ṱhogomela uri vha vhe na vhushaka havhuḓi na Yehova. Vha tea u dovha vha ita vhungoho ha uri vhane vha vha ṱhogomela vha ḓipfe vha tshi funwa. Vhahulwane vha dovha vha fana na ṱhoho dza miṱa ngauri vha thusa vhane vha vha ṱhogomela nga musi wa khombo. (Yak. 2:15-17) Zwiṅwe hafhu, Yehova u lavhelela uri vhahulwane na ṱhoho dza miṱa vha thuse vhaṅwe u thetshelesa milayo yawe. U dovha a vha vhudza uri vha ‘ite zwo ṅwaliwaho Bivhilini fhedzi.’—1 Vhakor. 4:6.
Yehova o ṋea ṱhoho ya muṱa vhuḓifhinduleli ha u ranga phanḓa muṱani. Musi ṱhoho ya muṱa i re na lufuno i sa athu u ita phetho, i thoma ya amba na mufumakadzi wayo (Sedzani phara 13)
12-13. Vhuḓifhinduleli vhune ṱhoho dza miṱa dza vha naho ho fhambana hani na vhune vhahulwane vha vha naho samusi zwo sumbedzwa kha Vharoma 7:2?
12 Naho zwo ralo, vhuḓifhinduleli vhune vhahulwane vha vha naho ho fhambana vhukuma na vhune ṱhoho dza miṱa dza vha naho. Sa tsumbo, Yehova o vhea vhahulwane uri vha vhe vhahaṱuli nahone honoho vhuḓifhinduleli ho ngo vhu ṋea ṱhoho dza miṱa. O ṋea vhahulwane vhuḓifhinduleli ha uri musi hu na muitazwivhi a sa rembuluwi, vha mu bvise tshivhidzoni.—1 Vhakor. 5:11-13.
13 Naho zwo ralo, hu na vhuḓifhinduleli he Yehova a vhu ṋea ṱhoho dza miṱa he a si vhu ṋee vhahulwane. O ṋea ṱhoho ya muṱa maanḓa a u vhetshela muṱa wayo milayo na u ita vhungoho ha uri vha i tevhele. (Vhalani Vharoma 7:2.) Sa tsumbo, ṱhoho ya muṱa u na maanḓa a u vhetshela vhana vhawe mulayo wa uri vha vhuye nga tshifhinga ḓe. U dovha a vha na maanḓa a u kaidza vhana vhawe arali vha sa tevhedzi wonoyo mulayo. (Vhaef. 6:1) Musi ṱhoho ya muṱa a re na lufuno a sa athu u vhea mulayo muṱani, u thoma a amba na mufumakadzi wawe ngauri vhuvhili havho vha “ṋama nthihi.” *—Mat. 19:6.
ṰHONIFHANI KRISTO ANE A VHA ṰHOHO YA TSHIVHIDZO
Ṱhoho ya Yesu ndi Yehova. Yesu u ṋea tshivhidzo tsha Vhukriste vhulivhisi (Sedzani phara 14)
14. (a) Marko 10:45 i zwi sumbedza hani uri zwo tea uri Yehova a vhee Yesu sa ṱhoho ya tshivhidzo? (b) Tshigwada tshi Langaho tshi na vhuḓifhinduleli vhufhio? (Sedzani bogisi “ Tshigwada Tshi Langaho Tshi Na Vhuḓifhinduleli Vhufhio?”)
14 Yehova o shumisa tshirengululi u itela u rengulula vhutshilo ha muṅwe na muṅwe tshivhidzoni na vhoṱhe vha re na lutendo kha Yesu. (Vhalani Marko 10:45; Mish. 20:28; 1 Vhakor. 15:21, 22) Nga zwenezwo, zwo tea uri Yesu a vhe ṱhoho ya tshivhidzo ngauri o ri fela. Samusi e ṱhoho yashu, u na maanḓa a u vhea milayo a tshi i vhetshela vhathu, miṱa na tshivhidzo tshoṱhe nahone u na maanḓa a u ita vhungoho ha uri ri tevhedze yeneyo milayo. (Vhagal. 6:2) Fhedzi hu na zwiṅwe zwine Yesu a zwi ita nga nnḓa ha u vhea milayo. U a ri funa na u ri ṱhogomela.—Vhaef. 5:29.
15-16. Ni guda mini kha zwe Marley na Benjamin vha zwi amba?
15 Vhahashu vha tshifumakadzini vha sumbedza uri vha ṱhonifha Kristo nga u tevhela vhulivhisi vhune vha ṋewa nga vhanna vhe a vha vhea uri vha vha ṱhogomele. Vhahashu vhanzhi vha tshifumakadzini vha tendelana na zwine Marley ane a dzula Amerika a zwi amba. U ri: “Vhuḓifhinduleli hanga sa mufumakadzi o vhingwaho na ha u vha muthu wa tshifumakadzini tshivhidzoni, ndi ha ndeme kha nṋe. Ndi tea u dzula ndi tshi ita vhuḓidini uri ndi ṱhonifhe vhuḓifhinduleli he Yehova a vhu ṋea munna wanga na vhahulwane. Fhedzi munna wanga na vhahashu tshivhidzoni vha ita uri zwi nndelutshele ngauri na vhone vha a nṱhonifha nahone vha dzhiela nṱha mushumo une nda u ita.”
16 Vhahashu vha tshinnani vha sumbedza uri vha pfesesa nzudzanyo ya uri hu vhe na ṱhoho nga u ṱhonifha na u hulisa vhahashu vha tshifumakadzini. Muṅwe wahashu wa tshinnani ane a pfi Benjamin wa ngei England u ri: “Hu na zwinzhi zwe nda zwi guda kha phindulo dza vhahashu vha tshifumakadzini miṱanganoni nahone vho ngudisa u huwelela na u funza nga nḓila ya khwine. Ndi vhona u nga vha ita mushumo wa ndeme.”
17. Ndi ngani ri tshi tea u ṱhonifha uri hu na vhe Yehova a vha ṋea vhuḓifhinduleli?
17 Musi vhanna, vhafumakadzi, ṱhoho dza miṱa na vhahulwane vha tshivhidzo vha tshi ṱhonifha uri Yehova o ṋea vhaṅwe vhuḓifhinduleli, zwi ita uri tshivhidzoni hu vhe na mulalo. Tsha ndeme vhukuma ndi uri zwi rendisa Yehova Khotsi ashu wa ṱaḓulu.—Ps. 150:6.
LUIMBO 123 U Ḓiṱukufhadzela Nzudzanyo Ya Ṱaḓulu
^ phar. 5 Yehova o ṋea vhahashu vha tshifumakadzini mushumo ufhio tshivhidzoni? Naa wahashu wa tshinnani ndi ṱhoho ya wahashu wa tshifumakadzini muṅwe na muṅwe? Naa vhahulwane vha na vhuḓifhinduleli vhu fanaho na ha ṱhoho dza miṱa? Kha ino thero, ri ḓo vhona nḓila ine Bivhili ya fhindula ngayo dzenedzi mbudziso.
^ phar. 5 Vhalani phara 6 kha thero “Tikedzani Vhafumakadzi Vha Vhakriste,” i re kha Tshiingamo tsha September 2020.
^ phar. 9 Sedzani bogisi “ Ndi Lini Hune Wahashu Wa Tshifumakadzini A Tea U Fukedza Ṱhoho?”
^ phar. 13 U itela u ḓivha uri ndi nnyi ane a tea u ita phetho ya uri muṱa u ḓo ṱanganela kha tshivhidzo tshifhio, vhalani dziphara 17-19 kha thero “Ri Nga Ṱhonifha Hani Vhaṅwe Tshivhidzoni Tsha Yehova?” kha Tshiingamo tsha August 2020.
^ phar. 59 U itela u ḓivha zwo engedzeaho nga ha enea mafhungo, vhalani bugu “Ni Ḓi-vhulungele Ngomu Lufunoni Lwa Mudzimu” kha masiaṱ. 209-212.
^ phar. 64 U itela u ḓivha zwo engedzeaho nga ha vhuḓifhinduleli ha Tshigwada tshi Langaho, vhalani Tshiingamo tsha ḽa 15 July 2013, masiaṱ. 20-25.
