1-3. (a) Ndi ngani Yehova o funa Salomo, nahone ndi phaṱhutshedzo dzifhio dze a dzi wana? (b) Ndi mbudziso dzifhio dzine ra ḓo dzi fhindula kha ino thero?

SALOMO o thoma u vha khosi ya Isiraele musi a tshee muṱuku. Musi a tshi kha ḓi tou bva u thoma u vhusa, Yehova o ḓivhonadza khae muḽoroni nahone a ri: “Nkhumbele tshine nda ḓo U ṋea.” Salomo o ri: “Ndi tshee ṅwana muṱuku, a sáthu u ḓivha u bva na u dzhena. . . . Ṋea mulanda wau mbilu i pfaho, uri a kone u vhusa vhathu vhau.” (1 Dzikh. 3:5-10) U humbela hawe “mbilu i pfaho” zwi sumbedza uri o vha a tshi ḓiṱukufhadza! Ri a kona u pfesesa uri ndi ngani Yehova o vha a tshi funa Salomo! (2 Sam. 12:24) Mudzimu washu o takadzwa vhukuma nga yeneyo phindulo ya khosi ye ya vha i tshee muswa lwe a i ṋea “mbilu ya vhuṱali na nḓivho.”—1 Dzikh. 3:12.

² Salomo o wana phaṱhutshedzo nnzhi musi a tshi kha ḓi fulufhedzea. O vha na ndugelo ya u “fhaṱela dzina ḽa Yehova Mudzimu wa Isiraele nnḓu.” (1 Dzikh. 8:20) Vhuṱali he Mudzimu a mu ṋea hone ho ita u ri a vhe na bvumo. Zwithu zwe a zwi amba musi o hevhedzwa nga Mudzimu zwo ṅwalwa buguni tharu dza Bivhili. Iṅwe ya dzenedzo bugu ndi Mirero.

³ Mbilu yo bulwa lunzhi kha bugu ya Mirero. Sa tsumbo, Mirero 4:23 i ri: “Kha zwoṱhe zwine zwa pfi zwi lindwe U vhulungese mbilu yau.” Kha ino ndimana, ipfi “mbilu” ḽi ambela kha mini? Ri ḓo fhindula yeneyo mbudziso kha ino thero. Ri ḓo dovha ra fhindula na dziṅwe mbudziso mbili: Sathane u lingedza hani u tshinya mbilu dzashu? Ri nga ita mini u itela u linda mbilu dzashu? U itela uri ri dzule ri tshi fulufhedzea kha Mudzimu, ri fanela u ḓivha phindulo dza dzenedzi mbudziso dza ndeme.

4-5. (a) Psalme ya 51:6, i ri thusa hani u pfesesa zwine ipfi “mbilu” ḽa ambela khazwo? (b) Mutakalo washu u fanyisa hani vhu ndeme ha zwine ra vha zwone nga ngomu?

⁴ Kha Mirero 4:23, ipfi “mbilu” ḽi ambela kha vhumuthu ha nga ngomu nahone honoho vhumuthu a vhu koni u vhonwa nga vhaṅwe vhathu. (Vhalani Psalme ya 51:6.) Nga maṅwe maipfi, ipfi “mbilu” ḽi ambela kha zwine ra zwi humbula, nḓila ine ra ḓipfa ngayo, zwiṱuṱuwedzi na zwine ra zwi tama. Ndi zwine ra vha zwone nga ngomu, hu si zwine ra vha zwone nga nnḓa fhedzi.

⁵ Ṱhogomelani nḓila dzine mutakalo washu wa fanyisa vhu ndeme ha zwine ra vha zwone nga ngomu. Ya u thoma, u itela uri ri dzule ri na mutakalo wavhuḓi, ri fanela u ḽa zwiḽiwa zwi re na pfushi na u ita nyonyoloso tshifhinga tshoṱhe. Nga hu fanaho, u itela uri ri dzule ri na vhushaka ho khwaṱhaho na Mudzimu, ri fanela u vhala Bivhili na khandiso dzo thewaho Bivhilini tshifhinga tshoṱhe na u dzula ri tshi sumbedza uri ri na lutendo kha Yehova. Ri sumbedza uri ri na lutendo khae nga u amba nga ha lutendo lwashu. (Vharoma 10:8-10; Yak. 2:26) Ya vhuvhili, musi ro sedza mbonalo ya nga nnḓa, ri nga humbula u nga ri na mutakalo ngeno ri tshi khou vhaisala nga ngomu. Nga hu fanaho, musi ri tshi ita zwoṱhe zwine Mukriste a tea uri a zwi ite, ri nga humbula u nga lutendo lwashu lwo khwaṱha, fhedzi nyemulo mmbi dzi nga sima midzi nga ngomu hashu. (1 Vhakor. 10:12; Yak. 1:14, 15) Ri fanela u humbula uri Sathane u ṱoḓa u ita uri ri humbule u fana nae. Zwenezwo a nga lingedza u zwi ita hani? Nahone ri nga ḓitsireledza hani?

6. Ndi tshifhio tshipikwa tsha Sathane, nahone u lingedza hani u tshi swikelela?

⁶ Sathane ndi ḽishandukwa ḽi sa tevheli zwilinganyo zwa Yehova, u ita zwithu u itela u ḓivhuyedza nahone u ṱoḓa na riṋe ri tshi fana nae. Sathane a nga si ri kombetshedze uri ri humbule na u ita zwithu u fana nae. Nga zwenezwo, u lingedza u shumisa dziṅwe nḓila u itela u swikelela tshipikwa tshawe. Sa tsumbo, ro tingwa nga vhathu vhe a vha tshinya. (1 Yoh. 5:19) U fulufhela uri ri ḓo khetha u fhedza tshifhinga navho, naho ri tshi zwi ḓivha uri vhukonani vhu si havhuḓi vhu “tshinya” nḓila  ine ra humbula ngayo na zwine ra zwi ita. (1 Vhakor. 15:33) Honoho vhukwila ho shuma kha Khosi Salomo. O vhinga vhafumakadzi vhanzhi vhe vha vha vha tshi gwadamela midzimu ya zwifanyiso nahone vho fheleledza vho vha na na ṱhuṱhuwedzo khulwane khae na u “kongona mbilu yawe a hangwa Yehova.”—1 Dzikh. 11:3.

7. Ndi mini zwine Sathane a zwi shumisa u itela u phaḓaladza nḓila ine a humbula ngayo, nahone ndi ngani ri tshi fanela u vha na vhulondi?

⁷ Sathane u shumisa mimuvi na zwiṱori zwine zwa tamba kha thelevishini u itela u phaḓaladza nḓila ine a humbula ngayo. U a pfesesa uri zwiṱori a zwi sokou ri mvumvusa fhedzi, fhedzi zwi ri funza nḓila ine ra fanela u humbula, u ḓipfa na u ita zwithu ngayo. Yesu o shumisa yeneyi nḓila ya u funza zwavhuḓi. Sa tsumbo, o shumisa tshifanyiso tsha Musamaria na tsha murwa we a ṱuwa hayani nahone a phusukanya thundu yawe. (Mat. 13:34; Luka 10:29-37; 15:11-32) Fhedzi vho tshikafhadzwaho muhumbulo nga Sathane na u humbula u fana nae vha nga shumisa zwiṱori u itela uri tshikafhadza. Ri fanela u vha na mavhonele o linganyiselwaho. Mimuvi na zwiṱori zwine zwa tamba kha thelevishini, zwi nga ri mvumvusa na uri gudisa zwi sa tshikafhadzi nḓila ine ra humbula ngayo. Fhedzi ri fanela u vha na vhulondi. Musi ri tshi khetha vhuḓimvumvusi ri fanela u ḓivhudzisa uri, ‘Naa uyu muvi kana zwine nda khou zwi ṱalela zwi nngudisa uri u fusha nyemulo dzanga a zwo ngo khakhea?’ (Vhagal. 5:19-21; Vhaef. 2:1-3) Ni fanela u ita mini arali na ṱhogomela uri tshiṱori tshi ṱuṱuwedza kuhumbulele kwa Sathane? Tshi iledzeni u fana na nḓila ine na nga iledza ngayo vhulwadze ho no fhirela!

8. Vhabebi vha nga thusa hani vhana vhavho uri vha linde mbilu dzavho?

⁸ Vhabebi, ni na vhuḓifhinduleli ho khetheaho ha u linda vhana vhaṋu kha vhuḓidini vhune Sathane a vhu ita ha u tshikafhadza mbilu dzavho. A zwi timatimisi uri ni ita zwoṱhe zwine  na nga kona u itela u tsireledza vhana vhaṋu uri vha si lwale. Ni ita uri haya haṋu hu dzule ho kuna nahone ni laṱa tshiṅwe na tshiṅwe tshine tsha nga ita uri inwi kana vhana vhaṋu ni lwale. Nga nḓila i fanaho, ni fanela u tsireledza vhana vhaṋu kha mimuvi, zwiṱori zwa thelevishini, mitambo ya elekitironiki na website, zwine zwa nga ita uri vha humbule u fana na Sathane. Yehova o ni ṋea vhuḓifhinduleli ha u thusa vhana vhaṋu uri vha vhe khonani yawe. (Mir. 1:8; Vhaef. 6:1, 4) Ni songo ofha u vhetshela muṱa waṋu milayo yo thewaho Bivhilini. Vhudzani vhana vhaṋu uri ndi mini zwine vha fanela uri vha zwi ṱalele na zwine a vho ngo fanela u zwi ṱalela na u vha thusa uri vha pfesese uri ndi ngani no ita yeneyo phetho. (Mat. 5:37) Musi vhana vhaṋu vha tshi khou aluwa, vha gudiseni uri vha ṱalukanye zwo lugaho na zwo khakheaho u ya nga zwilinganyo zwa Yehova. (Vhaheb. 5:14) Ḓivhani uri vhana vhaṋu vha guda zwinzhi kha zwine na ita, u fhira zwine na zwi amba.—Doit. 6:6, 7; Vharoma 2:21.

9. Ndi ufhio muṅwe muhumbulo une wa ṱuṱuwedzwa nga Sathane, nahone ndi ngani u khombo?

⁹ Sathane u dovha a lingedza u tshikafhadza mbilu dzashu nga u ita uri ri fulufhele vhuṱali ha vhathu nṱhani ha Yehova. (Vhakol. 2:8) Ṱhogomelani muṅwe muhumbulo une Sathane a u ṱuṱuwedza, wa uri u pfuma zwi ḓe u thoma vhutshiloni hashu. Vhane vha humbula nga yeneyo nḓila vha nga pfuma kana vha si pfume. Hu sa londwi zwenezwo, vha khomboni. Ndi ngani? Ndi ngauri vha nga livhisa ṱhogomelo kha u ita tshelede lune vha vhea mutakalo wavho khomboni, vhushaka havho na muṱa wavho, khamusi na vhushaka havho na Mudzimu u itela u swikelela tshipikwa tshavho. (1 Tim. 6:10) Ri livhuwa vhukuma Khotsi ashu wa ṱaḓulu we a ri thusa uri ri vhe na mavhonele o teaho nga ha tshelede.—Muh. 7:12; Luka 12:15.

10-11. (a) Ri fanela u ita mini u itela u ḓitsireledza? (b) Vhalindi vha misini ya kale vho vha vha tshi ita mini, nahone luvalo lwashu lu nga shuma hani sa mulindi?

¹⁰ Arali ri tshi ṱoḓa u linda mbilu dzashu, ri fanela u ḓivha khombo na u ṱavhanya u dzhia vhukando u itela u ḓitsireledza. Kha Mirero 4:23, ipfi ḽo ṱalutshedzelwaho ngauri “vhulungese” kana u linda, ḽi ri humbudza mushumo une wa itwa nga mulindi. Misini ya Khosi Salomo, vhalindi vho vha vha tshi ima nṱha ha mutsheṱo wa muḓi na u vhidzelela musi vha tshi vhona khombo. U vha na tshenetsho tshifanyiso muhumbuloni zwi ri thusa uri ri pfesese zwine ra fanela u ita u itela u thivhela Sathane uri a si tshikafhadze mihumbulo yashu.

¹¹ Misini ya kale, vhalindi vho vha vha tshi shumisana na vhalindakhoro. (2 Sam. 18:24-26) Vho vha vha tshi thusana kha u tsireledza muḓi nga u ita uri magethe a dzule o valwa musi maswina e tsini. (Neh. 7:1-3) Luvalo lwashu lwo gudiswaho nga Bivhili * lu nga shuma sa mulindi washu na uri tsivhudza musi Sathane a tshi lingedza u tshikafhadza mbilu dzashu, nga maṅwe maipfi, musi a tshi lingedza u ṱuṱuwedza zwine ra zwi humbula, nḓila ine ra ḓipfa ngayo, zwiṱuṱuwedzi kana zwine ra tama. Musi luvalo lwashu lu tshi ri tsivhudza uri hu na khombo, ri fanela u lu thetshelesa na u vala magethe.

12-13. Ri nga lingea u ita mini, fhedzi ndi mini zwine ra fanela u zwi ita?

¹² Ṱhogomelani tsumbo ya nḓila ine ra nga ḓitsireledza ngayo kha u ṱuṱuwedzwa nga nḓila ine Sathane a humbula ngayo. Yehova o ri funza u ri: “Vhupombwe na vhuyaḓa ha mifuda  yoṱhe kana vhupangwa zwi songo vhuya zwa bulwa vhukati [hashu].” (Vhaef. 5:3) Fhedzi ri ḓo ita mini arali vhane ra shuma navho kana vhane ra dzhena navho tshikolo vha thoma u amba nga zwa vhudzekani? Ri a zwi ḓivha uri ri fanela u “[iledza] vhuḓifari ha u sa ofha Mudzimu na nyemulo dza shango.” (Tito 2:12) Mulindi, ane a vha luvalo lwashu, a nga ri tsivhudza nga ha khombo. (Vharoma 2:15) Fhedzi naa ri ḓo mu thetshelesa? Ri nga lingea u thetshelesa thangana dzashu kana u sedza zwifanyiso zwine vha khou ri sumbedza zwone. Fhedzi ri ḓo tea u iledza yeneyo khombo nga u amba maṅwe mafhungo kana u ṱuwa.

¹³ Hu ṱoḓea tshivhindi uri ri iledze u tsikeledzwa nga thangana dzashu kha u ita zwithu zwo khakheaho na u humbula nga hazwo. Ri nga vha na vhungoho ha uri Yehova u vhona vhuḓidini vhune ra vhu ita nahone u ḓo ri ṋea nungo na vhuṱali u itela u iledza u humbula u fana na Sathane. (2 Koron. 16:9; Yes. 40:29; Yak. 1:5) Ndi zwifhio zwiṅwe zwithu zwine ra nga zwi ita u itela u linda mbilu dzashu?

14-15. (a) Ri fanela u ṱuṱuwedzwa nga mini, nahone ri nga zwi itisa hani? (b) Mirero 4:20-22 i ri thusa hani uri ri vhuyelwe nga muvhalo washu wa Bivhili? (Sedzani na bogisi ḽine ḽa ri “ Nḓila Ya U Elekanya.”)

¹⁴ U itela u linda mbilu dzashu, a ri faneli u sokou iledza zwithu zwi si zwavhuḓi fhedzi, fhedzi ri fanela u ṱanganedza ṱhuṱhuwedzo yavhuḓi. Dovhani ni humbule nga ha tshifanyiso tsha mutsheṱo. Mulindakhoro u vala magethe uri maswina a si vutshele muḓi, fhedzi nga zwiṅwe zwifhinga u litsha mavothi o vulea uri hu kone u dzheniswa zwiḽiwa na dziṅwe thundu. Arali magethe o vha a sa vuliwi, vhathu vha wonoyo muḓi vho vha vha tshi ḓo fa nga nḓala. Nga hu fanaho, ri fanela u tendela Mudzimu a tshi ṱuṱuwedza nḓila ine ra humbula ngayo tshifhinga tshoṱhe.

¹⁵ Bivhili i amba nga ha nḓila ine Yehova a humbula ngayo, nga zwenezwo, musi ri tshi i vhala ri vha ri tshi khou tendela nḓila ine Yehova a humbula ngayo i tshi ṱuṱuwedza nḓila ine ra humbula, u ḓipfa na u ita zwithu ngayo. Ri nga vhuyelwa hani nga muvhalo washu wa Bivhili? Thabelo ndi ya ndeme. Muṅwe wahashu wa tshifumakadzini o ri: “Musi ndi sa athu u vhala Bivhili, ndi thoma nga u rabela ndi tshi khou humbela uri Yehova a nthuse uri ‘ndi vhone madzanga’ a re Ipfini ḽawe.” (Ps. 119:18) Ri fanela u dovha ra elekanya nga zwe ra zwi vhala. Ipfi ḽa Mudzimu ḽi swikelela “ngomu mbiluni [yashu]” musi ri tshi rabela, u vhala na u elekanya nahone ri funa nḓila ine Yehova a humbula ngayo.—Vhalani Mirero 4:20-22; Ps. 119:97.

16. Vhathu vhanzhi vho vhuyelwa hani nga u ṱalela JW Broadcasting?

¹⁶ Ri nga dovha ra tendela nḓila ine Mudzimu a humbula ngayo i tshi ri ṱuṱuwedza nga u ṱalela JW Broadcasting^®. Vhaṅwe vhavhingani vho ri: “JW Broadcasting^® ya ṅwedzi muṅwe na muṅwe i fhindula thabelo dzashu! I ri khwaṱhisa na u ri ṱuṱuwedza musi ri songo takala kana ri na vhuludu. Kanzhi ri thetshelesa nyimbo dzine dza bva kha JW Broadcasting^® ṅwedzi muṅwe na muṅwe musi ri hayani. Ri dzi lidza musi ri tshi khou bika, u kunakisa kana u nwa tie.” Dzenedzi mbekanyamushumo dzi ri thusa u linda mbilu dzashu. Dzi ri thusa uri ri humbule u fana na Yehova na uri ri iledze mutsiko wa u humbula u fana na Sathane.

17-18. (a) Hu itea mini musi ri tshi shumisa zwine ra zwi guda kha Yehova, samusi 1 Dzikhosi 8:61 yo zwi sumbedza? (b) Ri nga guda mini kha tsumbo ya Khosi Hiskia? (c) U tendelana na thabelo ya Davida ine ya vha kha Psalme ya 139:23, 24, ndi mini zwine ra nga zwi rabelela?

¹⁷ Ri a vhuyelwa tshifhinga tshoṱhe musi ri tshi ita zwithu zwo lugaho, lutendo lwashu lu a khwaṱha. (Yak. 1:2, 3) Ri a takala nga nṱhani ha uri ri ita uri Yehova a ḓirwe khana nga u ri  vhidza vhana vhawe nahone lutamo lwashu lwa u ṱoḓa mu takadza lu a hula. (Mir. 27:11) Mulingo muṅwe na muṅwe uri vulela tshibuli tsha u sumbedza uri ro ḓiṋekedzela tshoṱhe kha u shumela Khotsi ashu a re na lufuno. (Ps. 119:113) Ri sumbedza uri ri funa Yehova nga mbilu yoṱhe, nga u thetshelesa ndaela dzawe na u ita zwine a zwi funa.—Vhalani 1 Dzikhosi 8:61.

¹⁸ Naa ri ḓo khakha? Ee; a ro ngo fhelela. Arali ra khakha, ri fanela u humbula tsumbo ya Khosi Hiskia. O ita vhukhakhi, fhedzi o rembuluwa nahone a bvela phanḓa a tshi khou shumela Yehova “nga mbilu yoṱhe.” (Yes. 38:3-6; 2 Koron. 29:1, 2; 32:25, 26) Nga zwenezwo, kha ri iledze zwithu zwoṱhe zwine Sathane a lingedza u zwi ita u itela uri ri humbule u fana nae. Kha ri rabelele uri ri vhe na “mbilu i pfaho.” (1 Dzikh. 3:9; vhalani Psalme ya 139:23, 24.) Ri nga dzula ri tshi fulufhedzea kha Yehova, arali ra linda mbilu dzashu.