YOMARA na khaladzi dzawe vhane vha pfi Marcelo na Hiver vha dzula kha muvhundu muṱuku ngei Guatemala. Yomara o thoma u guda Bivhili na Ṱhanzi, nga murahu na khaladzi dzawe vha thoma u guda. Fhedzi ho vha hu na thaidzo. Vhuraru havho a vha vhoni nahone vho vha vha sa koni u vhala khandiso dza braille. Nga zwenezwo, muthu we a vha a tshi guda navho Bivhili o vha a tshi vha vhalela phara na maṅwalo ane a vha kha ngudo ine vha khou i guda.

Zwo vha zwi tshi vha konḓela u ya pfunzoni. Uri vha kone u ya kha Holo ye ya vha i tsinisa navho, vho vha vha tshi tea u tshimbila lwa mimunithi ya 40 nahone vho vha vha sa ḓo zwi kona vhe vhoṱhe. Fhedzi vhahashu vha tshenetsho tshivhidzo vho vha thusa nga u ya navho miṱanganoni. Musi Yomara, Marcelo na Hiver vha tshi thoma u vhea nyambo dza vhagudiswa kha miṱangano ya vhukati ha vhege, vhahashu vho vha thusa uri vha rwele ngomani dzenedzo nyambo.

Nga May 2019, ho thoma u itiwa miṱangano he vha vha vha tshi dzula hone ngauri ho vha ho no pfulutshela vhaṅwe vhavhingani vha vhavulanḓila vha tshifhinga tshoṱhe. Vhenevho vhavhingani vho vha vha sa koni u ṅwala na u vhala nga braille, fhedzi vho vha vha tshi khou ṱoḓa u gudisa vhenevha vhagudiswa uri vha nga zwi itisa hani. Nga zwenezwo, vho ya ḽaiburari vha wana bugu dza braille uri vha kone u guda nḓila ine vha nga vha gudisa ngayo.

Nga murahu ha miṅwedzi i si gathi, vhuraru havho vho vha vha tshi vho kona u vhala braille nahone zwenezwo zwo ita uri vha kone u vha na vhushaka ha tsini na Yehova. a Zwa zwino Yomara, Marcelo na Hiver ndi vhavulanḓila vha tshifhinga tshoṱhe. Marcelo ndi mushumeli. Vha dzula vho farakanea vhege yoṱhe nga u shumela Yehova. Nḓila ine vha fhisea ngayo i ita uri na vhaṅwe vha fhisee.

Vhuraru havho vha livhuwa nḓila ye vhahashu tshivhidzoni vha sumbedza ngayo uri vha a vha funa nga u vha tikedza. Yomara u ri: “U bva tshee ra thoma u ṱangana na Dziṱhanzi, vho sumbedza uri vha a ri funa.” Marcelo u ri: “Ri na khonani dzavhuḓi henefha tshivhidzoni nahone ri tshipiḓa tsha vhahashu u mona na shango ḽoṱhe vha re na vhuthihi na vhane vha funana.” Yomara na khaladzi dzawe vho lavhelela nga maṱo matswuku tshifhinga tshine ḽifhasi ḽa ḓo shandulwa ḽa vha pharadiso.—Ps. 37:10, 11; Yes. 35:5.