1. Davida o vha a tshi ḓipfa hani nga ha Yehova, nahone zwo mu ṱuṱuwedza uri a ite mini?

KHOSI DAVIDA o ṅwala uri: “Muhulu-hulu, Mu-rendwa-hoṱhe ndi Iwe Yehova.” (Ps. 145:3) O vha a tshi funa Yehova nahone lwonolo lufuno lwo mu sudzulusela uri a rende Mudzimu e “tshivhidzoni.” (Ps. 22:22; 40:5) A zwi timatimisi uri ni funa Yehova na uri ni tendelana na maipfi a Davida ane a ri: “Mukhoḓiwa ndi Iwe Yehova Mudzimu wa khotsi-ashu Isiraele tsha kale na kale na lini na lini.”—1 Koron. 29:10-13.

2. (a) Ri nga renda hani Yehova? (b) Vhaṅwe vhathu vha sedzana na khaedu dzifhio, nahone ri ḓo ṱolisisa mini?

² Iṅwe nḓila ine ra renda ngayo Yehova musalauno ndi nga u fhindula miṱanganoni ya Vhukriste. Fhedzi vhunzhi ha vhahashu vha wana zwi tshi vha konḓela. Vha a ṱoḓa u fhindula miṱanganoni, fhedzi vha mbo ḓi dzhenwa nga nyofho. Vha nga kunda hani dzenedzo nyofho? Ndi mini zwine zwa nga ri thusa u ṋea phindulo dzi ṱuṱuwedzaho? Ri sa athu fhindula dzenedzo mbudziso, kha ri thome nga u ṱolisisa zwiitisi zwiṋa zwine zwa ita uri ri fhindule miṱanganoni.

3-5. (a) Samusi zwo ṱalutshedzwa kha Vhaheberu 13:15, ndi ngani ri tshi fhindula miṱanganoni? (b) Naa ri fanela u fhindula nga nḓila i fanaho? Ṱalutshedzani.

³ Yehova o ri ṋea ndugelo ya u mu renda. (Ps. 119:108) Musi ri tshi fhindula miṱanganoni ya Vhukriste ri vha ri tshi khou ṋea “tshiṱhavhelo tsha thendo” nahone a hu na muthu ane a nga ri ṋekedzela tshone. (Vhalani Vhaheberu 13:15.)  Naa Yehova u lavhelela uri roṱhe ri mu ṋee tshiṱhavhelo tshi fanaho kana u fhindula nga nḓila i fanaho? Hai!

⁴ Yehova u a zwi ḓivha uri vhuimo hashu na vhukoni vhune ra vha naho a zwi fani nahone u dzhiela nṱha zwiṱhavhelo zwine ra mu ṋekedza zwone. Humbulani nga ha zwiṱhavhelo zwa Vhaisiraele zwe a vha a tshi zwi ṱanganedza. Vhaṅwe Vhaisiraele vho vha vha tshi kona u ṋekedza nngu kana mbudzi. Fhedzi Muisiraele ane a shaya o vha a tshi nga ṋekedza “maivha-muronzhe mavhili kana mafhondo ao.” Arali Muisiraele a sa koni u swikelela maivha, Yehova o vha a tshi ṱanganedza “ndudwana ya vhukhopfu.” (Lev. 5:7, 11) Vhukhopfu ho vha vhu sa ḓuri, fhedzi Yehova o vha a tshi vhu ṱanganedza tenda ha vha vhu havhuḓi.

⁵ Mudzimu washu a re na vhuthu u ḓipfa nga nḓila i fanaho na ṋamusi. Musi ri tshi fhindula, ha lavheleli uri ri vhe na vhukoni ha u amba u fana na Apolo kana Paulo. (Mish. 18:24; 26:28) Zwine Yehova a lavhelela ndi uri ri ite zwoṱhe zwine ra nga kona u itela u fhindula. Humbulani nga ha tshilikadzi ye ya ṋeela nga zwipeni zwivhili. Yehova o mu dzhia e wa ndeme ngauri o ṋeela nga zwoṱhe zwe a vha e nazwo.—Luka 21:1-4.

6. (a) U ya nga Vhaheberu 10:24, 25, phindulo dzine ra dzi pfa dzi nga ri kwama hani? (b) Ni nga sumbedza hani uri ni dzhiela nṱha phindulo dze dza ni ṱuṱuwedza?

⁶ Ri a ṱuṱuwedzana musi ri tshi fhindula. (Vhalani Vhaheberu 10:24, 25.) Roṱhe ri takalela u pfa phindulo dzo fhamba-fhambanaho miṱanganoni yashu. Ri takalela u pfa musi ṅwana a tshi fhindula zwi tshi bva mbiluni nahone nga nḓila yo leluwaho. Ri a ṱuṱuwedzea musi ri tshi pfa muṅwe muthu a tshi amba o takala nga ha nḓila ye a wana ngayo ngoho. Ri takalela vhane vha vha na “tshivhindi” tsha u fhindula, naho vha tshi shona kana vha tshi khou thoma u guda luambo lwashu. (1 Vhathes. 2:2) Ri nga sumbedza hani uri ri dzhiela nṱha vhuḓidini havho? Nga u vha livhuwa nga phindulo yavho i ṱuṱuwedzaho musi miṱangano i tshi fhela. Iṅwe nḓila ine ra nga zwi ita ngayo, ndi nga u fhindula miṱanganoni. Musi ri tshi ita nga u ralo, hu vha hu sa khou ṱuṱuwedzwa riṋe fhedzi, fhedzi na riṋe ri vha ri khou ṱuṱuwedza vhaṅwe.—Vharoma 1:11, 12.

7. Ri vhuyelwa hani musi ri tshi fhindula?

 ⁷ Ri a vhuyelwa musi ri tshi fhindula. (Yes. 48:17) Nga nḓila-ḓe? Ya u thoma, u dzudzanya uri ri ḓo fhindula, zwi ḓo ri ṱuṱuwedza uri ri lugiselele zwavhuḓi. Musi ro lugiselela zwavhuḓi, ri pfesesa Ipfi ḽa Mudzimu nga vhuḓalo. Musi ri tshi pfesesa ipfi ḽa Mudzimu nga vhuḓalo, zwi ḓo ri lelutshela uri ri shumise zwe ra zwi guda. Ya vhuvhili, ri ḓo ḓifhelwa nga ho engedzeaho miṱanganoni nga nṱhani ha uri ri ḓo vha ri tshi khou shela mulenzhe. Ya vhuraru, nga nṱhani ha uri u fhindula zwi ṱoḓa vhuḓidini, kanzhi ri humbula mbuno dze ra dzi amba na musi miṱangano yo no fhela.

8, 9. (a) Samusi Maleaxi 3:16 yo sumbedza, ni vhona u nga Yehova u ḓipfa hani musi ri tshi fhindula miṱanganoni? (b) Ndi khaedu ifhio ine vhaṅwe vha sedzana nayo?

⁸ Ri takadza Yehova musi ri tshi amba nga ha lutendo lwashu. Ri nga vha na vhungoho ha uri Yehova u a ri thetshelesa na u dzhiela nṱha vhuḓidini vhune ra vhu ita u itela u fhindula miṱanganoni. (Vhalani Maleaxi 3:16.) Mudzimu u sumbedza uri u a ri dzhiela nṱha nga u ri fhaṱutshedza musi ri tshi ita zwoṱhe zwine ra nga kona u itela u mu takadza.—Mal. 3:10.

⁹ Ri na zwiitisi zwi pfalaho zwa u fhindula miṱanganoni. Fhedzi vhaṅwe vha a ofha u imisa tshanḓa. Arali ni tshi ḓipfa nga yeneyo nḓila, ni songo fhulufhuwa. Kha ri ṱolisise tsumbo dzi si gathi, maitele ane a vha Bivhilini na dziṅwe nyeletshedzo dzi shumaho dzine dza nga ri thusa uri ri fhindule nga ho engedzeaho miṱanganoni.

10. (a) Vhunzhi hashu ri ofha mini? (b) Ndi ngani u ofha u fhindula hu tshi nga vha tshiga tshavhuḓi?

¹⁰ Naa ni a tshuwa musi ni tshi ṱoḓa u imisa tshanḓa u itela u fhindula? Arali zwo ralo, a ni noṱhe. Vhunzhi hashu ri a tshuwa musi ri tshi fhindula. Musi ni sa athu u kunda nyofho dzine dza ita uri ni si kone u fhindula, ni fanela u thoma na ḓivha zwine zwa ita uri ni ofhe. Naa ni ofha uri ni ḓo hangwa zwine na khou ṱoḓa u zwi amba kana uri zwine na ḓo zwi amba  zwo khakhea? Naa ni vhilaedziswa nga uri phindulo yaṋu i nga si vhe yavhuḓi u fana na dza vhaṅwe? Dzenedzo nyofho ndi tshiga tshavhuḓi. Dzi sumbedza uri ni a ḓiṱukufhadza na u dzhia vhaṅwe vhe vhahulwane kha inwi. Yehova u funa yeneyo pfaneleo. (Ps. 138:6; Vhafil. 2:3) Fhedzi Yehova u ṱoḓa uri ni mu rende na u ṱuṱuwedza vhahaṋu miṱanganoni. (1 Vhathes. 5:11) U a ni funa nahone u ḓo ita uri ni vhe na tshivhindi.

11. Ndi dzifhio khumbudzo dzi bvaho Maṅwaloni dzine dza nga ri thusa?

¹¹ Ṱhogomelani dziṅwe khumbudzo dzi bvaho Maṅwaloni. Bivhili i ri roṱhe ri a khakha musi ri tshi amba. (Yak. 3:2) Yehova na vhahashu a vha lavheleli uri ri vhe vhathu vho fhelelaho. (Ps. 103:12-14) Ri muṱa muthihi nahone vha a ri funa. (Marko 10:29, 30; Yoh. 13:35) Vha a pfesesa uri nga zwiṅwe zwifhinga ri nga amba zwithu zwe ra vha ri songo ḓiimisela u zwi amba.

12-13. Ri guda mini kha tsumbo ya Nehemia na Yona?

¹² Humbulani nga ha dziṅwe tsumbo dzi re Bivhilini dzine dza nga ni thusa u kunda nyofho. Humbulani nga ha tsumbo ya Nehemia. O vha a tshi shuma muḓini wa khosi ine ya vha na maanḓa. Nehemia o vha o tsikeledzea nga nṱhani ha uri o vha o pfa uri mbondo na magethe a Yerusalema zwo kwashekanywa. (Neh. 1:1-4) Edzani u vhona nga maṱo a muhumbulo nḓila ye a vha o tshuwa ngayo musi Khosi i tshi mu vhudzisa uri ndi ngani a tshi vhonala a songo takala! Nehemia o ṱavhanyedza a rabela nahone a kona u fhindula. Khosi yo fhindula nga u ita zwo engedzeaho u itela u thusa vhathu vha Mudzimu. (Neh. 2:1-8) Humbulani na nga ha tsumbo ya Yona. Musi Yehova a tshi mu humbela uri a ye u amba na vhathu vha Ninive, Yona o dzhenwa nga nyofho nahone a shavhela huṅwe. (Yona 1:1-3) Yona o kona u bvela phanḓa na mushumo wawe a tshi khou thuswa nga Yehova. Nahone zwe a zwi amba zwo thusa vhukuma vhathu vha Ninive. (Yona 3:5-10) Kha tsumbo ya Nehemia ri guda uri ndi zwa ndeme u rabela musi ri sa athu u fhindula. Nahone kha Yona ri guda uri Yehova a nga ri thusa u mu shumela hu sa londwi nyofho dzashu. U fhindula tshivhidzoni a zwi konḓi u fana na u huwelela mulaedza wa khaṱulo kha vhathu vha Ninive.

¹³ Ndi nyeletshedzo dzifhio dzi shumaho dzine dza nga ni ṱuṱuwedza uri ni fhindule miṱanganoni? Kha ri ṱolisise nyeletshedzo dzi si gathi.

14. Ndi ngani ri tshi fanela u lugiselela miṱangano zwavhuḓi nahone ri nga zwi ita lini?

¹⁴ Lugiselelani miṱangano. Musi no lugiselela zwavhuḓi hu tshi kha ḓi vha na tshifhinga, ni ḓo kona u fhindula zwavhuḓi. (Mir. 21:5) Ndi ngoho uri roṱhe ri na zwifhinga zwi sa fani zwa u lugiselela miṱangano. Eloise ane a vha tshilikadzi i re miṅwahani ya vhu-80, u lugiselela Tshiingamo tshawe mathomoni a vhege. O ri: “Musi ndo lugiselela  hu tshee na tshifhinga, ndi ḓifhelwa nga miṱangano nga ho engedzeaho.” Joy ane a shuma tshifhinga tsho ḓalaho kha mushumo wawe wa u ḓitshidza, u ḓivhetshela tshifhinga nga Mugivhela tsha u lugiselela Tshiingamo. O ri: “Zwi a nndelutshela uri ndi humbule zwe nda zwi vhala musi ndo lugisela ho sala tshifhinganyana uri ndi ye miṱanganoni.” Ike ane a vha muhulwane wa tshivhidzo a dovha a vha muvulanḓila uri, “Ndi wana zwi zwavhuḓi u vhala nga zwiṱuku nga zwiṱuku vhege yoṱhe u fhira u vhala zwithu zwoṱhe nga tshifhinga tshithihi.”

15. Ni nga lugiselela hani miṱangano?

¹⁵ U lugiselela miṱangano zwavhuḓi zwi katela mini? Humbelani Yehova uri a ni ṋee muya mukhethwa ni sa athu u thoma u guda. (Luka 11:13; 1 Yoh. 5:14) Fhedzani mimunithi i si gathi ni tshi khou lavhelesa tshiṱoho, zwiṱohwana, zwifanyiso na bogisi ḽa u funza. Musi ni tshi khou vhala phara iṅwe na iṅwe, vhalani maṅwalo o redzwaho nga hune na nga kona ngaho. Elekanyani nga hazwo nahone ni livhise ṱhogomelo kha mbuno dzine na ḓo takalela u dzi fhindula. Musi ni tshi lugiselela zwavhuḓi ni ḓo vhuyelwa nahone zwi ḓo ni lelutshela uri ni fhindule.—2 Vhakor. 9:6.

16. Ndi zwifhio zwishumiswa zwine na vha nazwo, nahone ni zwi shumisa hani?

¹⁶ Arali zwi tshi konadzea, shumisani websites na app dzashu nga luambo lune na lu ḓivha. Yehova u shumisa ndangulo yawe u itela uri ṋea zwishumiswa zwine zwa ri thusa u lugiselela miṱangano. JW Library^® i ita uri ri kone u downlouda khandiso kha tshishumiswa tshashu tsha elekitironiki. Nga zwenezwo, ni nga kona u guda, u vhala kana u thetshelesa zwithu zwo rekhodiwaho tshifhinga tshiṅwe na tshiṅwe nahone huṅwe na huṅwe. Vhaṅwe vha shumisa JW Library^® u itela u guda nga tshifhinga tsha u awela musi vhe mushumoni kana tshikoloni kana vhe lwendoni. Watchtower Library na Watchtower ONLINE LIBRARY^™ dzi ita uri zwi leluwe u ita ṱhoḓisiso dza mbuno dzine ra khou ṱoḓa u dzi guda nga vhuḓalo.

17. (a) Ndi ngani zwi zwavhuḓi u lugiselela phindulo dzo vhalaho? (b) Ndi mini zwe na zwi guda kha vidio Become Jehovah’s Friend—Prepare Your Comment?

¹⁷ Arali zwi tshi konadzea, lugiselelani phindulo dzo vhalaho. Ndi ngani? Ngauri a si tshifhinga tshoṱhe tshine na ḓo sumbiwa musi no imisa tshanḓa. Vhaṅwe vha nga imisa zwanḓa khathihi na inwi, nahone mufari wa pfunzo a nga sumba muṅwe wavho. U itela uri miṱangano i fhele nga tshifhinga, mufari wa pfunzo a nga fhungudza vhathu vhane vha fhindula. Nga zwenezwo, ni songo khukhulisea kana u kulea nungo arali ni sa khou sumbiwa mathomoni a ngudo. Musi no lugiselela phindulo dzo vhalaho, ni ḓo kona u wana zwibuli zwo vhalaho zwa u fhindula. Iṅwe phindulo i nga vha u vhala luṅwalo. Fhedzi arali  ni tshi kona ni nga dovha na fhindula ni tshi shumisa maipfi aṋu. *

18. Ndi ngani ni tshi fanela u fhindula phindulo pfufhi?

¹⁸ Fhindulani phindulo pfufhi. Kanzhi phindulo pfufhi na dzi leluwaho ndi dzone dzine dza ṱuṱuwedza. Lwelani u fhindula phindulo pfufhi. Lingedzani u fhindula nga mithethe ya 30. (Mir. 10:19; 15:23) Arali no no fhedza miṅwaha minzhi ni tshi fhindula, ndi zwa ndeme uri ni vhe tsumbo nga u fhindula phindulo pfufhi. Arali ni khou fhindula phindulo ndapfu, vhaṅwe vha nga ofha uri vha nga si kone u fhindula nga nḓila ine na fhindula ngayo. Zwiṅwe hafhu, u fhindula phindulo pfufhi zwi ita uri na vhaṅwe vha kone u fhindula miṱanganoni. Arali hu inwi ane a khou thoma u fhindula, ṋeani phindulo yo leluwaho na yo livhaho. Ni songo amba mbuno dzoṱhe kha phara. Arali mbuno khulwane yo no ambiwa, ni nga amba dziṅwe mbuno.—Sedzani bogisi “ Ndi Nga Fhindula Nga Ha Mini?”

19. Mufari wa pfunzo a nga ni thusa hani, fhedzi ndi mini zwine na fanela u ita?

¹⁹ Vhudzani mufari wa pfunzo uri ni nga takalela u fhindula kha heyi phara. Arali ni tshi ṱoḓa u ita nga u ralo, ni fanela u amba na mufari wa bugu miṱangano i sa athu u thoma. Musi tshifhinga tsho swika tsha uri ni fhindule kha yeneyo phara, nga u ṱavhanya, imiselani tshanḓa tshaṋu nṱha uri mufari wa bugu a kone u tshi vhona.

20. Miṱangano ya tshivhidzo i fana hani na u kovhekana zwiḽiwa na khonani dzaṋu?

²⁰ Dzhiani miṱangano ya tshivhidzo u fana na zwiḽiwa zwine na zwi kovhekana na khonani dzaṋu. Humbulani, arali khonani dzaṋu tshivhidzoni dzo ni ramba uri ni ḓe zwiḽiwani nahone dza ni humbela uri ni dzudzanye zwiḽiwa zwiṱuku, ni ḓo ita mini? Ni nga vhilaela nyana, fhedzi ni nga ita zwoṱhe zwine na nga kona u dzudzanya zwiḽiwa zwine vhoṱhe vha ḓo zwi takalela. Samusi Yehova o ri ramba, o ri dzudzanyela ṱafula ḽo ḓalaho zwithu zwavhuḓi miṱanganoni yashu. (Ps. 23:5; Mat. 24:45) U a takala musi ri tshi ita zwoṱhe zwine ra nga kona u itela u mu ḓisela tshifhiwa tshavhuḓi. Nga zwenezwo, lugiselelani zwavhuḓi nahone ni fhindule no vhofholowa nga hune na nga kona ngaho. Nga u ralo, a ni nga ḓo sokou ḽa fhedzi ṱafulani ḽa Yehova, fhedzi na inwi ni ḓo ḓisa tshifhiwa tshivhidzoni.