NGA ḽavhuraru ḽa dzi 18 dza January 2023, ho vha na nḓivhadzo yo khetheaho kha jw.org i tshi khou amba uri Vho Gage Fleegle na Vho Jeffrey Winder vho vhewa sa miraḓo ya Tshigwada tshi Langaho tsha Ṱhanzi dza Yehova. Vhuvhili ha vhenevho vhahashu vho no fhedza miṅwaha minzhi vha tshi khou shumela Yehova nga u fhulufhedzea.

Wahashu Vho Fleegle vho aluselwa ngohoni nga vhabebi vhavho ngei vhukovhela ha Pennsylvania ngei Amerika. Musi vha tshi kha ḓi vha muṱuku, vhone na muṱa wahavho vho pfulutshela kha ḓorobo ṱhukhu he ha vha hu na ṱhoḓea. Nga murahu, vha lovhedzwa nga dzi 20 dza November 1988.

Vhabebi vha wahashu Vho Fleegle vho vha vha tshi dzulela u vha ṱuṱuwedza uri vha dzhenele tshumelo ya tshifhinga tshoṱhe. Vho vha vha tshi ramba vhalavhelesi na vhathu vhe vha vha vha tshi shuma Bethele muḓini wavho, Vho Fleegle vho vha vha tshi kona u vhona nḓila ye vhenevho vhahashu vha vha vho takala ngayo. Hu sa athu fhela tshifhinga vho lovhedzwa, wahashu Vho Fleegle vho dzhia vhuvulanḓila ha tshifhinga tshoṱhe nga dzi 1 dza September 1989. Nga murahu ha miṅwaha mivhili, vho swikelela tshipikwa tshavho tshe vha vha vho ḓivhetshela tshone musi vhe na miṅwaha ya 12 tsha u ya u shuma Bethele. Vho thoma u shuma Bethele ya Brooklyn nga October 1991.

Musi vha tshi khou shuma Bethele, vho shuma kha muhasho wa u gandisa lwa miṅwaha ya malo nahone nga murahu vha iswa kha Muhasho wa Tshumelo. Nga tshenetsho tshifhinga, vho vha vhe kha tshivhidzo tsha luambo lwa Tshirussia miṅwaha i si gathi. Nga 2006 vho vhinga mufumakadzi wavho Vho Nadia, vhe vha ya vha shuma navho Bethele. Vho shuma vhoṱhe kha tsimu ya luambo lwa Tshiportuguese nahone vho dovha vha shuma vhoṱhe miṅwaha i fhiraho fumi tsimuni ya luambo lwa Spanish. Nga murahu ha miṅwaha minzhi vha tshi khou shuma kha Muhasho wa Tshumelo, Wahashu Vho Fleegle vho iswa uri vha ye u shuma kha Ofisi ya Komiti ya u Funza nahone nga murahu vha iswa kha Ofisi ya Komiti ya Tshumelo. Nga March 2022  vho vhewa sa muthusi kha Komiti ya Tshumelo ya Tshigwada tshi Langaho.

Wahashu Vho Winder vho alutshela ngei Murrieta, California kha ḽa Amerika. Vho aluselwa ngohoni nga vhabebi vhavho nahone vho lovhedzwa nga dzi 29 March 1986. Nga ṅwedzi u tevhelaho, vho mbo ḓi dzhia vhuvulanḓila ha u thusa. Vho ḓiphiṋa nga maanḓa nga u ita wonoyu mushumo nahone vho vha vha tshi khou ṱoḓa u bvela phanḓa. Vho fhedza miṅwedzi i si gathi vho dzhia vhuvulanḓila ha u thusa nahone nga dzi 1 dza October 1986, vha dzhia vhuvulanḓila ha tshifhinga tshoṱhe.

Musi Wahashu Vho Winder vha tshi kha ḓi vha muṱuku vho dalela vhakomana vhavho vhavhili vhe nga tshenetsho tshifhinga vha vha vha tshi khou shuma Bethele. Zwenezwo zwo ṱuṱuwedza dzangalelo ḽa Wahashu Vho Winder ḽa u ita khumbelo ya u ya u shuma Bethele musi vho no vha muhulwane. Nga May 1990, vho rambiwa uri vha ye u shuma Bethele ngei Wallkill.

Musi Wahashu Vho Winder vha tshi ya Bethele vho shuma kha mihasho yo fhambanaho, i ngaho sa Muhasho wa u Kunakisa, Muhasho wa u Lima na Bethel Office. Vho vhinga mufumakadzi wavho Vho Angela nga 1997 nahone vha shuma Bethele vhoṱhe. Nga 2014 vho iswa ngei Warwick, he Wahashu Vho Winder vha thusa kha mushumo wa u fhaṱa ofisi khulwane dza Ṱhanzi dza Yehova. Nga 2016 vho iswa ngei Watchtower Educational Center ngei Patterson, he Wahashu Vho Winder vha shuma kha Muhasho wa Audio/​Video. Nga murahu ha miṅwaha miṋa vho humiselwa Warwick, nahone Wahashu Vho Winder vha shuma kha ofisi ya Komiti ya Vhashumi. Nga March 2022 vho vhewa sa muthusi kha Komiti ya Vhashumi ya Tshigwada tshi Langaho.

Ri rabela uri Yehova a bvele phanḓa a tshi fhaṱutshedza vhenevha ‘vhanna vhane vha vha zwifhiwa’ uri vha bvele phanḓa vha tshi ita zwine a zwi funa.​—Vhaef. 4:8.