1, 2. Yehova u ri sumbedza hani mafunda?

YEHOVA ndi Mudzimu ane a vha na mafunda. Zwoṱhe zwine ra vha nazwo ndi zwawe. Maseṱha na musuku u katela na zwithu zwoṱhe zwi re kha ḽifhasi ndi zwa Yehova nahone u zwi shumisa u itela uri zwivhumbwa zwawe zwi kone u tshila. (Ps. 104:13-15; Hag. 2:8) Bivhili i na mafhungo manzhi ane a amba nga ha nḓila ye Yehova a shumisa ngayo zwenezwi zwithu nga lwa vhuṱolo u itela u thusa vhathu vhawe.

² Lwa miṅwaha ya 40, Yehova o ṋea lushaka lwa Isiraele mana na maḓi musi vhe sogani. (Ek. 16:35) Nga zwenezwo, a vho ngo “shaya” tshithu. (Neh. 9:20, 21) Yehova o shumisa muporofita Elisa uri a ite uri tshilikadzi i fulufhedzeaho i vhe na mapfura manzhi nga lwa vhuṱolo. Tshenetsho tshifhiwa tsho ita uri yeneyo tshilikadzi i kone u badela zwikolodo zwayo nahone ya sala na tshelede yo linganaho ine ya nga kona u i shumisa na vharwa vhayo. (2 Dzikh. 4:1-7) Yehova o thusa Yesu uri a ite uri hu vhe na tshelede na u ita uri a fushe vhathu nga zwiḽiwa nga lwa vhuṱolo musi zwi tshi ṱoḓea.—Mat. 15:35-38; 17:27.

3. Ri ḓo haseledza mini kha ino thero?

³ Yehova a nga shumisa tshiṅwe na tshiṅwe u itela u tikedza tsiko  yawe i re kha ḽifhasi. Naho zwo ralo, u kha ḓi humbela vhashumeli vhawe uri vha shumise zwithu zwavho zwi vhonalaho u itela u tikedza mushumo une wa itwa nga ndangulo yawe. (Ek. 36:3-7, vhalani Mirero 3:9.) Ndi ngani Yehova a tshi lavhelela uri ri mu ṋee zwithu zwashu zwa ndeme zwe a ri ṋea zwone? Vhashumeli vha Yehova vha fulufhedzeaho vha tshifhingani tsho fhiraho, vho tikedza hani nga tshelede mushumo we wa vha u tshi itwa nga vhathu vhawe? Ndangulo i shumisa hani tshelede ine ya ṋeelwa ṋamusi? Ino thero i ḓo fhindula dzenedzi mbudziso.

4. Musi ri tshi tikedza mushumo wa Yehova, ri vha ri khou sumbedza mini?

⁴ Ri ṋea Yehova ngauri ri a mu funa na u mu livhuwa. Musi ri tshi humbula nga ha zwoṱhe zwe Yehova a ri itela zwone, ri a fhelelwa na nga maipfi. Musi Khosi Davida a tshi ṱalutshedza nga ha zwe zwa vha zwi tshi ṱoḓea u itela u fhaṱa thembele, o vha a tshi zwi ḓivha uri zwoṱhe zwine ra vha nazwo zwi bva ha Yehova nahone zwoṱhe zwine ra mu ṋea zwone u vha o tou ri ṋea.—Vhalani 1 Koronika 29:11-14.

5. Maṅwalo a sumbedza hani uri u ṋea zwi tshi bva mbiluni ndi zwa ndeme kha vhurabeli hashu?

⁵ U ṋea ndi iṅwe ya nḓila ine ra gwadamela ngayo Yehova. Muapostola Yohane o vhona bono ḽe khaḽo a pfa vhashumeli vha Yehova ngei ṱaḓulu vha tshi ri: “Iwe Yehova Mudzimu, ndi iwe wo fanelwaho nga vhugala na u huliswa na maanḓa, ngauri wo sika zwithu zwoṱhe, huno zwo vha hone na u sikwa nge wa zwi funa.” (Nzumb. 4:11) Ri ṱoḓa u ṋea Yehova zwithu zwa khwine zwine ra vha nazwo ngauri o fanelwa nga vhugala na u rendwa. Yehova o shumisa Mushe uri a vhudze lushaka lwa Isiraele ndaela ya uri vha vhe na vhuṱambo luraru nga ṅwaha. Samusi honoho vhuṱambo ho vha vhu tshipiḓa tsha vhurabeli havho, Vhaisiraele vho vha vha songo fanela u “vhonala [vha] songo fara tshithu.” (Doit. 16:16) Nga hu fanaho, ndi zwa ndeme kha vhurabeli hashu u ṋea zwi tshi bva mbiluni na u tikedza mushumo une wa itwa nga ndangulo ya Yehova.

6. Ndi ngani u ṋea hu zwithu zwavhuḓi? (Sedzani tshifanyiso tsha u thoma.)

⁶ U ṋea ndi zwithu zwavhuḓi. A ro ngo fanela u vha vhane vha sokou ṱanganedza fhedzi, fhedzi ri vhe vhane vha ṋea zwi tshi bva mbiluni. (Vhalani Mishumo 20:35.) Kha ri humbule nga ha ṅwana ane a rengela vhabebi vhawe tshifhiwa nga tshelede yawe ṱhukhu ye vha mu ṋea yone. Vhabebi vha livhuwa vhukuma tshenetsho tshifhiwa! Ṅwana ane a khou vula nḓila a tshi kha ḓi dzula hayani, a nga ṋea vhabebi vhawe tshelede ya u thusa kha zwithu zwine zwa ṱoḓea muṱani. Naho vhabebi vha tshi nga vha vha songo lavhelela zwenezwo, vha nga ṱanganedza tshenetsho tshifhiwa ngauri ndi nḓila ine ṅwana a sumbedza ngayo uri u livhuwa zwoṱhe zwine vhabebi vhawe vha mu itela zwone. Nga hu fanaho, Yehova u a zwi ḓivha uri ndi zwavhuḓi musi ri tshi ṋea kha zwithu zwa ndeme zwine ra vha nazwo.

7, 8. Vhathu vha Yehova vha misini ya Bivhili vho ri vhetshela hani tsumbo ya u ṋeela (a) u itela u tikedza mishumo yo khetheaho? (b) u itela u tikedza miṅwe mishumo?

⁷ Bivhili i amba nga ha vhathu vhe vha ṋeela nga thundu dzavho. Nga zwiṅwe zwifhinga, vhathu vha Yehova vho ṋeela u itela u tikedza miṅwe mishumo yo khetheaho. Sa tsumbo, Mushe o humbela vhathu uri vha ṋeele u itela uri hu fhaṱiwe nnḓu ya mulanga samusi na Khosi Davida o ita nga u ralo musi hu tshi fhaṱwa thembele. (Ek. 35:5; 1 Koron. 29:5-9) Musi hu tshi khou vhusa Khosi Yoasi, vhotshifhe vho shumisa tshelede ye ya ṋeelwa u itela u lugisa nnḓu ya Yehova. (2 Dzikh. 12:5, 6) Musi vhahashu vha tshivhidzo tsha u thoma vha tshi ḓivhadzwa uri hu ḓo vha na nḓala, vho humbela muṅwe na muṅwe nga ‘hune a  nga kona ngaho uri a rumele zwifhiwa u itela u thusa vhatendi vha dzulaho ngei Yudea.’—Mish. 11:27-30.

⁸ Nga zwiṅwe zwifhinga, vhathu vha Yehova vho ṋeela nga tshelede u itela u thusa vhane vha ranga phanḓa. Nga fhasi ha Mulayo wa Mushe, Vhalevi a vho ngo ṋewa ifa u fana na dziṅwe tshaka. Nṱhani hazwo, Vhaisiraele vho vha vha tshi ṋea Vhalevi tshafumi u itela uri vha livhise ṱhogomelo kha mushumo wavho nḓuni ya mulanga. (Num. 18:21) Nga hu fanaho, vhaṅwe vhafumakadzi vho sumbedza Yesu na vhaapostola vhawe mafunda nga u “vha ṱhogomela nga thundu dzavho.”—Luka 8:1-3.

9. Vhathu vho vha vha tshi ṋeela hani tshifhingani tsho fhiraho?

⁹ Vhathu vha ṋeela nga nḓila dzo fhamba-fhambanaho. Musi hu tshi fhaṱwa nnḓu ya mulanga ngei sogani, Vhaisiraele vho ṋeela na nga zwithu zwe vha bva nazwo ngei Egipita. (Ek. 3:21, 22; 35:22-24) Ḓanani ḽa u thoma ḽa miṅwaha, vhaṅwe Vhakriste vho rengisa zwithu zwe vha vha vhe nazwo, zwithu zwi ngaho tsimu kana nnḓu dzavho nahone vha ṋea vhaapostola yeneyo tshelede. Vhaapostola vho kovhela yeneyo tshelede vhane vha shaya. (Mish. 4:34, 35) Vhaṅwe vho vha vha tshi vhetshela thungo tshelede ya u ṋeela tshifhinga tshoṱhe u itela u tikedza mushumo. (1 Vhakor. 16:2) Nga zwenezwo, vhathu vhoṱhe—vho pfumaho na vha shayaho —vho vha vha tshi ṋeela.—Luka 21:1-4.

10, 11. (a) Ri nga edzisa hani vhashumeli vha Yehova vha misini ya Bivhili vhe vha vha vhe na mafunda? (b) Ni ḓipfa hani nga ndugelo ine na vha nayo ya u tikedza mushumo wa Muvhuso?

¹⁰ Na riṋe ṋamusi ri nga humbelwa uri ri ṋeele u itela u tikedza miṅwe mishumo yo khetheaho. Sa tsumbo, naa hu khou dzudzanywa u fhaṱwa Holo ya Muvhuso ine ya ḓo shumiswa nga tshivhidzo tshaṋu? Kana naa Holo ya Muvhuso ine na ṱanganela khayo zwino i khou lugiswa? Khamusi ri nga ḓivhadzwa uri hu na ṱhoḓea ya masheleni u itela u lugisa ofisi ya davhi ya hune ra dzula hone, buthano ḽine ra ṱanganela khaḽo kana u thusa vhahashu vhe vha welwa nga khombo dza mupo. Ri dovha ra ṋeela u itela u tikedza vhane vha shuma ofisini khulwane dza shango ḽoṱhe na ofisi dza davhi u mona na shango ḽoṱhe. Miṋeelo yashu i tikedza vharumiwa, vhavulanḓila vho khetheaho na vhalavhelesi vha ḽiisela. A zwi timatimisi uri na tshivhidzo tshaṋu tsho ita mbofho ya u ṋeela nga tshelede u itela u tikedza mushumo wa u fhaṱa Holo dza Maguvhangano na Holo dza Muvhuso dzine dza ita uri vhahashu vha vhuyelwe u mona na shango ḽoṱhe.

¹¹ Roṱhe ri nga shela mulenzhe kha u tikedza mushumo une Yehova a khou u khunyeledza kha ano maḓuvha a vhufhelo. Miṋeelo minzhi i itwa tshiphirini. Ri ṋeela kha mabogisi a re Holoni ya Muvhuso ri sa vhonwi nga vhathu kana ri nga ṋeela ri tshi shumisa website yashu ya jw.org. Ri nga vhona u nga miṋeelo yashu miṱuku a si ya ndeme. Fhedzi miṋeelo minzhi ṋamusi a i bvi kha zwifhiwa zwihulwane zwi si gathi, fhedzi i bva kha zwifhiwa zwinzhi zwiṱuku. Vhahashu u katela na vhane vha vha na tshelede ṱhukhu, vha edzisa vhathu vha Makedonia vhe vha vha vha tshi ‘shaya’ vhukuma, fhedzi vha humbela uri vha tendelwe u ṋeela nahone vha zwi ita nga mbilu yoṱhe.—2 Vhakor. 8:1-4.

12. Ndangulo i ita hani vhungoho ha uri miṋeelo i shumiswa nga nḓila yo teaho?

¹² Tshigwada tshi Langaho tshi rabela uri tshi kone u dzhia phetho yo teaho malugana na nḓila ine tshelede ine ya ṋeelwa ndanguloni ya fanela u shumiswa ngayo nga vhuṱali na nga u fulufhedzea. (Mat. 24:45) Tshelede ine ya ṋeelwa i shumiswa nga nḓila yo teaho. (Luka 14:28) Misini ya Bivhili, vhanna vha fulufhedzeaho vhe vha vha vho ṋewa mushumo wa u fara tshelede ye ya ṋeelwa, vho vha vha tshi ita vhungoho ha uri yeneyo miṋeelo  i shumiswa fhedzi kha zwithu zwo teaho. Sa tsumbo, Esera o humela Yerusalema na thundu dze dza ṋeelwa nga khosi ya Peresia—thundu dzi ngaho musuku, maseṱha na dziṅwe thundu dzine musalauno dzo vha tshi nga lingana tshelede i fhiraho milioni dza 1 300. Esera o vha a tshi dzhia yeneyo miṋeelo sa tshifhiwa tshe tsha ṋewa Yehova nahone o ṋea vhulivhisi ha nḓila ine dzenedzo thundu dza fanela u tsireledzwa ngayo musi vha tshi fhira fhethu hu songo tsireledzeaho. (Esera 8:24-34) Muapostola Paulo o kuvhanganya miṋeelo u itela u thusa vhahawe vha ngei Yudea. O ita vhungoho ha uri vhathu vhe vha vha vha tshi khou isa yeneyo miṋeelo vha ṱhogomele “zwithu zwoṱhe nga u fulufhedzea, hu si musi [vha] tshi vhonwa nga Yehova fhedzi, fhedzi na musi [vha] tshi vhonwa nga vhathu.” (Vhalani 2 Vhakorinta 8:18-21.) Ṋamusi ndangulo yashu i edzisa tsumbo ya Esera na Paulo nga u ita vhungoho ha uri miṋeelo i shumiswa nga nḓila yo teaho.

13. Ndi ngani ndangulo yo ita dziṅwe tshanduko?

¹³ Muṱa u nga shandula nḓila ine wa shumisa ngayo tshelede u itela uri vha si shumise tshelede nnzhi u fhira ine vha i wana. Kana vha nga humbula nga ha nḓila ine vha nga leludza ngayo vhutshilo havho u itela uri vha kone u shumela Yehova nga ho engedzeaho. Zwo tou ralo nga ndangulo ya Yehova. Miṅwahani ya zwenezwino, ho itwa zwithu zwinzhi zwavhuḓi. Nga zwiṅwe zwifhinga, zwenezwo zwithu zwo ita uri hu shumiswe tshelede nnzhi u fhira ye ya vha i tshi ṋeelwa. Nga zwenezwo, ndangulo yo ṱoḓa nḓila ine ya nga vhulunga ngayo tshelede na u leludza mushumo uri i kone u khunyeledza zwithu zwinzhi nga hune ya nga kona ngaho nga miṋeelo yaṋu i bvaho mbiluni.

14-16. (a) Ndi zwifhio zwiṅwe zwine zwa khunyeledzwa nga miṋeelo yaṋu? (b) No vhuyelwa hani nga dzenedzi ndugiselelo?

¹⁴ Vhathu vhanzhi vho fhedzaho miṅwaha minzhi vha tshi khou shumela Yehova vha amba uri zwino ndangulo i ri ṋea zwithu zwinzhi u fhira tshifhingani tsho fhiraho. Humbulani nga zwithu zwi tevhelaho! Miṅwahani ya zwenezwino, ho vha na jw.org na JW Broadcasting. Hu gandiswa Bivhili ya New World Translation of the Holy Scriptures nga nyambo nnzhi. Nga 2014/2015, ho vha na Buthano ḽa Tshaka Dzoṱhe ḽa maḓuvha mararu ḽe ḽa vha ḽi na tshiṱoho tshine tsha ri “Dzulani Ni Tshi Ṱoḓa Muvhuso Wa Mudzimu U Thoma!” Ḽeneḽo buthano ḽo farelwa kha zwitediamu zwihulwanesa ḓoroboni dza 14 u mona na shango ḽoṱhe. Vhe vha ya kha ḽeneḽo buthano vho vha vho takala vhukuma.

¹⁵ Vhanzhi vho sumbedza nḓila ine vha livhuwa ngayo zwithu zwine ndangulo ya Yehova  ya vha itela zwone. Sa tsumbo, vhaṅwe vhavhingani vhane vha shuma kha ḽiṅwe shango ngei Asia, vho ṅwala zwi tevhelaho malugana na JW Broadcasting: ‘Ḓorobo ine ra shuma khayo ndi ṱhukhu. Nga zwenezwo, nga zwiṅwe zwifhinga ri ḓipfa ri kule na vhaṅwe nahone ri a ita ri tshi hangwa uri mushumo wa Yehova u khou itwa shangoni ḽoṱhe na uri ri na vhushaka na vhahashu u mona na shango ḽoṱhe. Fhedzi musi ri tshi ṱalela mbekanyamushumo dzo fhamba-fhambanaho kha JW Broadcasting, zwi ita uri ri humbule uri ri na vhushaka na vhahashu u mona na shango ḽoṱhe. Vhahashu vha henefho vha a takalela vhukuma JW Broadcasting. Kanzhi ri pfa vha tshi amba uri vha ḓipfa vhe tsini na Tshigwada tshi Langaho musi vho no ṱalela mbekanyamushumo ya ṅwedzi muṅwe na muṅwe. Zwino vha ḓirwa khana u fhira naho hu lini nga u vha tshipiḓa tsha ndangulo ya Mudzimu.’

¹⁶ U mona na shango ḽoṱhe, Holo dza Muvhuso dzi ṱoḓaho u vha 2 500 dzi khou fhaṱiwa kana u vusuluswa. Miraḓo ya tshiṅwe tshivhidzo tsha ngei Honduras ye ya vha i tshi ṱoḓa Holo ya Muvhuso nga maṱo matswuku, yo ṅwala zwi tevhelaho musi i tshi tou thoma u i shumisa: “Zwi a ri takadza vhukuma u vha tshipiḓa tsha muṱa wa Yehova wa fhethu hoṱhe na u ḓiphina nga u vha na vhushaka na vhahashu u mona na shango ḽoṱhe.” Vhanzhi vha sumbedza u livhuwa nga nḓila i fanaho musi vha tshi wana Bivhili na dziṅwe khandiso dzo ṱalutshedzelwaho nga luambo lwavho lwa ḓamuni. Vhaṅwe vha a livhuwa musi vho no thuswa nga murahu ha u welwa nga khombo kana vho vhona mbuyelo dza u huwelela vha tshi shumisa tshigariki na u ṱanziela khagala hune vha dzula hone.

17. Ri zwi ḓivha hani uri Yehova u khou tikedza ndangulo yawe ṋamusi?

¹⁷ Vhaṅwe vhathu vhane vha si vhe Ṱhanzi dza Yehova a vha pfesesi uri zwi konadzea hani uri ri kone u ita wonoyu mushumo ri tshi shumisa miṋeelo ya u ḓifunela fhedzi. Musi muṅwe mulanguli wa iṅwe khamphani khulwane a tshi dalela tshiṅwe tsha zwifhaṱo zwashu hune ha gandiswa hone dzikhandiso, o mangadzwa vhukuma nga uri wonoyo mushumo u itwa nga vhathu vhane vha shuma nga u ḓifunela, u tikedzwa nga miṋeelo ya u ḓifunela nahone a ri rengisi zwiṅwe zwithu kana u dzudzanya zwiitea u itela u wana tshelede. O amba uri zwenezwi zwithu a zwi konadzei. Ri a tendelana nae! Fhedzi ri a zwi ḓivha uri zwi a konadzea ngauri Yehova u khou tikedza wonoyu mushumo.—Yobo 42:2.

18. (a) Ndi phaṱhutshedzo dzifhio dzine ra dzi wana musi ri tshi tikedza Muvhuso? (b) Ri nga gudisa hani vhana vhashu na vhathu vhaswa uri na vhone vha shele mulenzhe?

¹⁸ Yehova u ri hulisa nga u ri ṋea tshibuli tsha u tikedza mushumo une wa khou itwa ṋamusi. U ri khwaṱhisedza uri ri ḓo fhaṱutshedzwa musi ri tshi tikedza Muvhuso. (Mal. 3:10) Yehova o fulufhedzisa uri vhane vha vha na mafunda zwithu zwi ḓo vha tshimbilela zwavhuḓi. (Vhalani Mirero 11:24, 25.) U ṋea zwi dovha zwa ita uri ri takale ngauri “u ṋea zwi ḓisa dakalo ḽihulu u fhira u ṋewa.” (Mish. 20:35) Nga zwine ra zwi ita na zwine ra zwi amba, ri nga gudisa vhana vhashu na vhathu vhaswa nḓila ine vha nga shela ngayo mulenzhe kha wonoyu mushumo uri na vhone vha wane phaṱhutshedzo nnzhi.

19. Ino thero yo ni ṱuṱuwedza hani?

¹⁹ Zwoṱhe zwine ra vha nazwo zwi bva ha Yehova. U mu ṋea zwenezwo zwithu zwi sumbedza uri ri a mu funa nahone ri livhuwa zwoṱhe zwe a ri itela zwone. (1 Koron. 29:17) Musi hu tshi ṋeelwa u itela uri hu fhaṱwe thembele, “vhathu [vho] takala vha tshi vhona vhahulwane vhá si ná vhutshivha, vha tshi ṋea Yehova nga mbilu-mbuya.” (1 Koron. 29:9) U nga ri na riṋe ri nga ita zwi fanaho nga u bvela phanḓa ri tshi takala na u fushea musi ri tshi ṋea Yehova zwithu zwe a ri ṋea zwone.