1-2. Vhuimo hashu vhu fana hani na ha muṱhannga we ha ambiwa nga hae kha phara ya u thoma?

 KHA ri ri hu na muṅwe muṱhannga we a aluswa nga vhabebi vho pfumaho. Fhedzi ḽiṅwe ḓuvha vhabebi vhawe vha ṱangana na khombo vha lovha. Zwenezwo zwa ita uri a pfe vhuṱungu vhukuma. A zwo ngo fhelela henefho, u dovha a pfa maṅwe mafhungo a si avhuḓi. U wanulusa uri vhabebi vhawe vho zhaka tshelede yoṱhe na uri vho mu siela zwikolodo zwinzhi-zwinzhi. Vhabebi vhawe a vho ngo mu siela na peni. Nṱhani hazwo, u khou tea u lifha zwikolodo zwoṱhe zwa vhabebi vhawe nahone vhaṋe vha tshelede vha khou i ṱoḓa nga u ṱavhanya. A nga si vhuye a kona u badela zwenezwi zwikolodo nga ene muṋe.

² Vhuimo hashu vhu a fana na vhuimo he onoyo muṱhannga a sedzana naho. Vhabebi vhashu vha u thoma Adamu na Eva, vho vha vhe si na tshivhi nahone vha tshi khou tshila pharadisoni ya manakanaka. (Gen. 1:27; 2:7-9) Vho vha vhe na tshibuli tsha u tshila nga u ralo lwa tshoṱhe. Fhedzi zwithu zwo mbo ḓi shanduka. Adamu na Eva vho mbo ḓi ita tshivhi. Nga nṱhani ha zwenezwo, Yehova o mbo ḓi vha bvisa tsimuni ya Edeni vha xelelwa nga tshibuli tsha u tshila lwa tshoṱhe. Vhana vhavho vho wana ifa ḽifhio ḽi bvaho khavho? Bivhili i ri vhudza uri: “Tshivhi tsho dzhena shangoni nga muthu muthihi [ane a vha Adamu], tshenetsho tshivhi tsha ḓisa lufu, lufu lwa ṱanganya vhathu vhoṱhe, ngauri vhoṱhe vho tshinya.” (Vharoma 5:12) Ifa ḽe vha ri siela ḽone ndi tshivhi, tshine tsha ita uri ri fe. Tshenetsho tshivhi tshi tou nga tshikolodo tshihuluhulu,  tshine ra si kone u tshi lifha nga riṋe vhaṋe.​—Ps. 49:8.

 3. Zwivhi zwi fana hani na zwikolodo?

³ Bivhilini, tshivhi tshi fanyiswa na tshikolodo. (Mat. 18:32-35) Musi ri tshi ita tshivhi, zwi tou nga ri vha ri tshi khou koloda Yehova. Ri nga si kone u lifha tshenetsho tshikolodo nga riṋe vhaṋe nahone arali tsha sa lifhiwa, tshi ḓo phumulwa musi ri tshi fa.​—Vharoma 6:7, 23.

 4. (a) Ndi mini zwe zwa vha zwi tshi ḓo itea arali ro vha ri songo wana thuso? (Phisalema 49:7-9) (b) Ipfi “tshivhi” ḽi vha ḽi tshi khou ambela kha mini Bivhilini? (Sedzani bogisi “ Tshivhi.”)

⁴ Ri nga si kone u wana zwoṱhe zwe Adamu na Eva vha xelelwa ngazwo nga riṋe vhaṋe. (Vhalani Phisalema 49:7-9.) Arali Yehova a vhe a songo ri thusa, ro vha ri tshi ḓo vha ri si na fhulufhelo ḽa u tshila tshoṱhe tshifhingani tshi ḓaho kana ḽa u vuswa. Ro vha ri tshi ḓo fa ri si tsha dovha ra vuswa, u fana na zwine zwa itea kha zwipuka.​—Muh. 3:19; 2 Pet. 2:12.

 5. Khotsi ashu wa lufuno o ri thusa hani u lifha zwivhi zwashu? (Sedzani tshifanyiso.)

⁵ Humbulani nga ha houḽa muṱhannga we ra amba nga hae. O vha a tshi ḓo ḓipfa hani arali muṅwe munna o pfumaho a ri u ḓo mu badelela zwikolodo zwawe zwoṱhe? A zwi vhuyi zwa vhudziswa uri onoyo muṱhannga o vha a tshi ḓo takala vhukuma nahone a ṱanganedza tshenetsho tshifhiwa tsha mafunda. Nga hu fanaho, Khotsi ashu wa lufuno Yehova o ri ṋea tshifhiwa tshine tsha lifha tshivhi tshe ra tshi wana kha Adamu. Yesu o zwi vhea nga heyi nḓila: “Mudzimu o funa shango zwihuluhulu a vhuya a ṋekedza Murwa wawe muthihi fhedzi, uri ane a mu tenda a si fheliswe, fhedzi a wane vhutshilo vhu sa fheli.” (Yoh. 3:16) Zwiṅwe hafhu, tshenetshi tshifhiwa tshi ita uri zwi konadzee uri ri vhe na vhushaka ha tsini na Yehova.

 6. Ri ḓo amba nga ha mini kha ino thero nahone ndi ngani?

⁶ Ri fanela u ita mini u itela u vhuyelwa nga tshenetshi tshifhiwa tshi mangadzaho tshi itaho uri ri hangwelwe zwivhi kana uri zwikolodo zwashu zwi phumulwe? U itela u fhindula yeneyi mbudziso, ri ḓo haseledza nga ha maipfi o fhamba-fhambanaho a re Bivhilini na zwine a amba zwone. U elekanya nga ha zwe Yehova a zwi ita u itela u ri hangwela zwi ḓo ita uri ri mu livhuwe nga ho engedzeaho.

YEHOVA U ṰOḒA RI TSHI PFUMEDZANA NAE

 7. (a) Ndi mini zwiṅwe zwe Adamu na Eva vha xelelwa ngazwo? (b) Samusi ri vhana vha Adamu na Eva, ndi mini zwine ra zwi ṱoḓa? (Vharoma 5:10, 11)

⁷ Musi Adamu na Eva vha tshi ita tshivhi, zwo ita uri vha si tsha kona u tshila tshoṱhe na  uri vha si tsha vha na vhushaka havhuḓi na Yehova. Musi vha sa athu ita tshivhi, vho vha vha tshipiḓa tsha muṱa wa Yehova. (Luka 3:38) Musi vha tshi litsha u thetshelesa Yehova, vho mbo ḓi bviswa muṱani wawe nahone zwenezwo zwo itea musi vha sa athu vha na vhana. (Gen. 3:23, 24; 4:1) Samusi ri vhana vhavho, ri tea uri ri pfumedzanywe na Yehova. (Vhalani Vharoma 5:10, 11.) Nga maṅwe maipfi, ri ṱoḓa thuso uri ri vhe na vhushaka havhuḓi na Yehova. Iṅwe bugu yo amba uri ipfi ḽa Tshigerika ḽo shumiswaho henefha ḽine ḽa vha “u pfumedzana” ḽi amba “u ita uri swina ḽau ḽi vhe khonani yau.” Zwi mangadzaho ndi uri Yehova ndi ene we a thoma u ita uri ri vhe khonani dzawe. Nga nḓila-ḓe?

MUDZIMU O ITA URI ZWI KONADZEE URI RI VHE KHONANI DZAWE

 8. Ndi mini zwe Yehova a zwi ita nahone zwi ri vhuyedza hani?

⁸ Yehova o ita uri zwi konadzee uri vhathu vha re na tshivhi vha vhe khonani dzawe. O ita ndugiselelo ya uri ri wane zwe Adamu a xelelwa ngazwo nga u ri ṋea tshiṅwe tshithu tshine tsha phumula tshikolodo tsha Adamu. Vharoma 3:25 i amba uri ‘Mudzimu o ṋekedza tshipfumelelo.’ Tshenetshi tshipfumelelo tshi ita uri ri vhe na vhushaka ha tsini na Mudzimu.

 9. Yehova o ita mini uri Vhaisiraele vha kone u hangwelwa zwivhi?

⁹ Yehova o ita ndugiselelo ya tshifhinganyana ya uri a hangwele zwivhi zwa Vhaisiraele na uri vha vhe khonani dzawe. Vhaisiraele vho vha vha tshi tea u pembelela vhuṱambo ha u pfumelela ṅwaha muṅwe na muṅwe. Nga ḽeneḽo ḓuvha, tshifhe muhulu o vha a tshi ṋekedza zwiṱhavhelo zwa zwifuwo a tshi itela lushaka lwoṱhe. Fhedzi ngoho ndi ya uri, zwiṱhavhelo zwa zwifuwo zwo vha zwi sa iti uri Vhaisiraele vha pfumedzane na Mudzimu nga ho fhelelaho ngauri zwifuwo a si zwa ndeme musi zwi tshi vhambedzwa na vhathu. Naho zwo ralo, arali Muisiraele o rembuluwaho a ṋekedza zwiṱhavhelo, Yehova o vha a tshi mu hangwela zwivhi zwawe. (Vhahev. 10:1-4) Zwiṱhavhelo zwe Vhaisiraele vha vha vha tshi zwi ṋekedza nga ḓuvha ḽa u pfumelelwa na zwiṅwe zwiṱhavhelo zwe vha vha vha tshi zwi ṋekedza, zwo vha zwi tshi vha humbudza uri vha vhaitazwivhi. Zwo vha zwi tshi dovha zwa vha humbudza uri hu ṱoḓea tshiṅwe tshithu uri vha kone u hangwelwa nga ho fhelelaho.

10. Ndi mini zwe Yehova a zwi ita uri a kone u ri hangwela zwivhi?

¹⁰ Yehova o ita mini uri a kone u ri hangwela zwivhi? O ita ndugiselelo ya uri Murwa wawe ane a mu funa a ‘ḓiṋekedze luthihi nahone lwa tshoṱhe uri a hwale zwivhi zwa vhanzhi.’ (Vhahev. 9:28) Yesu o “ṋekedza vhutshilo hawe sa tshirengululi a tshi itela vhanzhi.” (Mat. 20:28) Tshirengululi ndi mini?

TSHIRENGULULI TSHO ITAHO URI RI VHE KHONANI DZA MUDZIMU

11. (a) U ya nga Bivhili, ndi ngani ro vha ri tshi ṱoḓa tshirengululi? (b) Tshirengululi tsho vha tshi tshi tea u ṋekedzwa nga muthu wa hani?

¹¹ U ya nga Bivhili, Yehova o ita phetho ya uri hu itwe tshirengululi uri vhathu vha kone u hangwelwa zwivhi na uri vha kone u vha khonani dzawe. Ho vha hu tshi ṱoḓea tshirengululi tsha hani uri vhathu vha kone u wana zwe Adamu a xelelwa ngazwo? Ni humbule uri Adamu na Eva vho xelelwa nga vhutshilo ho fhelelaho na tshibuli tsha u tshila lwa tshoṱhe. Nga zwenezwo, tshirengululi tsho vha tshi tshi tea u lingana na zwe Adamu na Eva vha xelelwa ngazwo. (1 Tim. 2:6) Tsho vha tshi tshi tea u ṋekedzwa nga munna (1) a si  na tshivhi; (2) ane a nga kona u tshila lwa tshoṱhe kha ḽifhasi; nahone (3) onoyo munna a vhe o ḓiimisela u ṋekedza vhutshilo hawe sa tshirengululi. Onoyo muthu o vha a tshi ḓo rengulula zwe Adamu a xelelwa ngazwo.

12. Ndi ngani Yesu o kona u ṋekedza tshirengululi?

¹² Kha ri haseledze zwithu zwiraru zwo itaho uri Yesu a kone u badela tshirengululi? Tsha u thoma, o vha e si na tshivhi nahone “ho ngo ita tshivhi.” (1 Pet. 2:22) Tsha vhuvhili, nga nṱhani ha uri o vha a si na tshivhi, o vha a tshi nga kona u tshila tshoṱhe kha ḽifhasi. Tsha vhuraru, o vha o ḓiimisela u fa a tshi itela riṋe. (Vhahev. 10:9, 10) Yesu o vha a tshi fana na Adamu musi Adamu a sa athu ita tshivhi. (1 Vhakor. 15:45) Nga nṱhani ha uri Yesu o ri fela, o kona u badela zwe Adamu a xelelwa ngazwo. (Vharoma 5:19) Yesu o mbo ḓi vha “Adamu wa u fhedza.” Nga zwenezwo, a zwi ṱoḓei uri hu dovhe hu ḓe muṅwe muthu a si na tshivhi uri a badele zwe Adamu a xelelwa ngazwo. Yesu o fa “luthihi nahone lwa tshoṱhe.”​—Vhahev. 7:27; 10:12.

13. Ndi phambano ifhio i re hone vhukati ha tshirengululi na u pfumedzana?

¹³ Ndi phambano ifhio i re hone vhukati ha u pfumedzana na tshirengululi? U pfumedzana ndi musi Yehova a tshi ita uri a dovhe a vhe na vhushaka havhuḓi na vhathu. Tshirengululi ndi tshone tshine tsha ita uri vhathu vha re na tshivhi vha kone u pfumedzana na Mudzimu. Tshenetshi tshirengululi ndi malofha a Yesu Kristo e a shululwa a tshi itela riṋe.​—Vhaef. 1:7; Vhahev. 9:14.

YEHOVA O RI VHOFHOLOLA KHA TSHIVHI NA LUFU A RI DZHIA SA VHO LUGAHO

14. Ri ḓo amba nga ha mini zwino nahone ndi ngani?

¹⁴ Ri vhuyelwa hani nga zwe Yehova a ri itela zwone? U itela u vhona uri ri vhuyelwa hani, ri ḓo haseledza nga ha nḓila mbili dzine Bivhili ya dzi shumisa u itela u ri thusa u vhona nḓila ine ra vhuyelwa ngayo musi a tshi ri hangwela.

15-16. (a) U rengululwa zwi amba mini Bivhilini? (b) U vhofhololwa hashu kha tshivhi na lufu zwi ita uri ri ḓipfe hani?

¹⁵ Bivhili i amba uri nga nṱhani ha uri ho ṋekedzwa tshirengululi, ro vhofhololwa kana ro rengululwa. Muapostola Petro o zwi vhea nga heyi nḓila, o ri: “Ni a zwi ḓivha uri a si siḽiva na musuku zwe zwa ni vhofholola [thevhedz., “rengulula”] kha kutshilele kwaṋu kwa mahandana kwe na ku wana kha vhomakhulukuku waṋu. Fhedzi no rengwa nga malofha a ndeme a Kristo, ane a nga a ngwana i sa solei, i si na vhadzi.”​—1 Pet. 1:18, 19; ṱms.

¹⁶ Nga nṱhani ha tshirengululi, ri nga kona u vhofhololwa kha tshivhi na lufu zwine zwa ri ṱungufhadza nga maanḓa. (Vharoma 5:21) Zwenezwo zwi ita uri ri livhuwe Yehova na Yesu nge vha ri vhofholola vha tshi shumisa malofha a Yesu.​—1 Vhakor. 15:22.

17-18. (a) Zwi amba mini u vhidzwa o lugaho? (b) Ri vhuyelwa nga mini musi Yehova a tshi ri dzhia sa vho lugaho?

¹⁷ Bivhili i amba uri vhashumeli vha Yehova vho luga. Zwenezwi zwi amba uri ha ṱoḓi ri tshi badela zwikolodo zwa zwivhi zwine ra ita. Naho a tshi ita nga u ralo, ho ngo shandula nḓila ine a haṱula ngayo. Yehova ha ri vhidzi uri ro luga nga nṱhani ha uri ri a fanelea u vhidzwa nga u ralo. Nahone musi a tshi ri ro luga, a zwi ambi uri u a ṱanganedza zwivhi zwashu. Fhedzi o ḓiimisela u ri hangwela nga nṱhani ha uri ri sumbedza u vha na lutendo kha zwe ene na Yesu Kristo vha ri itela zwone u itela u ri ṋea tshirengululi.​—Vharoma 3:24; Vhagal. 2:16.

¹⁸ Ri vhuyelwa hani musi Yehova a tshi ri dzhia sa vho lugaho? Vhe vha khethiwa uri vha ye u vhusa na Yesu Kristo ngei ṱaḓulu vha  vho dzhiiwa sa vho lugaho, sa vhana vha Mudzimu. (Tito 3:7; 1 Yoh. 3:1) Yehova o vha hangwela zwivhi zwavho. Zwi vha zwi tshi tou nga a vha tsheena mulandu na uri vha a fanelea u dzhena Muvhusoni wawe. (Vharoma 8:1, 2, 30) Vhane vha vha na fhulufhelo ḽa u tshila kha ḽifhasi na vhone vha dzhiiwa sa vho lugaho, sa khonani dza Mudzimu nahone vho hangwelwa zwivhi zwavho. (Yak. 2:21-23) Vha gogo ḽihulu vhane vha ḓo ponyoka Haramagedo, vha ḓo vha na tshibuli tsha u tshila lwa tshoṱhe vha songo vhuya vha thoma vha fa. (Yoh. 11:26) “Vho lugaho” na “vha songo lugaho” vho lovhaho vha ḓo vuswa. (Mish. 24:15; Yoh. 5:28, 29) Vhashumeli vha Mudzimu vha re kha ḽifhasi vha ḓo “ṋewa vhugala ha vhana vha Mudzimu vho vhofholowaho.” (Vharoma 8:21) Ro lavhelela nga maṱo matswuku tshifhinga tshine ra ḓo vha na vhushaka ho raliho na Khotsi ashu Yehova.

19. Vhuimo hashu ho shanduka hani nga nṱhani ha zwe Yehova na Yesu vha ri itela zwone? (Sedzani bogisi “ U Hangwelwa Nga Yehova.”)

¹⁹ Vhuimo hashu ho vha vhu tshi tou nga ha muṱhannga we ra amba nga hae, we vhabebi vhawe vha mu siela zwikolodo zwi si na vhukono zwe a vha a sa ḓo kona u zwi badela. Fhedzi Yehova o ri thusa. Zwa zwino vhuimo hashu ho shanduka ngauri Yehova o ita uri zwi konadzee uri a ri hangwele zwivhi zwashu na ngauri Yesu Kristo o ḓiṋekedza sa tshirengululi. Musi ri tshi vha na lutendo kha Yesu Kristo, zwi ita uri ri vhofhololwe kana ri rengululwe kha tshivhi na lufu. Musi Yehova a tshi ri hangwela, zwi vha zwi tshi tou nga a ro ngo vhuya ra ita zwenezwo zwivhi. Zwa ndeme vhukuma ndi uri ri vha na vhushaka havhuḓi na Khotsi ashu ane a ri funa, Yehova.

20. Ndi mini zwine ra ḓo zwi haseledza kha thero i tevhelaho?

²⁰ Musi ri tshi humbula nga ha zwe Yehova na Yesu vha ri itela zwone, zwi ita uri ri vha livhuwe vhukuma. (2 Vhakor. 5:15) Arali vha songo ri thusa, ro vha ri tshi ḓo tou pfi vha ha nnyi ngoho! Ro vha ri tshi ḓo vha ri si na fhulufhelo. Uri Yehova o ri hangwela zwivhi, zwi amba mini kha riṋe nga muthihi nga muthihi washu? Ri ḓo zwi haseledza kha thero i tevhelaho.