1. Yesu o vhudza vhafunziwa vhawe mini malugana na tshifhinga tshine “vhufhelo ha shango” ha ḓo ḓa ngatsho nahone o vha tsivhudza uri mini?

 MUSI ho sala maḓuvha a si gathi uri Yesu a vhulawe, vhafunziwa vhawe vhaṋa vho mu vhudzisa uri: “Tshiga tshi ḓo vha tshifhio . . . tsha vhufhelo ha shango?” (Mat. 24:3) Vhenevho vhafunziwa vha nga vha vho vha vha tshi khou vhudzisa uri vha ḓo zwi ḓivha hani musi Yerusalema na thembele yawo zwi tsini na u fheliswa. Musi Yesu a tshi vha fhindula, o amba nga ha u fheliswa ha Yerusalema na thembele yawo, fhedzi a dovha a vha vhudza na nga ha “vhufhelo ha shango” ḽine riṋe ra khou tshila khaḽo ṋamusi. Musi Yesu a tshi amba nga ha tshifhinga tsha vhufhelo o ri: “A hu na ane a ḓivha ḽeneḽo ḓuvha kana tshifhinga, na vharuṅwa vha re ṱaḓulu na Murwa a vha zwi ḓivhi, fhedzi zwi ḓivhiwa nga Khotsi.” O tsivhudza vhafunziwa vhawe vhoṱhe uri vha ‘dzule vho fhaṱuwa.’—Marko 13:32-37.

2. Ndi ngani zwo vha zwi zwa ndeme uri vhe vha vha vha tshi khou dzula Yerusalema vha dzule vho fhaṱuwa?

² Vhakriste vha Vhayuda vha u thoma vho vha vha tshi tea u dzula vho fhaṱuwa uri vha kone u ponya musi Yerusalema u tshi fheliswa. Yesu o vhudza vhatevheli vhawe zwine zwa ḓo vha thusa u vhona musi Yerusalema na thembele yawo zwi tsini na u fheliswa. O ri: “Musi ni tshi vhona Yerusalema wo tangwa nga dzimmbi, ni ḓivhe uri u fheliswa hawo hu tsini.” Nga tshenetsho tshifhinga vho vha vha tshi tea u ‘shavhela thavhani’ sa zwe Yesu a vha vhudza. (Luka 21:20, 21) Vhe vha thetshelesa zwe Yesu a amba vho ponya musi Vharoma vha tshi fhelisa Yerusalema.

3. Ri ḓo amba nga ha mini kha ino thero?

³ Ḽino shango ḽivhi ḽo no vha tsini na u fheliswa. Nga zwenezwo, na riṋe ri tea u dzivhuluwa na u dzula ro fhaṱuwa. Kha ino thero, ri ḓo amba nga ha uri ri nga linganyisela hani ngeno ri  tshi khou dzula ro fhaṱuwa, uri ri nga sumbedza hani uri ri a ḓiṱhogomela na uri ri nga shumisa hani tshifhinga tshashu tsho salaho nga vhuṱali.

4. Ndi ngani ri tshi tea u takalela u vhona nḓila ine zwithu zwa khou itea ngayo shangoni zwi tshi khou ita uri vhuporofita vhu itee?

⁴ Hu na zwiitisi zwi pfalaho zwa uri ri takalele u vhona nḓila ine vhuporofita vhu re Bivhilini ha khou itea ngayo zwino. Sa tsumbo, Yesu o ri vhudza zwithu zwine zwa ḓo itea zwine zwa ḓo ri thusa u vhona musi ḽino shango ḽa Saṱhane ḽo no vha tsini na u fheliswa. (Mat. 24:3-14) Muapostola Petro o ri ṱuṱuwedza uri ri sedzese u itea ha vhuporofita u itela uri lutendo lwashu lu dzule lwo khwaṱha. (2 Pet. 1:19-21) Bugu ya u fhedzisela ya Bivhili i thoma nga maipfi ane a ri: “Heyi ndi nzumbululo ye Yesu Kristo a dzumbululelwa nga Mudzimu, uri a sumbedze vhalanda vhawe zwine zwa ḓo itea hu si kale.” (Nzumb. 1:1) Nga zwenezwo, ri a takalela u ḓivha nga ha zwine zwa khou itea shangoni zwino na u ḓivha uri zwi khou ita hani uri vhuporofita vhu itee. Nahone ri nga takalela u haseledza enea mafhungo na vhaṅwe.

5. Ri tea u iledza mini, fhedzi ndi zwifhio zwine ra tea u zwi ita? (Sedzani tshifanyiso.)

⁵ Musi ri tshi haseledza na vhaṅwe nga ha vhuporofita vhu re Bivhilini, ri tea u iledza u humbulela zwine zwa ḓo itea. Ndi ngani? Ndi ngauri a ri ṱoḓi u amba tshiṅwe tshithu tshine tsha nga ita uri tshivhidzo tshi si tsha vha na vhuthihi. Sa tsumbo, ri nga pfa nga ha nḓila ine vhavhusi vha amba ngayo uri vha ḓo lugisa u sa anḓana ha vhathu na u ita uri hu vhe na mulalo na u tsireledzea. Nṱhani ha u humbulela uri zwenezwi ndi u itea ha vhuporofita vhu re kha 1 Vhathesalonika 5:3, ri tea u ḓivha mafhungo maswa-maswa e a ambiwa nga ha honoho vhuporofita. Musi zwine ra zwi haseledza na vhaṅwe zwo thewa kha dzikhandiso dzine dza bva kha ndangulo ya Yehova, ri vha ri tshi khou thusa uri tshivhidzo tshi dzule tshi na vhuthihi nga u “humbula na u vhona zwithu nga nḓila i fanaho.”—1 Vhakor. 1:10; 4:6.

6. Ri guda mini kha 2 Petro 3:11-13?

⁶ Vhalani 2 Petro 3:11-13. Muapostola Petro u ri thusa uri ri humbulisise nga ha tshiitisi tshashu tsha uri ri ṱolisise vhuporofita vhu re Bivhilini. U ri vhudza uri ri ‘dzule ri tshi humbula u vha hone ha ḓuvha ḽa Yehova.’ Ndi ngani? A ri zwi iti ngauri ri vha ri tshi khou ṱoḓa u wanulusa “ḓuvha na tshifhinga” zwine Yehova a ḓo ḓisa Haramagedo ngazwo, fhedzi ri zwi ita ngauri ri vha ri tshi khou ṱoḓa u shumisa tshifhinga tsho salaho ri tshi khou ‘ita mishumo ine ya sumbedza uri ro ḓikumedzela kha Mudzimu.’ (Mat. 24:36; Luka 12:40) Nga maṅwe maipfi, ri vha ri tshi khou ṱoḓa u ḓifara nga nḓila yo teaho na u ita vhungoho ha uri zwoṱhe zwine ra zwi itela Yehova zwi itiswa ngauri ri a mu funa vhukuma. Ri tea u ḓiṱhogomela uri ri dzule ri na eneo mahumbulele.

7. Ri sumbedza hani uri ri khou ḓiṱhogomela? (Luka 21:34)

⁷ Yesu o vhudza vhafunziwa vhawe uri vha songo ṱhogomela fhedzi zwine zwa khou itea shangoni, fhedzi na vhone vhaṋe vha ḓiṱhogomele. Yeneyo mbuno i bvela khagala kha zwo ṅwaliwaho kha Luka 21:34. (Vhalani.) Ṱhogomelani zwe Yesu a zwi amba. O ri: “Ni [ḓi]ṱhogomele.” Muthu ane a ḓiṱhogomela u dzula o sedza khombo dzine dza nga tshinya vhushaka hawe na Yehova nahone a lingedza u dzi iledza. Nga yeneyi nḓila, u dzula a tshi  ita uri Mudzimu a mu fune.—Mir. 22:3; Yuda 20, 21.

8. Ndi zwifhio zwe muapostola Paulo a zwi vhudza Vhakriste?

⁸ Muapostola Paulo o vhudza Vhakriste uri vha ḓiṱhogomele. Sa tsumbo, o vhudza Vhakriste vha Efesa uri: “Dzulani no fhaṱuwa uri ni si tshimbile sa matsilu, fhedzi ni tshimbile sa vho ṱalifhaho.” (Vhaef. 5:15, 16) Saṱhane u dzula a tshi khou lingedza u tshinya vhushaka hashu na Yehova. Ndi ngazwo Bivhili i tshi ri vhudza uri ri ‘dzule ri tshi pfesesa zwine Yehova a zwi funa’ uri ri kone u ḓitsireledza musi Saṱhane a tshi ri ṱhasela.—Vhaef. 5:17.

9. Ri nga ḓivha hani zwine Yehova a ṱoḓa ri tshi zwi ita?

⁹ Bivhili a i ri vhudzi nga ha tshiṅwe na tshiṅwe tshine tsha nga tshinya vhushaka hashu na Yehova. Kanzhi ri tea u ita phetho nga ha zwithu zwi songo ambiwaho nga ho livhaho Maṅwaloni. Uri ri ite phetho dza vhuṱali, ri tea u ḓivha “zwine Yehova a zwi funa.” Ri nga zwi ḓivha nga u dzula ri tshi guda Bivhili na u elekanya nga ha zwine ra zwi guda. Musi ri tshi pfesesa zwine Yehova a zwi ṱoḓa na u lingedza u “humbula u fana na Kristo,” ndi hone ri tshi ḓo tshimbila “sa vho ṱalifhaho,” naho ri si na milayo yo livhaho ine ya ri vhudza uri ri ite mini. (1 Vhakor. 2:14-16) Nga zwiṅwe zwifhinga zwi a ri lelutshela u vhona zwine ra tea u zwi iledza. Fhedzi nga zwiṅwe zwifhinga a zwo ngo leluwa nga u tou ralo.

10. Ndi dzifhio dziṅwe khombo dzine ra tea u dzi iledza?

¹⁰ Dziṅwe khombo dzine ra tea u dzi iledza ndi u tamba nga lufuno, u nwesa, u ḽesa, u amba zwithu zwine zwa nga vhaisa vhaṅwe na u ṱalela zwithu zwi re na vhuvemu, pornography na zwithu zwi ngaho zwenezwo. (Ps. 101:3) Swina ḽashu Diabolo u dzula a tshi khou ṱoḓa zwibuli zwa u tshinya vhushaka hashu na Yehova. (1 Pet. 5:8) Arali ra sa vha na vhusedzi, Saṱhane a nga ita uri mihumbuloni yashu na mbiluni dzashu ri thome u vha na vhutshivha, u sa fhulufhedzea, tseḓa, vengo, u ḓihudza na mbiti. (Vhagal. 5:19-21) Musi zwenezwi zwithu zwi tshi thoma, ni nga vhona u nga a zwi na khombo. Fhedzi arali na sa dzhia vhukando uri ni zwi bvise kha inwi, zwi ḓo aluwa zwa nga muri u re na mulimo nahone zwa tshinya vhushaka haṋu na Yehova na vhaṅwe.—Yak. 1:14, 15.

11. Ndi ifhio iṅwe khombo yo dzumbamaho ine ra tea u i iledza nahone ndi ngani?

¹¹ Iṅwe khombo ine ra tea u i iledza ine zwa nga konḓa u i vhona, ndi khonani dzi si dzavhuḓi Ṱhogomelani mafhungo a tevhelaho. Kha ri ri ni shuma na muthu ane a si vhe Ṱhanzi ya Yehova. Ni ṱoḓa onoyo muthu a tshi humbula zwithu zwavhuḓi nga ha Ṱhanzi dza Yehova. Zwenezwo zwi ita uri ni mu sumbedze vhuthu nahone ni ṱoḓe u mu thusa. Nga zwiṅwe zwifhinga ni ita ni tshi ḽa zwiḽiwa nae. Hu sa athu u fhela tshifhinga, ni ḓiwana ni tshi vho tou anzela u ḽa nae. Nga zwiṅwe zwifhinga, onoyo muthu u amba nga ha vhuḓifari vhu songo kunaho. Mathomoni, ni vha ni sa zwi takaleli. Fhedzi nga u ya ha tshifhinga, na vho thoma u zwi ḓowela nahone zwa si tsha ni khukhulisa. Fhedzi ḽiṅwe ḓuvha, onoyo muthu ane na shuma nae u ni ramba uri ni ḓibvise nae musi no no tshaisa nahone inwi na tenda. Nga u ya ha tshifhinga, ni ḓiwana ni tshi vho tendelana na zwine onoyo mushumisani na inwi a zwi amba. Hu si kale, ni ḓo wana ni tshi vho ita zwithu nga nḓila i fanaho na ya mushumisani waṋu. Ndi ngoho uri ri sumbedza vhathu vhoṱhe vhuthu na u vha ṱhonifha, fhedzi ri tea u zwi humbula uri vhathu vhane ra fhedzesa navho tshifhinga vha ḓo ita uri ri fane navho. (1 Vhakor. 15:33) Arali ra ḓiṱhogomela, sa zwe Yesu a ri vhudza uri ri zwi ite,  ri ḓo iledza u vha khonani na vhane vha si tshile u tendelana na zwine Yehova a zwi ṱoḓa. (2 Vhakor. 6:15) Ri ḓo vhona khombo i tshee kule ra i iledza.

12. Vhafunziwa vha Yesu vho vha vha tshi tea u ita mini musi vho lindela uri vhufhelo vhu swike?

¹² Yesu o ṋea vhafunziwa vhawe mushumo une vha tea u u ita ngauri o vha a tshi ṱoḓa uri vha dzule vho farakanea musi vho lindela uri vhufhelo vhu swike. O vha laya uri vha huwelele mafhungo maḓifha “Yerusalema na kha ḽoṱhe ḽa Yudea na Samaria, u swika magumoni a ḽifhasi.” (Mish. 1:6-8) Wonoyo wo vha u mushumo muhulwane nga maanḓa! Vhafunziwa vhawe vho shumisa tshifhinga tshavho nga vhuṱali nga u ita zwoṱhe zwine vha nga kona u itela u huwelela kha vhaṅwe.

13. Ndi ngani ri tshi tea u shumisa tshifhinga tshashu nga vhuṱali? (Vhakolosa 4:5)

¹³ Vhalani Vhakolosa 4:5. Zwine zwa nga ri thusa uri ri ḓiṱhogomele ndi u humbulisisa nga ha nḓila ine ra shumisa ngayo tshifhinga tshashu. “Zwiitea zwi songo lavhelelwaho” zwi nga itea kha muṅwe na muṅwe washu. (Muh. 9:11) Ri nga kha ḓi lovha zwi songo lavhelelwa.

14-15. Ri nga shumisa hani tshifhinga tshashu nga vhuṱali? (Vhahevheru 6:11, 12) (Sedzani tshifanyiso.)

¹⁴ Ri nga shumisa tshifhinga tshashu nga  vhuṱali nga u ita zwi funwaho nga Yehova na nga u khwaṱhisa vhushaka hashu nae. (Yoh. 14:21) Ri tea u vha vho ‘khwaṱhaho, ri si dzinginyee, ri dzule ri tshi ita zwinzhi mushumoni wa Murena.’ (1 Vhakor. 15:58) Arali ra ita zwenezwo, a ri nga ḓisoli naho ra nga fa kana vhufhelo ha nga swika.—Mat. 24:13; Vharoma 14:8.

¹⁵ Na ṋamusi, Yesu u bvela phanḓa a tshi thusa vhafunziwa vhawe musi vha tshi huwelela nga ha Muvhuso wa Mudzimu ḽifhasini ḽoṱhe. U khou ita zwe a ri fhulufhedzisa. Yesu u ri gudisa nḓila ine ra nga huwelela ngayo mafhungo maḓifha a tshi shumisa dzikhandiso na miṱangano. U dovha a ri ṋea zwine ra zwi ṱoḓa uri ri ite wonoyo mushumo. (Mat. 28:18-20) Riṋe ri shela mulenzhe nga u ita zwoṱhe zwine ra nga kona u itela u huwelela kha vhaṅwe na u vha funza na u dzula ro fhaṱuwa musi ro lindela Yehova a tshi fhelisa ḽino shango. Arali ra shumisa nyeletshedzo i re kha Vhahevheru 6:11, 12, ri ḓo dzula ro farelela fhulufhelo ḽashu “u swika vhufheloni.”—Vhalani.

16. Ro ḓiimisela u ita mini?

¹⁶ Yehova o vhea ḓuvha na tshifhinga ḽine a ḓo fhelisa ngaḽo ḽino shango ḽa Saṱhane. Musi ḽeneḽo ḓuvha ḽi tshi swika, Yehova u ḓo ita uri vhuporofita hoṱhe vhu re Bivhilini vhu itee. Musi tshenetsho tshifhinga tshi sa athu u swika, ri nga vhona u nga vhufhelo vhu khou lenga u swika. Naho zwo ralo, ḓuvha ḽa Yehova ‘a ḽi nga lengi.’ (Hab. 2:3) Nga zwenezwo, u nga ri ri nga ḓiimisela u ‘dzula ro lavhelesa Yehova,’ ro ‘lindela Mudzimu ane a vha mutshidzi washu ri sa fheli mbilu.’—Mika 7:7.