1. Yehova o sika vhathu vhe na vhukoni vhufhio vhu mangadzaho?

YEHOVA o sika vhathu vhe na vhukoni vhu mangadzaho. O ri ṋea vhukoni ha u humbula u itela u tandulula thaidzo na u dzudzanya vhumatshelo. (Mir. 2:11) O ri ṋea maanḓa a uri ri kone u ita zwe ra dzudzanya na u swikelela zwipikwa zwashu. (Vhafil. 2:13) O dovha a ri sika ri na luvalo lune lwa ri thusa u iledza u ita zwithu zwo khakheaho na u khakhulula vhukhakhi hashu musi ri tshi khakha.—Vharoma 2:15.

2. Yehova u lavhelela uri ri shumise hani vhukoni hashu?

² Yehova u lavhelela uri ri shumise vhukoni hashu nga nḓila yavhuḓi. Ndi ngani? Ngauri u a ri funa nahone u a ḓivha uri ri ḓo takala musi ri tshi shumisa tshifhiwa tshe a ri ṋea tshone. A tshi shumisa Ipfi ḽawe, Yehova u ri ṱuṱuwedza lunzhi uri ri shumise vhukoni hashu nga nḓila yavhuḓi. Sa tsumbo, ri vhala zwi tevhelaho kha Maṅwalo a Luheberu: “Ngelekanyo dza mushumi a dzi shayi bindu”; nahone “zwoṱhe zwine tshanḓa tshau tsha zwi kona, U zwi ite, nga maanḓa au.” (Mir. 21:5; Muh. 9:10) Maṅwalo a Tshikriste a Lugerika a ri: “Samusi ri na tshibuli, kha ri itele vhathu vhoṱhe zwivhuya”;  nahone “u ya nga he muṅwe na muṅwe a wana tshifhiwa, tshi shumiseni u itela u shumelana.” (Vhagal. 6:10; 1 Pet. 4:10) Vhukuma, Yehova u ṱoḓa ri tshi ita zwoṱhe zwine ra nga kona u itela u ḓivhuyedza na u vhuyedza vhaṅwe.

3. Ndi mini zwine vhathu vha si kone u zwi ita?

³ Naho zwo ralo, Yehova u a ḓivha uri hu na zwine ra si kone u zwi ita. Nga riṋe vhane, ri nga si kone u fhelisa u sa fhelela, tshivhi na lufu; nahone ri nga si kone u langa vhaṅwe vhathu ngauri muṅwe na muṅwe u na mbofholowo ya u ḓikhethela. (1 Dzikh. 8:46) Hu sa londwi uri ri na nḓivho kana tshenzhelo nngafhani, ri ḓo dzula ri tshi nga vhana kha Yehova.—Yes. 55:9.

4. Ndi mini zwine ra ḓo zwi haseledza kha ino thero?

⁴ Kha vhuimo hoṱhe, ri fanela u ḓitika nga vhulivhisi ha Yehova ri tshi fulufhela uri u ḓo ri tikedza na u ri itela zwithu zwine ra si kone u zwi ita. Fhedzi ri fanela u ita zwoṱhe zwine ra nga kona nga u dzhia maga o teaho u itela u tandulula thaidzo na u thusa vhaṅwe. (Vhalani Psalme ya 37:3.) Zwenezwi zwi amba uri ri fanela u ‘fulufhela Yehova na u ita zwivhuya’; nahone ri fanela u fulufhedzea. Kha ri ṱhogomele zwine ra nga zwi guda kha tsumbo ya Noaxe, Davida na vhaṅwe vhashumeli vha Mudzimu vha fulufhedzeaho vhe vha ḓitika nga Yehova na u ita zwithu zwo teaho. Samusi ri tshi ḓo zwi vhona, ho vha hu na zwithu zwe vha vha vha sa koni u zwi ita, fhedzi vho livhisa ṱhogomelo kha zwe vha vha vha tshi kona u zwi ita.

5. Ṱalusani vhuimo he Noaxe a vha o sedzana naho.

⁵ Noaxe o tshila misini ye shango ḽa vha ḽo “ḓala zwa mavemu” na u ḓifara luvhi. (Gen. 6:4, 9-13) O vha a tshi zwi ḓivha uri mafheleloni Yehova u ḓo fhelisa vhathu vhavhi kha ḽeneḽo shango. Naho zwo ralo, khamusi Noaxe o vha o tsikeledzea nga zwithu zwe vhathu vha vha vha tshi khou zwi ita. Kha honoho vhuimo, Noaxe o ṱhogomela uri hu na zwithu zwine a nga si kone u zwi ita na zwine a nga kona u zwi ita.

6, 7. (a) Ndi mini zwe Noaxe a vha a sa koni u zwi ita? (b) Vhuimo hashu vhu fana hani na ha misini ya Noaxe?

⁶ Zwe Noaxe a vha a sa koni u zwi ita: Naho Noaxe o huwelela mulaedza wa Yehova nga u fulufhedzea, ho ngo kona u kombetshedza vhaitazwivhi vhe vha vha vho mu tanga uri vha ṱanganedze wonoyo mulaedza nahone ho  ngo kona u ita uri Maḓi Mahulu a ḓe nga u ṱavhanya. Noaxe o vha a tshi fanela u fulufhela uri Yehova u ḓo fhelisa vhaitazwivhi samusi o fulufhedzisa nahone o vha a tshi fanela u tenda uri Mudzimu u ḓo ita zwenezwo nga tshifhinga tsho teaho.—Gen. 6:17.

⁷ Na riṋe ri khou tshila shangoni ḽo ḓalaho vhaitazwivhi nahone ri a ḓivha uri Yehova o fulufhedzisa uri u ḓo vha fhelisa. (1 Yoh. 2:17) Fhedzi zwino ri nga si kone u kombetshedza vhathu uri vha ṱanganedze “mafhungo maḓifha” a Muvhuso. Nahone a huna zwine ra nga kona u zwi ita u itela uri “maṱungu mahulu” a ṱavhanye u ḓa. (Mat. 24:14, 21) U fana na Noaxe, ri fanela u vha na lutendo lwo khwaṱhaho nahone ri fulufhele uri hu si kale Mudzimu u ḓo dzhenelela. (Ps. 37:10, 11) Ri na vhungoho ha uri Yehova o vhea ḓuvha ḽine a ḓo fhelisa ngaḽo vhaitazwivhi nahone ḽeneḽo ḓuvha ḽi nga si shanduke.—Hab. 2:3.

8. Noaxe o livhisa hani ṱhogomelo kha zwe a vha a tshi kona u zwi ita? (Sedzani tshifanyiso tsha u thoma.)

⁸ Zwe Noaxe a vha a tshi kona u zwi ita: Nṱhani ha u laṱela thaula kha zwe a vha a sa koni u zwi ita, Noaxe o livhisa ṱhogomelo kha zwe a vha a tshi kona u zwi ita. Samusi Noaxe o vha a tshi “huwelela nga ha u luga,” o vhudza vhathu nga ha mulaedza we a vha o ṋewa wone. (2 Pet. 2:5) A zwi timatimisi uri zwe Noaxe a zwi ita zwo ita uri lutendo lwawe lu dzule lwo khwaṱha. O dovha a shumisa vhukoni hawe u fhaṱa gungwa samusi Mudzimu o mu vhudza uri a ite zwenezwo.—Vhalani Vhaheberu 11:7.

9. Ri nga edzisa hani tsumbo ya Noaxe?

⁹ U fana na Noaxe, ri lwela u vha na “zwinzhi zwine [ra] zwi ita mushumoni wa Murena.” (1 Vhakor. 15:58) Wonoyo mushumo u katela u fhaṱa na u lugisa zwifhaṱo zwa vhurabeli, u tikedza maguvhangano na mabuthano kana u shuma ofisini ya davhi kana ofisini ya u ṱalutshedzela. Zwiṅwe hafhu, ri dzula ro farakanea kha mushumo wa u huwelela nahone ri a ḓivha uri wonoyo mushumo u khwaṱhisa fulufhelo ḽashu ḽa vhumatshelo. Muṅwe wahashu wa tshisadzini o ri: “Musi ni tshi vhudza vhaṅwe nga ha phaṱhutshedzo dza Muvhuso wa Mudzimu, ni ṱhogomela uri vhathetshelesi vhaṋu a vha na fulufhelo na ḽithihi nahone vha vhona thaidzo dzavho dzi si na thandululo.” Vhukuma, u shela mulenzhe kha mushumo wa u huwelela zwi ita uri ri vhe na fulufhelo ḽo khwaṱhaho nga ha vhumatshelo nahone zwi ita uri ri dzule ri kha mbambe ya vhutshilo.—1 Vhakor. 9:24.

10. Ṱalusani vhuimo he Davida a sedzana naho.

¹⁰ Yehova o ṱalusa Khosi Davida sa “munna ane mbilu yawe ya tendelana na [yawe].” (Mish. 13:22) Davida o vha a tshi fulufhedzea. Naho zwo ralo, kha vhuṅwe vhuimo Davida o ita tshivhi tshihulwane. O ita vhuṱonḓolo na Batseba. U ṋaṋisa zwenezwo, o lingedza u dzumba mafhungo nga u dzudzanya uri munna wawe Uria a vhulahwe nndwani. O dovha a ita uri Uria a ise luṅwalo lune lwa sumbedza nḓila ine a fanela u vhulahwa ngayo nndwani! (2 Sam. 11:1-21) Mafheleloni, zwivhi zwa Davida zwo bvela khagala. (Marko 4:22) Musi zwenezwo zwi tshi itea, Davida o ita mini?

11, 12. (a) Musi Davida o ita tshivhi, ndi mini zwe a vha a sa koni u zwi ita? (b) Arali ra rembuluwa musi ro ita vhukhakhi vhuhulwane, ri nga fulufhela uri Yehova u ḓo ri itela mini?

¹¹ Zwe Davida a vha a sa koni u zwi ita: Davida ho ngo kona u itulula zwe a zwi ita. Nahone ho ngo kona u ponya masiandoitwa a vhukhakhi hawe. Zwi re zwone ndi uri maṅwe a masiandoitwa a zwe Davida a zwi ita o tshila nao vhutshilo hawe hoṱhe. (2 Sam. 12:10-12, 14) Nga zwenezwo, o vha a tshi fanela u vha na lutendo. O vha a tshi fanela u tenda uri arali a rembuluwa zwa vhukuma, Yehova u ḓo mu hangwela na u mu thusa u konḓelela masiandoitwa a vhukhakhi hawe.

¹² Roṱhe ri a khakha ngauri a ro ngo fhelela. Vhuṅwe vhukhakhi ndi vhuhulwane u fhira vhuṅwe. Kha vhuṅwe vhuimo, ri nga si kone u itulula vhukhakhi hashu. Ri nga fanela u tshila na masiandoitwa. (Vhagal. 6:7) Fhedzi ri fulufhela zwe Yehova a zwi amba nahone ri fulufhela uri arali ra rembuluwa, Yehova u ḓo ri tikedza kha vhuimo vhu konḓaho naho honoho vhuimo vhu masiandoitwa a zwe ra zwi ita.—Vhalani Yesaya 1:18, 19; Mishumo 3:19.

13. Davida o dovha hani a vha na vhushaka havhuḓi na Yehova?

¹³ Zwe Davida a vha a tshi kona u zwi ita: Davida o tendela Yehova a tshi mu thusa uri a dovhe a vhe na vhushaka havhuḓi nae. Iṅwe nḓila ye a ita ngayo zwenezwo ndi nga u tenda u khakhululwa nga muporofita Nathani muimeleli wa Yehova. (2 Sam. 12:13) Davida o dovha a rabela Yehova zwi tshi bva mbiluni, a bula zwivhi zwawe na u humbela uri u ṱoḓa u dovha a vha na vhushaka havhuḓi na Yehova. (Ps. 51:1-17) Nṱhani ha u dzula a tshi ḓisola, Davida o guda kha vhukhakhi hawe. Ho ngo dovholola tshenetsho tshivhi tshihulwane. Nga murahu ha miṅwaha minzhi, o fa a tshi fulufhedzea nahone Yehova u mu humbula ngazwo.—Vhaheb. 11:32-34.

14. Ndi mini zwine ra nga zwi guda kha tsumbo ya Davida?

¹⁴ Ndi mini zwine ra nga zwi guda kha tsumbo ya Davida? Arali ra ita tshivhi tshihulwane, ri fanela u rembuluwa zwi tshi bva mbiluni na u humbela uri Yehova a ri hangwele. Ri fanela u bula zwivhi zwashu khae. (1 Yoh. 1:9) Ri fanela u dovha ra amba na vhahulwane nahone vha ḓo ri thusa nga lwa muya. (Vhalani Yakobo 5:14-16.) Musi ri tshi ṱanganedza thuso ya Yehova, ri vha ri tshi khou sumbedza uri ri fulufhela mafulufhedziso awe a uri u ḓo ri khuthadza na u ri hangwela. Zwi ḓo vha zwavhuḓi u guda kha vhukhakhi hashu, u kandela phanḓa tshumeloni ya Yehova na u lavhelela vhumatshelo nga maṱo matswuku.—Vhaheb. 12:12, 13.

15. Ndi mini zwine ra zwi guda kha tsumbo ya Hanna?

¹⁵ Khamusi ni humbula nga ha vhaṅwe vhashumeli vha kale vha fulufhedzeaho vhe vha fulufhela Yehova ngeno vha tshi khou ita zwo teaho. Sa tsumbo, Hanna o vha a sa koni u shandula vhuimo hawe ha u sa vha na vhana. Fhedzi o vha a tshi fulufhela uri Yehova u ḓo mu khuthadza, nga zwenezwo, o bvela phanḓa a tshi mu gwadamela thembeleni na u mu tevhulela zwi re mbiluni yawe nga thabelo. (1 Sam. 1:9-11) Naa yeneyo a si tsumbo yavhuḓi  kha riṋe? Musi ri na thaidzo dza mutakalo kana vhuṅwe vhuimo vhune ra si kone u vhu shandula, ri hwesa Yehova mbilaelo dzashu ri tshi fulufhela uri u na ndavha na riṋe. (1 Pet. 5:6, 7) Nahone ri ita zwoṱhe zwine ra nga kona uri ri vhuyelwe nga miṱangano ya Vhukriste na dziṅwe ndugiselelo dza lwa muya.—Vhaheb. 10:24, 25.

16. Vhabebi vha nga guda mini kha Samuele?

¹⁶ Hu pfi mini nga vhabebi vha fulufhedzeaho vhane vha vha na vhana vhe vha litsha u shumela Yehova? Samuele we a vha o no kalaha ho ngo kona u kombetshedza vhana vhawe uri vha dzule vha tshi fulufhedzea kha zwilinganyo zwo lugaho zwe a vha funza zwone. (1 Sam. 8:1-3) O vha a tshi fanela u zwi litshelela zwanḓani zwa Yehova. Naho zwo ralo, Samuele o bvela phanḓa a tshi fulufhedzea na u takadza Khotsi awe wa ṱaḓulu Yehova. (Mir. 27:11) Ṋamusi, vhabebi vhanzhi vha Vhakriste vha kha vhuimo vhu fanaho na ha Samuele. U fana na tshifanyiso tsha khotsi we a vha e na murwa wa ḽihwarahwara, vhabebi vha fulufhela uri Yehova o ḓiimisela u hangwela vhaitazwivhi vhane vha rembuluwa. (Luka 15:20) Naho zwo ralo, vhenevho vhabebi vha ita zwoṱhe zwine vha nga kona uri vha dzule vha tshi fulufhedzea kha Yehova nahone vha fulufhela uri tsumbo yavho i ḓo sudzulusa vhana vhavho uri vha humele kha Yehova.

17. Ndi ngani tsumbo ya mufumakadzi a shayaho i tshi ṱuṱuwedza?

¹⁷ Dovhani ni humbule nga ha tshilikadzi i shayaho ya misini ya Yesu. (Vhalani Luka 21:1-4.) Ho vha hu si na zwine onoyo mufumakadzi a nga kona u zwi ita nga ha zwithu zwi si zwavhuḓi zwe zwa vha zwi tshi khou itwa thembeleni. (Mat. 21:12, 13) Nahone o vha a sa koni u khwinisa vhuimo hawe ha zwa masheleni. Naho zwo ralo, o ṋeela nga u ḓifunela “zwipeni zwivhili” zwe zwa vha zwi “zwoṱhe zwe a vha a tshi ḓitshidza ngazwo.” Onoyo mufumakadzi a fulufhedzeaho o sumbedza u fulufhela Yehova zwi tshi bva mbiluni a tshi ḓivha uri arali a vhea zwithu zwa muya u thoma, Yehova u ḓo ṱhogomela zwishaiwa zwawe. Fulufhelo ḽa onoyo mufumakadzi ḽo mu sudzulusela uri a tikedze nzudzanyo ya vhurabeli ha ngoho. Nga hu fanaho, na riṋe ri fulufhela uri arali ra vhea Muvhuso u thoma, Yehova u ḓo ita vhungoho ha uri ri wana zwine ra zwi shaya.—Mat. 6:33.

18. Ṋeani tsumbo ya mushumeli wa Yehova we a vha e na mavhonele avhuḓi.

¹⁸ Musalauno, vhunzhi ha vhatendi nga riṋe vho ita zwi fanaho nga u fulufhela Yehova nahone vho ita zwo teaho. Ṱhogomelani tsumbo ya Malcolm we a dzula a tshi fulufhedzea u swika a tshi fa nga 2015. Lwa miṅwaha i fhiraho ḓana musi ene na mufumakadzi wawe vha tshi khou shumela Yehova, vho sedzana na khaedu nnzhi. O ri: “Vhutshilo vhu a konḓa nga zwiṅwe zwifhinga nahone zwi a konḓa u sedzana naho. Fhedzi Yehova u fhaṱutshedza vhane vha ḓitika ngae.” Malcolm o ṋea nyeletshedzo ifhio? O ri: “Rabelani uri ni ite mvelaphanḓa na u fhisea tshumeloni ya Yehova nga hune na nga kona ngaho. Livhisani ṱhogomelo kha zwine na kona u zwi ita, hu si zwine na si kone u zwi ita.” *

19. (a) Ndi ngani ndimana yashu ya ṅwaha wa 2017 yo tea? (b) Ni ḓo shumisa hani ndimana yashu ya ṅwaha wa 2017 vhutshiloni haṋu?

¹⁹ Samusi ano maitele a zwithu a tshi khou “ṋaṋa,” ri nga lavhelela u sedzana na vhuimo vhu konḓaho vhukuma. (2 Tim. 3:1, 13) Nga zwenezwo, ndi zwa ndeme u fhira naho hu lini u sa tendela thaidzo dzine ra sedzana nadzo dzi tshi ri kula nungo. Nṱhani hazwo, ri fanela u ṱahulela u fulufhela Yehova nga ho engedzeaho, ngeno ri tshi khou ita zwoṱhe zwine ra nga kona u ita zwo teaho. Ndi ngazwo ndimana yashu ya ṅwaha wa 2017 i na tshiṱoho tshine tsha ri: “Fulufhedza Yehova, U ite zwivhuya”!—Ps. 37:3.