THERO I GUDWAHO 7
LUIMBO 15 Rendani Tanzhe Ḽa Yehova!
Ni Vhuyelwa Hani Nga Nḓila Ine Yehova A Hangwela Ngayo?
“Iwe u hangwela zwa vhukuma.”—PS. 130:4.
ZWINE RA ḒO ZWI GUDA
Ri ḓo haseledza nga ha zwiṅwe zwa zwifanyiso zwine Bivhili ya zwi shumisa u itela u sumbedza nḓila ine Yehova a hangwela ngayo. Ino thero i ḓo ri thusa uri ri livhuwe nga ho engedzeaho nḓila ine Yehova a hangwela ngayo.
1. Ndi ngani zwi tshi konḓa u ḓivha zwine muthu a vha a tshi khou zwi amba musi a tshi ri “ndo ni hangwela”?
ARALI ni tshi zwi ḓivha uri no amba kana no ita zwiṅwe zwithu zwe zwa vhaisa muṅwe, zwi a homolosa u pfa a tshi ri: “Ndo ni hangwela.” Fhedzi maipfi ane a ri “ndo ni hangwela” a vha a tshi khou amba uri mini zwa vhukuma? Khamusi onoyo muthu u vha a tshi khou amba uri inwi nae ni kha ḓi vha dzikhonani. Kana khamusi u vha a tshi khou amba uri ha tsha ṱoḓa u amba nga ha zwe zwa itea. Vhathu vha vha vha tshi khou amba zwithu zwo fhambanaho musi vha tshi ri “ndo ni hangwela.”
2. Nḓila ine Yehova a hangwela ngayo yo ṱaluswa hani Maṅwaloni? (Sedzani ṱhaluso i re magumoni a siaṱari.)
2 Nḓila ine Yehova a ri hangwela ngayo yo fhambana na nḓila ine riṋe sa vhathu ra hangwelana ngayo. A hu na muthu ane a nga hangwela u fana na Yehova. Muphisalema o amba uri: “Iwe [Yehova] u hangwela zwa vhukuma, uri u ofhiwe.” a (Ps. 130:4) Yehova u “hangwela zwa vhukuma.” Ndi ene ane a ri sumbedza uri u hangwela zwi amba mini zwa vhukuma. Kha dziṅwe ndimana dza Maṅwalo a Tshihevheru, vhaṅwali vha ṱalusa nḓila ine Yehova a hangwela ngayo vha tshi shumisa ipfi ḽine a vha ḽi shumisi musi vha tshi ṱalusa nḓila ine vhathu vha hangwela ngayo.
3. Nḓila ine Yehova a hangwela ngayo yo fhambana hani na nḓila ine riṋe ra hangwela ngayo? (Yesaya 55:6, 7)
3 Musi Yehova a tshi hangwela muthu, zwivhi zwawe zwi vha zwo phumulwa lwa tshoṱhe. Nahone onoyo muthu a nga dovha a vha na vhushaka ha tsini na Yehova. Ri livhuwa uri Yehova u ri hangwela tshoṱhe nahone u zwi ita lunzhi-lunzhi.—Vhalani Yesaya 55:6, 7.
4. Yehova u ri thusa hani uri ri pfesese nḓila ine a hangwela ngayo?
4 Samusi nḓila ine Yehova a hangwela ngayo yo fhambana na nḓila ine riṋe ra hangwela ngayo, ndi mini zwine zwa nga ri thusa u pfesesa nḓila ine a hangwela ngayo? Yehova u shumisa zwifanyiso zwavhuḓi u itela u ri thusa u pfesesa nḓila ine a hangwela ngayo. Kha ino thero, ri ḓo haseledza nga ha zwiṅwe zwa zwenezwo zwifanyiso. Zwenezwo zwifanyiso zwi ḓo ri sumbedza uri Yehova u phumula hani zwivhi zwashu nahone a dovha a vusulusa vhushaka hashu nae he ha vha ho tshinyala nga nṱhani ha tshivhi. Musi ri tshi khou haseledza nga ha zwenezwo zwifanyiso, zwi ḓo ita uri ri livhuwe nga ho engedzeaho nḓila nnzhi dzine Khotsi ashu a ri hangwela ngadzo.
YEHOVA U RI HANGWELA ZWIVHI
5. Hu itea mini musi Yehova a tshi ri hangwela zwivhi zwashu?
5 Bivhilini kanzhi zwivhi zwi fanyiswa na muhwalo u lemelaho. Musi Khosi Davida a tshi amba nga ha zwivhi zwawe, o ri: “Milandu yanga yo no vha nṱha ha ṱhoho yanga; i nga muhwalo u lemelaho, ndi minzhi vhukuma lune ndi si kone u i hwala.” (Ps. 38:4) Yehova u a hangwela vhaitazwivhi vhane vha rembuluwa. (Ps. 25:18; 32:5) Ipfi ḽa Tshihevheru ḽo ṱalutshedzelwaho nga uri “u hangwela” ḽi amba “u hwala.” Musi Yehova a tshi ri hangwela zwivhi zwashu, u vha a tshi khou ri rula muhwalo u lemelaho. Zwi vha zwi tshi tou nga ro vha ro hwala muhwalo u lemelaho kha mahaḓa ashu nahone a ḓa a ri ṱhaḓula.
“Wo nkhangwela” (Ps. 32:5)
6. Yehova u dzhia zwivhi zwashu a zwi posa kule lungafhani?
6 Bivhili i shumisa tshiṅwe tshifanyiso tshine tsha sumbedza uri Yehova u hwala zwivhi zwashu a zwi posa kule na riṋe. Phisalema 103:12 i ri: “Vhutshinyi hashu o vhu laṱa kule, vhunga vhubvaḓuvha vhu kule na vhukovhela.” Vhubvaḓuvha na vhukovhela vhu kule na kule nga maanḓa, vhu nga si vhuye ha vuwa ho ṱangana. Nga maṅwe maipfi, Yehova u dzhia zwivhi zwashu a zwi posa kule u fhira na nḓila ine riṋe ra nga humbula ngayo. Zwenezwi zwi ri khwaṱhisedza uri Yehova u ri hangwela nga ho fhelelaho.
“Vhunga vhubvaḓuvha vhu kule na vhukovhela” (Ps. 103:12)
7. Bivhili i ṱalusa hani zwine Yehova a zwi ita nga zwivhi zwashu? (Mika 7:18, 19)
7 Naho Yehova a tshi dzhia zwivhi zwashu nga lwa pfanyisedzo a zwi posa kule na riṋe, naa u dzula a tshi zwi humbula? Hai. Khosi Hiskia o ṅwala uri: ‘Wo laṱa zwivhi zwanga zwoṱhe murahu hau.’ Kana samusi ṱhaluso i re magumoni a siaṱari ya lwonolu luṅwalo i tshi sumbedza, ‘wo bvisa zwivhi zwanga zwoṱhe phanḓa hau.’ (Yes. 38:9, 17; ṱms.) Tshenetshi tshifanyiso tshi sumbedza uri Yehova u dzhia zwivhi zwa vhathu vho rembuluwaho a zwi posa kule hune a si kone u zwi vhona. Enea maipfi a nga dovha a ṱaluswa nga heyi nḓila: “Wo ita uri zwivhi zwanga zwi nge a zwo ngo vhuya zwa thoma na u itea.” Bivhili i dovha ya khwaṱhisedza yeneyi mbuno nga tshiṅwe tshifanyiso tshine tsha wanala kha Mika 7:18, 19. (Vhalani.) Yeneyi ndimana i amba uri Yehova u posa zwivhi zwashu dzivhani ḽa lwanzhe. Zwifhingani zwa kale, zwo vha zwi sa konadzei uri muthu a tevhele tshithu tshine tsha vha fhasi-fhasi lwanzheni.
“Wa laṱela zwivhi zwanga zwoṱhe murahu hau” (Yes. 38:17)
“U ḓo laṱa zwivhi zwashu dzivhani ḽa lwanzhe” (Mika 7:19)
8. Ndi mini zwine ro no zwi guda u swika zwino?
8 Bivhili i bvisela khagala uri musi Yehova a tshi ri hangwela, u ri hangwela nga ho fhelelaho nahone ra sala ri si tsha tea u ḓivhona mulandu. Na Davida o amba uri: “Hu takala vhe vha hangwelwa vhutshinyi havho na vhe zwivhi zwavho zwa fukedzwa; hu takala ane Yehova a sa ḓo vhuya a humbula zwivhi zwawe.” (Vharoma 4:6-8) Zwenezwo ndi hone u hangwelwa ha vhukuma.
YEHOVA U PHUMULA ZWIVHI ZWASHU
9. Bivhili i shumisa zwifanyiso zwifhio u itela u ri thusa u vhona uri Yehova u hangwela nga ho fhelelaho?
9 Yehova o shumisa tshiṅwe tshifanyiso u itela u ri thusa uri ri livhuwe nḓila ine a hangwela ngayo vhathu vho rembuluwaho a tshi shumisa tshirengululi. Bivhilini ri vhala uri Yehova u ṱanzwa na u kunakisa zwivhi zwashu. Zwenezwi zwi ita uri muthu o khakhaho a sale o kuna. (Ps. 51:7; Yes. 4:4; Yer. 33:8) Musi Yehova a tshi ṱalutshedza zwine zwa itea musi muthu a tshi hangwelwa zwivhi, u ri: “Naho zwivhi zwaṋu zwo tswuka sa malofha, zwi ḓo tshena u fana na mahaḓa; naho zwo tswuka sa labi ḽitswuku, zwi ḓo tshena u fana na wuḽu.” (Yes. 1:18) Zwi a konḓa u kuvha na u bvisa dondo ḽitswuku kha tshiambaro. Yehova u shumisa tshenetshi tshifanyiso u itela u ri khwaṱhisedza uri zwivhi zwashu zwi nga ṱanzwiwa zwa sala zwo kuna, zwa tou nga a zwo ngo vhuya zwa thoma na u vha hone.
“Naho zwivhi zwaṋu zwo tswuka sa malofha, zwi ḓo tshena u fana na mahaḓa” (Yes. 1:18)
10. Bivhili i ṱalusa hani mafunda ane Yehova a a sumbedza musi a tshi ri hangwela?
10 Samusi ro amba nga hazwo kha thero yo fhiraho, zwivhi zwi fanyiswa na “zwikolodo.” (Mat. 18:32-35) Nga zwenezwo, tshifhinga tshoṱhe musi ri tshi ita tshivhi, zwi vha zwi tshi tou nga tshikolodo tshashu tshi khou engedzea. Ri na tshikolodo tshihulu. Fhedzi, musi Yehova a tshi ri hangwela, zwi vha zwi tshi tou nga u khou phumula tshenetsho tshikolodo tshi si tsha vha hone. Ha ri kombetshedzi uri ri badele zwivhi zwe a ri hangwela zwone. Samusi muthu a tshi takala musi tshikolodo tshawe tshi tshi phumuliwa, na riṋe ri a takala musi Yehova a tshi ri hangwela.
“Ndo phumula zwikolodo zwau zwoṱhe” (Mat. 18:32)
11. Zwi amba mini musi hu tshi pfi zwivhi zwashu zwo ‘phumulwa’? (Mishumo 3:19, ṱms)
11 Yehova u phumula zwikolodo zwashu kana zwivhi zwashu lwa tshoṱhe. (Vhalani Mishumo 3:19 na ṱhaluso i re magumoni a siaṱari.) U itela u fanyisa zwenezwi, humbulani nga ha muthu ane a hwaya tshikolodo tshaṋu kha bugu ya zwikolodo. Naho o hwaya tshenetsho tshikolodo, nomboro dzo ṅwalwaho nga fhasi dzi vha dzi tshi kha ḓi vhonala. Fhedzi u phumula tshithu zwo fhambana na zwenezwo. U itela uri ri kone u pfesesa tshenetshi tshifanyiso, ri tea u humbula uri tshifhingani tsha kale, inki ye ya vha i tshi shumiswa, zwo vha zwo leluwa u i phumula u tshi shumisa tshipontshi na maḓi. Nga zwenezwo, musi tshikolodo tsho phumulwa, tsho vha tshi si tsha vhonala. Zwe zwa vha zwo ṅwalwa zwa sala zwi si tsha vhonala na luthihi. Zwi vha zwi tshi tou nga tshenetsho tshikolodo a tshi ngo vhuya tsha thoma tsha vha hone. Ri a livhuwa vhukuma u ḓivha uri musi Yehova a tshi ri hangwela zwivhi zwashu, zwi vha zwi tshi tou nga a ro ngo vhuya ra thoma ra zwi ita.—Ps. 51:9.
“Uri zwivhi zwaṋu zwi phumulwe” (Mish. 3:19, ṱms.)
12. Ndi mini zwine ra zwi guda kha tshifanyiso tsha gole ḽitswu?
12 Yehova u shumisa tshifanyiso tshi fanaho musi a tshi ṱalusa nḓila ine a phumula ngayo zwivhi zwashu. O ri: “Ndi ḓo phumula vhutshinyi hau ha tou nga ho fukedzwa nga gole. Zwivhi zwau zwa tou nga zwo fukedzwa nga gole ḽitswu.” (Yes. 44:22) Musi Yehova a tshi ri hangwela, zwi vha zwi tshi tou nga u khou shumisa gole ḽitswu u itela u dzumba kana u ita uri vhukhakhi hashu vhu si tsha dovha ha vhonala.
“Ndi ḓo phumula vhutshinyi hau ha tou nga ho fukedzwa nga gole” (Yes. 44:22)
13. Musi Yehova a tshi ri hangwela zwivhi, zwi ita uri ri ḓipfe hani?
13 Zwenezwi zwi ri gudisa mini? Musi Yehova a tshi ri hangwela zwivhi, a ro ngo tea u sala ri tshi khou ḓivhona mulandu lwa vhutshilo hashu hoṱhe. O phumula zwivhi zwashu lwa tshoṱhe a tshi shumisa malofha a Yesu Kristo. Musi Yehova a tshi ri hangwela tshivhi, zwi vha zwi tshi tou nga a ro ngo vhuya ra thoma na u ita tshenetsho tshivhi. Musi ri tshi rembuluwa kha zwivhi zwashu, yeneyo ndi yone nḓila ine Yehova a ri hangwela ngayo.
YEHOVA U ITA URI RI DOVHE RI VHE KHONANI DZAWE
Nḓila ine Yehova a ri hangwela ngayo i ita uri ri dovhe ri vhe na vhushaka ha tsini nae (Sedzani phara 14)
14. Ndi ngani ri tshi nga fhulufhela uri Yehova o ri hangwela tshoṱhe? (Sedzani zwifanyiso.)
14 Musi Yehova a tshi ri hangwela, ri nga vha na vhungoho ha uri ri nga dovha ra vha khonani dzawe. Nga nṱhani ha uri Yehova u ri hangwela nga ho fhelelaho, a ro ngo tea u bvela phanḓa ri khou ḓivhona mulandu. A ro ngo tea u tshuwa uri khamusi Yehova u tshee o ri sinyutshela nahone u khou ṱoḓa nḓila ya u ri pfisa vhuṱungu. Zwenezwo zwi nga si vhuye zwa itea. Ndi ngani ri tshi nga fhulufhela Yehova musi a tshi ri o ri hangwela? Yehova o vhudza muporofita Yeremia uri: “Ndi ḓo vha hangwela vhukhakhi havho, a thi tsha ḓo humbula zwivhi zwavho.” (Yer. 31:34) Muapostola Paulo o redza eneo maipfi ane a ri: “A thi tsha ḓo humbula zwivhi zwavho.” (Vhahev. 8:12) Fhedzi zwenezwi zwi amba mini zwa vhukuma?
“A thi tsha ḓo humbula zwivhi zwavho” (Yer. 31:34)
15. Zwi amba mini uri Yehova ha tsha ḓo dovha a humbula zwivhi zwashu?
15 Bivhilini ipfi ‘humbula’ a ḽi dzuleli u ambela kha u humbula tshiṅwe tshithu kana u humbula nga hatsho. Ḽi nga ambela na kha uri onoyo muthu u ḓo ita zwiṅwe zwithu. Sa tsumbo, tshigevhenga tshe tsha vha tsho ombelwa tsini na Yesu tsho humbela Yesu uri: “Yesu, u nkhumbule musi u tshi dzhena Muvhusoni wau.” (Luka 23:42, 43) Onoyo munna o vha a tshi khou humbela uri Yesu a mu itele zwiṅwe zwithu nga tshenetsho tshifhinga. Yesu o vhudza onoyo munna uri u ḓo mu vusa. Nga zwenezwo, musi Yehova a tshi amba uri ha tsha ḓo dovha a humbula zwivhi zwashu, u vha a tshi khou amba uri o ri hangwela na uri ha tsha ḓo dovha a ri ṱarafa tshifhingani tshi ḓaho.
16. Bivhili i ṱalusa hani mbofholowo ine ra i wana musi ri tshi hangwelwa?
16 Musi Yehova a tshi ri hangwela, ri pfa ro vhofholowa. Bivhili i shumisa tshiṅwe tshifanyiso u itela u ri thusa u pfesesa zwenezwo. Nga nṱhani ha uri ri vhathu vhane vha vha na tshivhi na uri ri dzulela u ita tshivhi, ri tou nga “phuli dza tshivhi.” Fhedzi musi Yehova a tshi ri hangwela, ri tou nga phuli dzo ‘vhofhololwaho kha tshivhi.’ (Vharoma 6:17, 18; Nzumb. 1:5) Musi ri tshi ḓivha uri Yehova o ri hangwela, ri ḓo kona u takala sa phuli yo vhofhololwaho.
“No vhofhololwa kha tshivhi” (Vharoma 6:18)
17. U hangwelwa zwi fana hani na u fhodzwa? (Yesaya 53:5)
17 Vhalani Yesaya 53:5. Tshifanyiso tsha u fhedzisela tshi ri fanyisa na muthu a re na vhulwadze vhune ha vhulaya. Nga nṱhani ha tshirengululi tsha Yesu Kristo, Yehova o ri fhodza nga lwa pfanyisedzo. (1 Pet. 2:24) Musi ri tshi ita tshivhi, ri vha ri tshi khou tshinya vhushaka hashu na Yehova. Fhedzi Yehova u shumisa tshirengululi u itela u ri hangwela na u ita uri ri dovhe ri vhe na vhushaka havhuḓi nae. Samusi na muthu we a fhodzwa vhulwadze vhune ha vhulaya a tshi takala vhukuma, na riṋe ri a takala musi ri tshi dovha ra vha na vhushaka havhuḓi na Yehova na u dovha ra takalelwa ngae.
“Ro fhodzwa nga mbonzhe dzawe” (Yes. 53:5)
NḒILA INE U HANGWELWA NGA YEHOVA ZWA KWAMA NGAYO VHUTSHILO HASHU
18. Ro guda mini kha zwifanyiso zwo fhambanaho zwi re Bivhilini zwi ambaho nga ha nḓila ine Yehova a hangwela ngayo? (Sedzani bogisi “Nḓila Ine Yehova A Ri Hangwela Ngayo.”)
18 Ndi mini zwe na zwi guda musi ri tshi khou haseledza nga ha zwifanyiso zwi re Bivhilini zwi ambaho nga ha nḓila ine Yehova a hangwela ngayo? Musi Yehova a tshi ri hangwela zwivhi, u ri hangwela nga ho fhelelaho nahone tshoṱhe. Zwenezwi zwi ita uri zwi konadzee uri ri vhe na vhushaka ha tsini na Khotsi ashu wa ṱaḓulu. Naho zwo ralo, ri a zwi ḓivha uri u hangwelwa nga Yehova ndi tshifhiwa tshine a ri ṋea nga nṱhani ha uri u a ri funa na uri u na mafunda, hu si nga nṱhani ha uri ri a fanelea u hangwelwa.—Vharoma 3:24.
19. (a) Ndi mini zwine ra zwi livhuwa? (Vharoma 4:8) (b) Ndi mini zwine ra ḓo zwi haseledza kha thero i tevhelaho?
19 Vhalani Vharoma 4:8. Ri a livhuwa vhukuma uri Yehova u a ri hangwela. (Ps. 130:4) Fhedzi arali ri tshi ṱoḓa Yehova a tshi ri hangwela, na riṋe ri tea u ita zwiṅwe zwithu zwa ndeme. Yesu o amba uri: “Arali ni sa hangweli vhathu zwe vha tshinya, na Khotsi aṋu wa ṱaḓulu ha nga ni hangweli.” (Mat. 6:14, 15) Nga zwenezwo, ri tea u edzisa Yehova nga u hangwela vhaṅwe. Ri nga zwi itisa hani zwenezwo? Thero i tevhelaho i ḓo haseledza nga ha uri ri nga zwi ita hani.
LUIMBO 46 Ri A U Livhuwa, Yehova
a Nḓila ine maipfi a Tshihevheru a ṱalusa ngayo u hangwela i sumbedza uri Yehova u hangwela zwa vhukuma nahone nḓila ine a hangwela ngayo yo fhambana na nḓila ine riṋe ra hangwela ngayo.
