1-2. (a) Ndi lini hune ra humbulesa nga ha muthu we ra lovhelwa ngae? (b) Yesu o ita mini vhusiku he a fa ngaho?

A RI hangwi vhathu vhane ra vha funa vho lovhaho naho hu kale vho lovha. Kanzhi ri vha humbulesa nga ḓuvha ḽe vha lovha ngaḽo.

² Ṅwaha muṅwe na muṅwe, riṋe na vhaṅwe vha dzimiḽioni ri a kuvhangana u itela u humbula lufu lwa Yesu Kristo ane ra mu funa. (1 Pet. 1:8) Ri vha ri tshi khou humbula lufu lwa muthu we a ri fela uri a ri rengulule kha tshivhi na lufu. (Mat. 20:28) Zwavhuḓivhuḓi, Yesu o vha a tshi khou ṱoḓa vhatevheli vhawe vha tshi humbula lufu lwawe. Vhusiku he Yesu a fa ngaho, o ita tshilalelo na vhafunziwa vhawe nahone a vha vhudza uri: “Dzulani ni tshi ita zwenezwi u itela u nkhumbula.” *—Luka 22:19.

3. Ri ḓo amba nga ha mini kha ino thero?

³ Kha vhathu vhane vha ḓa Tshihumbudzoni tsha lufu lwa Kristo ṅwaha muṅwe na muṅwe, a si vhanzhi vhane vha vha na fhulufhelo ḽa u tshila ṱaḓulu. Vhunzhi ha vhane vha ḓa ndi vhane vha vha na fhulufhelo ḽa u tshila kha ḽifhasi. Kha ino thero, ri ḓo vhona uri ndi ngani vha re na fhulufhelo ḽa u tshila ṱaḓulu na vha re na fhulufhelo ḽa u tshila kha ḽifhasi vha tshi ya Tshihumbudzoni ṅwaha muṅwe na muṅwe. Ri ḓo dovha ra  vhona uri ri vhuyelwa nga mini musi ri tshi ya Tshihumbudzoni. Kha ri thome nga u vhona uri ndi ngani vho ḓodzwaho vha tshi ya Tshihumbudzoni.

4. Ndi ngani vhaḓodzwa vha tshi ḽa vhurotho na u nwa waini Tshihumbudzoni?

⁴ Vhaḓodzwa vha a ḽa vhurotho na u nwa waini Tshihumbudzoni ṅwaha muṅwe na muṅwe. Ndi ngani vha tshi ḽa vhurotho na u nwa waini? U itela u fhindula yeneyo mbudziso, kha ri ambe nga ha zwe zwa itea vhusiku he Yesu a fa ngaho. Musi Yesu na vhafunziwa vhawe vho no ḽa Paseka, o thoma Tshilalelo tsha Murena. O ṋea vhaapostola vhawe vha 11 vha fhulufhedzeaho vhurotho na waini, a vha vhudza uri vha ḽe na u nwa. Yesu o amba navho nga ha milanga mivhili, ine ya vha mulanga muswa na mulanga wa Muvhuso. * (Luka 22:19, 20, 28-30) Yeneyi milanga yo ita uri vhaapostola vhawe na vhaṅwe vha kone u vha mahosi na vhotshifhe ṱaḓulu. (Nzumb. 5:10; 14:1) Vhaḓodzwa vhane vha kha ḓi vha kha ḽifhasi ndi vhone vhane vha ḽa vhurotho na u nwa waini Tshihumbudzoni.

5. Vhaḓodzwa vha ḓivha mini nga ha fhulufhelo ḽavho?

⁵ Zwiṅwe zwine zwa ita uri vhaḓodzwa vha ye Tshihumbudzoni ndi ngauri vha wana tshibuli tsha u humbulisisa nga ha fhulufhelo ḽine vha vha naḽo. Yehova o vha ṋea fhulufhelo ḽavhuḓi ḽa uri a vha tsha ḓo dovha vha fa na uri vha ḓo tshila ṱaḓulu nga hu sa fheli, vha vhusa na Yesu Kristo o vuswaho na vhaṅwe vhaḓodzwa. Tsha ndeme vhukuma, vha ḓo vha vhe na Yehova. (1 Vhakor. 15:51-53; 1 Yoh. 3:2) Vhaḓodzwa vha a zwi ḓivha uri vha ḓo ḓiphiṋa nga yeneyo ndugelo vhe ṱaḓulu. Fhedzi vha tea u dzula vha tshi fhulufhedzea u swikela vha tshi lovha uri vha kone u ya ṱaḓulu. (2 Tim. 4:7, 8) Vha a takala musi vha tshi humbula nga ha fhulufhelo ḽavho. (Tito 2:13) Hu pfi mini nga vha “dziṅwe nngu”? (Yoh. 10:16) Ndi ngani vha tshi ya Tshihumbudzoni?

6. Ndi ngani vha dziṅwe nngu vha tshi ya Tshihumbudzoni ṅwaha muṅwe na muṅwe?

⁶ Vha dziṅwe nngu vha a ya Tshihumbudzoni, fhedzi a vha ḽi vhurotho kana u nwa waini. Nga 1938, vhane vha vha na fhulufhelo ḽa u tshila kha ḽifhasi vho vhidziwa uri vha ḓe Tshihumbudzoni lwa u tou thoma. Tshiingamo tsha Tshiisimane tsha 1 March 1938 tsho ri: “Zwi ḓo vha zwo tea uri vha [dziṅwe nngu] vha vhe hone Tshihumbudzoni na u vhona zwine zwa itea henefho.  . . Na vhone vha tea u ḓiphiṋa nga Tshihumbudzo.” U fana na vhathu vhane vha rambiwa munyanyani, na vha dziṅwe nngu vha a ya Tshihumbudzoni naho vha sa ḽi vhurotho na u nwa waini.

7. Ndi ngani vha dziṅwe nngu vha tshi lavhelela nga maṱo matswuku nyambo ya Tshihumbudzo?

⁷ Vha dziṅwe nngu na vhone vha a humbulisisa nga ha fhulufhelo ḽine vha vha naḽo. Vha lavhelela nga maṱo matswuku u pfa nyambo ya Tshihumbudzo ngauri i vha i tshi khou ambesa nga ha zwine Yesu na vha 144 000 vha ḓo vha itela zwone musi vha tshi khou vhusa lwa Miṅwaha ya Tshigidi. Vha tshi livhiswa nga Khosi yavho Yesu Kristo, vha 144 000 vha ḓo thusa kha u ita uri ḽifhasi ḽi  vhe pharadiso na u ita uri vhathu vha si tsha vha na tshivhi. Vha dziṅwe nngu vha a takala musi vha tshi humbula uri vhuporofita vhu re kha Yesaya 35:5, 6; 65:21-23 na vhu re kha Nzumbululo 21:3, 4 vhu ḓo itea tshifhingani tshi ḓaho. Musi vha tshi ḓivhona vhe shangoni ḽiswa na mashaka avho, zwi ita uri fhulufhelo ḽavho ḽi dzule ḽo khwaṱha na uri vha si litshe u shumela Yehova.—Mat. 24:13; Vhagal. 6:9.

8. Ndi tshifhio tshiṅwe tshiitisi tshine tsha ita uri vha dziṅwe nngu vha ye Tshihumbudzoni?

⁸ Kha ri ambe nga ha tshiṅwe tshiitisi tshine tsha ita uri vha dziṅwe nngu vha ye Tshihumbudzoni. Vha vha vha tshi khou sumbedza uri vha funa vhaḓodzwa na u vha tikedza. Ipfi ḽa Mudzimu ḽo dzula ḽo amba uri vhaḓodzwa na vha dziṅwe nngu vho vha vha tshi ḓo shuma vhoṱhe nga vhuthihi. Zwo vha zwi tshi ḓo itea hani? Kha ri ambe nga hazwo.

9. Vhuporofita vhu re kha Sakaria 8:23 vhu sumbedza hani nḓila ine vha dziṅwe nngu vha ḓipfa ngayo nga ha vhaḓodzwa?

⁹ Vhalani Sakaria 8:23. Honovhu vhuporofita vhu sumbedza nḓila ine vha dziṅwe nngu vha ḓipfa ngayo nga ha vhaḓodzwa. Maipfi “Muyuda” na “inwi” a ambela kha vhaḓodzwa vhane vha kha ḓi vha kha ḽifhasi. (Vharoma 2:28, 29) “Vhathu vha fumi vhane vha bva kha tshaka dza nyambo dzoṱhe” vha imela vha dziṅwe nngu. Vha “fara tshiambaro tsha” vhaḓodzwa, zwine zwa amba u gwadamela Yehova navho nga vhuthihi. Nga zwenezwo, vha dziṅwe nngu vha sumbedza uri vha na vhuthihi na vhaḓodzwa nga u vha hone Tshihumbudzoni.

10. Yehova o ita hani uri vhuporofita vhu re kha Hesekiele 37:15-19, 24, 25 vhu itee?

¹⁰ Vhalani Hesekiele 37:15-19, 24, 25. Honovhu vhuporofita ho itea musi Yehova a tshi ita uri vhaḓodzwa na vha dziṅwe nngu vha shume vhoṱhe nga vhuthihi. Vhu amba nga ha thanda mbili. Vhaḓodzwa vha nga thanda “ya Yuda” (lushaka lwe Yehova a vha a tshi khetha khosi dza Isiraele khalwo) nahone vhane vha vha na fhulufhelo ḽa u tshila kha ḽifhasi vha nga thanda “ya Efuraimi.” * Yehova o vha a tshi ḓo ita uri dzenedzo thanda mbili dzi vhe “thanda nthihi.” Zwenezwo zwi amba uri vha shuma nga vhuthihi vha tshi khou vhuswa nga Khosi nthihi, Yesu Kristo. Ṅwaha muṅwe na muṅwe vhaḓodzwa na vha dziṅwe nngu vha ya Tshihumbudzoni vhe na vhuthihi sa “sambi ḽithihi” ḽi re na “mulisa muthihi.”—Yoh. 10:16.

11. “Nngu” dze dza ambiwa kha Mateo 25:31-36, 40 dzi tikedza hani vharathu vha Kristo?

¹¹ Vhalani Mateo 25:31-36, 40. “Nngu” dze Yesu a amba nga hadzo kha tshenetshi tshifanyiso ndi vha dziṅwe nngu vhane vha vha na fhulufhelo ḽa u tshila kha ḽifhasi. Vha tikedza vharathu vha Kristo vho ḓodzwaho kha u ita mushumo muhulwane we vha ṋewa wone wa u huwelela na u ita vhafunziwa shangoni ḽoṱhe.—Mat. 24:14; 28:19, 20.

12-13. Vha dziṅwe nngu vha tikedza vharathu vha Kristo nga dzifhio dziṅwe nḓila?

¹² Ṅwaha muṅwe na muṅwe vha dziṅwe nngu vha tikedza vharathu vha Kristo nga u bva fulo ḽa u ramba vhathu vhane vha takalela uri vha ḓe Tshihumbudzoni musi hu tshee ho sala dzivhege uri Tshihumbudzo tshi vhe hone. (Vhalani bogisi “ Naa Ni Khou Ḓilugiselela Tshihumbudzo?”) Vha dovha vha thusa kha u dzudzanya uri hu vhe na Tshihumbudzo  kha zwivhidzo zwoṱhe u mona na ḽifhasi ḽoṱhe, naho kha zwivhidzo zwinzhi hu sa vhi na vhane vha ḽa Tshihumbudzoni. Zwi a vha takadza u thusa vharathu vha Kristo nga dzenedzi nḓila. Vha dziṅwe nngu vha a zwi ḓivha uri zwine vha itela vhaḓodzwa, vha khou zwi itela Yesu.—Mat. 25:37-40.

¹³ Ndi zwifhio zwiṅwe zwiitisi zwine zwa ita uri roṱhe ri ḓe Tshihumbudzoni hu sa londwi uri ri na fhulufhelo ḽifhio?

14. Yehova na Yesu vho sumbedza hani uri vha a ri funa?

¹⁴ Roṱhe ri ya Tshihumbudzoni ngauri ri vha ri tshi khou livhuwa Yehova na Yesu nge vha ri funa. Yehova o no ri sumbedza nga nḓila nnzhi uri u a ri funa. Nḓila khulwanesa ye a ri sumbedza ngayo uri u a ri funa, ndi musi a tshi rumela Murwa wawe uri a ḓe a tambule na u ri fela. (Yoh. 3:16) Na Yesu o sumbedza uri u a ri funa nge a ḓiimisela u ri fela. (Yoh. 15:13) Ri nga si kone u lifha zwoṱhe zwe Yehova na Yesu vha ri itela zwone. Fhedzi ri nga sumbedza uri ri a zwi livhuwa nga nḓila ine ra tshila ngayo. (Vhakol. 3:15) Ri ya Tshihumbudzoni ngauri ri vha ri tshi khou ṱoḓa u humbulisisa nga ha nḓila ine vha ri funa ngayo na u vha sumbedza uri ri a vha funa.

15. Ndi ngani vhaḓodzwa na vha dziṅwe nngu vha tshi dzhiela nṱha tshirengululi?

¹⁵ Ri ya Tshihumbudzoni ngauri ri dzhiela nṱha tshirengululi. (Mat. 20:28) Vhaḓodzwa vha dzhiela nṱha tshirengululi ngauri ndi tshone tshine tsha ita uri vha vhe na fhulufhelo ḽine vha vha naḽo. Tshenetshi tshirengululi tshi ita uri Yehova a vha dzhie sa vho lugaho na u vha dzhia sa vhana vhawe. (Vharoma 5:1; 8:15-17, 23) Na vha dziṅwe nngu vha dzhiela nṱha tshirengululi. Tshenetshi tshirengululi tshi ita uri vha kone u vha na vhushaka havhuḓi na Yehova, vha mu shumele na u vha na fhulufhelo ḽa u “bva maṱunguni mahulu.” (Nzumb. 7:13-15) Iṅwe nḓila ine vhaḓodzwa na vha dziṅwe nngu vha sumbedza ngayo uri vha dzhiela nṱha tshirengululi, ndi nga u ḓa Tshihumbudzoni ṅwaha muṅwe na muṅwe.

16. Ndi tshifhio tshiṅwe tshiitisi tshine tsha ita uri ri ye Tshihumbudzoni?

¹⁶ Ri dovha ra ya Tshihumbudzoni ngauri ri ṱoḓa u thetshelesa Yesu. Hu sa londwi uri ri na fhulufhelo ḽifhio, muṅwe na muṅwe washu u ṱoḓa u ita zwe Yesu a zwi amba nga vhusiku he a thoma ngaho Tshihumbudzo. O ri: “Dzulani ni tshi ita zwenezwi u itela u nkhumbula.”—1 Vhakor. 11:23, 24.

17. Tshihumbudzo tshi ri thusa hani u sendela tsini na Yehova?

¹⁷ Ri sendela tsini na Yehova. (Yak. 4:8) Samusi ro no zwi guda, Tshihumbudzo tshi ri thusa uri ri humbule nga ha fhulufhelo ḽine ra vha naḽo na u elekanya nga ha nḓila ine Yehova a ri funa ngayo. (Yer. 29:11; 1 Yoh. 4:8-10) Musi ri tshi humbulisisa nga ha fhulufhelo ḽine ra vha naḽo na nḓila ine Yehova a ri funa ngayo, ri vha na vhushaka ho khwaṱhaho na Yehova.—Vharoma 8:38, 39.

18. U elekanya nga ha tsumbo ya Yesu zwi ri ṱuṱuwedza uri ri ite mini?

¹⁸ U ya Tshihumbudzoni zwi ita uri ri edzise Yesu. (1 Pet. 2:21) Musi ho sala maḓuvha a si gathi uri ri ye Tshihumbudzoni, ri vhala nga ha zwe zwa itea kha Yesu musi a sa athu u vhulawa, musi a tshi vhulawa na musi a tshi vuswa. Nga ḓuvha ḽa Tshihumbudzo nga madekwana, hu vha na nyambo ine ya ri  humbudza nḓila ine Yesu a ri funa ngayo. (Vhaef. 5:2; 1 Yoh. 3:16) Musi ri tshi vhala mafhungo a Yesu na u elekanya nga hao, ri ṱuṱuwedzea u “dzula [ri] tshi tshila u fana nae.”—1 Yoh. 2:6.

19. Ri nga dzula hani ri khonani ya Mudzimu?

¹⁹ U ya Tshihumbudzoni zwi ita uri ri ḓiimisele u dzula ri khonani ya Mudzimu. (Yuda 20, 21) Ri ita uri Mudzimu a ri fune nga u mu thetshelesa, nga u ita uri dzina ḽawe ḽi khethwe na nga u mu takadza. (Mir. 27:11; Mat. 6:9; 1 Yoh. 5:3) U ya Tshihumbudzoni zwi ri ṱuṱuwedza uri ri tshile nga nḓila ine ra tou nga ri khou vhudza Yehova uri: ‘Ndi ṱoḓa u u takadza tshifhinga tshoṱhe!’

20. Ndi zwifhio zwiitisi zwi pfalaho zwine ra vha nazwo zwa u ya Tshihumbudzoni?

²⁰ Hu sa londwi uri ri na fhulufhelo ḽifhio, ri na zwiitisi zwi pfalaho zwa u ya Tshihumbudzoni. Musi ri tshi ya Tshihumbudzoni ṅwaha muṅwe na muṅwe, ri vha ri tshi khou humbula lufu lwa Yesu Kristo ane ra mu funa. Tsha ndeme vhukuma ri vha ri tshi khou humbula nḓila ine Yehova a ri funa ngayo musi a tshi rumela Murwa wawe uri a vhe tshirengululi. Ṋaṅwaha Tshihumbudzo tshi ḓo vha nga Ḽavhuṱanu nga madekwana, nga dzi 15 April 2022. Ri funa Yehova na Murwa wawe. Nga zwenezwo, a hu na tshithu tsha ndeme tshi fhiraho u vha hone Tshihumbudzoni.