1-2. (a) Ndi mini zwine Yehova a zwi vhona musi vhathu vha dzimilioni vhe Tshilaleloni tsha Murena? (Sedzani tshifanyiso tshi re kha gwati.) (b) Ri ḓo haseledza mini kha ino thero?

HUMBULANI zwine Yehova a zwi vhona musi vhathu vha dzimilioni u mona na shango ḽoṱhe vhe Tshilaleloni tsha Murena. Ha sokou vhona tshigwada tsha vhathu, fhedzi u vhona muthu muṅwe na muṅwe ane a vha henefho. Sa tsumbo, u vhona vhane vha ḓa nga u fulufhedzea ṅwaha muṅwe na muṅwe. Khamusi kha vhenevho hu na vhane vha ḓa hu sa londwi u tovholwa lu vhavhaho. Vhaṅwe a vha yi kha miṅwe miṱangano ya tshivhidzo, fhedzi vha dzhia u ya Tshihumbudzoni hu zwithu zwa ndeme zwine vha tea u zwi ita. Yehova u dovha a vhona na vhane vha nga vha vho ḓa Tshihumbudzoni lwa u tou thoma, khamusi vha khou itiswa nga u ṱoḓa u ḓivha zwine zwa itiwa kha wonoyu muṱangano.

² Yehova u takalela u vhona vhathu vhanzhi vha tshi ḓa Tshihumbudzoni. (Luka 22:19) Fhedzi Yehova ha livhisi ṱhogomelo kha tshivhalo tsha vhathu vhane vha ḓa, fhedzi u livhisa ṱhogomelo kha uri ndi ngani vho ḓa kha tshenetsho tshiitea. Kha ino thero, ri ḓo haseledza mbudziso ya ndeme: Ndi ngani ri sa yi Tshihumbudzoni fhedzi, fhedzi ri tshi ya na kha miṱangano ya tshivhidzo ye Yehova a i dzudzanyela vhane vha mu funa?

3-4. (a) Ndi ngani ri tshi ya miṱanganoni? (b) U ya miṱanganoni zwi amba mini nga ha riṋe? (c) U ya nga 1 Vhakorinta 11:23-26, ndi ngani ri tshi fanela u ya Tshihumbudzoni?

³ Tshiitisi tshihulwane tsha uri ri ye miṱanganoni ndi nga nṱhani ha uri ndi tshipiḓa tsha vhurabeli hashu. Ri dovha ra ya miṱanganoni nga nṱhani ha uri ri funzwa nga Yehova. Vhathu  vhane vha ḓihudza vha ḓivhudza uri a vha ṱoḓi u funzwa tshithu. (3 Yoh. 9) U fhambana navho, ro ḓiimisela u funzwa nga Yehova na ndangulo yawe.—Yes. 30:20; Yoh. 6:45.

⁴ U ya miṱanganoni zwi sumbedza uri ri a ḓiṱukufhadza nahone ro ḓiimisela u guda. A ri yi Tshihumbudzoni tsha lufu lwa Yesu ngauri ri khou kombetshedzea u ita nga u ralo, fhedzi ri ya nga nṱhani ha uri ri a ḓiṱukufhadza nahone ri thetshelesa ndaela ya Yesu ine ya ri: “Dzulani ni tshi ita zwenezwi u itela u nkhumbula.” (Vhalani 1 Vhakorinta 11:23-26.) Tshenetsho tshiitea tshi ita uri ri vhe na fulufhelo ḽo khwaṱhaho nga ha vhumatshelo na uri humbudza uri Yehova u a ri funa. Naho zwo ralo, Yehova u a zwi ḓivha uri ri ṱoḓa u ṱuṱuwedzwa na u khuthadzwa hu si luthihi nga ṅwaha fhedzi. Nga zwenezwo, u ri itela miṱangano vhege iṅwe na iṅwe nahone uri ṱuṱuwedza uri ri ye khayo. U ḓiṱukufhadza zwi ri ita uri ri thetshelese. Ri fhedza tshifhinga tshinzhi ri tshi khou lugisela na u ya miṱanganoni.

5. Ndi ngani vhathu vhane vha ḓiṱukufhadza vha tshi tenda u rambiwa nga Yehova uri a vha gudise?

⁵ Ṅwaha muṅwe na muṅwe, vhathu vhanzhi vhane vha ḓiṱukufhadza vha tenda u rambiwa nga Yehova uri a vha gudise. (Yes. 50:4) Vha ḓifhelwa nga u ya Tshihumbudzoni nahone vha thoma u ya na kha miṅwe miṱangano. (Sak. 8:20-23) Roṱhe ri takalela u gudiswa nga Yehova ane a vha “Mutshidzi [washu na] Mulamuleli.” (Ps. 40:17) A hu na tshithu tshi takadzaho u fana na u gudiswa nga Yehova na Murwa wawe Yesu ane a mu funesa.—Mat. 17:5; 18:20; 28:20.

6. U ḓiṱukufhadza zwo thusa hani muṅwe munna uri a ye Tshihumbudzoni?

⁶ Ṅwaha muṅwe na muṅwe ri ita vhuḓidini ha u rambela vhathu vhanzhi Tshihumbudzoni tsha lufu lwa Yesu nga hune zwa nga konadzea ngaho. Vhathu vhanzhi vhane vha ḓiṱukufhadza vha a vhuyelwa nga u tenda musi ri tshi vha ramba. Ṱhogomelani tsumbo i tevhelaho. Miṅwahani i si gathi yo fhiraho, muṅwe munna o ṱanganedza tshibammbiri tsha u mu rambela Tshihumbudzoni, fhedzi a vhudza muthu we a mu ṋea tshenetsho tshibammbiri uri a nga si kone u swika. Fhedzi nga ḓuvha ḽa Tshihumbudzo, wahashu o mangala musi onoyo munna a tshi dzhena Holoni ya Muvhuso. Onoyo munna o mangadzwa nga nḓila ye a ṱanganedzwa ngayo nahone a thoma u ya miṱanganoni vhege iṅwe na iṅwe. Kha ṅwaha u tevhelaho, ndi luraru fhedzi lwe a si kone u ya miṱanganoni. Ndi mini zwe zwa mu thusa uri a ye miṱanganoni? U ḓiṱukufhadza zwo ita uri a shandule muhumbulo wawe. Wahashu we a mu ramba o ri, “U a ḓiṱukufhadza vhukuma.” A zwi timatimisi uri ndi Yehova we a kokodza onoyo munna uri a mu gwadamele nahone zwino o lovhedzwa.—2 Sam. 22:28; Yoh. 6:44.

7. Zwine ra zwi guda miṱanganoni na Bivhilini zwi nga ri thusa hani uri ri ḓiṱukufhadze?

⁷ Zwine ra zwi guda miṱanganoni na musi ri tshi vhala Bivhili zwi nga ri thusa uri ri ḓiṱukufhadze. Musi ho sala vhege dzi si gathi uri ri ye Tshihumbudzoni, miṱangano yashu i ḓo vha yo livhisa ṱhogomelo kha tsumbo ya Yesu na nḓila ye a ḓiṱukufhadza ngayo musi a tshi ṋekedza vhutshilo hawe sa tshirengululi. Ri a ṱuṱuwedzwa uri ri vhale mafhungo ane a amba nga ha lufu lwa Yesu na mvuwo yawe Bivhilini musi ho sala maḓuvha a si gathi uri ri ye Tshihumbudzoni. Zwine ra zwi guda miṱanganoni na zwine ra zwi vhala nga ha zwenezwo zwiitea Bivhilini, zwi ita uri ri dzhiele nṱha zwe Yesu a ri itela zwone. Zwi ita uri ri edzise u ḓiṱukufhadza hawe na u ita zwine Yehova a zwi funa na musi zwi tshi konḓa.—Luka 22:41, 42.

8. Yesu o sumbedza hani tshivhindi?

⁸ Ri lingedza u edzisa Yesu nga u vha na tshivhindi. Humbulani nga tshivhindi tshe a tshi sumbedza musi a sa athu fa. O vha a tshi zwi ḓivha uri hu si kale maswina awe a ḓo mu shonisa, u mu rwa na u mu vhulaya. (Mat. 20:17-19) Fhedzi o vha o ḓiimisela u fa. Musi tshifhinga tshi tshi swika, o vhudza vhaapostola vhawe vha fulufhedzeaho vhe a vha e navho ngei Getsemane uri: “Vuwani; kha ri ṱuwe. O mpheṱaho u tsini.” (Mat. 26:36, 46) Musi tshigwada tsha vhathu tshe tsha vha tsho ḓiṱama tshi tshi ḓa u mu fara, o bvela khagala a ḓiṱalusa nahone a vhudza eneo maswole uri a litshe vhaapostola vhawe vha ṱuwe. (Yoh. 18:3-8) Yesu o sumbedza u vha na tshivhindi! Ṋamusi, Vhakriste vho ḓodzwaho na vha dziṅwe nngu vha lwela u edzisa Yesu nga u vha na tshivhindi. Nga nḓila-ḓe?

9. (a) Ndi ngani zwi tshi ṱoḓa tshivhindi u ya miṱanganoni tshifhinga tshoṱhe? (b) Tsumbo dzashu dzi kwama hani vhahashu vhane vha vha dzhele nga nṱhani ha lutendo lwavho?

⁹ U itela u ya miṱanganoni tshifhinga tshoṱhe, ri nga fanela uri ri vhe na tshivhindi musi ro sedzana na vhuimo vhu konḓaho. Vhaṅwe vhahashu vha a ya miṱanganoni hu sa londwi vhuimo vhu konḓaho vhu ngaho, u lila, u kulea nungo kana thaidzo dza mutakalo. Vhaṅwe vha sumbedza u vha na tshivhindi nga u ya miṱanganoni hu sa londwi u hanedzwa nga miraḓo ya muṱa kana nga vhavhusi. Humbulani nga ha nḓila ine tsumbo dzashu dza kwama ngayo vhahashu vhane vha vha dzhele nga nṱhani ha lutendo lwavho. (Vhaheb. 13:3) Musi vha tshi pfa uri ri bvela phanḓa ri tshi shumela Yehova naho ro sedzana na thaidzo, zwi ita uri vha dzule vhe na lutendo, tshivhindi na u fulufhedzea. Na muapostola Paulo o ṱangana na zwithu zwi fanaho. Musi e dzhele ya ngei Roma, o takadzwa nga u pfa uri vhahawe vha khou shumela Mudzimu nga u fulufhedzea. (Vhafil. 1:3-5, 12-14) Paulo o ṅwalela Vhaheberu vhurifhi musi a sa athu vhofhololwa kana nga murahu ha musi o no vhofhololwa. Kha honoho vhurifhi o ṱuṱuwedza Vhakriste vha fulufhedzeaho uri vha “[bvele] phanḓa [vha] tshi funana sa vharathu na vhakomana” na uri vha si litshe u kuvhangana vhoṱhe.—Vhaheb. 10:24, 25; 13:1.

10-11. (a) Ndi vhafhio vhane ra fanela u vha ramba? (b) Vhaefesa 1:7 i ri ṋea tshiitisi tshifhio tsha u ita nga u ralo?

¹⁰ Ri sumbedza u vha na tshivhindi nga u rambela Tshihumbudzoni mashaka ashu, vhane ra shuma navho na vhahura vhashu. Ndi ngani ri tshi vha ramba? Ri ramba vhaṅwe uri vha ḓe Tshihumbudzoni nga nṱhani ha uri ri livhuwa zwe Yehova na Yesu vha ri itela zwone. Ri ṱoḓa vha tshi guda uri vha nga vhuyelwa nga ‘vhuthu vhuhulu’ ha Yehova he a vhu sumbedza nga tshirengululi.—Vhalani Vhaefesa 1:7; Nzumb. 22:17.

¹¹ Musi ri tshi sumbedza tshivhindi nga u kuvhangana, ri vha ri tshi khou sumbedza pfaneleo yavhuḓi ine Mudzimu na Murwa wawe vha i sumbedza nga nḓila i mangadzaho.

12. (a) Miṱangano yashu i ita hani uri ri fune Yehova na Yesu? (b) 2 Vhakorinta 5:14, 15 i ri ṱuṱuwedza uri ri edzise Yesu nga nḓila-ḓe?

¹² U funa hashu Yehova na Yesu zwi ita uri ri ye miṱanganoni. Nga zwenezwo, zwine ra zwi guda miṱanganoni zwi ita uri ri fune Yehova na Murwa wawe nga ho engedzeaho. Ri humbudzwa zwe vha ri itela zwone tshifhinga tshoṱhe musi ri miṱanganoni. (Vharoma 5:8) Tshihumbudzo tshi humbudza riṋe na vha sa pfesesi vhundeme ha tshirengululi, lufuno lune Yehova na Yesu vha vha nalwo. Nga nṱhani ha uri ri dzhiela nṱha zwe vha ri itela zwone, ri lingedza u edzisa Yesu nga nḓila ine ra tshila ngayo ḓuvha ḽiṅwe na ḽiṅwe. (Vhalani 2 Vhakorinta 5:14, 15.) Zwiṅwe hafhu, mbilu yashu i ri ṱuṱuwedza uri ri rende Yehova nge a ri ṋea tshirengululi. Iṅwe nḓila ine ra nga mu renda ngayo, ndi nga u fhindula miṱanganoni zwi tshi bva mbiluni.

13. Ri nga sumbedza hani uri ri funa Yehova na Murwa wawe? Ṱalutshedzani.

¹³ Ri nga sumbedza uri ri funa Yehova na Murwa wawe nga u ḓidzima zwiṅwe zwithu ri tshi itela vhone. Kanzhi ri tea u ḓidzima zwiṅwe zwithu u itela u ya miṱanganoni. Zwivhidzo zwinzhi zwi vha na miṱangano musi vhathu vha tshi tou tshaisa mushumoni nahone kanzhi ri vha ro neta. Miṅwe miṱangano i vha hone nga mafhelo a vhege musi vhaṅwe vhathu vho awela. Naa Yehova u a zwi ṱhogomela uri ri ya miṱanganoni naho ro neta? U a zwi ṱhogomela! Yehova u a ri vhona nahone u dzhiela nṱha vhuḓidini vhune ra vhu ita u itela u ya miṱanganoni.—Marko 12:41-44.

14. Yesu o ri vhetshela hani tsumbo ya u sumbedza lufuno lu sa ḓiṱoḓeli zwalwo?

¹⁴ Yesu o ri vhetshela tsumbo ya u sumbedza lufuno lu sa ḓiṱoḓeli zwalwo. O vha a songo ḓiimisela u sokou fela vhafunziwa vhawe fhedzi, fhedzi na u tshila u itela u vhea madzangalelo avho u thoma. Sa tsumbo, o vha a tshi vha e na vhafunziwa vhawe naho o neta kana o tsikeledzea. (Luka 22:39-46) O vha a tshi livhisa ṱhogomelo kha zwine a nga zwi ṋea vhaṅwe, hu si zwine a nga zwi wana khavho. (Mat. 20:28) Musi ri tshi funa Yehova na vhahashu zwi tshi bva mbiluni, ri ḓo ita zwoṱhe zwine ra nga kona u itela u ya Tshilaleloni tsha Murena u katela na miṱanganoni yoṱhe ya tshivhidzo.

15. Ndi vhafhio vhane ra takalela u vha thusa?

¹⁵ Ri tshipiḓa tsha vhurathu na vhukomana tsha Vhakriste vha ngoho u mona na shango  ḽoṱhe nahone ri ḓifhelwa nga u fhedza tshifhinga tsho engedzeaho ri tshi khou rambela vhathu vhaswa ngohoni. Naho zwo ralo, ri takalela u thusa vhane vha “vha na lutendo lu fanaho na lwashu” fhedzi vho fholaho muyani. (Vhagal. 6:10) Ri sumbedza uri ri a vha funa nga u vha ṱuṱuwedza uri vha ḓe miṱanganoni, zwihuluhulu Tshihumbudzoni. U fana na Yehova na Yesu, ri ḓo takala vhukuma musi muthu we a vha o fhola muyani a tshi humela kha Yehova ane a vha Khotsi ashu wa lufuno na Mulisa.—Mat. 18:14.

16. (a) Ri nga ṱuṱuwedzana hani, nahone miṱangano yashu i ri itela mini? (b) Ndi ngani zwino hu tshifhinga tshavhuḓi tsha u humbula maipfi a Yesu ane a wanala kha Yohane 3:16?

¹⁶ Musi ho sala vhege dzi si gathi, rambani vhathu vhanzhi nga hune zwa nga konadzea ngaho Tshihumbudzoni nga madekwana a Ḽavhuṱanu a ḽa 19 April 2019. (Sedzani bogisi “ Ni Ḓo Vha Ramba?”) U nga ri ri nga ita zwoṱhe zwine ra nga kona u itela u ṱuṱuwedza vhaṅwe nga u vha hone tshifhinga tshoṱhe miṱanganoni yoṱhe ye Yehova a ri dzudzanyela yone. Samusi vhufhelo ha ano maitele a zwithu vhu tsini, miṱangano yashu i ḓo ri thusa uri ri dzule ri tshi ḓiṱukufhadza, ri na tshivhindi na lufuno. (1 Vhathes. 5:8-11) Kha ri sumbedze nḓila ine ra ḓipfa ngayo zwi tshi bva mbiluni nga ha Yehova na Murwa wawe nge vha sumbedza uri vha a ri funa!—Vhalani Yohane 3:16.