MULAYO wa Mushe wo vha u tshi tendela vhathu uri vha ṋekedze maivha-muronzhe na maivha sa zwifhiwa kha Yehova. Zwenezwi zwiṋoni zwivhili zwo vha zwi tshi ambiwa khathihi kha milayo i ambaho nga ha u ṋekedza zwiṱhavhelo nahone muthu o vha a tshi nga shumisa maivha-muronzhe kana maivha. (Lev. 1:14; 12:8; 14:30) Zwenezwi zwo vha zwi tshi vhuyedza ngani? Tshiṅwe tshiitisi ndi uri maivha-muronzhe o vha a sa wanali tshifhinga tshoṱhe. Ndi ngani?

Maivha-muronzhe a wanala shangoni ḽa Isiraele nga miṅwedzi ine ha vha hu tshi khou dudela. Ṅwaha muṅwe na muṅwe nga October, a a pfuluwa a ya mashangoni a dudelaho a re tshipembe, a vhuyelela shangoni ḽa Isiraele nga tshifhinga tsha luṱavula. (Luimbo. 2:11, 12; Yer. 8:7) Zwi amba uri zwo vha zwi tshi konḓela Vhaisiraele uri vha ṋekedze maivha-muronzhe sa tshiṱhavhelo nga tshifhinga tsha vhuria.

Maivha ha anzeli u pfuluwa, nga zwenezwo, o vha a tshi dzulela u wanala shangoni ḽa Isiraele. Zwiṅwe hafhu, o vha a tshi fuiwa. (Vhambedzani Yohane 2:14, 16.) Bugu ine ya pfi Bible Plants and Animals, i ri: “Vhathu vho vha vho fuwa maivha mivhunduni na ḓoroboni dzoṱhe dza Palestina. Muḓini muṅwe na muṅwe ho vha ho korwa luvhondo uri enea maivha a wane vhudzulo.”—Vhambedzani Yesaya 60:8.

Nga zwenezwo, musi Yehova a tshi ṱanganedza zwiṱhavhelo zwa zwiṋoni zwine zwa wanala tshifhinga tshoṱhe shangoni ḽa Isiraele, o vha a tshi khou sumbedza uri u a funa na u humbulela Vhaisiraele.