EE, ZWO vha zwo tou ralo nga zwiṅwe zwifhinga. Ṱhogomelani tsumbo i tevhelaho. Doiteronomio 24:14, 15 i ri: “Mutshinyali we wa mu thola U songo mu ṱhupha, kana ndi wa haṋu, kana ndi mutsinda o dzulaho shangoni ḽa haṋu . . . A nga ḓo U hwelela ha Yehova, wa vhó ḓo hwala mulandu.”

Mafhungo a ambaho nga ha khumbelo ya malugana na honoho vhuimo o ṅwalwa kha ḽiṅwalwa ḽa ḓanani ḽa vhusumbe ḽa miṅwaha B.C.E. Ḽeneḽo ḽiṅwalwa ḽo wanala tsini na ngei Ashdod. Khamusi ḽo vha ḽo ṅwalelwa muthu we a vha a tshi shuma masimuni we a kundelwa u isa goroi ye a vha o kalelwa uri a i ise nga ḓuvha, ḽeneḽo ḽiṅwalwa ḽo ṅwalwaho kha tshipiḓa tsha vumba, ḽi ri: “Musi mushumi wau a tshi fhedza u vhulunga zwe a zwi kaṋa maḓuvha a si gathi o fhiraho, Hoshayahu murwa wa Shobay o ḓa a dzhia nguvho ya mushumi wau. . . . Vhoṱhe vhe vha vha vha tshi khou kaṋa na nṋe ḓuvha ḽi tshi khou fhisa vha ḓo ṱanziela . . . uri zwe nda zwi amba ndi ngoho. A thi na mulandu na muthihi. . . . Arali mulanguli a sa ita uri zwi vhe vhuḓifhinduleli hawe uri mushumi wau a ṋewe nguvho yawe, nga a zwi ite nga nṱhani ha u mu pfela vhuṱungu! A wo ngo fanela u fhumula mushumi wau e si na nguvho yawe.”

Muḓivhazwakale ane a pfi Simon Schama o ri: “Ri guda zwinzhi kha yeneyi khumbelo u fhira zwine ya zwi amba nga ha mushumi we a vha a tshi khou ṱoḓa [nguvho yawe] nga maṱo matswuku. I dovha ya sumbedza uri khamusi hu na zwe onoyo mushumi a vha a tshi zwi ḓivha nga ha milayo i re Bivhilini, zwihuluhulu milayo i re kha Levitiko na Doiteronomio ine ya lwisana na u sa farwa zwavhuḓi ha vhane vha shaya.”