1. Muṅwe muṱhannga o kwamea hani nga nyambo ye ya vhewa buthanoni nga 1935?

HO VHA hu na muṅwe muṱhannga we a lovhedzwa nga 1926 e na miṅwaha ya 18. Vhabebi vhawe vho vha vhe Vhagudi vha Bivhili sa izwi Ṱhanzi dza Yehova vho vha vha tshi vhidzwa nga ḽeneḽo dzina nga tshenetsho tshifhinga. Vho vha vhe na vharwa vhararu na vhananyana vhavhili vhe vha vha alusa uri vha shumele Yehova Mudzimu na u edzisa Yesu Kristo. Onoyo muṱhannga a funaho Mudzimu o vha a tshi ḽa vhurotho na u nwa waini ṅwaha muṅwe na muṅwe Tshilaleloni tsha Murena, u fana na vhaṅwe Vhagudi vha Bivhili vhoṱhe nga tshenetsho tshifhinga. Fhedzi fhulufhelo ḽawe ḽo shanduka musi a tshi pfa nyambo yo khetheaho i re na tshiṱoho tshine tsha ri: “Gogo Ḽihulu.” Yeneyo nyambo yo vhewa nga Vho J. F. Rutherford buthanoni ḽe ḽa vha ḽi ngei Amerika Washington D.C. Vhagudi vha Bivhili vho guda mini kha ḽeneḽo buthano?

2. Wahashu Vho Rutherford vho ṱalutshedza ngoho ifhio i takadzaho kha nyambo yavho?

² Kha nyambo yavho, Vho Rutherford vho ṱalutshedza uri vha “gogo ḽihulu” ḽo ambiwaho kha Nzumbululo 7:9 ndi vhafhio. U swika nga tshenetsho tshifhinga, Vhagudi vha Bivhili vho vha vha tshi humbula uri vha gogo ḽihulu vha ḓo ya ṱaḓulu, fhedzi vha tshi humbula uri vhaḓodzwa vha fhulufhedzea u fhira vha gogo ḽihulu. Wahashu Vho Rutherford vho ṱalutshedza vha tshi shumisa Maṅwalo uri vha gogo ḽihulu a vha nga ḓo  ya ṱaḓulu, fhedzi ndi vha dziṅwe nngu * dza Kristo vhane vha ḓo ponyoka ‘maṱungu mahulu’ vha tshila tshoṱhe kha ḽifhasi. (Nzumb. 7:14) Yesu o fhulufhedzisa a ri: “Ndi na dziṅwe nngu dzine dzi si vhe dza hetshi tshitumba; na dzone ndi fanela u dzi ḓisa, dzi ḓo pfa ipfi ḽanga, dza vha sambi ḽithihi, dza vha na mulisa muthihi.” (Yoh. 10:16) “Dziṅwe nngu” hu khou ambiwa Ṱhanzi dza Yehova dzi fhulufhedzeaho dzi re na fhulufhelo ḽa u tshila tshoṱhe Pharadisoni kha ḽifhasi. (Mat. 25:31-33, 46) Kha ri vhone uri yeneyi nḓila ntswa ine ha pfeseswa ngayo enea mafhungo yo shandula hani vhutshilo ha vhathu vhanzhi vha Yehova, u katela na uḽa muṱhannga wa miṅwaha ya 18.—Ps. 97:11; Mir. 4:18.

3-4. Buthanoni ḽa 1935, vhathu vhanzhi vho pfesesa mini nga ha fhulufhelo ḽavho?

³ Kha ḽeneḽo buthano, zwo takadza vhukuma musi tshiambi tshi tshi amba na vhathetshelesi tsha ri: “Ri khou humbela uri vhoṱhe vha re na fhulufhelo ḽa u tshila tshoṱhe kha ḽifhasi vha takuwe!” Muṅwe wahashu we a vha e hone kha ḽeneḽo buthano u ri o vhona hu tshi takuwa vhathu vha fhiraho hafu ya vhe vha vha vhe hone. Wahashu Vho Rutherford vha ri: “Vhonani! Gogo ḽihulu!” Nga murahu ha zwenezwo, vhoṱhe vhe vha vha vhe hone vha ṱavha mukosi wa dakalo. Vhe vha vha vho ima vho zwi pfesesa uri Yehova ho ngo vha khetha uri vha ye ṱaḓulu. Vho zwi ḓivha uri a vho ngo ḓodzwa nga muya wa Mudzimu. Nga ḓuvha ḽi tevhelaho kha ḽeneḽo buthano, ho lovhedzwa Ṱhanzi ntswa dza 840 nahone vhunzhi havho vho vha vhe vha dziṅwe nngu.

⁴ Nga murahu ha yeneyo nyambo, uḽa muṱhannga we ra amba nga hae u thomani na vhaṅwe vhanzhi vho mbo ḓi litsha u ḽa vhurotho na u nwa waini Tshilaleloni tsha Murena. Vhanzhi vho ḓipfa u fana na muṅwe wahashu wa tshinnani we a ri: “Ndo guma u ḽa zwiga zwa Tshihumbudzo nga 1935. Ndo zwi pfesesa uri Yehova ho ngo nkhetha nga muya mukhethwa uri ndi ye u tshila ṱaḓulu. Nṱhani hazwo, ndo vha na fhulufhelo ḽa u tshila kha ḽifhasi na u ḽi ita pharadiso.” (Vharoma 8:16, 17; 2 Vhakor. 1:21, 22) Vha gogo ḽihulu vho ya vha tshi engedzea u bva nga tshenetsho tshifhinga nahone vha khou shumisana na vhaḓodzwa vho salaho kha ḽifhasi.

5. Yehova u dzhia hani vho litshaho u ḽa zwiga zwa Tshihumbudzo?

⁵ Yehova u dzhia hani vhe vha litsha u ḽa zwiga zwa Tshihumbudzo nga murahu ha 1935? Zwiṅwe hafhu, Yehova u dzhia hani Ṱhanzi yo lovhedzwaho ya ṋamusi ye ya vha i tshi tenda uri yo tea u ḽa vhurotho na u nwa waini Tshilaleloni tsha Murena, fhedzi nga murahu ya zwi vhona uri a yo ngo ḓodzwa nga muya mukhethwa? (1 Vhakor. 11:28) Vhaṅwe vho ḽa zwiga, zwi tshi itiswa nga u sa pfesesa fhulufhelo ḽavho. Fhedzi arali vha tenda uri vho tou khakha, vha litsha u ḽa nahone vha bvela phanḓa vha tshi shumela Yehova nga u fhulufhedzea, zwi tou pfala uri u ḓo vha ṱanganedza sa tshipiḓa tsha vha dziṅwe nngu. Naho vha sa tsha ḽa vhurotho na u nwa waini, vha kha ḓi ḓa Tshihumbudzoni ngauri vha dzhiela nṱha zwe Yehova na Yesu vha vha itela zwone.

6. Yesu o vhudza vharuṅwa uri vha ite mini?

⁶ Samusi maṱungu mahulu o no sendela tsini-tsini, zwi ḓo ri ṱuṱuwedza u amba nga ha zwiṅwe zwine Nzumbululo ndima ya 7 ya zwi  amba nga ha vhaḓodzwa na nga vha gogo ḽihulu vha re tshipiḓa tsha dziṅwe nngu. Yesu o vhudza vharuṅwa uri vha bvele phanḓa vho fara mimuya miṋa ya u lozwa. A vho ngo tea u litshedza yeneyo mimuya u swika vhaḓodzwa vhoṱhe vho salaho kha ḽifhasi vha tshi swaiwa, zwine zwa amba u swikela Yehova a tshi vhona uri vho fhulufhedzea. (Nzumb. 7:1-4) Vharathu vha Kristo vho ḓodzwaho vho fhulufhedzeaho vha ḓo lambedzwa nga u itwa uri vha vhe mahosi na vhotshifhe ngei ṱaḓulu. (Nzumb. 20:6) Yehova, Yesu na vharuṅwa vha ḓo takala vhukuma musi vha tshi vhona vhaḓodzwa vha 144 000 vha tshi wana malamba avho ngei ṱaḓulu.

7. Kha Nzumbululo 7:9, 10, Yohane u vhona vhafhio nahone vho vha vha tshi khou ita mini? (Sedzani tshifanyiso tshi re kha gwati.)

⁷ Musi Yohane o no amba nga ha eneo mahosi na vhotshifhe vha 144 000, u vhona zwiṅwe zwithu zwi takadzaho. U vhona “gogo ḽihulu” ḽo ponyokaho Haramagedo. Zwenezwo zwigwada zwivhili a zwi fani ngauri vha “gogo ḽihulu” ndi vhanzhi u fhira vha 144 000 nahone a ri ḓivhi uri vha ḓo vha vhe vhangana. (Vhalani Nzumbululo 7:9, 10.) Vho “ambara zwiambaro zwitshena,” zwine zwa sumbedza uri vho ‘dzula vha si na tshika’ dza shango ḽa Saṱhane nahone vho dzula vha tshi fhulufhedzea kha Mudzimu na Kristo. (Yak. 1:27) Vha vhidzelela uri vho tshidzwa nga zwe Yehova na Yesu ane a vha Ngwana ya Mudzimu, vha vha itela zwone. Zwiṅwe hafhu, vho fara matavhi a mitshevho a sumbedzaho uri vho ṱanganedza Yesu sa Khosi yo vhewaho nga Yehova.—Vhambedzani Yohane 12:12, 13.

8. Nzumbululo 7:11, 12 i ri vhudza mini nga ha Yehova, Yesu, vharuṅwa na vhaḓodzwa vho vuswaho?

⁸ Vhalani Nzumbululo 7:11, 12. Ho itea mini musi vha re ṱaḓulu vha tshi vhona vha gogo ḽihulu? Yohane u vhona vhoṱhe ṱaḓulu vho takala na u renda Mudzimu musi vha tshi vhona gogo ḽihulu. Vha re ṱaḓulu vha ḓo takalela u vhona musi ḽeneḽi bono ḽi tshi itea, musi vha gogo ḽihulu vha tshi bva maṱunguni mahulu vha tshi khou tshila.

9. U ya nga Nzumbululo 7:13-15, vha gogo ḽihulu vha khou ita mini zwino?

⁹ Vhalani Nzumbululo 7:13-15. Yohane u amba uri vha gogo ḽihulu “vho ṱanzwa zwiambaro zwavho vha zwi tshenisa nga malofha a Ngwana.” Zwenezwo zwi amba uri vha na luvalo lwo kunaho nahone Yehova u a vha takalela. (Yes. 1:18) Ndi Vhakriste vho ḓiṋekedzaho na u lovhedzwa, vha re na lutendo lwo khwaṱhaho kha tshiṱhavhelo tsha Yesu nahone vha na vhushaka havhuḓi na Yehova. (Yoh. 3:36; 1 Pet. 3:21) Ndi ngazwo Mudzimu a tshi vha takalela na u vha tendela vha tshi “mu shumela masiari na vhusiku” fhano kha ḽifhasi. Na zwino vha khou ita mushumo muhulwane wa u huwelela nga ha Muvhuso na u ita vhafunziwa ngauri Muvhuso wa Mudzimu ndi tshithu tsha ndeme khavho.—Mat. 6:33; 24:14; 28:19, 20.

10. Vha gogo ḽihulu vha na vhungoho ha mini nahone vho fhulufhedziswa mini zwine vha ḓo vhona zwi tshi itea?

¹⁰ Vha gogo ḽihulu vhane vha ponyoka maṱungu mahulu vha na vhungoho ha uri Mudzimu u ḓo vha ṱhogomela ngauri “Mudzimu o dzulaho kha khuluṋoni u ḓo vha tsireledza.” Vha dziṅwe nngu vha ḓo vhona hu tshi itea nga vhuḓalo zwe vha fhulufhedziswa na u zwi lindela nga maṱo matswuku. Zwe vha fhulufhedziswa ndi hezwi: “[Mudzimu] u ḓo phumula miṱodzi yoṱhe maṱoni avho, lufu a lu tsha ḓo vha hone, u ṱungufhala, u lila na vhuṱungu a zwi tsha ḓo vha hone.”—Nzumb. 21:3, 4.

11-12. (a) Nzumbululo 7:16, 17 i ri ndi phaṱhutshedzo dzifhio dzine vha gogo ḽihulu vha ḓo dzi wana tshifhingani tshi ḓaho? (b) Vha dziṅwe nngu vha nga ita mini Tshihumbudzoni nahone vha ṱuṱuwedzwa nga mini?

¹¹ Vhalani Nzumbululo 7:16, 17. Ano maḓuvha vhaṅwe vha vhathu vha Yehova vha na nḓala nga nṱhani ha uri a vha na tshelede yo  eḓanaho ya u renga zwiḽiwa kana nga nṱhani ha thaidzo dzo bveledzwaho nga nndwa. Vhaṅwe vho valelwa dzhele nga nṱhani ha lutendo lwavho. Naho zwo ralo, vha gogo ḽihulu vho takala vhukuma ngauri vha a zwi ḓivha uri musi vho no ponyoka hu tshi fheliswa ḽino shango, vha ḓo dzula vhe na zwiḽiwa zwinzhi nahone vha ḓo dzula vha tshi funzwa nga Yehova. Musi Yehova a tshi fhelisa shango ḽivhi ḽa Saṱhane, u ḓo ita vhungoho ha uri vhathu vhawe vha si welwe nga mbiti dzawe dzine dza nga ‘mufhiso wa ḓuvha.’ Musi maṱungu mahulu o no fhela, Yesu u ḓo isa vhenevha vho ponyokaho kha ḽifhasi kha “maḓi a vhutshilo [vhu sa fheli].” Humbulani uri vha gogo ḽihulu vha na fhulufhelo ḽavhuḓi lungafhani! Kha vhathu vhoṱhe vhe vha vhuya vha tshila, zwi nga itea uri vha gogo ḽihulu vha si fe!—Yoh. 11:26.

¹² Vha dziṅwe nngu vha na fhulufhelo ḽavhuḓi ḽine vha tea u ḽi livhuwa kha Yehova na Yesu nge vha vha ṋea ḽone. Naho Yehova a songo vha khetha uri vha dzule ṱaḓulu, u a vha funa u fana na vhaḓodzwa. Vhaḓodzwa na vha dziṅwe nngu vha nga renda Mudzimu na Kristo. Iṅwe nḓila ine vha nga zwi ita ngayo ndi nga u vha hone Tshilaleloni tsha Murena.

13-14. Ndi ngani vhaḓodzwa vhane vha kha ḓi vha kha ḽifhasi na vha dziṅwe nngu vha tshi tea u ya Tshihumbudzoni?

¹³ Ano maḓuvha, vhane vha ḽa vhurotho na u nwa waini Tshihumbudzoni ndi vhaṱukusa kha vhane vha vha vhe hone Tshihumbudzoni. Zwivhidzoni zwinzhi hu vha hu si na na muthihi ane a ḽa vhurotho na u nwa waini Tshihumbudzoni. Vhunzhi ha vhane vha vha hone Tshihumbudzoni vha na fhulufhelo ḽa u tshila kha ḽifhasi. Zwino ndi ngani vha tshi ya Tshilaleloni tsha Murena? Ri nga vha fanyisa na vhathu vhane vha ya munyanyani wa khonani yavho. Vha ya munyanyani u itela u sumbedza vhane vha khou vhingana uri vha a vha funa na u vha tikedza. Nga zwenezwo, vha dziṅwe nngu vha ya Tshihumbudzoni ngauri vha khou ṱoḓa u sumbedza uri vha a funa na u tikedza Kristo na vhaḓodzwa. Zwiṅwe zwine zwa ita uri vha dziṅwe nngu vha ye Tshihumbudzoni ndi u itela u sumbedza u livhuwa tshiṱhavhelo tsha Yesu tshine tsha ita uri zwi konadzee uri vha tshile tshoṱhe kha ḽifhasi.

¹⁴ Zwiṅwe zwi itaho uri vha dziṅwe nngu vha vhe hone Tshihumbudzoni ndi u itela u  tevhedza zwe Yesu a vha laya. Musi Yesu a tshi ita Tshilalelo tsha Murena tsha u tou thoma na vhaapostola vhawe vha fhulufhedzeaho, o vha vhudza uri: “Dzulani ni tshi ita zwenezwi u itela u nkhumbula.” (1 Vhakor. 11:23-26) Nga zwenezwo, arali vhaḓodzwa vha tshi kha ḓi vha hone kha ḽifhasi, vha dziṅwe nngu vha ḓo bvela phanḓa vha tshi ya Tshilaleloni tsha Murena. Zwiṅwe hafhu, vha dziṅwe nngu vha ramba vhathu vhoṱhe uri na vhone vha ḓe Tshihumbudzoni.

15. Ri nga ita mini uri ri rende Mudzimu na Kristo Tshihumbudzoni?

¹⁵ Musi ri Tshihumbudzoni, ri wana tshibuli tsha u renda Mudzimu na Kristo nga luimbo na thabelo. Tshiṱoho tsha nyambo ya uno ṅwaha tshi ri: “Dzhielani Nṱha Zwe Mudzimu Na Kristo Vha Ni Itela Zwone!” I ḓo ita uri ri livhuwe Yehova na Yesu nga ho engedzeaho. Nga zwenezwo, musi hu tshi tshimbidzwa zwiga zwa Tshihumbudzo, zwi ḓo ita uri ri humbule nga ha zwine zwenezwo zwiga zwa imela zwone. Zwenezwo zwiga zwi imela muvhili wa Yesu na malofha awe. Ri ḓo humbula nga ha lufuno lwe Yehova a ri sumbedza lwone musi a tshi tendela murwa wawe uri a ri fele uri ri wane vhutshilo. (Mat. 20:28) Muṅwe na muṅwe ane a funa Khotsi ashu wa ṱaḓulu na Murwa wawe u ḓo ṱoḓa u vha hone Tshihumbudzoni.

16. Vhaḓodzwa na vha dziṅwe nngu vha fana nga nḓila dzifhio?

¹⁶ Vhaḓodzwa na vha dziṅwe nngu vha a fana nga dziṅwe nḓila. Yehova ha funi tshiṅwe tshigwada u fhira tshiṅwe. Vhaḓodzwa na vha dziṅwe nngu ndi vha ndeme kha Mudzimu. Vhoṱhe o vha renga nga mutengo muthihi, nga vhutshilo ha Murwa wawe ane a mu funa. Zwenezwi zwigwada zwivhili zwi fhambana fhedzi nga fhulufhelo ḽine zwa vha naḽo. Fhedzi vhoṱhe vhaḓodzwa na vha dziṅwe nngu vha tea u dzula vha tshi fhulufhedzea kha Mudzimu na Kristo. (Ps. 31:23) Ri songo hangwa uri muya wa Mudzimu u nga shuma kha roṱhe nga nḓila i fanaho hu sa londwi uri ri vhaḓodzwa kana vha dziṅwe nngu. Zwi amba uri Yehova u ṋea muṅwe na muṅwe muya wawe zwi tshi ya nga zwine zwa khou ṱoḓea.

17. Vhaḓodzwa vhane vha kha ḓi vha kha ḽifhasi vho lavhelela mini nga maṱo matswuku?

¹⁷ Vhakriste vho ḓodzwaho a vha bebwi vhe na fhulufhelo ḽa u ya ṱaḓulu. Mudzimu u tou vha ṋea ḽeneḽo fhulufhelo. Vha elekanya nga ha fhulufhelo ḽavho, vha rabela nga haḽo na u lindela nga maṱo matswuku u wana malamba avho ṱaḓulu. A vha zwi ḓivhi uri muvhili wa muya une vha ḓo vha nawo ngei ṱaḓulu u ḓo vha u hani. (Vhafil. 3:20, 21; 1 Yoh. 3:2) Fhedzi vho lavhelela u vhona Yehova, Yesu, vharuṅwa  na vhaṅwe vhaḓodzwa na u vha navho Muvhusoni ngei ṱaḓulu.

18. Vha dziṅwe nngu vho lavhelela mini?

¹⁸ Vha dziṅwe nngu vho lavhelela u tshila tshoṱhe kha ḽifhasi. Ndi zwine vhathu vhoṱhe vha zwi tama. (Muh. 3:11) Vho lindela ḓuvha ḽine vha ḓo thusa u ita uri ḽifhasi ḽoṱhe ḽi vhe pharadiso. Vha ri ḽi swika lini ḓuvha ḽine vha ḓo fhaṱa nnḓu dzavho, vha ita dzingade na u vha na mutakalo wavhuḓi na vhana vhavho. (Yes. 65:21-23) Vho lavhelela nga maṱo matswuku u ya fhethu hunzhi kha ḽifhasi, u vhona dzithavha, maḓaka na malwanzhe na u guda nga ha zwithu zwoṱhe zwe Yehova a zwi sika. Fhedzi zwi takadzesaho ndi u ḓivha uri vhukonani havho na Yehova vhu ḓo bvela phanḓa vhu tshi hula na u khwaṱha.

19. Tshihumbudzo tshi ṋea muṅwe na muṅwe tshibuli tsha u ita mini nahone ṋaṅwaha tshi ḓo vha hone lini?

¹⁹ Yehova o ṋea muṅwe na muṅwe wa vhashumeli vhawe vho ḓiṋekedzaho fhulufhelo ḽavhuḓi ḽa vhumatshelo. (Yer. 29:11) Tshihumbudzo tsha lufu lwa Kristo ndi tshifhinga tsho khetheaho tsha uri vhaḓodzwa na vha dziṅwe nngu vha rende Mudzimu na Kristo nga zwe vha ri itela zwone. Zwe vha ita zwi ita uri zwi konadzee uri ri ḓiphiṋe nga vhutshilo vhu sa fheli. Muṱangano wa Tshihumbudzo ndi wa ndeme u fhira miṱangano yoṱhe ine Vhakriste vha vha nayo ṅwaha muṅwe na muṅwe. Uno ṅwaha Tshihumbudzo tshi ḓo vha hone nga Mugivhela wa dzi 27 March 2021 nga madekwana. Vhathu vhanzhi ṋaṅwaha vha ḓo kona u vha hone kha wonoyu muṱangano wa ndeme ngauri vha dzula fhethu hu re na mbofholowo ya vhurabeli. Vhaṅwe vha ḓo ya Tshihumbudzoni naho vha tshi khou pikiswa. Vhaṅwe vha ḓo ita Tshihumbudzo vhe dzhele. U nga ri tshivhidzo tshiṅwe na tshiṅwe, tshigwada na muthu muṅwe na muṅwe a nga ḓiphiṋa nga u vha hone Tshihumbudzoni. Yehova, Yesu, vharuṅwa na vhaḓodzwa vho vuswaho vha ḓo vha vho ṱalela vhe ngei ṱaḓulu!