THERO I GUDWAHO 4
“Muya Wa Mudzimu U A Ri Dzumbululela”
“Muya wa Mudzimu u a ri dzumbululela uri ri vhana vha Mudzimu.”—VHAROMA 8:16.
LUIMBO 25 Vhathu Vho Khetheaho
MANWELEDZO *
Yehova o ḓodza Vhakriste vha ṱoḓaho u vha 120 nga nḓila i mangadzaho nga Pentekoste (Sedzani dziphara 1-2)
1-2. Ndi tshiitea tshifhio tshi mangadzaho tsho iteaho nga Pentekoste ya 33 C.E.?
NDI nga Swondaha nga matsheloni nga Pentekoste ya 33 C.E. ngei Yerusalema. Vhafunziwa vha ṱoḓaho u vha 120 vho kuvhangana kamarani ya nṱha. (Mish. 1:13-15; 2:1) Maḓuvhani a si gathi hu sa athu itea zwenezwo, Yesu o vha o vha vhudza uri vha dzule henefho Yerusalema uri vha kone u ṋewa tshifhiwa. (Mish. 1:4, 5) Nga murahu hu itea mini?
2 “Nga u ṱavhanya [hu] pfala mubvumo u bvaho ṱaḓulu u tshi nga wa ḓumbu.” Wonoyu mubvumo u pfala nḓuni yoṱhe. Nga murahu hu vhonala “khavhu dza mulilo dzi ngaho lulimi” nṱha ha ṱhoho dza vhafunziwa nahone vhoṱhe vha “ḓadzwa nga muya mukhethwa.” (Mish. 2:2-4) Yehova o ḓodza vhenevho vhafunziwa nga yeneyo nḓila i mangadzaho. (Mish. 1:8) Vho vha vha u thoma u ḓodzwa nga muya mukhethwa * nahone vha vha na fhulufhelo ḽa u vhusa na Yesu ṱaḓulu.
HU ITEA MINI MUSI MUTHU A TSHI ḒODZWA?
3. Ndi ngani vhathu vho ḓodzwaho nga muya mukhethwa nga Pentekoste vha songo timatima?
3 Arali ni vhe ni hone kha vhe vha kuvhangana kamarani ya nṱha nga ḽeneḽo ḓuvha, no vha ni sa ḓo zwi hangwa. Tshithu tshi ngaho khavhu ya mulilo i ngaho lulimi tshi nṱha ha ṱhoho yaṋu nahone na thoma u amba nga luṅwe luambo. (Mish. 2:5-12) No vha ni sa ḓo timatima uri no ḓodzwa nga muya mukhethwa. Fhedzi naa vhoṱhe vhane vha ḓodzwa vha wana muya mukhethwa nga nḓila i mangadzaho nahone vha ḓodzwa nga tshifhinga tshithihi? Hai! Ri zwi ḓivha hani?
4. Naa vhaḓodzwa vha tshifhingani tsha kale vho ḓodzwa khathihi? Ṱalutshedzani.
4 Kha ri ambe nga ha uri vha ḓodzwa lini. Vha ṱoḓaho u vha 120 vhe vha vha vhe hone nga Pentekoste ya 33 C.E. a si vhone vhe vhoṱhe vho ḓodzwaho. Nga murahunyana nga ḽeneḽo ḓuvha, vhaṅwe vha ṱoḓaho u vha 3 000 vho ḓodzwa nga muya mukhethwa. Vho ḓodzwa musi vha tshi lovhedzwa. (Mish. 2:37, 38, 41) Fhedzi miṅwahani i tevhelaho, a si vhoṱhe vhe vha ḓodzwa musi vha tshi lovhedzwa. Vhasamaria vho ḓodzwa ho no fhela tshifhinganyana vho lovhedzwa. (Mish. 8:14-17) Koronelio na vha muṱa wawe vho ḓodzwa vha sa athu lovhedzwa nahone zwenezwo zwo vha zwi songo ḓowelea.—Mish. 10:44-48.
5. U ya nga 2 Vhakorinta 1:21, 22, hu itea mini musi muthu a tshi ḓodzwa?
5 Kha ri haseledze uri hu itea mini musi muthu a tshi ḓodzwa. Vhaṅwe vho ḓodzwaho vho thoma zwi tshi vha konḓela u tenda uri Yehova o vha khetha. Vha nga ḓivhudzisa uri: ‘Ndi ngani Mudzimu o khetha nṋe?’ Vhaṅwe a vha ḓipfi nga u ralo. Hu sa londwi uri muthu u ḓipfa hani, muapostola Paulo u ṱalutshedza zwine zwa itea musi muthu a tshi ḓodzwa, u ri: “Musi no no tenda, no swaiwa * nga muya mukhethwa we Mudzimu a u fhulufhedzisa, une wa khwaṱhisedza uri ri ḓo wana ifa ḽashu.” (Vhaef. 1:13, 14) Yehova u shumisa muya wawe mukhethwa u itela uri vho ḓodzwaho vha vhe na vhungoho ha uri vho ḓodzwa. Nga yeneyo nḓila, muya mukhethwa u vha “khwaṱhisedza [kana u vha fhulufhedzisa]” uri vha ḓo tshila tshoṱhe ṱaḓulu, hu si kha ḽifhasi.—Vhalani 2 Vhakorinta 1:21, 22.
6. Mukriste o ḓodzwaho u tea u ita mini uri a kone u tshila ṱaḓulu?
6 Arali Mukriste o ḓodzwa, naa zwenezwi zwi amba uri u ḓo ya ṱaḓulu? Hai. Naho e na vhungoho ha uri o khethwa uri u ḓo ya ṱaḓulu, u tea u humbula heyi nyeletshedzo: “Vhahashu, ndi ngazwo ni tshi tea u ita zwoṱhe zwine na nga kona uri zwe na vhidzelwa na u nangelwa zwone zwi vhe zwa vhukuma kha inwi, ngauri arali na dzula ni tshi ita zwenezwi zwithu, a ni nga wi.” (2 Pet. 1:10) Nga zwenezwo, naho Mukriste o ḓodzwa kana o vhidzelwa u ya ṱaḓulu, u ḓo ya ṱaḓulu fhedzi arali a dzula a tshi fhulufhedzea.—Vhafil. 3:12-14; Vhahev. 3:1; Nzumb. 2:10.
MUTHU U ZWI ḒIVHA HANI URI O ḒODZWA?
7. Vhaḓodzwa vha zwi ḓivha hani uri vho khethwa uri vha ḓo ya ṱaḓulu?
7 Muthu u zwi ḓivha hani uri Yehova o mu khetha uri a ḓe ṱaḓulu? Phindulo ri i wana kha maipfi e Paulo a vhudza vha re ngei Roma “vho vhidzwaho uri vha vhe vhakhethwa.” O ri: “A no ngo ṱanganedza muya wa uri ni vhe phuli, u itaho uri ni dovhe ni ofhe, fhedzi no ṱanganedza muya wa uri ni vhe vhana vhawe, wonoyo muya u ita uri ri vhidzelele ri ri: ‘Aba, Khotsi!’ Muya wa Mudzimu u a ri dzumbululela uri ri vhana vha Mudzimu.” (Vharoma 1:7; 8:15, 16) Mudzimu u shumisa muya wawe mukhethwa u itela uri vhaḓodzwa vha ḓivhe uri o vha khetha.—1 Vhathes. 2:12.
8. 1 Yohane 2:20, 27 i sumbedza hani uri vhaḓodzwa vha a zwi ḓivha uri vho khethiwa na uri a zwi ṱoḓei uri vha khwaṱhisedzwe nga muthu?
8 Yehova u ita uri vhe a vha khetha vha si timatime uri vho khethiwa. (Vhalani 1 Yohane 2:20, 27.) Naho zwo ralo, u fana na muṅwe na muṅwe, vhaḓodzwa na vhone vha gudiswa nga Yehova a tshi shumisa ndangulo yawe. Vhaḓodzwa vhone vhaṋe vha a zwi ḓivha uri vho ḓodzwa, a hu ṱoḓei uri muthu a vha khwaṱhisedze. Yehova u shumisa muya wawe mukhethwa une wa vha maanḓa a shumaho nga nḓila khulwane u itela u vha khwaṱhisedza uri vho ḓodzwa.
VHO “BEBWA HAFHU”
9. Musi muthu a tshi ḓodzwa hu vha na tshanduko ifhio khae samusi zwo ambiwa kha Vhaefesa 1:18?
9 Vhashumeli vhanzhi vha Yehova a vha pfesesi uri hu itea mini musi muthu a tshi khethiwa uri a vhe muḓodzwa. A vha pfesesi ngauri a vho ngo ḓodzwa. Musi Mudzimu a tshi sika vhathu, o vha a tshi khou ṱoḓa uri vha tshile tshoṱhe ḽifhasini, hu si ṱaḓulu. (Gen. 1:28; Ps. 37:29) Fhedzi o khetha vhaṅwe uri vha tshile ṱaḓulu. Musi a tshi vha khetha, u shandula nḓila ine vha humbula ngayo uri fhulufhelo ḽavho ḽi vhe ḽa u tshila ṱaḓulu.—Vhalani Vhaefesa 1:18.
10. Zwi amba mini u “bebwa hafhu”? (Sedzani na ṱhaluso i re magumoni a siaṱari.)
10 Musi Vhakriste vha tshi ḓodzwa nga muya mukhethwa, vha “bebwa hafhu.” * Yesu o dovha a sumbedza uri a zwi konadzei u ṱalutshedza muthu a songo ḓodzwaho uri zwi hani u “bebwa hafhu” kana u “bebwa nga muya.”—Yoh. 3:3-8.
11. Ṱalutshedzani uri hu shanduka mini kha nḓila ine muthu o ḓodzwaho a humbula ngayo.
11 Musi Mukriste a tshi ḓodzwa, nḓila ine a humbula ngayo i shanduka hani? Musi a sa athu ḓodzwa u vha e na fhulufhelo ḽa u tshila tshoṱhe ḽifhasini. U vha o lavhelela nga maṱo matswuku tshifhinga tshine Yehova a ḓo fhelisa vhuvhi hoṱhe a ita uri ḽifhasi ḽi vhe pharadiso. Khamusi o vha a tshi ḓivhona a tshi khou ṱanganedza vhathu vha hawe na khonani dzawe dzo vuswaho. Fhedzi musi o no ḓodzwa, nḓila ine a humbula ngayo i a shanduka. Ndi ngani? A si ngauri u vho vhona u tshila kha ḽifhasi zwi zwa fhasi. Ho ngo shandula muhumbulo wawe nga nṱhani ha thaidzo dze a ṱangana nadzo. Nahone a si uri u vho vhona u nga u tshila tshoṱhe ḽifhasini zwi ḓo bora. Nṱhani ha zwenezwo, Yehova u shumisa muya wawe mukhethwa u itela u shandula nḓila ine a humbula ngayo na fhulufhelo ḽine a vha naḽo.
12. U ya nga 1 Petro 1:3, 4, vhaḓodzwa vha ḓipfa hani nga fhulufhelo ḽavho?
12 Muthu o ḓodzwaho a nga ḓipfa a sa fanelei. Fhedzi ha timatimi na luthihi uri Yehova o mu khetha. Mbilu yawe i fhufhuma nga dakalo musi a tshi humbula nga ha fhulufhelo ḽa vhumatshelo.—Vhalani 1 Petro 1:3, 4.
13. Vhaḓodzwa vha dzhia hani vhutshilo havho ha musi vha tshee kha ḽifhasi?
13 Naa zwenezwi zwi amba uri vhaḓodzwa vha ṱoḓa u ṱavhanya vha fa? Musi muapostola Paulo a tshi fhindula yeneyo mbudziso, o fanyisa mivhili yavho na dennde. O ri: “Ngoho ndi ya uri riṋe vha re kha ḽeneḽi dennde ri a gomela, ro tsikeledzea, ngauri a ri ṱoḓi u bva khaḽo, fhedzi ri ṱoḓa u dzhena kha ḽiṅwe, uri ri wane vhutshilo, ri si tsha fa.” (2 Vhakor. 5:4) Vhenevha Vhakriste a vha ri ndi fa lini! Fhedzi vha kha ḓi takalela u tshila nahone vha ṱoḓa u fhedza tshifhinga vha tshi khou shumela Yehova vhe na miṱa yavho na khonani dzavho. Naho zwo ralo, hu sa londwi uri vha khou ita mini, vha dzula vha tshi humbula nga ha fhulufhelo ḽavho ḽavhuḓi ḽa vhumatshelo.—1 Vhakor. 15:53; 2 Pet. 1:4; 1 Yoh. 3:2, 3; Nzumb. 20:6.
NAA NO ḒODZWA?
14. Ndi zwifhio zwine musi u tshi zwi ita zwa si ambe uri wo ḓodzwa?
14 Khamusi ni khou ḓivhudzisa arali no ḓodzwa nga muya mukhethwa. Arali zwo ralo, humbulisisani nga ha hedzi mbudziso dza ndeme: Naa ni na lutamo lu ni ṱuṱuwedzaho u ita zwi funwaho nga Mudzimu? Naa ni pfa u nga ni a fhisea vhukuma kha u huwelela? Naa ni a takalela u guda nga ha “zwithu zwa Mudzimu zwo dzumbiwaho” Bivhilini? (1 Vhakor. 2:10) Naa ni vhona u nga Yehova o fhaṱutshedza vhuḓidini he na vhu ita musi ni tshi huwelela? Naa ni pfa ni na vhuḓifhinduleli ha u thusa vhaṅwe u guda nga ha Yehova? Naa Yehova o no ni thusa nga zwithu zwinzhi? Arali no fhindula dzenedzi mbudziso nga ‘Ee!’ naa zwi amba uri ni muḓodzwa? Na khathihi. Ndi ngani? Ngauri vhashumeli vhoṱhe vha Yehova vha nga ḓipfa nga yeneyo nḓila naho vha songo ḓodzwa. Yehova a nga shumisa muya wawe mukhethwa u ṋea mushumeli wawe muṅwe na muṅwe maanḓa a u ita zwenezwi zwithu, hu sa londwi uri u na fhulufhelo ḽa u tshila gai. Arali ni tshi kha ḓi timatima uri no ḓodzwa, zwi amba uri a no ngo ḓodzwa. Vho ḓodzwaho nga muya wa Mudzimu a vha timatimi! Vha a zwi ḓivha uri vho ḓodzwa!
Yehova o shumisa muya wawe mukhethwa u itela u thusa Abrahamu, Sara, Davida na Yohane Mulovhedzi u ita zwithu zwi mangadzaho, fhedzi ho ngo vha khetha uri vha tshile ṱaḓulu (Sedzani dziphara 15-16) *
15. Ri zwi ḓivha hani uri a si vhoṱhe vho wanaho muya mukhethwa vhane vha ḓo tshila ṱaḓulu?
15 Bivhilini hu na tsumbo dza vhathu vhanzhi vha re na lutendo vhe vha wana muya mukhethwa, fhedzi vha si khethiwe uri vha ḓo tshila ṱaḓulu. Davida o vha a tshi livhiswa nga muya mukhethwa. (1 Sam. 16:13) Wo mu thusa uri a kone u pfesesa zwithu zwo dzumbiwaho Bivhilini na u mu livhisa uri a ṅwale tshiṅwe tshipiḓa tsha Bivhili. (Marko 12:36) Naho zwo ralo, muapostola Petro o amba uri Davida “ho ngo ya ṱaḓulu.” (Mish. 2:34) Yohane Mulovhedzi o vha o “ḓadzwa nga muya mukhethwa.” (Luka 1:13-16) Yesu o amba uri a hu na muthu ane a fhira Yohane, fhedzi o dovha a amba uri Yohane ha nga yi ṱaḓulu. (Mat. 11:10, 11) Yehova o ṋea vhenevha vhanna muya mukhethwa uri vha kone u ita zwithu zwi mangadzaho, fhedzi ho ngo vha khetha uri vha ye u tshila ṱaḓulu. Naa zwenezwi zwi amba uri a vho ngo fhulufhedzea u fana na vhane vha ḓo vhusa ṱaḓulu? Hai. Zwi amba uri Yehova u ḓo vha vusa vha tshila tshoṱhe Pharadisoni.—Yoh. 5:28, 29; Mish. 24:15.
16. Vhunzhi ha vhathu vha Yehova vho lavhelela mini?
16 Vhashumeli vhanzhi vha Mudzimu ṋamusi a vha na fhulufhelo ḽa u tshila ṱaḓulu. Vha na fhulufhelo ḽa u tshila kha ḽifhasi musi Muvhuso wa Mudzimu u tshi vhusa, u fana na Abrahamu, Sara, Yohane Mulovhedzi na vhaṅwe vhanna na vhafumakadzi vha fhulufhedzeaho vha zwifhingani zwa kale.—Vhahev. 11:10.
17. Ri ḓo haseledza mbudziso dzifhio kha thero i tevhelaho?
17 Hu na mbudziso dzine ra nga ḓivhudzisa dzone ngauri ri kha ḓi tshila na vhaḓodzwa. (Nzumb. 12:17) Sa tsumbo, vhaḓodzwa vha tea u ḓidzhia hani? Ri tea u dzhia hani muthu ane a thoma u ḽa na u nwa Tshihumbudzoni? Naa ri tea u vhilaedziswa nga u vhona tshivhalo tsha vhane vha ḽa na u nwa tshi tshi engedzea tshi tshi ya? Thero i tevhelaho i ḓo fhindula dzenedzo mbudziso.
^ phar. 5 U bva nga Pentekoste ya 33 C.E., Yehova o ṋea vhaṅwe Vhakriste fhulufhelo ḽa u vhusa na Murwa wawe ṱaḓulu. Fhedzi Vhakriste vha zwi ḓivha hani uri vho khethiwa? Yehova u khetha hani vhane vha ḓo vhusa ṱaḓulu? Ino thero i ḓo fhindula dzenedzo mbudziso dzi vusaho dzangalelo nahone i fana na i re kha Tshiingamo tsha January 2016.
^ phar. 2 ṰHALUTSHEDZELO YA MAIPFI: U ḓodzwa nga muya mukhethwa: Yehova u khetha muthu ane a ḓo vhusa na Yesu ṱaḓulu a tshi shumisa muya mukhethwa. Nga wonoyo muya mukhethwa, Yehova u vha a tshi khou ṋea onoyo muthu fhulufhelo ḽa u tshila ṱaḓulu kana u mu “khwaṱhisedza” nga zwine a ḓo zwi wana. (Vhaef. 1:13, 14) Muya mukhethwa u mu “dzumbululela” na u mu bvisela khagala uri u ḓo wana malamba awe ṱaḓulu.—Vharoma 8:16.
^ phar. 5 ṰHALUTSHEDZELO YA MAIPFI: U swaiwa. Honohu u swaiwa hu vha ha tshoṱhe arali muthu o ḓodzwaho o fhulufhedzea u swika a tshi fa kana hu sa athu thoma maṱungu mahulu.—Vhaef. 4:30; Nzumb. 7:2-4; sedzani “Mbudziso Dzi Bvaho Ha Vhavhali” kha Tshiingamo tsha April 2016 nga Luisimane.
^ phar. 10 U itela u wana zwo engedzeaho nga ha u “bebwa hafhu,” vhalani Tshiingamo tsha ḽa 1 July 2009, masiaṱ. 3-12.
LUIMBO 27 U Dzumbululwa Ha Vharwa Vha Mudzimu
^ phar. 57 ṰHALUSO YA TSHIFANYISO: Roṱhe ri nga vha na fhulufhelo ḽa u tshila kha ḽifhasi musi Muvhuso wa Mudzimu u tshi vhusa, hu sa londwi uri ri dzhele kana ri na mbofholowo ya u huwelela na u funza.
