Mary na makalaha wawe John, a vha dzula fhethu hune ha vha na vhathu vhanzhi vhane vha bva Philippines nahone vha kona u huwelela khavho. Nga tshifhinga tsha dziedzi ḽa COVID-19, Mary o kona u thoma ngudo nnzhi dza Bivhili kha vhathu vhane vha dzula shangoni ḽahawe, u katela na kha vhathu vhane vha bva kha maṅwe mashango. O zwi kona hani?

Mary o vha a tshi vhudzisa vhathu vhane a guda navho Bivhili uri: “Vha a ḓivha muṅwe muthu ane a nga takalela u guda Bivhili?” Arali vha nga ri ee, o vha a tshi vha humbela uri vha mu thuse u kwamana nae. U vhudzisa yeneyi mbudziso yo leluwaho kanzhi zwi ita uri hu vhe na mvelelo dzavhuḓi. Ndi ngani? Ndi nga uri vhunzhi ha vhathu vhane vha funa Ipfi ḽa Mudzimu vha a takalela u vhudza mashaka avho na khonani dzavho zwine vha khou zwi guda. Ho vha na mvelelo dzifhio nge Mary a vhudzisa vhathu vhane a guda navho yeneyi mbudziso?

Muṅwe mufumakadzi ane a pfi Jasmin we a vha a tshi guda Bivhili na Mary, o ita uri Mary a kone u kwamana na vhaṅwe vhathu vhaṋa vhe na vhone vha vha vha tshi khou ṱoḓa u guda Bivhili. Muṅwe wa vhenevho vhathu u pfi Kristine, o vha a tshi khou takalela zwithu zwe a vha a tshi khou zwi guda lwe a humbela Mary uri a guda nae luvhili nga vhege. Mary o mbo ḓi vhudzisa Kristine arali a tshi ḓivha vhaṅwe vhathu vhane vha nga takalela u guda Bivhili, Kristine a ri: “Ee ndi ḓo amba na khonani dzanga uri ni kone u ambedzana navho.” Nga murahu ha vhege dzi si gathi, Kristine o ita uri Mary a kwamane na khonani dzawe nṋa vhe vha vha vha tshi khou takalela u guda. Nga murahu Kristine o dovha a ita uri Mary a kwamane na dziṅwe khonani dzawe vhe na vhone vha vha vha tshi khou ṱoḓa u guda. Vhenevho khonani dza Kristine vho ita uri Mary a kone u kwamana na vhaṅwe khonani dzavho vhe na vhone vha vha vha tshi khou ṱoḓa u guda Bivhili.

Kristine o vha a tshi ṱoḓa uri mashaka awe vhane vha vha Philippines vha gude Bivhili. Nga zwenezwo, o mbo ḓi amba na ṅwananyana wawe ane a pfi Andrea. U thomani Andrea o vha a tshi vhona u nga Ṱhanzi dza Yehova ndi vhurereli vhuṅwe-vho, a vha tendi kha Yesu na uri vha shumisa Thestamennde ya Kale fhedzi. Nga murahu ha u guda luthihi fhedzi, o mbo ḓi zwi vhona uri zwe a vha a tshi zwi humbula nga ha Dziṱhanzi a si zwone. Tshifhinga tshoṱhe musi a tshi guda zwithu zwiswa Bivhilini o vha tshi ri: “Arali zwo ambiwa Bivhilini zwi amba uri ndi zwone.”

Nga murahu ha tshifhinganyana, Andrea o mbo ḓi ita uri Mary a kwamane na khonani dzawe mbili na mushumisani wawe vhe na vhone vha thoma u guda. Musi Mary a tshi khou guda na Andrea, makhadzi wa Andrea vhe vha vha vha sa vhoni vhane vha pfi Vho Angela vho vha vha tshi vha vho thetshelesa nahone Mary o vha a sa zwi ḓivhi uri vho vha vha tshi vha vho thetshelesa. Ḽiṅwe ḓuvha makhadzi wa Andrea vho humbela Andrea uri a ambe na Mary uri na vhone vha khou ṱoḓa u guda Bivhili. Makhadzi wa Andrea vho vha vha tshi khou takalela zwe vha vha  vha tshi khou zwi guda. Musi hu sa athu fhela ṅwedzi, vho vha vho no rwela ngomani maṅwalo manzhi nahone vha tshi khou ṱoḓa u guda luṋa nga vhege. Andrea o mbo ḓi vha thusa uri vha dzule vha tshi ya miṱanganoni vha tshi shumisa videoconferencing.

Mary o mbo ḓi wanulusa uri musi a tshi guda na Kristine, munna wa Kristine u vha e hone nga henefho tsini. Nga zwenezwo, Mary o mbo ḓi vhudzisa munna wa Kristine arali a tshi nga takalela u guda. Joshua munna wa Kristine o mbo ḓi ri: “Nṋe ndi ḓo tou thetshelesa fhedzi, arali na mmbudzisa mbudziso ndi ḓo ḓiṱutshela.” Hu sa athu fhela na mimunithi miṱanu, Joshua o vha o no vhudzisa mbudziso nnzhi u fhira dze Kristine a dzi vhudzisa nahone o vha a tshi khou ṱoḓa u bvela phanḓa a tshi guda.

Nge Mary a vhudzisa yeneyo mbudziso yo leluwaho zwo ita uri a vhe na vhagudiswa vhanzhi vha Bivhili. Kha vhaṅwe vhavho o tou humbela dziṅwe Ṱhanzi uri dzi gude navho. Nga nṱhani ha uri Mary o vhudzisa yeneyo mbudziso yo leluwaho, vhathu vha 28 vha bvaho kha mashango maṋa o fhambanaho vho thoma u guda Bivhili.

Mugudiswa wa u thoma wa Mary ane a pfi Jasmin we ra amba nga hae o lovhedzwa nga April 2021. Kristine o lovhedzwa nga May 2022 nahone a humela Philippines u itela u vha na muṱa wa hawe. Vhagudiswa vhavhili vhe Kristine a ita uri vha kwamane na Mary na vhone vho lovhedzwa. Makhadzi wa Andrea Vho Angela vho lovhedzwa nga murahu ha miṅwedzi i si gathi musi Kristine o lovhedzwa nahone zwino ndi muvulanḓila wa tshifhinga tshoṱhe. Joshua munna wa Kristine na ṅwananyana wavho Andrea, na vhaṅwe vhagudiswa vha khou ita mvelaphanḓa yavhuḓi.

Tshifhingani tsha Yesu na vhaapostola, vhunzhi ha vhathu vho vhudza miṱa yavho na khonani dzavho zwithu zwe vha zwi guda nga ha Yesu. (Yoh. 1:41, 42a; Mish. 10:24, 27, 48; 16:25-33) Vhudzisani vhagudiswa vhaṋu na vhathu vhane vha takalela uri: “Naa hu na muṅwe muthu ane vha mu ḓivha ane a nga takalela u guda Bivhili?” Hu ḓivha nnyi, khamusi na inwi ni nga kha ḓi wana vhathu vhanzhi vhane na nga guda navho Bivhili arali na vhudzisa yeneyi mbudziso yo leluwaho.